“Koutou Kofuʼi Te Teu Tau Katoa ʼo Te ʼAtua”

“Koutou kofuʼi te teu tau katoa ʼo te ʼAtua ke feala ai hakotou tutuʼu mālohi ʼo fakafeagai ki te ʼu kākā ʼa te Tevolo.”​—Efeso 6⁠:​11, MN.

1, 2. ʼAki takotou ʼu palalau māhani, koutou fakamatala te teu tau fakalaumālie ʼaē ʼe tonu ke kofuʼi e te kau Kilisitiano.

ʼI TE ʼuluaki sēkulō neʼe ko te temi mālohi ʼaia ʼo te puleʼaga ʼo Loma. ʼAki te ʼatu kautau Loma neʼe feala ai ke nātou puleʼi katoa te mālama ʼo te temi ʼaia. Ko te tagata fai hisitolia neʼe ina ʼui ko te kautau ʼaia ʼe ko “te kautau solia ʼaē neʼe lahi tokotahi tana ʼu mālo ʼi te hisitolia.” Neʼe faʼufaʼu te kautau ʼo Loma e te kau solia neʼe akoʼi lelei ki te tau, kae neʼe toe fakalogo tanatou mālo ki tonatou teu tau. Neʼe fakaʼaogaʼi e te ʼapositolo ko Paulo ia te teu tau solia Loma moʼo fakahā te teu tau fakalaumālie ʼaē neʼe tonu ke kofuʼi e te kau Kilisitiano ke nātou mālo ʼi tanatou fakafeagai ki te Tevolo.

² ʼE tou maʼu te fakamatala ʼo te teu tau fakalaumālie ʼaia ia Efeso 6⁠:​14-17 (MN ). Neʼe ʼui fēnei e Paulo: “Koutou nonofo mālohi, ʼo koutou nonoʼo tokotou koga loto ʼaki te moʼoni, ʼo koutou kofuʼi te kofu ukamea ʼo te faitotonu, pea koutou tui ki ʼokotou vaʼe te logo lelei ʼo te tokalelei. ʼI te meʼa fuape, ke koutou toʼo te meʼa tali tau lahi ʼo te tui, ʼaē ʼe feala ai anai ke koutou matehi fuli te ʼu mahafu kakaha ʼa te agakovi. Pea koutou tali foki mo te puloga tau ʼo te hāofaki, pea mo te heletā ʼo te laumālie, ʼaē ko te folafola ʼa te ʼAtua.” ʼI te sio ʼa te tagata, ko te teu tau ʼaē neʼe talanoa kiai Paulo neʼe ina puipui fakalelei ia te tagata solia Loma. Tahi ʼaē meʼa, neʼe ʼi ai tana heletā, neʼe ko tana mahafu tāfito ʼaia mokā fetauʼaki mo he tahi.

3. He koʼe ʼe tonu ke tou fakalogo ki te ʼu fakatotonu ʼa Sesu Kilisito pea mo muliʼi tana faʼifaʼitaki?

³ ʼO hilifaki ki te ʼu mahafu tau pea mo te akoako ki te tau, neʼe toe fakalogo te mālo ʼa te kautau Loma ki tanatou fakalogo ki tonatou pule takitaki tau. ʼO feiā ki te kau Kilisitiano, ʼe tonu ke nātou fakalogo kia Sesu Kilisito, ʼaē ʼe ʼui e te Tohi-Tapu ko te “pule ki he ʼu hahaʼi lanu kehekehe ʼo te fenua.” (Isaia 55⁠:⁠4) ʼE toe “pule [foki] . . . ki te kokelekasio.” (Efeso 5⁠:​23, MN ) ʼE foaki mai e Sesu te ʼu fakatotonu ki tatatou tau fakalaumālie pea mo tuku mai he faʼifaʼitaki lelei ʼo ʼuhiga mo te kofuʼi ʼo te teu tau fakalaumālie. (1 Petelo 2⁠:21) Ko te ʼulugaaga ʼa Kilisito ʼe hage ko totatou teu tau fakalaumālie, ʼe tokoniʼi tatou e te Tohi-Tapu ke tou ‘maʼu’ te manatu ʼa Kilisito. (1 Petelo 4⁠:​1, MN ) Kapau ʼe tou vakavakaʼi te ʼu koga takitahi ʼo totatou teu tau fakalaumālie, pea ʼe tou muliʼi anai te faʼifaʼitaki ʼa Sesu moʼo fakahā te maʼuhiga pea mo te ʼaoga ʼo te teu tau ʼaia.

Tou Puipui Totatou Koga Loto, Totatou Fatafata, Pea Mo Totatou ʼu Vaʼe

4. Koteā te ʼaoga ʼo te kiliʼi pipi ʼi te teu tau ʼo te tagata solia, pea koteā ʼaē ʼe ina fakatātā?

⁴ Te koga loto ʼe nonoʼo ʼaki te moʼoni. ʼI te temi muʼa, neʼe ʼai e te kau solia te foʼi kiliʼi pipi laulahi, ko tona laulahi neʼe ko satimeta e 5 peʼe ko satimeta e 15. ʼE ʼui e ʼihi kau fakaliliu ʼe tonu ke lau fēnei te vaega, “koutou fakaʼaogaʼi te moʼoni ohage ko he kiliʼi pipi moʼo haʼi ʼaki tokotou koga loto.” Neʼe puipui e te kiliʼi pipi te koga loto ʼo te tagata solia, pea neʼe feala hana tautau ai te ʼaiʼaga ʼo tana heletā. Ka nonoʼo e he tagata solia tona koga loto, neʼe teuteu ia ki te tau. Neʼe fakaʼaogaʼi e Paulo te kiliʼi pipi ʼo te tagata solia moʼo fakatātā peʼe tonu ke malave mālohi feafeaʼi te ʼu moʼoni faka Tohi-Tapu ki totatou maʼuli. ʼE tonu ke haʼi maʼu totatou koga loto ʼaki te kiliʼi pipi ʼaia, ko tona faka ʼuhiga ke tou maʼuliʼi te moʼoni pea mo tou puipui ʼi te temi fuli pe. (Pesalemo 43⁠:3; 1 Petelo 3⁠:15) ʼAki te fakatuʼutuʼu ʼaia, ʼe tonu ke tou ako fakalelei te Tohi-Tapu pea mo metitasioʼi. Ko te lao ʼa te ʼAtua neʼe ‘ ʼi te loto’ ʼo Sesu. (Pesalemo 40⁠:⁠8) ʼI te temi ʼaē neʼe fakafehuʼi ai e tona ʼu fili, neʼe feala ke ina tali faka ʼatamai age ʼaki te Tohi-Tapu.​—Mateo 19⁠:​3-6; 22⁠:​23-32.

5. Koutou fakamahino peʼe lava tokoni feafeaʼi mai ia te Tohi-Tapu mokā hoko mai he ʼu fai fakahala peʼe ko he ʼu faigataʼaʼia.

⁵ Ka tou tuku te ʼu moʼoni ʼo te Tohi-Tapu ke nātou takitaki tatou, ʼe feala ke ina puipui tatou mai te ʼu manatu hala pea mo faka fealagia kia tatou ke tou fai he ʼu tonu ʼe fakapotopoto. Ka hoko mai he ʼu fai fakahala peʼe ko he ʼu faigataʼaʼia, ʼe fakaloto mālohiʼi anai tatou e te ʼu pelesepeto faka Tohi-Tapu ke tou fai te meʼa ʼaē ʼe lelei. ʼE hage pe anai ʼe tou sio ki totatou Faiako Lahi ko Sehova, pea ʼe tou logoʼi anai te leʼo mai muli ʼe ina ʼui fēnei mai: “Koʼeni te ala. Koutou haʼele ai.”​—Isaia 30⁠:​20, 21.

6. He koʼe ʼe tonu ke puipui totatou loto, pea ʼe hāofaki fakalelei feafeaʼi totatou loto e te faitotonu?

⁶ Te kofu ukamea ʼo te faitotonu. Neʼe puipui e te kofu ukamea ia te mafu ʼo te tagata solia, ʼaē ko he koga maʼuhiga ʼo tona sino. Ko totatou loto​—te ʼuhiga ʼo kita takitokotahi​—ʼe ʼaoga kiai he puipui makehe koteʼuhi ʼe holi te loto ki te meʼa ʼaē ʼe kovi. (Senesi 8⁠:21) Koia ʼe tonu ai ke tou ako pea mo manako ki te ʼu lekula faitotonu ʼa Sehova. (Pesalemo 119⁠:​97, 105) Ko tatatou manako ki te faitotonu ʼe ina uga ai tatou ke tou līaki te ʼu manatu ʼo te mālama ʼaē ʼe mole ina tokagaʼi mo ina fakavaivaiʼi te ʼu pelesepeto maʼuhiga ʼa Sehova. Koia ka tou manako ki te meʼa ʼaē ʼe lelei pea mo fehiʼa ki te meʼa ʼaē ʼe kovi, ʼe mole tou fai anai he aga ʼe feala ke tou tuʼutāmaki ai. (Pesalemo 119⁠:​99-101; Amosi 5⁠:15) Ko Sesu ʼe ko he faʼifaʼitaki ʼi te faʼahi ʼaia, pea ʼe ʼui fēnei e te Tohi-Tapu ʼo ʼuhiga mo ia: “Neʼe ke manako ki te faitotonu pea neʼe ke fehiʼa ki te agahala.”​—Hepeleo 1⁠:​9, MN.a

7. He koʼe neʼe ʼaoga ki he tagata solia Loma ke ina tui he ʼu sūlie mālohi, pea koteā ʼaē ʼe ina fakatātā?

⁷ Te ʼu vaʼe ʼe fakatui ʼaki te logo lelei ʼo te tokalelei. Neʼe tonu ke tui e te ʼu solia Loma te ʼu sūlie peʼe ko te ʼu taka mālohi, heʼe ʼi te agamāhani lolotoga te tau neʼe nātou haʼele ia kilometa e 30 ʼi te ʼaho fuli ʼaki tonatou ʼu teu tau e taki kilo 27 te teu tau. Neʼe lelei te fakatātā e Paulo tatatou tui te ʼu sūlie ki tatatou lotolelei ʼaē ʼo faka mafola te logo ʼo te Puleʼaga ki te hahaʼi fuli ʼaē ka fia fakalogo anai kiai. ʼE maʼuhiga te faʼahi ʼaia, koteʼuhi ʼe ʼiloʼi feafeaʼi anai e te hahaʼi ia Sehova mo kapau ʼe mole tou nofo teuteu pea mo fai faka mafola?​—Loma 10⁠:​13-15.

8. ʼE tou lava faʼifaʼitakiʼi feafeaʼi ia Sesu ʼi tatatou faka mafola te logo lelei?

⁸ Neʼe koteā te gāue maʼuhiga e tahi ʼi te maʼuli ʼo Sesu? Neʼe ina ʼui ki te Kovana Loma ko Posio Pilato: ‘Neʼe ʼau haʼu ki te malamanei moʼo fagonogono te moʼoni.’ Neʼe faka mafola ia Sesu ʼi te ʼu potu fuli neʼe ina maʼu ai he tahi ʼe fia logo, pea neʼe ina leleiʼia tana minisitelio ʼo ina fakamuʼamuʼa age ʼi tona fīmālie fakasino. (Soane 4⁠:​5-34; 18⁠:37) Kapau ohage ko Sesu, ʼe tou fiafia ʼi te tala ʼo te logo lelei, ʼe tou maʼu anai te ʼu faigamālie moʼo fagonogono ki te hahaʼi. Tahi ʼaē meʼa, ʼe tou mālolohi anai ʼi te faʼahi fakalaumālie mokā ʼe tou maʼumaʼua ʼi tatatou minisitelio.​—Gaue 18⁠:⁠5.

Te Meʼa Tali Tau, Te Puloga, Pea Mo Te Heletā

9. Neʼe puipui feafeaʼi te tagata solia Loma e te meʼa tali tau lahi?

⁹ Te meʼa tali tau lahi ʼo te tui. Ko te kupu faka Keleka ʼaē neʼe ina fakaliliu ʼaki te kupu “meʼa tali tau lahi,” ʼe faka ʼuhiga ki he meʼa tali tau neʼe lahi feʼauga moʼo puipui te sino katoa. ʼE ina puipui anai te tagata solia mai te ʼu “mahafu kakaha” ʼaē ʼe talanoa kiai ia Efeso 6⁠:​16, MN. ʼI te temi muʼa, neʼe fakaʼaogaʼi e te kau solia te ʼu kauʼi nahau neʼe tutu tona muʼamuʼaʼi nahau ʼaki te kalasini. ʼE fakamatala e te tagata fai Tohi-Tapu, ko te ʼu kauʼi nahau ʼe ko “he ʼu mahafu fakamataku ʼi te ʼu mahafu tau ʼo te temi muʼa.” Kapau neʼe mole maʼu he meʼa tali tau lahi ʼa he tagata solia moʼo puipui ia ia mai te ʼu mahafu, neʼe feala ke lavea kovi ai peʼe mate.

10, 11. (a) Koteā “te ʼu mahafu kakaha” ʼa Satana ʼaē ʼe feala ke tuʼutāmaki ai tatatou tui? (b) ʼE fakahā feafeaʼi e te faʼifaʼitaki ʼa Sesu te maʼuhiga ʼo te tui ʼi te ʼu temi faigataʼa?

¹⁰ Koteā “te ʼu mahafu kakaha” ʼaē ʼe fakaʼaogaʼi e Satana moʼo maumauʼi tatatou tui? ʼE lagi ko he fakataga peʼe ko he fakafeagai ʼi he famili, ʼi te fale gāue, peʼe ʼi te faleako. Neʼe tuʼutāmaki te maʼuli fakalaumālie ʼa ʼihi Kilisitiano ʼuhi ko te mānumānu, pea ko te holi ki te ʼu felāveʼi fakasino heʼeʼaoga. Moʼo puipui tatou mai te ʼu fai fakahala ʼaia, “ ʼi te meʼa fuape, [ʼe tonu ke tou] toʼo te meʼa tali tau lahi ʼo te tui.” ʼE tou tui heʼe tou ʼiloʼi ia Sehova, ʼe tou felogoi tuʼumaʼu mo ia ʼi te faikole, pea ʼe tou mahino ki tana puipui pea mo tana tapuakinaʼi tatou.​—Sosue 23⁠:14; Luka 17⁠:5; Loma 10⁠:⁠17.

¹¹ ʼI te nofo ʼa Sesu ʼi te kele, neʼe ina fakahā ʼe maʼuhiga ke kita maʼu he tui mālohi ʼi te ʼu temi faigataʼa. Neʼe falala katoa ki te ʼu tonu ʼo tana Tāmai pea neʼe fiafia ʼi te fai ʼo te finegalo ʼo te ʼAtua. (Mateo 26⁠:​42, 53, 54; Soane 6⁠:38) Māʼiape la mo te temi ʼaē neʼe hoha lahi ai ʼi te ʼōloto ʼo Setesemane, neʼe ʼui fēnei e Sesu ki tana Tāmai: “Ke mole fai ki te meʼa ʼaē ʼe ʼau loto ki ai, kaʼe ke fai pe ki te meʼa ʼaē ʼe ke loto ki ai.” (Mateo 26⁠:​39, MN ) Neʼe mahino tuʼumaʼu kia Sesu te maʼuhiga ʼo te nofo agatonu pea mo te fakafiafiaʼi ʼo tana Tāmai. (Tāʼaga Lea 27⁠:11) Kapau ʼe tou falala feiā kia Sehova, pea ʼe mole vaivai anai tatatou tui ʼi te ʼu laukovi peʼe ko te ʼu fakafeagai ʼaē ʼe fai mai kia tatou. Kae ʼe mālohi anai tatatou tui mo kapau ʼe tou falala ki te ʼAtua, mo fakahā totatou ʼofa kia te ia, pea mo taupau tana ʼu fakatotonu. (Pesalemo 19⁠:​7-11; 1 Soane 5⁠:⁠3) ʼE mole he fakapale fakamālama peʼe ko he fakafiafia heʼeʼaoga faka temi, ʼe tatau mo te ʼu tapuakina ʼa Sehova ʼaē ʼe ina foaki kia nātou ʼe ʼoʼofa kia te ia.​—Tāʼaga Lea 10⁠:⁠22.

12. Ko te ʼu faʼahi fea ʼaē ʼe puipui ai tatou e totatou puloga fakatātā, pea he koʼe ʼe ʼaoga te taʼi puipui ʼaia?

¹² Te puloga ʼo te fakamaʼuli. Ko te puloga neʼe ina puipui te ʼulu pea mo te ʼuto ʼo te tagata solia​—ʼaē ʼe nofo ai tona ʼatamai. Ko te puloga ʼe fakatatau ki tatatou ʼamanaki faka Kilisitiano koteʼuhi ʼe ina puipui totatou ʼatamai. (1 Tesalonika 5⁠:⁠8) Logola kua fetogi totatou ʼatamai e te ʼatamai mālama totonu ʼo te Folafola ʼa te ʼAtua, kae ʼe kei tou vaivai pe pea mo heʼe haohaoa. ʼE kei fakahalaʼi gafua pe totatou ʼatamai. ʼE feala ki te ʼu fakatuʼutuʼu ʼo te tuʼu ʼaenī ke nātou fakahēhē tatou peʼe nātou pulihi te ʼamanaki ʼaē neʼe foaki mai e te ʼAtua. (Loma 7⁠:18; 12⁠:⁠2) Neʼe mole he fua ʼo te faiga ʼa te Tevolo ke ina faka lākahalaʼi ia Sesu, ʼi tana momoli age “te atu puleaga o te malama-nei mo onatou kololia.” (Mateo 4⁠:⁠8) Neʼe fakafeagai mālohi ia Sesu ki ai, pea neʼe ʼui fēnei e Paulo ʼo ʼuhiga mo ia: “ ʼUhi ko te fiafia ʼaē neʼe fakapapau age kia te ia, [ko Sesu] neʼe ina kātakiʼi te pou fakamamahi, ʼo ina meʼa noaʼi te ufiufi, pea heka ia ʼi te toʼomataʼu ʼo te hekaʼaga hau ʼo te ʼAtua.”​—Hepeleo 12⁠:​2, MN.

13. E feafeaʼi hatatou lava falala tuʼumaʼu ki te ʼamanaki?

¹³ Neʼe mole maʼu feiā pe e Sesu tana falala. Kapau ʼe tou fakafonu totatou ʼatamai ʼaki ni ʼu ʼamanaki peʼe ko ni ʼu fakatuʼutuʼu ʼo te tuʼu ʼaenī kae mole tou haga sio maʼu ki te ʼamanaki, ʼe vaivai anai tatatou tui ki te ʼu fakapapau ʼa te ʼAtua. ʼAki te temi, ʼe feala pe anai ke puli katoa ai tatatou ʼamanaki. Tahi ʼaē meʼa, kapau ʼe tou metitasioʼi tuʼumaʼu te ʼu fakapapau ʼa te ʼAtua, ʼe tou fiafia tuʼumaʼu anai ʼi te ʼamanaki ʼaē ʼe tou maʼu mai ai.​—Loma 12⁠:⁠12.

14, 15. (a) Koteā tatatou heletā fakatātā, pea ʼe lava fakaʼaogaʼi feafeaʼi? (b) Koutou toʼo he faʼifaʼitaki ʼo te tokoni mai ʼa te heletā ʼo te laumālie ke tou tekeʼi te ʼu fai fakahala.

¹⁴ Te heletā ʼo te laumālie. Ko te folafola ʼa te ʼAtua, peʼe ko te logo, ʼaē ʼe tuʼu ʼi te Tohi-Tapu ʼe hage ko he heletā māsila mata lua ʼe feala ke ina holoʼi te ʼu akonaki hala pea mo tokoni ki te hahaʼi faitotonu ke nātou maʼu te ʼāteaina fakalaumālie. (Soane 8⁠:32; Hepeleo 4⁠:12) Ko te heletā fakalaumālie ʼaia ʼe ina lava puipui tatou mokā tou mamahi ʼi te ʼu ʼahiʼahi, peʼe ko te ʼu faiga ʼa te kau ʼaposita ke nātou maumauʼi tatatou tui. (2 Kolonito 10⁠:​4, 5) ʼE tou fakafetaʼi heʼe ko ‘te Tohi-Tapu katoa ʼe haʼu mai te ʼAtua pea ʼe ina teuteuʼi fakalelei tatou ki te ʼu gāue lelei fuli’!​—2 Timoteo 3⁠:​16, 17.

¹⁵ ʼI tona fakahalaʼi e Satana ʼi te toafa, neʼe fakaʼaogaʼi fakalelei e Sesu te heletā ʼo te laumālie moʼo tauʼi te ʼu manatu hala pea mo te ʼu kākā. ʼI tana tauʼi te ʼu fakaneke fuli ʼa Satana, neʼe ina tali fēnei age: “ ʼE tohi fēnei.” (Mateo 4⁠:​1-11, MN ) ʼI Sepania, neʼe tokoni te Tohi-Tapu kia Tavite ia te Fakamoʼoni ʼa Sehova ke ina tekeʼi te ʼu fai fakahala. ʼI tona taʼu 19, neʼe ʼui age e te fafine kei finemui neʼe kaugā gāue mo ia ʼi te sosiete fakamaʼa, ke nā “fakatahi.” Neʼe fakafisi ia Tavite ki tana ʼu fai fakahala, pea neʼe ina kole ki tona pule gāue ke fetogi ia ia ki he tahi koga meʼa, ke mamaʼo mai te ʼaluʼaga ʼaia. Neʼe ʼui fēnei e Tavite: “Neʼe ʼau manatuʼi te faʼifaʼitaki ʼa Sosefo. Neʼe ʼau fai ohage ko ia, ʼo ʼau fakafeagai ki te aga heʼeʼaoga pea mo ʼau foimo hola mai ai.”​—Senesi 39⁠:​10-12.

16. Koutou fakamahino pe koʼe ʼe tonu ke tou akoako ‘te fakaʼaogaʼi lelei ʼo te folafola ʼo te moʼoni.’

¹⁶ Neʼe toe fakaʼaogaʼi e Sesu ia te heletā ʼo te laumālie moʼo tokoni ki ʼihi hahaʼi ke nātou hāo mai te pule ʼa Satana. Neʼe ʼui fēnei e Sesu: “Ko taku akonaki e mole a aku kae a ia ae nee ina fekaui mai au.” (Soane 7⁠:16) Moʼo faʼifaʼitakiʼi te faiakonaki faiva ʼa Sesu, ʼe tonu ke tou akoako. ʼO ʼuhiga mo te kau solia Loma, neʼe tohi fēnei e te tagata Sutea fai hisitolia ko Josèphe: “Ko te ʼu tagata solia fuli neʼe nātou akoako tau ʼi te ʼaho fuli, pea neʼe nātou faiga mālohi ohage pe ʼe nātou tau moʼoni, koia ʼaē neʼe nātou lava kātakiʼi ai tonatou gaʼegaʼe mokā nātou tau.” ʼI tatatou tau fakalaumālie, ʼe tonu ke tou fakaʼaogaʼi te Tohi-Tapu. Tahi ʼaē meʼa, ʼe tonu ke ‘tou faiga fakamalotoloto ke tou tutuʼu ia muʼa ʼo te ʼAtua ohage ko he ʼu tagata ʼe ʼofa kiai, ko he ʼu tagata gāue ʼe mole nātou ufiufi ʼi he meʼa, ʼe nātou fakaʼaogaʼi lelei te folafola ʼo te moʼoni.’ (2 Timoteo 2⁠:15) ʼE tou fiafia lahi mokā tou fakaʼaogaʼi te Tohi-Tapu moʼo tali ki he tahi ʼe fai mai hana fehuʼi fakamalotoloto!

Koutou Faikole ʼi Te ʼu Lakaga Fuli Pe

17, 18. (a) E ʼaoga feafeaʼi te faikole moʼo fakafeagai ki te ʼu fai fakahala ʼa Satana? (b) Koutou toʼo he faʼifaʼitaki moʼo fakamahino te maʼuhiga ʼo te faikole.

¹⁷ ʼI tana ʼosi talanoa ki te teu tau katoa fakalaumālie, ʼe toe palalau ia Paulo ki te tahi tokoni maʼuhiga. Moʼo fakafeagai kia Satana, ko te kau Kilisitiano ʼe tonu ke nātou fakaʼaogaʼi “ia faahiga faikole pea mo kole fuape.” ʼO feafeaʼi? Neʼe tohi fēnei e Paulo: ‘Koutou haga faikole ʼi te ʼu lakaga fuli pe ʼi te laumālie.’ (Efeso 6⁠:​18) Ka tou tau mo he ʼu fai fakahala, mo he ʼu ʼahiʼahi, peʼe ko he lotovaivai, ʼe fakaloto mālohiʼi ʼaupito tatou e te faikole. (Mateo 26⁠:41) Ko Sesu “neʼe ina momoli ʼaki te ʼu lāuga mālohi pea mo te ʼu loʼimata, tana ʼu kole mamahi pea mo tana ʼu tagi kia te Ia ʼaē ʼe feala ke ina hāofaki ia ia mai te mate pea neʼe tali lelei ia ia ʼuhi ko tana manavasiʼi ki te ʼAtua.”​—Hepeleo 5⁠:​7, MN.

¹⁸ Ko Milagros, ʼaē neʼe tokaga ki te mahaki ʼo tona ʼohoana ia taʼu e 15 tupu, ʼe ina ʼui fēnei: “Ka ʼau lotovaivai, ʼe ʼau faikole kia Sehova. ʼE mole he tahi age meʼa ʼe lava tokoni mai kia ʼau. ʼE moʼoni, ʼe ʼi ai ʼihi temi neʼe kua ʼau lotovaivai ai. Kae ʼi te temi fuli pe neʼe ʼau faikole ai kia Sehova, neʼe ʼau lotomālohi ai.”

19, 20. Koteā ʼaē ʼe tonu ke tou fai ke feala hatatou mālo ʼi tatatou tauʼi ia Satana?

¹⁹ ʼE ʼiloʼi e te Tevolo kua nounou tona temi pea ʼe ina faka ʼāʼāsili tana ʼu fai fakahala. (Apokalipesi 12⁠:​12, 17) ʼE tonu ke tou fakafeagai mālohi ki te fili mālohi ʼaia pea mo “tau te tau matalelei ʼo te tui.” (1 Timoteo 6⁠:12, MN ) ʼE ʼaoga ai kia tatou ia te mālohi ʼaē ʼe fakalaka ʼi te mālohi māhani. (2 Kolonito 4⁠:⁠7) ʼE toe ʼaoga foki te tokoni ʼa te laumālie maʼoniʼoni ʼa te ʼAtua koia ʼaē ʼe tonu ai ke tou kole te faʼahi ʼaia. Neʼe ʼui fēnei e Sesu: “Kapau ko koutou, logope takotou agakovi, ʼe koutou popoto ʼi te foaki ki ʼakotou ʼu fānau he ʼu meʼa ʼofa ʼe lelei, e feafeaʼi leva la te lahi ake ia ʼo te foaki e te Tāmai ʼaē ʼi selo te laumālie maʼoniʼoni kia nātou ʼaē ʼe nātou kole kia te ia!”​—Luka 11⁠:​13, MN.

²⁰ ʼE mahino mai, ʼe maʼuhiga ke tou kofuʼi te teu tau katoa ʼaē ʼe foaki mai e Sehova. Moʼo kofuʼi te teu tau fakalaumālie ʼaia, ʼe tonu ke tou fakatuputupu ni ʼu kalitate ʼe leleiʼia e te ʼAtua, ohage la ko te tui pea mo te faitotonu. ʼE tonu ke tou manako ki te moʼoni ohage ʼe tou kofuʼi ʼaki ia tatou, ke tou tokalelei moʼo tala ʼo te logo lelei ʼi te lakaga fuli pe, pea mo tou manatuʼi tuʼumaʼu ia te ʼamanaki. ʼE tonu ke tou akoako ʼi te fakaʼaogaʼi fakalelei ʼo te heletā ʼo te laumālie. Kapau ʼe tou kofuʼi te teu tau katoa ʼo te ʼAtua, pea ʼe feala anai ke tou mālo ʼi tatatou tauʼi te ʼu laumālie mālohi agakovi pea ʼe feala moʼoni anai ke tou faka kolōliaʼi te huafa maʼoniʼoni ʼa Sehova.​—Loma 8⁠:​37-39.

[Kiʼi nota]

ʼE Koutou Tali Feafeaʼi Anai?

• Ko ai te faʼifaʼitaki lelei ʼo ʼuhiga mo te kofuʼi ʼo te teu tau fakalaumālie, pea he koʼe ʼe tonu ke tou vakaʼi fakalelei tana faʼifaʼitaki?

• ʼE tou lava puipui feafeaʼi totatou ʼatamai mo totatou loto?

• E tou lava liliu feafeaʼi ʼo faiva ʼi te fakaʼaogaʼi ʼo te heletā ʼo te laumālie?

• He koʼe ʼe tonu ke tou faikole ʼi te lakaga fuli pe?

[Paki ʼo te pasina 17]

Ko te ako leleiʼi ʼo te Tohi-Tapu ʼe ina uga ai tatou ke tou tala te logo lelei ʼi te lakaga fuli pe

[Paki ʼo te pasina 18]

ʼE tokoni mai tatatou ʼamanaki ke tou tauʼi te ʼu ʼahiʼahi

[Paki ʼo te pasina 19]

ʼE koutou fakaʼaogaʼi koa “te heletā ʼo te laumālie” ʼi te minisitelio?