ʼE Koutou ʼIloʼi Koa Te Fiafia ʼAē ʼe Maʼu Mai Te Foaki?
KO TE tuagaʼane neʼe kua teitei taʼu 50 tana kau ki te gāue faka Kilisitiano. Logope kua vaivai ʼuhi ko tana kua finematuʼa, kae neʼe lotomālohi ke ʼalu ʼo mamata ki te Fale foʼou ʼo Te Puleʼaga. Neʼe tapiki ki te nima ʼo te tēhina neʼe tokoni age, pea neʼe hū ki te fale fono pea neʼe haʼele māmālie ʼo aʼu pe ki te faʼahi ʼaē neʼe fia ʼalu kiai—ia te kesi ʼaiʼaga meʼa ʼofa. Neʼe ina ʼai ki loto te kiʼi foʼi falā neʼe ina taupau maʼu ki te faʼahi ʼaia. Logope neʼe mole lava ki te gāue laga fale, kae neʼe fia tokoni kiai.
ʼAki te fakamatala ʼaenī ʼo te fafine Kilisitiano, ʼe lagi koutou manatuʼi te tahi fafine agatonu—te “fafine vītua” ʼaē neʼe sioʼi e Sesu ʼi tana momono te ʼu kiʼi foʼi piesi ki te tānakiʼaga koloā ʼo te fale lotu. ʼE mole fakamatala mai te ʼu ʼaluʼaga ʼo tona maʼuli, kae ʼi te temi ʼaia ko he fafine neʼe mole kei ʼi ai hona ʼohoana neʼe ko he fafine masiva. ʼE mahino ia neʼe malave te faʼahi ʼaia ki te loto ʼo Sesu, koteʼuhi neʼe mahino kātoa ki te meʼa ʼaē neʼe fai e te fafine ʼaia. ʼI tana fakahā ki tana kau tisipulo ia te faʼifaʼitaki ʼa te fafine, neʼe ina tala age ko te kiʼi meʼa ʼofa ʼaē neʼe ina foaki, neʼe ko “te meʼa kātoa ʼaē neʼe ina maʼu, tana paʼaga fuli.”—Maleko 12:41-44, MN.
He koʼe koa neʼe fai e te fafine vītua masiva ʼaia ia he toe sakilifisio feiā? ʼE mahino mai, neʼe ina fai ʼuhi ko tana pipiki mālohi kiā Sehova ʼAtua, ʼaē neʼe fakahoko ki ai ia te atolasio ʼi te fale lotu ʼi Selusalemi. Logope neʼe mole lahi te meʼa ʼaē neʼe ina lava fai, kae neʼe fia lagolago ki te tauhi taputapu. Pea neʼe lagi fiafia ʼaupito ʼi tana foaki meʼa ʼofa moʼo lagolago ki te faʼahi ʼaia.
He ʼu Meʼa ʼOfa Moʼo Lagolago Ki Te Gāue ʼa Sehova
Ko te ʼu koloā pea mo te falā neʼe ko he ʼu meʼa ʼofa neʼe ʼaoga tuʼumaʼu ʼi te tauhi maʼa, pea neʼe ko he ʼu faʼahi neʼe maʼu tuʼumaʼu ai he fiafia lahi. (1 Fakamatala 29:9) ʼI te Iselaele ʼāfea, neʼe mole gata pe te fakaʼaogaʼi ʼo te ʼu meʼa ʼofa ki te fakamataleleiʼi ʼo te fale lotu, kae neʼe toe fakaʼaogaʼi foki moʼo taupau ia te ʼu gāue kehekehe ʼaē neʼe fai ʼi te ʼaho fuli ʼo ʼuhiga mo te tauhi kiā Sehova. Neʼe tohi ʼi te Lao ko te ʼu foha ʼo Iselaele ʼe nātou foaki anai te ʼu vaega hogofulu ʼo tonatou ʼu koloā moʼo tokoni ki te kau Levite, ʼaē neʼe nātou fakahoko te ʼu gāue ʼi te fale lotu. Kae neʼe tonu foki mo te kau Levite ke nātou fai meʼa ʼofa kiā Sehova ʼo nātou foaki te vaega hogofulu ʼo te ʼu meʼa ʼofa ʼaē neʼe foaki age kiā nātou.—Faka au 18:21-29.
Logope kua faka ʼāteaina ia te kau Kilisitiano mai te ʼu fakamaʼua ʼo te fuakava ʼo te Lao, kae ʼe kei hoko atu pe te fai meʼa ʼofa ʼa te kau kaugana ʼa te ʼAtua moʼo lagolago ki te tauhi moʼoni. (Kalate 5:1) Pea tahi ʼaē meʼa, maʼa te kau Kilisitiano ʼo te ʼuluaki sēkulō neʼe ko meʼa fakafiafia hanatou fai meʼa ʼofa ki ʼonatou tēhina māsisiva. (Gaue 2:45, 46) Neʼe fakamanatuʼi e te ʼapositolo ko Paulo ki te kau Kilisitiano te lahi ʼo te ʼu meʼa lelei ʼe foaki age e te ʼAtua kiā nātou, ʼo toe feiā pe mo nātou, ʼe tonu ke nātou foaki lahi ki niʼihi. Neʼe ina tohi fēnei: “Fakatotonu ki te hahai maumea o te malama aeni, ke aua tanatou fiameamea mo tanatou tuku tanatou falala ki he u koloa fakalakilua, kae ki te Atua ae e ina fakakoloa mai tatou, aki te meafuape, tou fakafiafia ai. Ke natou gaue ki te lelei, mo fakakoloa natou i te u gaue lelei mo taulekaleka, ke lahi tanatou faiʼofa pea mo mauli vaevae. E natou tanaki ai maʼanatou he koloa mauhiga ki te kahau, koteuhi ke natou mau te mauli mooni.” (1 Timoteo 6:17-19; 2 Kolonito 9:11) ʼI tona fakahagatonu, ʼaki te meʼa ʼaē neʼe kua ina fai e ia totonu, neʼe lava fakamoʼoni e Paulo ki te ʼu palalau ʼaenī ʼa Sesu: “ ʼE lahi age te fiafia ʼi takita foaki, ʼi takita tali.”—Gaue 20:35, MN.
Ko Te ʼu Meʼa ʼOfa ʼa Te Kau Kilisitiano Ia ʼAho Nei
Ia ʼaho nei, ko te kau kaugana ʼa Sehova ʼe kei nātou hoko atu te fakaʼaogaʼi ʼo tonatou ʼu koloā moʼo fetokoniʼaki pea mo lagolago ki te gāue ʼa te ʼAtua. Māʼia mo nātou ʼaē ʼe mole lahi honatou ʼu koloā, kae ʼe nātou foaki meʼa ʼofa ʼo mulimuli ki tonatou ʼu fealagia. ʼE mahino ki “te tagata kaugana agatonu mo poto,” iā muʼa ʼo Sehova, ʼe maʼua ke ina fakaʼaogaʼi fakalelei te ʼu meʼa ʼofa fuli ʼaia. (Mateo 24:45, MN ) ʼE fakaʼaogaʼi te ʼu paʼaga ʼaia moʼo fakahaʼele te ʼu pilo ʼo te ʼu filiale, moʼo fakaliliu pea mo fai te ʼu Tohi-Tapu mo te ʼu tohi faka Tohi-Tapu, moʼo fakatuʼutuʼu he ʼu fakatahi lalahi faka Kilisitiano, moʼo fai ʼo te ako ʼa te ʼu tagata taupau feʼoloʼaki mo te kau misionea pea mo tanatou ʼu fefolauʼaki, mo te fetuku meʼa ʼofa moʼo tokoni kiā nātou neʼe tau mo he tuʼutāmaki, ʼo feiā mo te tahi age ʼu tuʼuga fakatuʼutuʼu maʼuhiga. Tou vakaʼi age muʼa te fakatuʼutuʼu—ʼaē ko te laga ʼo he ʼu fale fono.
ʼI te vāhaʼa fuli, ʼe lahi te ʼu fono ʼa te kau Fakamoʼoni ʼa Sehova ʼi tonatou ʼu Fale ʼo Te Puleʼaga, ʼo nātou ako ai te ʼu meʼa fakalaumālie pea mo nātou fakatahitahi ai mo he ʼu hahaʼi lelei. Kae ʼi te ʼu fenua ʼaē ʼe mole lelei ai te maʼuli faka ekonomika, ʼe faigataʼa ki te kau Fakamoʼoni ke nātou laga honatou Fale ʼo Te Puleʼaga mo kapau ʼe mole fai age he tokoni faka paʼaga. ʼI te taʼu 1999, neʼe fakatuʼutuʼu ai e te kau Fakamoʼoni ʼa Sehova ke nātou fakaʼaogaʼi te falā mai te ʼu fenua koloaʼia moʼo laga te ʼu Fale ʼo Te Puleʼaga ʼi te ʼu fenua ʼaē ʼe māsisiva ʼaupito. Pea tahi ʼaē meʼa, neʼe foaki e te toko lauʼi afe tēhina mo tuagaʼane lotolelei ia tonatou temi pea mo tanatou poto gāue, ʼo nātou tautau ʼolo ʼo gāue ʼi te ʼu fenua mamaʼo ʼaia. Lolotoga te ʼu laga fale, ʼe akoako e te kau Fakamoʼoni ʼo te fenua ia te laga fale pea mo te taupau ʼo te ʼu fale ʼaia, pea ʼaki te Falā Ki Te ʼu Fale ʼo Te Puleʼaga neʼe lava totogi ai ia te ʼu meʼa gāue. Ko te kau Fakamoʼoni ʼaē ʼe nātou fakaʼaogaʼi ʼi te temi nei te ʼu fale fono foʼou ʼaia, ʼe nātou fakafetaʼi ki tonatou ʼu tēhina mo tuagaʼane ʼaē neʼe nātou foaki tonatou temi kiai pea mo tanatou falā. ʼI te māhina fuli, ʼe taupau lelei e te kau Fakamoʼoni ʼaia te Fale foʼou ʼo Te Puleʼaga pea mo tokoni ki te huʼi ʼo te ʼu maʼua ʼo te ʼu laga fale, pea mo tokoni ai ki te laga ʼo te tahi ʼu Fale foʼou ʼo Te Puleʼaga.
ʼE laga te ʼu Fale ʼo Te Puleʼaga ʼaki te ʼu meʼa gāue pea mo te ʼu faʼahiga faʼu fale ʼo te fenua. Ko te ʼu fale fono ʼaia ʼe hage pe tona faʼu ko te ʼu fale māhani, pea ʼe nātou matalelei pea mo ʼaoga lelei ki te ʼu fono. ʼI te temi ʼaē neʼe kamata ai te polokalama laga fale ʼi te taʼu 1999, neʼe kau kiai te ʼu fenua māsisiva e 40. Talu mai ai, ko te polokalama laga fale ʼaia neʼe fai ʼi te ʼu fenua feiā e 116, teitei pe ke fakalaka ʼi te vaelua ʼo te ʼu kokelekasio ʼa te kau Fakamoʼoni ʼa Sehova ʼi te malamanei kātoa. ʼI te ʼu taʼu e nima kua hili, ko Fale ʼo Te Puleʼaga e 9 000 tupu neʼe laga, ko tona fakafuafua ko fale foʼou e 5 neʼe laga ʼi te ʼaho! Kae ʼi te ʼu fenua ʼaia e 116, ʼe kei ʼaoga ke laga he tahi ʼu Fale ʼo Te Puleʼaga e 14 500. ʼAki te tapuakina ʼa Sehova pea mo te lotolelei pea mo te manavaʼofa ʼa te kau Fakamoʼoni ʼi te malamanei kātoa, ʼe mātou fakaʼamu ke feʼauga te paʼaga moʼo fai te ʼu laga fale ʼaia.—Pesalemo 127:1.
ʼE Faka Fealagia e Te ʼu Fale ʼo Te Puleʼaga Ia Te Tuputupu
ʼE malave feafeaʼi te ʼu faiga mālohi ʼaia ki te kau Fakamoʼoni ʼo te fenua pea mo te faka mafola ʼo te Puleʼaga? ʼE lahi te ʼu fenua, ʼe tuputupu ʼaupito ai te hahaʼi ʼaē ʼe ʼōmai ki te ʼu fono mokā ʼosi laga he fale fono foʼou. Neʼe hoko te meʼa feiā ʼi Burundi: “ ʼI te ʼosi laga pe ʼo te Fale ʼo Te Puleʼaga, neʼe fonu ʼaupito te nofoʼaki. Ohage la, neʼe ʼi ai te Fale ʼo Te Puleʼaga neʼe fakatahitahi kiai te toko 100 hahaʼi ʼi te ʼu fono. ʼAki tonatou Fale foʼou ʼo Te Puleʼaga, ʼe ko ʼona hekaʼaga e 150. Pea ʼi te ʼosi laga ʼo te fale fono, ko te toko 250 hahaʼi ʼaē neʼe kau mai ki te ʼu fono.”
He koʼe neʼe hoko te toe tuputupu feiā? ʼUluaki pe, heʼe ʼi te temi ʼaē neʼe mole ʼi ai he fale fono ʼa te kau fai faka mafola kae neʼe nātou fakatahitahi ʼi he lalo fuʼu ʼakau peʼe ko he gāueʼaga, neʼe tau mahalohalo te hahaʼi ʼo ʼuhiga mo nātou. ʼI te tahi fenua, ko te ʼu agamālohi ʼaē neʼe fakahoko e te hahaʼi ʼo te ʼu lanu kehekehe, neʼe fakapipiki ki te ʼu faʼahiga lotu ʼaē ʼe fakatahitahi feiā, pea ʼe fakamaʼua e te puleʼaga ki te ʼu lotu fuli, ke ʼi ai honatou ʼu fale lotu.
ʼAki te ʼu fale fono ʼaia, ʼe toe feala ai ki te kau Fakamoʼoni ʼa Sehova ke nātou fakahā ki te hahaʼi fuli ʼe mole ko nātou ko he kau tisipulo ʼa he tagata. ʼE tohi fēnei e te filiale ʼa te kau Fakamoʼoni ʼa Sehova ʼo Zimbabwe: “ ʼI muʼa atu, neʼe fono te ʼu tēhina ʼi te ʼu ʼapi, pea ko te hahaʼi ʼo te kolo neʼe nātou fakahigoaʼi te kokelekasio ʼaki te higoa ʼo te tagata ʼaē ʼoʼona te ʼapi. Neʼe nātou ʼui ko te ʼu tēhina ʼe nātou kau ki te lotu ʼo ʼaē mo ʼaē. Kae kua fetogi ʼi te temi nei, heʼe kua sisio lelei te hahaʼi ki te ʼu pano ʼe tohi lelei ai ‘Te Fale ʼo Te Puleʼaga ʼo te kau Fakamoʼoni ʼa Sehova.’ ”
ʼE Nātou Foaki ʼAki He Loto Fiafia
Neʼe tohi fēnei e te ʼapositolo ko Paulo: “E ofa te Atua kia ia ae e ina foaki fakafiafia.” (2 Kolonito 9:7) ʼE moʼoni ia, ʼe ko he tokoni lelei te foaki ʼo he ʼu meʼa ʼofa lahi. Kae ko te vaega lahi ʼo te falā ʼaē ʼe lagolago ki te gāue ʼa te kau Fakamoʼoni ʼa Sehova ʼe haʼu mai te ʼu puha tānaki meʼa ʼofa ʼo te ʼu Fale ʼo Te Puleʼaga. Peʼe lahi peʼe veliveli, kae ʼe maʼuhiga fuli te ʼu fai meʼa ʼofa pea ʼe mole tonu ke meʼa noaʼi. Koutou manatuʼi ko Sesu neʼe tuʼu ʼi he faʼahi neʼe lava sio ai ki te fafine vītua masiva ʼe ina foaki te ʼu kiʼi foʼi piesi veliveli e lua. Ko te kau ʼāselo pea mo Sehova neʼe nātou sisio mo nātou kiai. ʼE mole tou ʼiloʼi te higoa ʼo te fafine vītua ʼaia, kae neʼe loto e Sehova ke fakamatala ʼo talu ai ʼi te Tohi-Tapu ia te aga ʼaia neʼe ina fai mo tona loto kātoa.
ʼI tuʼa atu ʼo te lagolago ki te laga ʼo te ʼu Fale ʼo Te Puleʼaga, ʼe toe ʼaoga tatatou ʼu meʼa ʼofa ki te tahi ʼu koga ʼo te gāue maʼuhiga ʼo te Puleʼaga. Ka tou lagolago feiā, ʼe tou logoʼi ai he fiafia pea mo “lahiʼage ai te u fakafetai ki te Atua.” (2 Kolonito 9:12) ʼE fakamatala fēnei mai e totatou ʼu tēhina Kilisitiano mai Bénin: “ ʼI te ʼaho fuli, ʼe mātou fakahake he ʼu faikole fakafetaʼi kiā Sehova ʼo ʼuhiga mo te falā ʼaē ʼe foaki fakaʼofa mai e te ʼu tēhina mo tuagaʼane ʼi te malamanei kātoa.” ʼO toe feiā, ko tatou fuli ʼaē ʼe tou lagolago ʼaki tatatou falā ki te ʼu gāue ʼo te Puleʼaga, ʼe tou logoʼi ia te fiafia ʼaē ʼe tupu mai tatatou foaki!
[Talanoa ʼo te pasina 22, 23]
Te ʼu Faʼahiga Fai Moʼo Foaki
HE ʼU MEʼA ʼOFA KI TE GĀUE FAKA MALAMANEI
Ko te tokolahi ʼe nātou tānaki kehe hanatou foʼi falā ke nātou ʼai ki te ʼu kesi ʼaiʼaga meʼa ʼofa ʼaē ʼe tohi ai: “Te ʼu meʼa ʼofa ki te gāue faka malamanei—Mateo 24:14.”
ʼI te māhina fuli, ʼe momoli e te ʼu kokelekasio te falā ʼaia ki te filiale ʼo tonatou fenua. ʼE toe feala foki hatatou momoli fakahagatonu he ʼu meʼa ʼofa ki te filiale ʼo totatou fenua. ʼE feala ke tou foaki he ʼu faʼahiga koloā kehekehe. ʼE tonu ke tou momoli tahi mo te ʼu meʼa ʼofa ʼaia, he tohi ʼe ina fakamahino fakanounou ai te ʼu meʼa ʼofa ʼaia.
TE ʼU MEʼA ʼOFA ʼE FAKA TUʼAKOI
ʼE feala ke tou foaki he paʼaga ʼaki te faka tuʼakoi makehe ʼaenī kapau ʼe tou kole te paʼaga ʼaia, pea ʼe toe liufaki mai anai. Kapau ʼe koutou fia maʼu he tahi ʼu fakamahino, pea koutou faitohi ki te filiale.
KO HE MEʼA ʼOFA KUA FAKATUʼUTUʼU
ʼO hilifaki atu ki te ʼu meʼa ʼofa faka paʼaga ʼaia ʼaē ʼe mole honatou ʼu faka tuʼakoi pea mo te ʼu meʼa ʼofa ʼaē ʼe faka tuʼakoi, ʼe toe ʼi ai te tahi ʼu faʼahiga fai meʼa ʼofa moʼo lagolago ki te haʼele lelei ʼo te gāue faka malamanei ʼo te Puleʼaga. ʼE kau kiai te ʼu meʼa ʼaenī:
Polices dʼassurance: ʼE feala ke foaki ki te Sosiete Watch Tower he police dʼassurance peʼe ko he letelete / peʼe ko he posio.
Te Falā ʼi Te Fale Paʼaga: ʼO mulimuli ki te ʼu meʼa ʼaē ʼe fakamaʼua e te ʼu fale paʼaga ʼo tokotou fenua, ʼe feala ke koutou tuku te Sosiete Watch Tower ke taupau ki takotou falā ʼi te fale paʼaga, peʼe ko he compte dépôt, peʼe ko he compte de retrait personnel, peʼe feala ke fakatoʼo te ʼu meʼa ʼaia ki te Sosiete ʼi takotou mate.
Te ʼu Vahe ʼo He Matani Gāue: ʼE feala ke foaki ki te Sosiete Watch Tower te ʼu meʼa ʼaia ohage ko he meʼa ʼofa kātoa, peʼe ko he fakatuʼutuʼu ʼe faka fealagia ai kiā ia ʼaē ʼe ina foaki ke hoholo atu tana maʼu te paʼaga.
Te ʼu Kele Pea Mo Te ʼu Nofoʼaga: ʼE feala ke tou foaki te ʼu koloā ʼaia ʼaē ʼe feala hanatou fakatau, peʼe tou faka tuʼakoi ke feala hatatou fakaʼaogaʼi ʼi totatou temi maʼuli. ʼE tonu ke tou fakahā te faʼahi ʼaia ki te filiale ʼo totatou fenua ʼi muʼa ʼo tatatou foaki kiai te ʼu koloā ʼaia.
Te ʼu Pepa ʼAē ʼe Tohi Ai Te Loto Fakamuli ʼo He Tahi Pea Mo Te ʼu Kotala Fidéicommis: ʼE feala ke tou foaki he kele peʼe ko he paʼaga ki te Sosiete Watch Tower ʼo tou tohi ʼi he pepa totatou loto fakamuli, ʼo mulimuli pe ki te lao, peʼe toe feala ke tou fai te kotala fidéicommis ʼaē ʼe ʼui ai ʼe maʼu anai e te Sosiete totatou ʼu koloā ʼi tatatou ʼosi mate. ʼE lagi feala ke fakasiʼisiʼi te tukuhau ʼaē ʼe tonu ke totogi e ia ʼaē ʼe ina fai te kotala ʼaia, mo kapau ʼe fai mo te kautahi faka lotu.
Kapau ʼe koutou fia ʼiloʼi he tahi ʼu faʼahi ʼo ʼuhiga mo te ʼu fakatuʼutuʼu foaki meʼa ʼofa ʼaia, koutou faitohi ki te filiale ʼo tokotou fenua.
[Paki ʼo te pasina 20, 21]
Te ʼu fale fono ʼāfea pea mo te ʼu fale fono foʼou ʼa te kau Fakamoʼoni ʼa Sehova
Zambie
République Centrafricaine