Te Matalelei ʼo Te ʼu Meʼa ʼAē Neʼe Fakatupu e Sehova

“Ko Te ʼu Fuʼu ʼAkau ʼa Sehova Kua Nātou Makokona”

NEʼE kua koutou ʼolo koa ki he vao matuʼa ʼo sioʼi te hū ʼo te laʼā ʼi te ʼu fuʼu ʼakau lalahi? Neʼe koutou logo koa ki te agiagi ʼo te matagi ʼi te ʼu lau?​—Isaia 7⁠:⁠2.

ʼI ʼihi ʼu potu ʼo te kele, lolotoga ʼihi māhina ʼo te taʼu, ko te lau ʼo te ʼu fuʼu ʼakau kehekehe ʼe nātou liliu ʼo kula, mo legalega momoho, mo legalega, pea mo te tahi ʼu lanu. ʼE hage ʼe vela te vao ʼakau. ʼE ʼalutahi te faʼahi ʼaia mo te ʼu palalau ʼaenī: “Koutou fakafiafia ʼu moʼuga, ʼaki he ʼu kalaga fakafiafia, mo koutou ʼu vao matuʼa pea mo koutou ʼu fuʼu ʼakau fuli ʼi ai!”​—Isaia 44⁠:23.a

Ko te teitei vahe e tahi ʼi te tolu ʼo te kele ʼe ko te vao matuʼa. ʼI hona ʼaluʼaga fakatalakitupua, ko te vao matuʼa pea mo te ʼu meʼa ʼaē ʼe maʼuʼuli ai ʼe nātou faka kolōliaʼi tonatou Tupuʼaga, ia Sehova ʼAtua. ʼAki te takitaki ʼo te laumālie maʼoniʼoni, neʼe hiva fēnei te tagata fai pesalemo: “Koutou fakavikiviki, . . . ʼu fuʼu ʼakau ʼaē ʼe maʼu tonatou ʼu fua pea mo te ʼu fuʼu sita fuli.”​—Pesalemo 148⁠:​7-9.

ʼE ʼui fēnei e te tohi The Trees Around Us: “ ʼE maʼuhiga te ʼu fuʼu ʼakau ki te maʼuli ʼo te tagata, ki tonatou maʼuli fakasino pea mo fakamataleleiʼi.” Ko te ʼu vao matuʼa ʼe nātou puipui, mo taupau pea mo foaki lahi ki te malamanei te vai. Tahi ʼaē meʼa, ko te ʼu fuʼu ʼakau ʼe nātou fakamaʼa te ʼaele. ʼAki te fakatuʼutuʼu ʼaē ʼe higoa ko te photosynthèse, ko te ʼu lau ʼe nātou fakaʼaogaʼi te kasa ʼaē ko te dioxyde de carbone, mo te vai, mo te ʼu eveeve ʼo te kele, pea mo te mālama ʼo te laʼā, ʼo nātou faʼu ʼaki he ʼu meʼa ʼe ʼaoga ki te ʼu fuʼu ʼakau ke nātou homo ake pea mo nātou faʼu mo te kasa ʼaē ʼe tou mānava kiai.

Ko te vao matuʼa ʼe ko he mātaga matalelei ʼaupito. ʼI te agamāhani, ʼi te ʼu vao matuʼa, ʼe ko te ʼu fuʼu ʼakau lalahi ʼaē ʼe fakaofoofo tāfito. ʼI te ʼu fuʼu ʼakau lalahi ʼaia, ʼe homo ake mo te ʼu maile maga, mo te limu, mo te vao, mo te ʼu kiʼi fuʼu ʼakau liliki, pea mo te ʼu fisiʼi teu. ʼE feala ke maʼuli tahi te ʼu ʼakau ʼaia mo te ʼu fuʼu ʼakau lalahi, ʼo nātou hohomo ake ʼi te malūmalū ʼo te ʼu fuʼu ʼakau, pea mo nātou fakaʼaogaʼi te vai ʼaē ʼe foaki e te vao matuʼa.

ʼI ʼihi vao matuʼa, ʼe lau ko te ʼu lauʼi hogofulu miliona ʼu lauʼakau ʼaē ʼe tō ʼi te eketa e tahi ʼi te fakaʼosi taʼu. Koteā ʼaē ʼe hoko ki te ʼu lau ʼaia? Ko te ʼu kiʼi manu liliki, mo te ʼu champignons, mo te ʼu ʼunufe, pea mo te tahi ʼu meʼa maʼuli, ʼe nātou fakaliliu te ʼu lau ʼaia ko te limu, ʼaē ʼe hage ko he meʼa fakagako kele. ʼE moʼoni, ʼe mole he meʼa ʼe maumau, heʼe ko te ʼu meʼa maʼuli ʼaia ʼe nātou teuteuʼi te kele ke homo ake te tahi ʼu ʼakau foʼou.

ʼI te ʼu lalo lauʼakau, ʼe lahi ai te ʼu meʼa maʼuli ʼi te kele. Ohage ko tona ʼui e te tohi The Forest, “ko te ʼu kiʼi meʼa maʼuli e 1 350 . . . ʼe feala ke tou maʼu ʼi he meta kale e 30 pea ʼi te loto kele, ia satimeta e 2 vaelua, kae ʼe mole lau ai te ʼu kiʼi meʼa liliki ʼaupito ʼi te kele ʼaē ʼe mole feala ke tou sio kiai.” Tahi ʼaē meʼa, ʼe maʼu ʼi te vao matuʼa te ʼu manu ʼaē ʼe totolo, te ʼu manu lele, te ʼu kiʼi manu liliki, pea mo te ʼu manu lalahi. Ko ai ʼaē ʼe tonu ke vikiʼi ʼuhi ko te ʼu meʼa matalelei pea mo kehekehe ʼaia? ʼE tala fēnei e totatou Tupuʼaga: “Ko te ʼu manu fekai fuli ʼo te vao matuʼa ʼe ʼaʼaku, te ʼu faga manu ʼi te ʼu moʼuga ʼe lauʼi teau afe.”​—Pesalemo 50⁠:⁠10.

Neʼe fakatupu ʼihi manu ʼaki te fealagia ʼaē ke nātou momoe ʼi te temi momoko, pea mo nātou maʼuʼuli ʼi te temi kovi ʼaia ka mole nātou kakai lolotoga he temi. Kae ʼe mole ko te ʼu manu fuli ʼaē ʼe nātou fai te faʼahi ʼaia ʼi te temi momoko. ʼI te vaelua ʼo te fasiga taʼu momoko, ʼe feala ke koutou sio ki te feleleʼaki ʼa te ʼu tia. ʼE mole momoe te ʼu tia ʼi te temi momoko peʼe nātou tānaki he meʼa kai, kae ʼe nātou kumi, ʼo nātou kai te ʼu kiʼi vaʼa pea mo te ʼu moto, ohage ko te meʼa ʼaē ʼe feala ke koutou sio kiai ʼi te paki ʼaenī mai Siamani.

ʼE lahi te talanoa ʼa te Tohi-Tapu ʼo ʼuhiga mo te maʼuli ʼo te ʼu ʼakau. ʼE lau ko te Tohi-Tapu ʼe talanoa kia teitei ʼakau kehekehe e 130, ʼo kau kiai te ʼu faʼahiga fuʼu ʼakau e 30. ʼO ʼuhiga mo te faʼahi maʼuhiga ʼaia, ʼe ʼui fēnei e Michael Zohary, te tagata ʼe ina fai te ʼu kumi ʼo ʼuhiga mo te ʼu fuʼu ʼakau: “Māʼiape la ʼi he tohi māhani, ʼe mole maʼu e he tahi he ʼu tuʼuga talanoa feiā ki he ʼu ʼakau ʼe pipiki ki te ʼu faʼahi kehekehe ʼo te maʼuli, ohage ko tona tuʼu ʼi te Tohi-Tapu.”

Ko te ʼu fuʼu ʼakau pea mo te ʼu vao matuʼa ʼe ko he ʼu meʼa ʼofa matalelei mai te Tupuʼaga ʼofa. Kapau ʼe tou ʼolo ki he vao matuʼa, pea ʼe mahino papau ia ʼe tou manatu tahi anai mo te ʼu palalau neʼe fai e te tagata fai pesalemo: “Ko te ʼu fuʼu ʼakau ʼa Sehova kua nātou makokona, te ʼu sita ʼo Lipani ʼaē neʼe ina to, ʼaē ʼe faʼu ai e te ʼu manulele tonatou fātaʼi.”​—Pesalemo 104⁠:​16, 17.

[Kiʼi nota]

[Talanoa ʼo te pasina 9]

Ko te tahi ʼi te ʼu fuʼu ʼakau ʼaē ʼe matalelei ʼi te fenua Alape, ʼe ko te fuʼu alimoni. ʼO mole hage ko te ʼu fuʼu ʼakau ʼaē, ko te ʼu mukoʼi alimoni ʼe hohomo ake ʼi te kamata pe ʼo te taʼu. Ko te kau Hepeleo ʼo te temi muʼa neʼe nātou fakahigoaʼi te fuʼu alimoni, ko te fuʼu ʼakau ʼaē ʼe ʼala ake, ʼuhi ko tana ʼuluaki homo ake. ʼE hage ʼe ʼala ake te fuʼu ʼakau ʼaia ʼuhi ko tona ʼu tuʼuga muko ʼaē e lanu huʼalisi peʼe hina.​—Tagata Tānaki 12⁠:⁠5.

ʼI te ʼu faʼahiga manulele e 9 000 ʼaē kua ʼiloʼi e te tagata, ko manu ʼe teitei 5 000 ʼe nātou hiva. ʼI te ʼu vao matuʼa ʼaē ʼe mole ʼi ai he logoaʼa, ʼe tou logo ai ki tanatou hiva. (Pesalemo 104⁠:12) Ohage ko te moineau ʼe logo lelei tana hiva. Ko te ʼu fauvettes, ohage ko tona tuʼu ʼi te paki, ʼe ko he ʼu kiʼi manulele ʼe hiva, pea ko tonatou ʼu fuluʼi kapakau ʼe lanu nefunefu, mo legalega pea mo fuluʼi hega.​—Pesalemo 148⁠:​1, 10.

[Paki ʼo te pasina 9]

Te vao matuʼa ʼi Normandie, ʼi Falani