Te ʼu Fehuʼi ʼa Te Kau Lautohi

He koʼe koa ʼe ʼui e te kau Fakamoʼoni ʼa Sehova ko te mataʼi numelo 144 000 ʼaē ʼe tuʼu ʼi te tohi ʼo Apokalipesi ʼe ko he numelo moʼoni kae ʼe mole ko he mataʼi numelo fakatātā?

Neʼe tohi fēnei e te ʼapositolo ko Soane: “Nee au logo ki te kaugamalie o natou nee fakailoga: Ko te toko teau fagofulu-mafa afe nee fakailoga.” (Apokalipesi 7:4) ʼE fakahā e te Tohi-Tapu, ko te palalau “[ko] natou nee fakailoga” ʼe faka ʼuhiga ki he ʼu hahaʼi neʼe fili mai te malamanei ke nātou ʼafio mo Kilisito ʼi te lagi moʼo puleʼi te kele ʼaē ka liliu anai ko he Palatiso. (2 Kolonito 1:21, 22; Apokalipesi 5:​9, 10; 20:6) ʼE lahi te ʼu tupuʼaga ke tou ʼui ai ko te toko 144 000 ʼe ko he numelo moʼoni. ʼE ʼi ai tona tupuʼaga ʼe tou maʼu ʼi te kapite katoa ʼo te vaega ʼo Apokalipesi 7:4.

ʼI te ʼosi fakahā age ki te ʼapositolo ko Soane ʼi te misi ʼo ʼuhiga mo te kūtuga ʼaia ʼo te toko 144 000 hahaʼi, neʼe sio ki te tahi kūtuga. ʼE ʼui e Soane ko te lua kūtuga ʼaia ʼe ko “te toe hahaʼi tokolahi, ʼe mole feala hona lau e he tahi, mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli.” Ko te toe hahaʼi tokolahi ʼaia ʼe ko nātou ʼaē ka hāo anai ʼi te “mamahi lahi” ka hoko mai, ʼaē ka ina fakaʼauha te mālama agakovi ʼaenī.​—Apokalipesi 7:​9, 14, MN.

Kae koutou tokagaʼi te fakakehekeheʼi ʼe fai e Soane ʼi te ʼu vaega 4 mo te 9 ʼo Apokalipesi kapite 7. ʼE ina ʼui ai ko te ʼuluaki kūtuga, ia “natou nee fakailoga,” kua ʼiloʼi tonatou kaugamālie. Kae ko te lua kūtuga, “te toe hahaʼi tokolahi,” ʼe mole ʼiloʼi peʼe nātou tokofia. ʼAki te faʼahi ʼaia, ʼe tou mahino ai ko te numelo 144 000 ʼe ko he numelo moʼoni. Kanapaula ko te numelo 144 000 neʼe ko he numelo fakatātā pea mo faka ʼuhiga ki he kūtuga ʼe mole ʼiloʼi peʼe nātou tokofia, kanaʼauala ʼe mole ʼi ai he ʼuhiga ʼo he fakakehekeheʼi ʼo te ʼu vaega ʼaia e lua. Koia ʼe fakahā lelei e te tuʼuʼaga ʼo te vaega, ko te numelo 144 000 ʼe tonu ke faka ʼuhiga ʼe ko he numelo moʼoni.

ʼE lahi te kau poto sivi Tohi-Tapu ʼo te temi muʼa pea mo te temi nei ʼe nātou ʼui ko te numelo ʼaia ʼe ko he numelo moʼoni. Ohage la, kua hili kiai taʼu e 100, ʼi tana fakamahinohino ia Apokalipesi 7:​4, 9, neʼe tohi fēnei e te tagata Pilitania ʼe ina sivisivi te ʼu lea ko Dr. Ethelbert W. Bullinger: “ ʼE mahino gafua ia, koteʼuhi ʼe tuʼu tahi ʼi te kapite ʼaia, te numelo kua ʼiloʼi peʼe ko te tokofia pea mo te numelo ʼe mole ʼiloʼi peʼe ko te tokofia.” (The Apocalypse or “The Day of the Lord,” ʼi te pasina 282) Mole heʼeki faʼa fualoa, neʼe tohi fēnei e Robert L. Thomas, Jr., polofesea ʼo te Tauhi Foʼou ʼi Te Seminalio ʼo Te Pule ʼi Amelika: “ ʼE mole ʼi ai he fakamoʼoni ʼo te ʼui ʼaē ko te mataʼi numelo 144 000 ʼe ko he numelo fakatātā.” Neʼe ina toe ʼui fēnei: “ ʼE fakakeheʼi te kūtuga kua ʼiloʼi peʼe nātou tokofia [ia Apokalipesi 7:4] pea mo te tahi kūtuga ia Apokalipesi 7:9 ʼe mole ʼiloʼi peʼe nātou tokofia. Kapau ʼe ko te numelo 144 000 ʼe ko he numelo fakatātā, pea ko tona faka ʼuhiga ʼe mole he numelo ʼi te tohi ʼo Apokalipesi ʼe ko he numelo moʼoni.”​—Revelation: An Exegetical Commentary, Tohi 1, pasina 474.

ʼE lau e ʼihi ʼe lahi te ʼu palalau fakatātā ʼi te tohi ʼo Apokalipesi, koia ko te ʼu numelo fuli ʼaē ʼe maʼu ʼi te tohi ʼaia, ʼo feiā mo te numelo 144 000, ʼe ko he ʼu numelo fakatātā. (Apokalipesi 1:​1, 4; 2:​10) Kae ʼe hala te manatu ʼaia. ʼE moʼoni ʼe lahi te ʼu mataʼi numelo fakatātā ʼe tuʼu ʼi te tohi ʼo Apokalipesi, kae ʼe toe tuʼu aipe foki mo te ʼu mataʼi numelo moʼoni. Ohage la, ko Soane ʼe palalau ki “te u higoa e hogofulu-ma-lua o te toko hogofulu-ma-lua apositolo a te Akeno.” (Apokalipesi 21:14) ʼE mahino mai, ko te mataʼi numelo 12 ʼaē ʼe tuʼu ʼi te vaega ʼaia ʼe tonu ke toʼo katoa feiā, ʼe mole ko he mataʼi numelo fakatātā. Tahi ʼaē meʼa, ʼe faitohi te ʼapositolo ko Soane ʼo ʼuhiga mo te ʼafio ʼa Kilisito ia “Taʼu e Afe.” ʼE tonu ke toʼo katoa mo te mataʼi numelo ʼaia ohage ko tona fakahā fakalelei mai e te Tohi-Tapu.a (Apokalipesi 20:​3, 5-7) Koia, ke ʼiloʼi peʼe ko he numelo ʼe moʼoni peʼe ko he fakatā ʼi te tohi ʼo Apokalipesi, ʼe fakalogo ki te ʼu vaega ʼi muʼa atu pea mo te ʼaluʼaga ʼo te vaega ʼaē ʼe tuʼu ai ia te mataʼi numelo.

Ko te ʼui ʼaē ko te numelo 144 000 ʼe tonu ke toʼo katoa pea ʼe faka tuʼakoi pe te hahaʼi ʼaia, ko he kūtuga ʼe tokosiʼi mokā ʼe fakatatau ki te “toe hahaʼi tokolahi,” ʼe toe ʼalutahi pe mo te tahi ʼu vaega faka Tohi-Tapu. Ohage la, ki muli age ʼi te meʼa ʼaē neʼe fakahā ki te ʼapositolo ko Soane, ʼe fakatatau ia te toko 144 000 kia nātou ʼaē “nee [“totogi,” MN ] natou mai te hahai, e ko te u uluaki fua.” (Apokalipesi 14:​1, 4) Pea tahi ʼaē meʼa, ʼi te temi ʼaē neʼe nofo ai ia Sesu ʼi te kele, neʼe palalau kia nātou ʼaē ʼe ka kaugā hau mo ia ʼi tona Puleʼaga ʼi selo pea neʼe ina fakahigoaʼi ia nātou ko he “kiʼi fagaovi.” (Luka 12:32; 22:29) Ei, ko nātou ʼaia ʼaē neʼe toʼo mai te hahaʼi pea mo nātou ʼafio anai ʼi selo ʼe nātou lāvaki mokā ʼe fakatatau ki te hahaʼi ʼaē ka maʼuʼuli anai ʼi te Palatiso fakakelekele.

Koia ko te ʼu vaega ʼe pipiki mai kia Apokalipesi 7:4 pea mo te ʼu fakamatala ʼe fakapipiki kiai ʼaē ʼe maʼu ʼi te tahi ʼu vaega ʼi te Tohi-Tapu ʼe nātou fakamoʼoni ko te mataʼi numelo ko te 144 000 ʼe tonu ke toʼo katoa feiā. ʼE faka ʼuhiga kia nātou ʼaē ka ʼafio anai ʼi selo pea mo Kilisito moʼo takitaki te Palatiso fakakelekele, ʼaē ka nonofo ai te kaugamālie ʼaupito ʼo te hahaʼi fiafia ʼaē ʼe atolasio kia Sehova ʼAtua.​—Pesalemo 37:29.

[Kiʼi nota]

[Paki ʼo te pasina 31]

ʼE faka tuʼakoi pe te kau maʼu tofiʼa ʼi te lagi ki te toko 144 000

[Paki ʼo te pasina 31]

ʼE mole ʼiloʼi peʼe tokofia ia te “toe hahaʼi tokolahi”

[Haʼuʼaga ʼo te paki pasina 31]

Stars: Courtesy of Anglo-Australian Observatory, photograph by David Malin