“Ko Toku Tokoni ʼe Haʼu Mai Ia Sehova”

Ko Te Hahaʼi Mātutuʼa ʼe “Ko He Pale Matalelei”

NEʼE ʼui fēnei e te fafine ʼe taʼu 101, ʼe higoa ko Murielle: “ ʼE lelei tokotahi te maʼuli ʼaenī kua au maʼu.” Koʼeni te manatu ʼa Theodoros, ʼaē ʼe taʼu 70: “ ʼE ko he pilivilesio moʼoni!” Neʼe ʼui fēnei e Maria, ʼaē ʼe taʼu 73: “Mole he tahi age faʼahiga fakaʼaogaʼi lelei ʼo toku maʼuli.” Ko nātou fuli ʼaia neʼe nātou tauhi ʼi tonatou maʼuli kātoa kiā Sehova ʼAtua.

ʼI te malamanei kātoa, tokolahi te hahaʼi mātutuʼa feiā ʼe nātou atolasio pea mo nātou gāue lahi kiā Sehova. Logola tanatou kua vaivavai, mo māhahaki, pea mo tanatou tahi ʼu faigataʼaʼia, kae ʼe kei nātou tauhi kiā Sehova ʼaki tonatou loto kātoa. ʼI te kokelekasio faka Kilisitiano, ko te kau mātutuʼa agatonu ʼaia ʼe ko he ʼu faʼifaʼitaki ʼe fakaʼapaʼapaʼi ʼuhi ko tanatou tauhi fakamalotoloto. ʼE maʼuhiga ʼaupito kiā Sehova te tauhi ʼa te kau mātutuʼa, tatau aipe peʼe mole lagi feala anai ke lahi age tanatou gāue ʼuhi ko tonatou ʼu ʼaluʼaga takitokotahi.a​—2 Kolonito 8:12.

ʼE fakahā ʼi te tohi ʼo Pesalemo te manatu ʼe tāu mo feʼauga ʼo ʼuhiga mo te maʼuli lelei ʼaē ʼe feala ke maʼu e te kau mātutuʼa. ʼE feala ke nātou hage ko he fuʼu ʼakau lahi kua matuʼa kae ʼe fua tuʼumaʼu pe. ʼO ʼuhiga mo te kau mātutuʼa ʼaē ʼe nonofo agatonu, neʼe hiva fēnei te tagata fai pesalemo: “ ʼE nātou toe tuputupu anai ʼi tonatou temi matuʼa, ʼe nātou haga sino lelei anai pea mo mālolohi.”​—Pesalemo 92:14.

ʼE lagi tuʼania ʼihi kua mātutuʼa naʼa līʼakina nātou pea mole kei tokagaʼi nātou mokā hoko mai anai tonatou temi vaivai matuʼa. Neʼe kole fēnei e Tavite ki te ʼAtua: “ ʼAua naʼa ke fakafisi kiā te au ʼi toku temi matuʼa; ʼi te temi ʼaē ʼe vaivai ai toku mālohi, ʼaua naʼa ke tuku au.” (Pesalemo 71:9) Koteā te kehekehe ʼo te vaivai pea mo te tuputupu ʼi te temi matuʼa? Ko te kalitātē fakaʼatua ʼaē ko te faitotonu. Neʼe hiva fēnei ia te tagata fai pesalemo: “ ʼE fisi anai te tagata agatonu ohage ko he fuʼu palema.”​—Pesalemo 92:12.

Ko nātou ʼaē neʼe lahi tanatou gāue agatonu ki te ʼAtua ʼi tonatou temi mālolohi, ʼi te agamāhani ʼe kei lahi pe tanatou ʼu gāue ʼi tonatou temi mātutuʼa. ʼE moʼoni, ko te ʼu meʼa neʼe nātou fai ʼi tonatou maʼuli peʼe ko tanatou tokoni ki te hahaʼi, neʼe maʼu ai tona ʼu fua lelei, ohage ko te ʼu pulapula ʼaē ʼe talamuko ake pea mo matutuʼa, ʼo tokalelei ki he taʼukai lahi. (Kalate 6:​7-​10; Kolose 1:​10) ʼE mahino ia, ko te hahaʼi ʼaē neʼe nātou fakaʼaogaʼi tonatou maʼuli moʼo kumi pe te ʼu meʼa ʼaē ʼe nātou loto kiai, ʼo mole nātou tokagaʼi te ʼu ala ʼo te ʼAtua, ʼi te agamāhani mokā nātou mātutuʼa, pea ʼe mole faʼa tokagaʼi nātou.

ʼE toe fakahā lelei ʼi te Tohi-Tapu, ʼi te tohi ʼo Tāʼaga Lea, ko te faitotonu ʼe ko he meʼa fakamatalelei ʼo te temi matuʼa. ʼE tou lau fēnei: “Ko te ʼu ʼulu hina ʼe ko he pale matalelei mokā ʼe nātou nonofo ʼi te ala ʼo te faitotonu.” (Tāʼaga Lea 16:31) Ei, ko te faitotonu ʼe ko te fakahā ʼaia ʼo te matalelei ʼo te loto. Kapau ʼe faitotonu he tahi ʼi tona maʼuli pea ʼe fakaʼapaʼapaʼi anai. (Levitike 19:32) Ko he tahi kua matuʼa pea mo ina maʼu te poto pea mo te vilitute, ʼe fakaʼapaʼapaʼi ia ia.​—Sopo 12:12.

ʼE ko he meʼa matalelei kiā Sehova, he tahi ʼe nofo agatonu ʼi tana tauhi. ʼE ʼui fēnei ʼi te Tohi-Tapu: “ ʼO aʼu ki tokotou temi matuʼa [ko au Sehova] ʼe au Tatau aipe; pea ʼo aʼu ki tokotou ʼulu hina, ko au, ʼe au lagolago aipe kiā koutou. Ei, ʼe au fai anai ke au ʼamo pea ke au lagolago pea mo au fakahāo koutou.” (Isaia 46:4) ʼE ko he meʼa fakaloto fīmālie lahi te ʼiloʼi ʼaē ko tatatou Tāmai ʼaē ʼe ʼi selo, ʼe ina fakapapau ʼe tokoni pea mo lagolago ki te kau mātutuʼa ʼaē ʼe nonofo agatonu!​—Pesalemo 48:14.

Kapau ʼe ko he meʼa matalelei kiā Sehova he tahi neʼe ina fakaʼaogaʼi tona maʼuli moʼo tauhi agatonu kiā te ia, pea ʼe tonu mo tatou ke tou fakaʼapaʼapaʼi feiā ki ai. ʼI tatatou faʼifaʼitakiʼi te manatu ʼa te ʼAtua, ʼe tou ʼoʼofa ki totatou ʼu tēhina mo tuagaʼane ʼaē kua mātutuʼa. (1 Timoteo 5:​1, 2) Tou kumi he ʼu ʼaluʼaga ke tou fakahā ai te ʼofa faka Kilisitiano, ʼo tou tōkakaga ki te ʼu meʼa ʼaē ʼe ʼaoga kiā nātou.

ʼI Tonatou Temi Matuʼa ʼe Nātou Haʼele ʼi Te Ala ʼo Te Faitotonu

ʼE ʼui papau fēnei e Salomone: “ ʼI te ala ʼo te faitotonu, ʼe kita maʼu ai te maʼuli.” (Tāʼaga Lea 12:28) Tatau aipe peʼe kua matuʼa he tahi, kae ʼe feala pe ke kamata haʼele ʼi te ala ʼaia ʼo te maʼuli. Ohage la, ʼi Moldavie, ko te tagata kua taʼu 99 neʼe ina fakaʼaogaʼi tona temi tūpulaga moʼo lagolago ki te ʼu manatu faka politike ʼo te Kominisi. Neʼe fia meʼa lahi he neʼe palalau ia mo te kau takitaki Kominisi ʼiloa, ohage ko te tagata pule ko Lénine. Kae ʼi te temi ʼaē neʼe faka haʼu ai ʼo puli te Kominisi, neʼe mole kei maʼu e te tagata matuʼa ʼaia he fakatuʼutuʼu pea mo he takitaki ʼi tona maʼuli. Koia ʼi te temi ʼaē neʼe fakahā age ai e te kau Fakamoʼoni ʼa Sehova ko te Puleʼaga ʼo te ʼAtua ʼe ko te puleʼaki pe ʼaia e tahi ki te ʼu fihifihia ʼo te malamanei, neʼe ina tali te moʼoni ʼo te Tohi-Tapu pea neʼe ina ako fakamalotoloto te Tohi-Tapu. Neʼe mate kae neʼe mole heʼeki papitema.

ʼI tana ʼiloʼi te ʼu fakamaʼua ʼa te ʼAtua ʼo ʼuhiga mo te aga ʼaē ʼe tonu ke fai, neʼe mahino ai ki te fafine taʼu 81 ʼi Hukalia, neʼe tonu ke ʼohoana mo te tagata ʼaē neʼe nā nonofo fakapōʼuli talu mai fualoa. Neʼe lototoʼa te fafine pea neʼe ina fakamahino age ki te tagata ʼaē neʼe nā nonofo ia te manatu ʼi te Tohi-Tapu. Neʼe punamaʼuli ʼaupito pea mo fiafia he neʼe tali e te tagata ke nā ʼohoana. ʼI tanā ʼosi ʼohoana, neʼe tuputupu vave ʼi te faʼahi fakalaumālie. Hili māhina e valu ʼi te ʼosi kamata ʼo tana ako Tohi-Tapu, neʼe liliu ai leva ko he kaugā fagona, pea mole fualoa pea neʼe papitema. ʼE matalelei moʼoni te kau mātutuʼa mokā nātou haʼele ʼi te faitotonu.

Ei, ʼe lava tui papau te kau Kilisitiano agatonu ʼaē kua mātutuʼa, ʼe tokaga te ʼAtua kiā nātou. ʼE mole līaki anai e Sehova ia nātou ʼaē ʼe nonofo agatonu kiā te ia. ʼE ina fakapapau ʼe ina takitaki, mo tokoni pea mo lagolago kiā nātou ʼi tonatou temi matuʼa. Pea ʼe nātou fakamoʼoni ki te ʼu palalau ʼaenī ʼa te tagata fai pesalemo: “Ko toku tokoni ʼe haʼu mai ia Sehova.”​—Pesalemo 121:2.

[Kiʼi nota]

[Fakamatala ʼo te pasina 9]

“Ko te ʼu ʼulu hina ʼe ko he pale matalelei mokā ʼe nonofo ia nātou ʼi te ala ʼo te faitotonu.”—TĀʼAGA LEA 16:31

[Talanoa ʼo te pasina 8]

ʼE TOKAGA IA SEHOVA KI TANA KAU KAUGANA ʼAĒ KUA MĀTUTUʼA

“ ʼE ke tuʼu ake anai ki ʼoluga ia muʼa ʼo te ʼu ʼulu hina, pea ʼe tonu anai ke ke fakaʼapaʼapa ki te tagata matuʼa.”—Levitike 19:32.

“ ʼO aʼu ki tokotou temi matuʼa ʼe au Tatau aipe; pea ʼo aʼu ki tokotou ʼulu hina, ko au, ʼe au lagolago aipe kiā koutou.”—Isaia 46:4.