Ko Tokotou ʼu ʼAluʼaga ʼe Nātou Puleʼi Koa Tokotou Maʼuli?
KO TE maʼuli kinakina pea mo te ʼu faigataʼaʼia ʼe ko he ʼu meʼa kua hoko māhani ʼi “te ʼu temi fakamataku” ʼaenī. (2 Timoteo 3:1, MN ) Ko ʼihi faigataʼaʼia ʼe feala pe ke faka temi pea puli ki muli age. Ko ʼihi ʼe feala ke hoko ʼi ni ʼu māhina peʼe ko ni ʼu taʼu. ʼI te ʼu ʼaluʼaga ʼaia, tokolahi ʼe nātou logoʼi te meʼa ʼaē neʼe logoʼi e te tagata fai pesalemo ko Tavite, ʼaē neʼe kalaga fēnei kia Sehova: “Kua lahi te ʼu mamahi ʼo toku loto, hāofaki ʼau mai taku ʼu tuʼania.”—Pesalemo 25:17.
ʼE koutou nonofo koa ʼi he ʼu faigataʼaʼia ʼe mamafa kia koutou? Kapau ko ia ʼaia, ʼe koutou lava maʼu he tokoni pea mo he fakaloto mālohi ʼi te Tohi-Tapu. Tou vakaʼi te maʼuli ʼo te ʼu kaugana agatonu e toko lua ʼa Sehova, neʼe nā lava tauʼi fakalelei tonā ʼu faigataʼaʼia: ko Sosefo mo Tavite. ʼAki hatatou vakavakaʼi pe neʼe feafeaʼi tanā tali tona ʼu fihifihia, ʼe tou lava maʼu ai he ʼu ako ʼaoga ʼe tokoni mai anai kia tatou mokā tou tau mo he ʼu faigataʼaʼia feiā ia ʼaho nei.
Neʼe Nā Tau Mo Te ʼu Faigataʼaʼia Lalahi
ʼI te temi ʼaē neʼe taʼu 17 ai ia Sosefo, neʼe tau mo te ʼu fihifihia maʼuhiga ʼi tona famili totonu. Neʼe sio te ʼu tēhina lalahi ʼo Sosefo, ko Sakopo tanatou tāmai “neʼe ʼofa lahi age ia [kia Sosefo] ʼi tona ʼu tēhina fuli.” Koia “neʼe nātou fehihiʼa ki ai, pea neʼe mole kei nātou lava palalau lelei age ki ai.” (Senesi 37:4) ʼE tou lava mahino ki te tuʼania pea mo te hoha ʼaē neʼe logoʼi e Sosefo. Ki muli age, ʼi te kua lahi fau ʼo te loto fehiʼa ʼo te ʼu tēhina ʼo Sosefo, neʼe nātou fakatau ia ia ke liliu ko he kaugana.—Senesi 37:26-33.
ʼI tana nofo kaugana ʼi Esipito, neʼe tekeʼi e Sosefo ia te fakahala mai te ʼohoana ʼo tona pule. ʼI te ʼita ʼa te fafine ki te fakafisi ʼa Sosefo ki tana fakahala, neʼe fai e te fafine te tukugakovi loi, ʼo ina ʼui ko Sosefo neʼe ina faigaʼi ke ina fakaʼalikiʼi ia ia. Neʼe ʼave ai ia Sosefo “ki te fale pilisoni,” pea “neʼe fakamamahiʼi tona ʼu vaʼe ʼaki te ʼu seini, pea neʼe haʼi ia ia ʼaki te ʼu ukamea.” (Senesi 39:7-20; Pesalemo 105:17, 18) ʼE mahino ia neʼe mamahi ʼaupito ai ia Sosefo! Lolotoga taʼu e 13, neʼe liliu ia Sosefo ko he tagata kaugana peʼe pilisoniʼi ʼuhi ko te aga heʼe faitotonu neʼe fai age ki ai e ʼihi, ʼo kau mo tona famili totonu.—Senesi 37:2; 41:46.
Ko Tavite, ʼi tona temi tūpulaga neʼe tau mo te ʼu ʼahiʼahi. Lolotoga te ʼu taʼu, neʼe feholaʼaki, neʼe tuli haʼele ia ia ohage he manu e te Hau ko Saulo. ʼI te temi fuli pe, neʼe feala ke hoko he tuʼutāmaki kia Tavite. ʼI te tahi lakaga, neʼe ʼalu ia ʼo kumi meʼa kai ki te pelepitelo ko Ahimeleke. (1 Samuele 21:1-7) ʼI te ʼiloʼi e Saulo neʼe tokoni ia Ahimeleke kia Tavite, neʼe fakatotonu ai e te Hau ke matehi ia Ahimeleke pea mo te kau pelepitelo fuli pea mo tonatou ʼu famili. (1 Samuele 22:12-19) Koutou fakakaukauʼi age muʼa te lotomamahi ʼaē neʼe lagi logoʼi e Tavite he neʼe ina fakatupu te malaʼia ʼaia, kae neʼe mole loto kiai.
Koutou fakakaukauʼi age muʼa te ʼu taʼu ʼaē neʼe ʼutakiʼi ai e Sosefo mo Tavite ia te ʼu mamahi pea mo tonā gaohi koviʼi. ʼE tou vakaʼi anai peʼe koteā ʼaē neʼe nā fai ʼi te ʼu ʼaluʼaga faigataʼa ʼaia, pea koteā te ʼu faʼahi maʼuhiga ʼe tou lava tāʼofi ai. Tou vakaʼi te ʼu ʼaluʼaga e tolu ʼaē ʼe lelei ai ke tou faʼifaʼitaki ki te ʼu tagata ʼaia e lua.
ʼAua Naʼa Tou Taupau He Loto ʼIta Pea Mo He Fia Lagavaka
ʼUluaki, neʼe mole fia taupau e te ʼu tagata ʼaia he lotokovi mo he loto ʼita. ʼI te temi ʼaē neʼe nofo ai ia Sosefo ʼi te fale pilisoni, neʼe feala noa pe ke tuputupu ia ia he loto ʼita ki te kākā ʼo tona ʼu tēhina, pea mo fakakaukauʼi he faʼahiga puleʼaki ke ina fai he lagavaka mo kapau ʼe toe fesioʼaki mo nātou. ʼE tou ʼiloʼi feafeaʼi neʼe mole taupau e Sosefo he manatu kovi feiā? Tou vakaʼi age muʼa peʼe koteā ʼaē neʼe ina fai, ʼi te temi ʼaē neʼe faigamālie ai ke lagavaka ki tona ʼu tēhina, ʼi tanatou ʼōmai ki Esipito moʼo totogi hanatou pulapula. ʼE ʼui fēnei ʼi te Tohi-Tapu: “Pea neʼe mavae ai [ia Sosefo] mai ia nātou pea mo tagi. . . . ʼI te ʼosi fakatotonu age e Sosefo, neʼe ʼolo [tana ʼu kaugana] ʼo fakafonu [te] ʼu kato pulapula [ʼo tona ʼu tēhina]. Neʼe tonu foki ke toe liufaki age tanatou falā, ʼo fafaʼo ki tanatou ʼu taga pulapula takitahi, pea mo foaki age he meʼa kai ki tanatou ʼolo ʼi te ala.” Ki muli age, ʼi tana fekauʼi tona ʼu tēhina ke nātou ʼolo ʼo kumi mai tanatou tāmai ki Esipito, neʼe fakaloto mālohiʼi nātou e Sosefo ʼaki te ʼu palalau ʼaenī: “ ʼAua naʼa koutou kē ʼi te ala.” ʼAki tana ʼu palalau pea mo tana aga, neʼe fakamoʼoni ai e Sosefo neʼe mole ina taupau he loto ʼita pea mo he fia lagavaka.—Senesi 42:24, 25; 45:24.
ʼO feiā mo Tavite, neʼe mole ina taupau he loto ʼita ʼo ʼuhiga mo te Hau ko Saulo. ʼI te ʼu lakaga e lua, neʼe faigamālie kia Tavite ke ina matehi ia Saulo. ʼI te tahi ʼaho neʼe fakaneke ia ia e tana ʼu tagata fakalogo ke ina fakahoko te koga ʼaia, kae neʼe ina ʼui fēnei: “ ʼE mole feala kia ʼau, ʼo ʼuhiga mo te manatu ʼa Sehova, ke ʼau fai te meʼa ʼaia ki toku ʼaliki, te fakanofo ʼa Sehova.” Neʼe tuku e Tavite ia te fihifihia kia Sehova, ʼo ina ʼui age ki tana hahaʼi fakalogo: “Ohage pe ko te maʼuli moʼoni ʼa Sehova, ʼe tauteaʼi anai ia ia e Sehova totonu; peʼe hoko moʼoni mai anai tona ʼaho pea ʼe tonu anai ke mate, peʼe hifo anai ki te tau pea ʼe matehi ai anai.” Ki muli age, neʼe fai e Tavite te hiva ki te mate ʼo Saulo pea mo tona foha, ia Sonatane. Ohage ko Sosefo, neʼe mole taupau e Tavite he loto ʼita.—1 Samuele 24:3-6; 26:7-13; 2 Samuele 1:17-27.
ʼE tou taupau koa he loto ʼita pea mo he fia lagavaka mokā fai mai he aga heʼe faitotonu? ʼE feala pe ke hoko te meʼa ʼaia. Kapau ʼe tou tuku totatou ʼita ke ina puleʼi tatou, pea ʼe fua kovi age kia tatou ʼi te aga heʼe faitotonu ʼaē neʼe fai mai kia tatou. (Efeso 4:26, 27) Tatau aipe peʼe mole tou lava lolomi te ʼu meʼa ʼaē ʼe fai e te hahaʼi, kae ko tatou ʼe tou lolomi te meʼa ʼaē ka tou fai. ʼE faigafua age hatatou līaki ia te loto ʼita mo te fia lagavaka mokā ʼe tou tui ko Sehova ʼe ina fai anai he puleʼaki ki te ʼaluʼaga ʼaia ʼi tona temi totonu.—Loma 12:17-19.
Tou Fakatuputupu He ʼu Kalitate ʼi He ʼu ʼAluʼaga Pe
Ko te lua ako ʼe tou lava maʼu mai te ʼu faʼifaʼitaki ʼaia e lua, ʼe ko tatatou mole tuku totatou ʼu ʼaluʼaga ke nātou tāʼofi tatou ke tou fai he meʼa. ʼE feala pe, ʼi te lahi fau ʼo tatatou tokaga ki te meʼa ʼaē ʼe mole tou lava fai, ke mole kei tou tokagaʼi te meʼa ʼaē ʼe tou lava fai. Kapau koia ʼaia, pea kua puleʼi tatou e totatou ʼu ʼaluʼaga. Neʼe feala pe ke hoko te faʼahi ʼaia kia Sosefo. Kae neʼe ina fia fakatuputupu he ʼu kalitate ʼi te ʼaluʼaga ʼaē neʼe hoko kia ia. Logola ko Sosefo neʼe ko te kaugana, kae “neʼe ʼofa ki ai [tona pule] pea neʼe tauhi tuʼumaʼu kia ia, pea neʼe ina fakanofo ia ia ke pule ki tona ʼapi.” Neʼe toe feiā te aga ʼa Sosefo ʼi tana nofo ʼi te fale pilisoni. ʼAki te tapuakina ʼa Sehova pea mo tana gāue lelei, “neʼe fakanofo ai e te pule ʼo te fale pilisoni ke leʼoleʼo ki te kau pilisoni fuli ʼaē neʼe nonofo ʼi te fale pilisoni; pea ko te ʼu meʼa fuli ʼaē neʼe fai e te kau pilisoni neʼe ko ia ʼaē neʼe ina fakatotonu age.”—Senesi 39:4, 21-23.
Lolotoga te ʼu taʼu ʼaē neʼe feholaʼaki ai ia Tavite, neʼe ina fakatuputupu te ʼu kalitate ʼi te ʼaluʼaga ʼaē neʼe tau mo ia. ʼI te temi ʼaē neʼe nonofo ai ia Tavite mo tana kau tagata ʼi te toafa ʼo Palani, neʼe nātou puipui te ʼu faga ōvi ʼa Napale mai te hahaʼi kaihaʼa. Neʼe ʼui fēnei e te tahi tagata tauhi ōvi ʼa Napale: “Neʼe nātou hage ko he kaupā maʼa mātou, ʼi te po mo te ʼaho.” (1 Samuele 25:16) Ki muli age, ʼi tana nofo ʼi Sikelake, neʼe ʼohofiʼi e Tavite te ʼu kolo ʼaē neʼe puleʼi e te ʼu fili ʼo Iselaele ʼo ina kapu ia nātou ki te potu saute, pea mo ina puipui te ʼu tuʼakoi ʼo Suta.—1 Samuele 27:8; 1 Fakamatala 12:20-22.
ʼE tonu koa ke tou faiga mālohi ke tou fakatuputupu he ʼu kalitate ʼi te ʼaluʼaga ʼaē ʼe tau mo tatou? Logope ʼe lagi faigataʼa, kae ʼe tou lava fai te faʼahi ʼaia. ʼI tana fakakaukauʼi tona maʼuli, neʼe tohi fēnei e te ʼapositolo ko Paulo: “Neʼe ʼau ako, ʼi te ʼu ʼaluʼaga fuli pe ʼaē ʼe tau mo ʼau, ke ʼau fakafeauga ki te ʼu meʼa ʼaē kua ʼau maʼu. Ei, ʼe ʼau ʼiloʼi te maʼuli ʼi te masiva, ei ʼe ʼau ʼiloʼi te maʼuli ʼi te mahu. . . . Ia meʼa fuli pea mo te ʼu ʼaluʼaga fuli, neʼe ʼau ako te meʼa fakalilo ʼaē ko te mākona ʼo feiā pe mo te pakupaku, te maʼuli ʼi te mahu ohage pe ko te maʼuli ʼi te faigataʼaʼia.” He koʼe neʼe manatu feiā ia Paulo ʼo ʼuhiga mo te maʼuli? He neʼe haga falala kia Sehova. Neʼe ina fakamoʼoni fēnei: “ ʼE ʼau maʼu te mālohi kia meʼa fuli, ʼuhi ko ia ʼaē ʼe ina foaki mai te mālohi.”—Filipe 4:11-13, MN.
Tou Falala Kia Sehova
Ko te tolu ako: ʼe mole tonu ke tou fakaʼaogaʼi he ʼu puleʼaki ʼe mole ʼalutahi mo te Tohi-Tapu, kae ʼe tonu ke tou falala kia Sehova. Neʼe tohi fēnei e te tisipulo ko Sakopo: “Ke mau e te kataki te katoa o tana gaue, koteuhi ke koutou haohaoa mo lelei pau pea ke aua naa koutou masiva i he mea.” (Sakopo 1:4) ʼE tonu ke tou faka fealagia ki te faʼa kātaki ke ‘katoa tana gāue’ ʼo tou faʼa kātaki ʼo aʼu ki te gataʼaga ʼo totatou ʼahiʼahi, kae ke ʼaua naʼa tou fakaʼaogaʼi he ʼu puleʼaki ʼe mole ʼalutahi mo te Tohi-Tapu. ʼE hoki ʼahiʼahiʼi anai tatatou tui pea mo fakamaʼa, pea ʼe hoki hā lelei anai te mālohi ʼo tatatou tui. Neʼe maʼu e Sosefo mo Tavite ia te taʼi faʼa kātaki ʼaia. Neʼe mole nā fakakaukauʼi he puleʼaki ʼe fakaloto mamahi anai kia Sehova. Kae neʼe nā fakaʼaogaʼi te ʼu ʼaluʼaga ʼaē neʼe hoko kia nāua moʼo fakatupu hona ʼu kalitate. Neʼe nā falala kia Sehova, pea neʼe nā maʼu ai te ʼu tapuakina lahi! Neʼe fakaʼaogaʼi ia nāua toko lua e Sehova moʼo hāofaki pea mo takitaki tana hahaʼi.—Senesi 41:39-41; 45:5; 2 Samuele 5:4, 5.
ʼE lagi tou tau mo he ʼu ʼaluʼaga ʼe tou fia kumi ai he ʼu puleʼaki ʼe mole ʼalutahi mo te Tohi-Tapu. Ohage la, kua koutou lotovaivai koa heʼe mole heʼeki koutou maʼu hokotou ʼohoana ʼe koutou leleiʼia? Kapau koia, pea koutou fakamamaʼo mai te ʼu ʼaluʼaga fuli ʼaē ʼe feala ke tupu ai hakotou talagataʼa ki te fakatotonu ʼa Sehova ke kita ʼohoana “ ʼi te ʼAliki pe.” (1 Kolonito 7:39, MN ) ʼE koutou felāveʼi koa mo he ʼu fihifihia ʼi te nofo faka taumatuʼa? Koutou faiga fakatahi mo tokotou ʼohoana ke koutou fakatokatoka te fihifihia, kae ʼaua naʼa koutou muliʼi te manatu ʼa te mālama ʼaē ʼe ina fakaneke te mavete. (Malakia 2:16; Efeso 5:21-33) ʼE faigataʼaʼia koa hakotou taupau tokotou famili ʼuhi ko te ʼu faigataʼaʼia faka ekonomika? Ko te falala kia Sehova ʼe kau kiai ia te mole fai ʼo he ʼu gāue ʼe mole lelei peʼe tapuʼi e te lao, ʼuhi pe ko takotou fia maʼu ʼo hakotou falā. (Pesalemo 37:25; Hepeleo 13:18) ʼI tona fakahagatonu, ʼe tonu ke tou faiga mālohi fuli moʼo fakatuputupu he ʼu kalitate ʼi te ʼaluʼaga ʼaē ʼe tau mo tatou pea mo tou faiga mālohi ke fakapale tatou e Sehova. ʼAki tatatou fai feiā, tou falala mālohi ko Sehova ʼe ina foaki mai anai te puleʼaki ʼaē ʼe lelei ʼaupito.—Mikea 7:7.
ʼE Tokoni Atu Anai Ia Sehova Kia Koutou
ʼE fua lelei anai kia tatou tatatou metitasioʼi te ʼu meʼa ʼaē neʼe hoko ki te ʼu tagata ko Sosefo mo Tavite, ʼaē neʼe nā felāveʼi mo te ʼu ʼaluʼaga fakaloto mamahi mo te ʼu faigataʼaʼia. Logola ʼe mole lahi ʼaupito te ʼu pasina ʼaē ʼe fakamatala ai tonā ʼu hisitolia ʼi te Tohi-Tapu, kae ko te ʼu ʼahiʼahi ʼaē neʼe tau mo nāua neʼe hoko lolotoga ni taʼu. Koutou fai te fehuʼi ʼaenī kia koutou totonu: ‘Neʼe koteā ʼaē neʼe tokoni ki te ʼu kaugana ʼaia ʼa te ʼAtua ke nā tali te ʼu meʼa ʼaē neʼe hoko kia nāua? Koteā ʼaē neʼe tokoni kia nāua ke nā taupau tuʼumaʼu tonā fiafia? Koteā te ʼu kalitate ʼaē neʼe nā maʼu ai?’
ʼE toe ʼaoga pe foki kia tatou ia te faʼa kātaki ʼo te ʼu kaugana ʼa Sehova ʼo te temi nei. (1 Petelo 5:9) ʼI te taʼu fuli, ʼe tou maʼu ʼi Te Tule Leʼo pea mo te Réveillez-vous ! te ʼu tuʼuga fakamatala ʼo te maʼuli ʼo te kau Kilisitiano. ʼE koutou lau koa pea mo metitasio ki te ʼu faʼifaʼitaki ʼo te kau Kilisitiano agatonu ʼaia? Tahi ʼaē meʼa, ʼe tou maʼu ʼi te ʼu kokelekasio te ʼu tēhina mo te ʼu tuagaʼane ʼe nātou nonofo agatonu pea mo ʼutakiʼi te ʼu ʼaluʼaga faigataʼa. ʼE koutou fakatahi tuʼumaʼu koa mo nātou ʼi te ʼu fono pea mo faʼifaʼitakiʼi tanatou agatonu?—Hepeleo 10:24, 25.
Ka koutou felāveʼi mo he ʼu ʼaluʼaga faigataʼa, koutou manatuʼi ko Sehova ʼe tokaga kia koutou pea mo tokoni atu anai kia koutou. (1 Petelo 5:6-10) Koutou faiga mālohi ke mole puleʼi tokotou maʼuli e tokotou ʼu ʼaluʼaga. Koutou muliʼi te faʼifaʼitaki ʼa Sosefo, mo Tavite, pea mo ʼihi kaugana, ʼo mole koutou taupau he loto ʼita kae ke koutou fakatuputupu he ʼu kalitate ʼi te ʼu ʼaluʼaga ʼaē ʼe tau mo koutou, ʼo koutou falala ko Sehova ʼe ina foaki atu anai te puleʼaki ʼaē ʼe lelei. Koutou fakaōvi kia te ia ʼi te faikole pea mo te ʼu gāue fakalaumālie. Kapau ʼe koutou fai feiā, ʼe koutou maʼu ai anai te fiafia pea mo te fīmālie ʼi te ʼu temi faigataʼa.—Pesalemo 34:8.
[Paki ʼo te pasina 20, 21]
Neʼe gāueʼi e Sosefo he ʼu kalitate ʼi te ʼu ʼaluʼaga ʼaē neʼe tau mo ia
[Paki ʼo te pasina 23]
Neʼe falala ia Tavite ko Sehova ʼe ina fakatokatoka anai tona ʼu fihifihia