E Feafeaʼi Hatatou Fakahā Totatou ʼOfa Ki Te ʼAtua?
KO TE ʼofa ʼaē kia Sehova ʼe mole faka ʼuhiga pe ke kita ʼiloʼi ia ia. ʼE lava fakamoʼoni e te ʼu kaugana ʼa te ʼAtua ʼi te malamanei, ʼe tuputupu te ʼofa ki te ʼAtua mokā ʼiloʼi e he tahi tona ʼulugaaga, pea ʼe toe mālohi age mokā ina ʼiloʼi lelei te meʼa ʼaē ʼe fia fai kiai, mo te meʼa ʼaē ʼe fehiʼa kiai, pea mo te ʼu meʼa ʼaē ʼe ina leleiʼia pea mo tana ʼu fakamaʼua.
ʼI tona ʼofa, neʼe foaki mai e Sehova tana Folafola, te Tohi-Tapu, ʼaē ʼe ina fakahā mai peʼe ko ai ia ia. ʼI te Tohi-Tapu, ʼe tou ako ai te aga ʼa Sehova ʼi te ʼu ʼaluʼaga kehekehe. Ohage pe ko hatatou fiafia lahi mokā tou maʼu he tohi mai he tahi ʼe tou ʼoʼofa ai, ʼe tou toe maʼu he fiafia lahi ʼaki te Tohi-Tapu heʼe tou maʼu ai te ʼu agaaga foʼou ʼo te ʼulugaaga ʼo Sehova.
Kae ohage ko tatatou sio ʼi ʼihi temi ʼi tatatou fai faka mafola, ko he tahi ʼe ina ako peʼe ko ai te ʼAtua ʼe mole tupu ai leva hana ʼofa kia te ia. Neʼe ʼui fēnei e Sesu ki ʼihi kau Sutea neʼe mole loto fakafetaʼi: “ ʼE koutou vakaʼi lelei te ʼu Tohi, heʼe koutou manatu ʼaki te ʼu tohi ʼaia, ʼe koutou maʼu ai anai te maʼuli heʼegata; . . . kaʼe ʼe ʼau ʼiloʼi lelei ʼe mole ia koutou te ʼofa ki te ʼAtua.” (Soane 5:39, 42, MN ) Ko ʼihi lolotoga ni ʼu taʼu, ʼe nātou ako te ʼu gāue ʼofa ʼaē neʼe fai e Sehova kae ʼe mole lahi hanatou ʼofa kia te ia. Koteā tona tupuʼaga? Koteʼuhi neʼe mole nātou mahino ki te meʼa ʼaē ʼe tonu ke nātou fai ʼaki te ʼu moʼoni ʼaē neʼe nātou ako. Kae ko te ʼu lauʼi miliona hahaʼi fakamalotoloto ʼaē ʼe tou ako mo nātou te Tohi-Tapu, ʼe tuputupu tonatou ʼofa ki te ʼAtua. Koteā tona tupuʼaga? Heʼe ohage pe ko tatou, ʼe nātou mulimuli ki te faʼifaʼitaki ʼo Asafe. Koteā ʼaē neʼe fai e Asafe?
Tou Metitasio ʼAki He Loto Fakafetaʼi
Neʼe loto ia Asafe ke ina fakatuputupu ʼi tona loto te ʼofa ʼaē kia Sehova. Neʼe ina tohi fēnei: “ ʼAki toku loto ʼe ʼau hoha anai . . . ʼE ʼau manatuʼi anai te ʼu gāue ʼa Sah; heʼe ʼau manatuʼi anai tau ʼu gāue fakaofoofo ʼaē neʼe ke fai ki muʼa atu. Ei, ʼe ʼau metitasio anai ki tau ʼu gāue fuli, pea ʼe ʼau tokagaʼi anai tau ʼu faʼahiga aga.” (Pesalemo 77:6, 11, 12) Ko te ʼofa ki te ʼAtua ʼe tuputupu anai ʼi te loto ʼo he tahi ʼe ina fakakaukauʼi te ʼu aga ʼa Sehova ohage ko tona fai e te tagata fai pesalemo.
Tahi ʼaē meʼa, ko te toe manatuʼi ʼo te ʼu ʼaluʼaga ʼaē neʼe tou fiafia ai ʼi te tauhi kia Sehova, ʼe fakamālohi ai tatatou ʼu felogoi mo ia. Neʼe ʼui e te ʼapositolo ko Paulo ko tatou ko he ʼu “kauga gaue” ʼo te ʼAtua, pea ʼe makehe ʼaupito te fakakaumeʼa ʼaē ʼe feala ke tuputupu ʼi he ʼu kaugā gāue. (1 Kolonito 3:9) Ka tou fakahā totatou ʼofa kia Sehova, ʼe ina leleiʼia ʼaupito pea ʼe fiafia ai tona loto. (Tāʼaga Lea 27:11) Pea ka tou kole te tokoni ʼa Sehova pea ke ina takitaki tatou ʼi te ʼu faigataʼaʼia, ʼe tou ʼiloʼi ʼe nofo mo tatou, pea ʼe loloto ai totatou ʼofa kia te ia.
ʼE tuputupu te fakakaumeʼa ʼa he toko lua mokā nā fefakahāʼaki tanā ʼu manatu. ʼO toe feiā pe, ka tou ʼui kia Sehova te tupuʼaga ʼo tatatou agatonu kia te ia, pea ʼe toe mālohi ai totatou ʼofa kia te ia. ʼE tou maʼuliʼi ai te ʼu palalau ʼaenī neʼe fai e Sesu: “ ʼE tonu ke ke ʼofa kia Sehova tou ʼAtua ʼaki tou loto katoa pea mo tou nefesi katoa pea mo tou laumālie katoa pea mo tou mālohi katoa.” (Maleko 12:30, MN ) Koteā ʼaē ʼe feala ke tou fai ke tou ʼiloʼi papau ai ʼe tou haga ʼofa anai kia Sehova ʼaki totatou loto katoa, mo totatou nefesi katoa, mo totatou ʼatamai katoa, pea mo totatou mālohi katoa?
Tou ʼOfa Kia Sehova ʼAki Totatou Loto Katoa
Ko te loto ʼaē ʼe talanoa kiai te Tohi-Tapu ʼe ko totatou ʼuhiga ʼaē ʼi loto—totatou ʼu holi, mo tatatou ʼu aga pea mo te ʼu meʼa ʼaē ʼe tou logoʼi. Koia ko te ʼofa kia Sehova ʼaki totatou loto katoa ko tona faka ʼuhiga ko te meʼa maʼuhiga ʼaē ʼe tou loto tāfito kiai, ʼe ko te fakafiafia ʼo te ʼAtua. (Pesalemo 86:11) ʼE tou fakahā ʼe tou maʼu te ʼofa ʼaia mo kapau ʼe tou faiga ke ina leleiʼia totatou ʼulugaaga. ʼE tou faiga ke tou faʼifaʼitakiʼi te ʼAtua ʼo tou ‘fehiʼa ki te meʼa ʼaē ʼe kovi, pea mo tou pipiki ki te meʼa ʼaē ʼe lelei.’—Loma 12:9.
Ko totatou ʼofa ki te ʼAtua ʼe malave ki te ʼu meʼa fuli ʼaē ʼe tou logoʼi. Ohage la, ʼe lagi tou leleiʼia tatatou gāue peʼe lahi tatatou tokaga kiai, kae ʼe tuʼu ai koa totatou loto? Kailoa. ʼE tou fakamuʼamuʼa totatou ʼuhiga minisi ʼa te ʼAtua, heʼe tou ʼoʼofa kia te ia. Pea ʼe tou fia fakafiafia tatatou ʼu mātuʼa, mo totatou ʼohoana, pea mo totatou patolo, kae ʼe tou fakahā totatou ʼofa kia Sehova ʼaki totatou loto katoa mokā tou faiga tāfito ke tou fakafiafia ia tona loto. ʼE mahino ia ʼe tāu mo ia ke tou fakamuʼamuʼa ia ia ʼi totatou maʼuli.—Mateo 6:24; 10:37.
Tou ʼOfa Kia Sehova ʼAki Totatou Nefesi Katoa
ʼI te Tohi-Tapu, ko te kupu “nefesi” ʼe faka ʼuhiga ʼuluaki ki he tahi, pea mo totatou maʼuli. Koia ko totatou ʼofa kia Sehova ʼaki totatou nefesi katoa, ko tona faka ʼuhiga ʼaē ʼe tou fakaʼaogaʼi totatou maʼuli moʼo fakavikiviki kia te ia pea mo fakamoʼoni ʼe tou ʼofa kia te ia.
ʼE moʼoni ʼe lagi tou fai he tahi ʼu meʼa, ohage ko te ako ʼo he gāue, peʼe ko te fakatuʼu ʼo he matani gāue, peʼe ko te taupau ʼo te famili. Kae ʼe tou toe fakahā totatou ʼofa kia Sehova ʼaki totatou nefesi katoa, mokā tou fai te ʼu meʼa ʼaē ʼe ina fakamaʼua mai ke tou fai, pea mokā ʼe mole tou fakamuʼamuʼa te tahi ʼu meʼa ʼi totatou maʼuli, kae tou “haga kumi muʼa te puleʼaga pea mo tona faitotonu.” (Mateo 6:33, MN ) Ko tatatou tauhi ʼaki totatou nefesi katoa ʼe toe faka ʼuhiga ke tou faʼafai. ʼE tou fakahā kia Sehova ʼe tou ʼofa kia te ia mokā tou faka mafola ʼaki he loto faʼafai te logo ʼo te Puleʼaga, peʼe tou fai he ʼu tali fakaloto mālohi ʼi te ʼu fono, peʼe tou tokoni ki totatou ʼu tēhina mo tuagaʼane Kilisitiano. Ia meʼa fuli pe, ʼe tou haga ‘fai te finegalo ʼo te ʼAtua ʼaki totatou nefesi katoa.’—Efeso 6:6.
Neʼe fakahā e Sesu tona ʼofa ki te ʼAtua ʼaki tona nefesi katoa, ʼi tana fakafisi kia ia totonu. Neʼe ina fakamuʼamuʼa te finegalo ʼo te ʼAtua pea ina tuku ki muli te ʼu meʼa ʼaē neʼe loto kiai. Neʼe fakaafe tatou e Sesu ke tou mulimuli ki tona faʼifaʼitaki. Neʼe ina ʼui fēnei: “Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi pea ke muli tuʼumaʼu mai ia te ʼau.” (Mateo 16:24, 25, MN ) Ko tatatou fakafisi ʼaē kia tatou ko tona faka ʼuhiga ʼaē ke tou foaki totatou maʼuli. Ko tona faka ʼuhiga ʼaē, ko totatou ʼofa lahi ki te ʼAtua ʼe ina ʼeke tatou ke tou tuku totatou maʼuli ki ʼona ʼu nima, ohage ko te meʼa ʼaē neʼe fai e te hahaʼi ʼi te temi ʼo te Iselaele ʼāfea, ko he tagata Sutea neʼe ʼofa lahi ki tona pule neʼe ina foaki ia ia totonu ke kaugana ki tona pule ʼo aʼu ki tona mate. (Teutalonome 15:16, 17) Ko tatatou foaki totatou maʼuli kia Sehova ʼe ko he fakamoʼoni ʼaia ʼe tou ʼofa kia te ia.
Tou ʼOfa Kia Sehova ʼAki Totatou ʼAtamai Katoa
Ko totatou ʼofa kia Sehova ʼaki totatou ʼatamai katoa ko tona faka ʼuhiga ke tou faiga lahi ke tou mahino ki te ʼulugaaga ʼo Sehova, mo tana ʼu fakatuʼutuʼu, pea mo tana ʼu fakamaʼua. (Soane 17:3; Gaue 17:11) ʼE tou fakahā totatou ʼofa kia Sehova mokā tou fakaʼaogaʼi totatou ʼu fealagia fuli moʼo tokoni ki te hahaʼi ke nātou ʼoʼofa mo nātou kia Sehova pea mo tou hikihiki totatou poto ʼi te faiako. Neʼe fai e te ʼapositolo ko Petelo te fakaloto mālohi ʼaenī: “Koutou fakagaūgaūe takotou fakakaukau ʼo ʼuhiga mo te gāue.” (1 Petelo 1:13, MN ) Pea ʼe tou faiga ke tou ʼoʼofa ki te hahaʼi, tāfito ki te ʼu kaugana ʼa te ʼAtua. ʼE tou ʼiloʼi tonatou ʼu ʼaluʼaga pea mo tou vakaʼi te temi ʼaē ʼe lelei ai ke tou vikiʼi ia nātou, peʼe ko te ʼu temi ʼaē ʼe ʼaoga ai ke tou fakaloto fīmālieʼi ia nātou.
ʼE tou fakahā kia Sehova ʼe tou ʼofa kia te ia ʼaki totatou ʼatamai katoa, mokā tou tuku ke fakalogo tatatou ʼu fakakaukau kia te ia. ʼE tou faiga ke tou manatu ohage ko ia, mo tou tokagaʼi ia ia ʼi te ʼu tonu ʼaē ʼe tou fai, pea mo falala ʼe lelei tokotahi tana takitaki. (Tāʼaga Lea 3:5, 6; Isaia 55:9; Filipe 2:3-7) Kae ʼi tatatou haga fakahā totatou ʼofa ki te ʼAtua, ʼe tou lava fakaʼaogaʼi feafeaʼi totatou mālohi?
Tou ʼOfa Kia Sehova ʼAki Totatou Mālohi Katoa
Tokolahi te kau tūpulaga ʼi te kokelekasio ʼe nātou fakaʼaogaʼi tonatou mālohi moʼo fakavikiviki kia Sehova. (Tāʼaga Lea 20:29; Tagata Tānaki 12:1) Ko te ʼaluʼaga ʼaē ʼe fakahā ai te kau tūpulaga tokolahi tonatou ʼofa kia Sehova ʼaki tonatou mālohi katoa, ʼe ko tanatou kau ki te selevisi pionie katoa. Tokolahi te ʼu faʼe ʼe nātou kau ki te selevisi ʼaia logola te kei ako ʼo tanatou ʼu tamaliki. Ko te kau tagata ʼāfea agatonu ʼaē ʼe nātou fai te ʼu ʼaʼahi faka tauhi ōvi pea mo tokakaga ki tonatou ʼu
famili, ʼe nātou fakahā ai tonatou ʼoʼofa kia Sehova ʼaki tonatou mālohi katoa. (2 Kolonito 12:15) ʼE foaki e Sehova tona mālohi kia nātou ʼaē ʼe falala kia te ia, ke feala ai hanatou fakahā tonatou ʼofa ʼo nātou fakavikiviki kia te ia, pea mo nātou fakaʼaogaʼi tonatou mālohi fuli.—Isaia 40:29; Hepeleo 6:11, 12.
ʼE lava tuputupu anai totatou ʼofa mo kapau ʼe tou gāueʼi fakalelei. Koia tou haga toʼo he temi moʼo metitasio. Tou manatuʼi te ʼu meʼa ʼaē neʼe fai e Sehova maʼa tatou pea he koʼe ʼe tāu mo ia ke tou tauhi kia te ia. ʼI totatou ʼuhiga hōloga agahala ʼo Atama, ʼe mole tāu anai ʼi he temi mo tatou ia “te u mea aia nee teuteu e te Atua kia natou e oʼofa ia te ia,” kae ʼe feala ke tou fakahā ʼe tou ʼofa kia Sehova ʼo tou foaki totatou maʼuli katoa kia te ia. ʼOfa pe ke tou haga fai te faʼahi ʼaia!—1 Kolonito 2:9.
[Paki ʼo te pasina 20]
ʼE tou fakahā totatou ʼofa ki te ʼAtua ʼaki tatatou ʼu gāue