Ko Te ʼu Lea Faka Polofeta Fuli Neʼe Talanoa Kiā Kilisito

“Neʼe fai te ʼu lea faka polofeta moʼo fakamoʼoni kiā Sesu.”​—Apokalipesi 19:10, MN.

1, 2. (a) Talu mai te taʼu 29 ʼo totatou temi, koteā te meʼa maʼuhiga ʼaē neʼe tonu ke fai e te kau Iselaele? (b) Koteā ʼaē ka tou vakaʼi anai ʼi te alatike ʼaenī?

ʼI TE taʼu 29 ʼo totatou temi, neʼe fakatalitali ia Iselaele ki te Mesia ʼaē neʼe fakapapauʼi mai. Pea neʼe ʼāsili tui ia te hahaʼi ki te haʼu ʼa te Mesia, ʼuhi ko te minisitelio ʼa Soane Patita. (Luka 3:15) Neʼe fakahā lelei age e Soane ʼe mole ko ia ko Kilisito, kae neʼe ko Sesu ʼo Nasaleti, ʼo ina ʼui fēnei: “Nee . . . au fakamooni e ko ia te Alo o te Atua.” (Soane 1:20, 34) Mole faʼa fualoa kiai, koʼeni te hahaʼi tokolahi ʼe nātou muliʼi ia Sesu ʼo fakalogo ki tana ʼu faiakonaki pea mo ina fakamālōlō ia nātou.

² ʼI te ʼu māhina ki muli age, neʼe foaki e Sehova ia te ʼu fakamoʼoni lahi ʼo ʼuhiga mo tona ʼAlo. Ko nātou ʼaē neʼe nātou ako ia te Tohi-Tapu pea mo sio ki te ʼu gāue ʼa Sesu, neʼe nātou maʼu ai he fakatafito mālohi ke nātou tui kiā te ia. Kae ʼe ʼasi mai ʼi te fuakava ʼaē neʼe fai e te hahaʼi mo te ʼAtua neʼe mole nātou tui. He neʼe tokosiʼi ia nātou ʼaē neʼe nātou fakamoʼoni ko Sesu ʼe ko Kilisito ia te ʼAlo ʼo te ʼAtua. (Soane 6:60-69) Kanapaula neʼe koutou māʼuʼuli ʼi te temi ʼaia, ʼe feafeaʼi anai ia takotou tali ia te faʼahi ʼaia? ʼE koutou tali anai koa ko Sesu ʼe ko te Mesia pea mo koutou liliu anai ko hana ʼu tisipulo agatonu? Koutou fakatokagaʼi ia te fakamoʼoni ʼaē neʼe foaki e Sesu totonu ʼo ʼuhiga mo ia ʼi te temi ʼaē neʼe tukugakoviʼi ai ʼaē ʼe ina maumauʼi ia te Sapato, pea mo koutou fakatokagaʼi ia te tahi ʼu fakamoʼoni neʼe ina foaki moʼo fakaloto mālohiʼi ia te tui ʼo tana ʼu tisipulo agatonu.

Neʼe Foaki e Sesu Totonu Ia Te Fakamoʼoni

3. Ko te ʼu ʼaluʼaga fea ʼaē neʼe tonu ai ke fakahā e Sesu ia he fakamoʼoni ʼo ʼuhiga mo ia?

³ ʼI te Pāsikate ʼo te taʼu 31 ʼo totatou temi, neʼe nofo ia Sesu ʼi Selusalemi. Neʼe hoki ʼosi atu pe tana fakamālōlō ia te tagata neʼe mahaki ia taʼu e 38. Kae ko te kau Sutea neʼe nātou tukugakoviʼi ia Sesu ʼi tana fai ia te fakamālōlō ʼaia ʼi te Sapato. Neʼe nātou toe tukugakoviʼi ia ia ʼo nātou ʼui neʼe fasituʼu pea mo nātou fia matehi ia ia koteʼuhi neʼe ina ʼui ko tana Tāmai ʼe ko te ʼAtua. (Soane 5:1-9, 16-18) Ko te tali ʼaē neʼe fai e Sesu maʼa ia totonu, neʼe ina fakahā ai ia te ʼu manatu mālohi e tolu moʼo fakalotoʼi ia te kau Sutea fuli ʼaē neʼe agatonu, ke nātou ʼiloʼi pe ko ai moʼoni ia Sesu.

4, 5. He koʼe neʼe fai faka mafola ia Soane, pea neʼe koteā tona ʼu fua lelei?

⁴ ʼUluaki, neʼe fakahā e Sesu ia te fakamoʼoni ʼo tana tagata fakamelomelo, ia Soane Patita, ʼo ʼui maʼana: “Neʼe koutou fekauʼi te ʼu tagata kiā Soane, pea neʼe fakamoʼoni e ia ki te moʼoni. Ko te tagata ʼaia neʼe ko he mālama neʼe mū pea mo gigila, pea ʼi he kiʼi temi nounou pe, neʼe koutou fia fakafiafia ʼaupito ʼi tona mālama.”​—Soane 5:33, 35, MN.

⁵ Ko Soane Patita neʼe ko “he mālama neʼe mū pea mo gigila” heʼe logola ia tona pilisoniʼi hala e Helote, kae neʼe ina fakahoko ia te fakatotonu ʼa te ʼAtua ʼaē ke ina teuteuʼi ia te ala ʼo te Mesia. Neʼe ʼui fēnei e Soane: “Ke fakaha iaʼia ki Iselaele, koena te tupuaga o taku haù o fai papitema i te vai. . . . Nee au mamata ki te Laumalie, e hage he lupe, nee hifo ifo mai te lagi o nofo ia te ia. Pea mo au, nee mole au iloi ia, kae ko ia ae nee ina fekaui mai au ke au fai papitema i te vai, nee ina tala mai kia te au: ‘Ko te fuga ulu o ia ae e au sio anai ki te hifo ifo a te Laumalie o nofo ai, e ko ia ae e fai papitema i te Laumalie-Maonioni. Pea nee au mamata mo au fakamooni e ko ia te Alo o te Atua.’ ”a (Soane 1:26-37) Neʼe fakahā lelei e Soane ko Sesu ʼe ko te ʼAlo ʼo te ʼAtua​—ia te Mesia ʼaē neʼe fakapapauʼi mai. Koia ʼi te mahino lelei ʼo te ʼu fakamoʼoni ʼa Soane, hili pe māhina e valu ki tona mate, tokolahi ʼi te kau Sutea agatonu neʼe nātou ʼui fēnei: “Kua mooni te meafuape nee tala e Soane o uhiga mo ia aeni.”​—Soane 10:41, 42.

6. He koʼe neʼe feala ʼaki te ʼu gāue ʼa Sesu ke sio ia te hahaʼi ki te tokoni age ʼaē ʼa te ʼAtua kiā te ia?

⁶ Lua, neʼe fakaʼaogaʼi e Sesu ia te tahi fakamoʼoni moʼo fakamoʼoni ʼaki ko ia ko te Mesia. Neʼe talanoa ki tana ʼu gāue lelei moʼo fakamoʼoni ki te tokoni age ʼaē ʼa te ʼAtua kiā te ia. Neʼe ina ʼui fēnei: “Kae e au maù te fakamooni e lahiʼage i te fakamooni a Soane: ko te u gaue ke au fakahoko, nee foaki mai kia te au e te Tamai ae nee ina fekaui mai au.” (Soane 5:36) Māʼiape la mo te ʼu fili ʼo Sesu neʼe mole feala ke nātou fakafeagai ki te fakamoʼoni ʼaia, ʼaē neʼe ko te ʼu tuʼuga milakulo. Ki muli age, neʼe fehuʼi fēnei e ʼihi: “Pe kotea he mea ke tou fai, koteuhi e lahi te u fakailoga e fai e te tagata-nei.” (Soane 11:47) Kae ko ʼihi neʼe nātou tali fakalelei pea mo ʼui fēnei: “Ka haʼu anai ia Kilisito, ʼe ina fai anai koa he ʼu fakaʼiloga ʼo lahi ake ʼi te ʼu meʼa ʼaē neʼe fai e te tagata ʼaenī?” (Soane 7:31, MN ) Neʼe ko he faigamālie ʼaia ki te hahaʼi ʼaē neʼe fagono ki te ʼu faiakonaki ʼa Sesu ke nātou sisio ʼi te ʼAlo ia te ʼu kalitate ʼo tana Tāmai.​—Soane 14:9.

7. Koteā ʼaē ʼe fakamoʼoni kiai ia te Tauhi ʼĀfea ʼo ʼuhiga mo Sesu?

⁷ Tolu leva, neʼe foaki e Sesu ia te fakamoʼoni ʼe mole feala hona fakafihiʼi. Neʼe ina ʼui fēnei: “Ko te Tohi-Tapu . . . e fakamooni mai kia te au. He kapau nee koutou tui kia Moisese, pea nee koutou tui mai kia te au, he ko te mea nee ina tohi e uhiga ia mo au.” (Soane 5:39, 46) Ei, ʼi muʼa ʼo te temi ʼo Sesu, neʼe kau ia Moisese ʼi te kau Fakamoʼoni ʼaē neʼe nātou faitohi ʼo ʼuhiga mo Kilisito. ʼI tanatou ʼu tohi, ko te ʼu lea faka polofeta e lauʼi teau pea mo te ʼu fakamatalatala ʼo ʼuhiga mo te ʼu hōloga, ʼe nātou talanoa fuli ki te Mesia. (Luka 3:23-38; 24:44-46; Gaue 10:43) Pea e feafeaʼi ki te Lao ʼa Moisese? Neʼe tohi fēnei e te ʼapositolo ko Paulo: “Pea liliu leva te Lao ko totatou faiʼako o kaku kia Kilisito.” (Kalate 3:24) Ei, “neʼe fai te ʼu lea faka polofeta [peʼe neʼe fakatuʼutuʼu] moʼo fakamoʼoni kiā Sesu.”​—Apokalipesi 19:10, MN.

8. He koʼe neʼe tokolahi ia te kau Sutea ʼaē neʼe mole tui ki te Mesia?

⁸ ʼE koutou tui anai koa ko Sesu neʼe ko te Mesia ʼaki ia te fakamoʼoni ʼa Soane, mo te ʼu gāue mālohi ʼa Sesu pea mo te ʼu kalitate ʼo te ʼAtua ʼaē neʼe ina maʼu, pea mo te ʼu tuʼuga fakamoʼoni faka Tohi-Tapu? Ko he tahi ʼe ʼofa moʼoni ki te ʼAtua pea mo tana Folafola, ʼe fakamoʼoni anai ki te faʼahi ʼaia pea mo faka tui ko Sesu ʼe ko te Mesia ʼaē neʼe fakapapauʼi mai. Kae ko te ʼofa ʼaia neʼe kua puli ʼi Iselaele. Neʼe ʼui fēnei e Sesu ki tona ʼu fili: “E au iloi koutou, e mole koutou maù ia koutou te ofa o te Atua.” (Soane 5:42) Neʼe mole nātou “kumi . . . te kolōlia ʼaē ʼe haʼu mai te ʼAtua tokotahi,” kae neʼe nātou “tali te kolōlia ʼaē ʼe [nātou] fefoakiʼaki.” Koia ʼaē neʼe tupu ai tanatou fakafeagai kiā Sesu ʼaē neʼe ʼofa ki tana Tāmai, he neʼe fehiʼa ki te taʼi manatu ʼaia!​—Soane 5:43, 44, MN; Gaue 12:21-23.

Neʼe Fakahā Fakatomuʼa Ia Te ʼu Meʼa Moʼo Fakamālohiʼi Ia Tanatou Tui

9, 10. (a) He koʼe neʼe matatonu ke foaki he fakaʼiloga fakaofoofo ki te kau tisipulo? (b) Koteā te fakapapau taulekaleka neʼe fai e Sesu ki tana ʼu tisipulo?

⁹ Kua hili ia te taʼu kātoa ki te temi ʼaē neʼe foaki ai e Sesu ia te fakamoʼoni fakatomuʼa ki tona ʼuhiga Mesia. Kua ʼosi mo te Pāsikate ʼo te taʼu 32 ʼo totatou temi. Tokolahi ʼaē neʼe tui kiā te ia neʼe mole kei nātou muli ia te ia, lagi heʼe ko te ʼu fakataga, mo te fia maʼu koloā, peʼe ko te ʼu tuʼania ʼo te maʼuli. Lagi ko ʼihi neʼe kua nātou lotolotolua peʼe nātou ʼiʼita he neʼe fakafisi ia Sesu ki tanatou ʼu faiga ʼaē ke nātou fakanofo hau ia ia. ʼI te temi ʼaē neʼe ʼahiʼahiʼi ai Sesu e te kau takitaki Sutea, neʼe mole ina fia foaki he fakaʼiloga mai te lagi moʼo faka kolōliaʼi ʼo ia totonu. (Mateo 12:38, 39) ʼI te fakafisi ʼaia ʼa Sesu, lagi neʼe tupu ai he lotolotolua ʼa ʼihi. Tahi ʼaē meʼa, neʼe fakahā e Sesu ia te meʼa neʼe mata faigataʼa ki tana ʼu tisipulo​—“e maua ia ke hake ki Selusalemi pea ke tali mamahi lahi mai te kau matua, mo te u pule pelepitelo pea mo te kau Sekelipa, ke tamatei.”​—Mateo 16:21-23.

¹⁰ Neʼe lagi kei toe māhina e hiva peʼe hogofulu, pea tonu ai leva kiā Sesu “ke mavae ia ʼi te malamanei ʼaenī ʼo ʼalu ki tana Tāmai.” (Soane 13:1, MN ) ʼI tana ʼofa ʼaupito ki tana ʼu tisipulo agatonu, neʼe fakapapau age e Sesu ki ʼihi ia nātou ia te meʼa ʼaē neʼe mole ina fia fakahā ki te kau Sutea heʼe tui​—he fakaʼiloga mai te lagi. ʼE ʼui fēnei e Sesu: “Mooni, e au tala atu kia koutou, e tutuu i heni, ia natou ae e mole natou iloi anai te mate, i mua o tanatou mamata ki te haele mai o te Foha o te tagata mo tona Puleagahau.” (Mateo 16:28) ʼE mahino ia, neʼe mole ʼui e Sesu ko ʼihi ʼi tana ʼu tisipulo ʼe nātou māʼuʼuli anai ʼo aʼu ki te temi ʼaē ka fakatuʼu ai te Puleʼaga Faka Mesianike ʼi te taʼu 1914. Neʼe fakatuʼutuʼu e Sesu ke ina fakahā ki ʼana tisipulo ʼofaina e toko tolu ia tona kolōlia ʼaē ka ina maʼu anai ʼi tona temi Hau ʼi te Puleʼaga. Neʼe higoa ia te meʼa ʼaia neʼe hā: ko te fetogi faka milakulo.

11. Koutou fakamatalatala ia te fetogi faka milakulo ʼa Sesu.

¹¹ Hili ʼaho e ono, pea ʼave e Sesu ia Petelo, mo Sakopo pea mo Soane ki te moʼuga māʼoluga​—lagi ko te tumutumu ʼo te Moʼuga ʼo Helemone. ʼI tanatou ʼi ai, ko Sesu “nee fetogi fofoga i onatou mua, nee huhulu ona fofoga o hage ko te laa, pea nee mamaʼa ona teu o hage ko te malama.” Neʼe toe ʼasi ai mo te ʼu polofeta ko Moisese pea mo Elia ʼe nā fai palalau mo Sesu. ʼE lagi neʼe hoko te meʼa fakaofoofo ʼaia ʼi te pōʼuli, ʼo toe makehe age ia tona taulekaleka. Pea ʼi tona hage ʼaē ʼe moʼoni, neʼe ʼui ai leva e Petelo ke ina fakatuʼu ia he ʼu falelā e tolu​—ko he tahi maʼa Sesu, he tahi maʼa Moisese pea mo he tahi maʼa Elia. ʼI te kei lolotoga palalau ʼa Petelo, neʼe ūgia nātou e te mālama pea nātou logo ki te leʼo mai te ʼao ʼe ina ʼui fēnei: “E ko toku Alo aeni, te Ofaina, ia te ia e katoa ai toku loto, koutou fakalogo kia te ia.”​—Mateo 17:1-6.

12, 13. Neʼe malave feafeaʼi ki te ʼu tisipulo ʼa Sesu ia te fetogi faka milakulo, pea koteā tona tupuʼaga?

¹² ʼIo, neʼe mole heʼeki faʼa fualoa neʼe fakamoʼoni ia Petelo ko Sesu ʼe ko “Kilisito, te Alo o te Atua mauli.” (Mateo 16:17) Kae koutou fakakaukauʼi age muʼa, neʼe nātou logo ki te fakamoʼoni ʼaē neʼe foaki e te ʼAtua totonu, mo tana fakahā lelei pe ko ai ia tona ʼAlo fakanofo pea mo tana gāue! Neʼe ko he faʼahi neʼe ina fakaloto mālohiʼi moʼoni ia te tui ʼa Petelo, mo Sakopo pea mo Soane! Koia ʼi te kua fakaloto mālohiʼi leva ʼo tanatou tui, kua nātou tokalelei leva ki te ʼu meʼa ʼaē ka hoko mai pea mo te gāue maʼuhiga ʼaē ka nātou fakahoko ʼi te kokelekasio ʼaē ka fakatuʼu.

¹³ ʼE malave fualoa anai ki te ʼu tisipulo ia te fetogi faka milakulo. Hili taʼu e 30 tupu ki muli age, neʼe tohi fēnei e Petelo: “[Ko Sesu] neʼe ina maʼu te faka maʼuhiga pea mo te kolōlia mai te ʼAtua te Tāmai, ʼi te temi ʼaē neʼe ʼave ai kiā te ia, te ʼu palalau ʼaenī, ʼaki te kolōlia taulekaleka: ‘Ko ia nei ko toku ʼAlo, toku ʼofaina, ʼaenī ʼe au fiafia ai.’ ʼIo, ko te ʼu palalau ʼaia neʼe haʼu mai te lagi, ʼi te temi ʼaē neʼe mātou nonofo fakatahi ai mo ia ʼi te moʼuga taputapu.” (2 Petelo 1:17, 18, MN ) Neʼe toe malave mālohi kiā Soane ia te meʼa ʼaē neʼe hoko. Hili taʼu e 60 talu mai te temi ʼaē neʼe hoko ai ia te fetogi faka milakulo ʼaia, neʼe lagi ina manatuʼi ia te faʼahi ʼaia ʼi tana fai ia te ʼu palalau ʼaenī: “Neʼe mātou mamata ki tona kolōlia, ko he kolōlia ohage ko he kolōlia ʼe maʼu e he foha ʼulu tokotahi mai tana tāmai.” (Soane 1:14, MN ) Kae ʼi te ʼu meʼa ʼaē ka fakahā fakatomuʼa anai ki te ʼu tisipulo ʼa Sesu, ʼe mole gata pe anai ʼi te fetogi faka milakulo.

Te Tahi ʼu Meʼa Moʼo Fakaloto Mālohiʼi Ia Te Kau Agatonu ʼa Te ʼAtua

14, 15. Neʼe faka ʼuhiga feafeaʼi ia te maʼuli ʼa te ʼapositolo ko Soane ʼo aʼu ki te haʼu ʼa Sesu?

¹⁴ ʼI te ʼosi fakatuʼuake ʼo Sesu, neʼe hā ia ki tana kau tisipulo ʼi te Tai ʼo Kalilea. ʼI te potu ʼaia neʼe ina ʼui fēnei kiā Petelo: “Kapau ʼe au loto ke nofo [ia Soane] ʼo kaku ki taku haʼu, koteā ia tona ʼuhiga kiā te koe?” (Soane 21:1, 20-22, 24, MN ) ʼAki te ʼu palalau ʼaia, ʼe tonu koa ke tou manatu ko te ʼapositolo ko Soane ʼe mole mate anai ʼi te ʼu ʼapositolo ʼaē? ʼE hage ʼe tou mahino feiā ki te ʼu palalau ʼaia, heʼe ko Soane neʼe hoko atu ia tana gāue kaugana agatonu kiā Sehova iā lagi ʼihi ʼu taʼu e 70. Kae ko te palalau ʼa Sesu neʼe faka ʼuhiga ki te tahi age meʼa neʼe maʼuhiga age.

¹⁵ ʼAki te kupusiga palalau “ ʼo kaku ki taku haʼu” ʼe tou manatuʼi ai ia te palalau ʼa Sesu ʼo ʼuhiga mo “te haele mai o te Foha o te tagata mo tona Puleagahau.” (Mateo 16:28) Ko te faka ʼuhiga ʼo te ʼui ʼaē ʼe maʼuli ia Soane ʼo aʼu ki te haʼu ʼa Sesu, heʼe ki muli age neʼe faka fealagia kiā Soane ke sio fakatomuʼa ki te fakanofo hau ʼo Sesu ʼi te Puleʼaga. ʼI te kua vave mate ʼo Soane, neʼe foaki age kiā ia ʼi tana ʼaunofo ʼi te motu ʼo Patemosi, ia te Apokalipesi pea mo tona ʼu fakakikite fakaofoofo ʼo te ʼu meʼa ʼaē ka hoko ʼi “te aho o te Aliki.” Neʼe fiafia ʼaupito ia Soane ʼi te ʼu meʼa ʼaē neʼe sio kiai, koia ʼi te temi ʼaē neʼe ʼui age e Sesu: “E au vave alu atu,” neʼe tali fēnei age e Soane: “Ameni, haele mai Aliki Sesu!”​—Apokalipesi 1:1, 10; 22:20.

16. He koʼe ʼe maʼuhiga ke tou haga fakamālohiʼi ia tatatou tui?

¹⁶ Ko te hahaʼi agatonu ʼaē neʼe māʼuʼuli ʼi te ʼuluaki sēkulō neʼe nātou tali ia Sesu ko te Mesia pea neʼe nātou tui kiā te ia. ʼUhi ko te heʼe tui ʼa te hahaʼi ʼi ʼonatou tafaʼaki, pea mo te gāue ʼaē neʼe tonu ke nātou fakahoko, pea mo te ʼu ʼahiʼahiʼi ʼaē neʼe ʼamanaki hoko mai, koia neʼe tonu ai ke fakamālohiʼi ia te tui ʼa te hahaʼi tui. Neʼe foaki e Sesu ia te ʼu fakamoʼoni lahi ʼo tona ʼuhiga Mesia pea neʼe ina fakahā fakatomuʼa ia te ʼu meʼa taulekaleka moʼo fakaloto mālohiʼi ia tana ʼu tisipulo agatonu. Ia ʼaho nei, ʼe tou māʼuʼuli nei ʼi “te aho o te Aliki.” Kua vave hoko mai te temi ʼaē ka fakaʼauha ai anai e Kilisito ia te mālama agakovi ʼa Satana pea mo hāofaki ia te hahaʼi ʼa te ʼAtua. ʼE tonu mo tatou ke tou fakamālohiʼi ia tatatou tui, ʼo tou fakaʼaogaʼi kātoa ia te ʼu fakatuʼutuʼu fuli ʼaē ʼe foaki mai e Sehova ki totatou fiafia fakalaumālie.

Neʼe Puipui Nātou ʼi Te Fakapōʼuli Pea Mo Te Fakataga

17, 18. ʼI te ʼuluaki sēkulō, koteā te kehekehe ʼaē neʼe ʼiloga ʼi te ʼu tisipulo ʼa Sesu pea mo te hahaʼi ʼaē neʼe fakafeagai ki te ʼu fakatuʼutuʼu ʼa te ʼAtua, pea koteā ʼaē neʼe hoko ki te ʼu kūtuga lualua ʼaia?

¹⁷ ʼI te ʼosi mate ʼo Sesu, ʼaki he lototoʼa neʼe fakalogo ia te ʼu tisipulo ki tana fakatotonu ʼaē ke nātou fakamoʼoni ʼo ʼuhiga mo ia “i Selusalemi, mo Sutea katoa, mo Samalia o kaku ki te u tuakoi o te kelekele.” (Gaue 1:8) Logola te ʼu temi fakataga, kae neʼe tapuakinaʼi e Sehova ia te kokelekasio faka Kilisitiano foʼou ʼaki ia te ʼu fakamahino fakalaumālie pea mo te ʼu tisipulo foʼou e tokolahi.​—Gaue 2:47; 4:1-31; 8:1-8.

¹⁸ Tahi ʼaē meʼa, ko te hahaʼi ʼaē ʼe fakafeagai ki te logo lelei kua ʼāsili age te kovi ʼo tanatou ʼu fakatuʼutuʼu. ʼE ʼui fēnei ʼi te Tāʼaga Lea 4:19: “Ko te ala ʼo te kau agakovi ʼe hage ko te fakapōʼuli, ʼe mole nātou ʼiloʼi te meʼa ʼaē ʼe nātou tūkia tuʼumaʼu ai.” Ko “te fakapōʼuli” neʼe ʼāsili ʼi te taʼu 66 ʼo totatou temi ʼi te temi ʼaē neʼe ʼātakai ai Selusalemi e te kau solia Loma. ʼE mole ʼiloʼi papau pe koʼe neʼe nātou mavae faka temi, kae ʼi tanatou toe liliu mai ʼi te taʼu 70 ʼo totatou temi, neʼe nātou fakaʼauha ia te kolo. Neʼe fakahā e te tagata fai hisitolia Sutea ko Josèphe, neʼe mamate ia te kau Sutea e toko miliona tupu. Kae neʼe hāo ia te kau Kilisitiano agatonu. Koteā tona tupuʼaga? Koteʼuhi ʼi te temi ʼaē neʼe mavae faka temi ai ia te kau Loma, neʼe nātou fakalogo ki te fakatotonu ʼa Sesu ʼaē ke nātou feholaki.​—Luka 21:20-22.

19, 20. (a) He koʼe ʼe mole tonu ke mātataku ia te hahaʼi ʼa te ʼAtua ʼi te fakaōvi mai ʼo te fakaʼauha ʼo te tuʼu ʼaenī? (b) Koteā te mahino makehe neʼe foaki e Sehova ki tana hahaʼi ʼi te ʼu taʼu e hogofulu ʼi muʼa ʼo te taʼu 1914?

¹⁹ ʼE toe feiā pe mo totatou temi. Ko te mamahi lahi ʼaē ka hoko mai ʼe ina fakaʼauha kātoa anai ia te tuʼu agakovi ʼaenī ʼa Satana. Kae ʼe mole tonu ke mātataku ia te hahaʼi ʼa te ʼAtua, he neʼe fakapapau fēnei mai e Sesu: “Koʼeni, ʼe au nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 28:20, MN ) Moʼo fakamālohiʼi ia te tui ʼo tana ʼu ʼuluaki tisipulo pea mo teuteuʼi nātou ki te meʼa ʼaē ka hoko mai, neʼe fakahā fakatomuʼa age e Sesu kiā nātou ia tona fakanofo faka kolōlia ʼi selo ʼi tona ʼuhiga Hau Faka Mesianike. E feafeaʼi ʼi te temi nei? ʼI te taʼu 1914 neʼe hoko moʼoni ia te meʼa ʼaē neʼe fakahā fakatomuʼa e Sesu. Pea neʼe ko he moʼoni neʼe ina fakaloto mālohiʼi ia te tui ʼa te hahaʼi ʼa te ʼAtua! ʼE ko he fakamoʼoni ʼaia ʼo he ka haʼu taulekaleka, pea neʼe toe ʼāsili lahi age ia te mahino ʼaē neʼe foaki ki te ʼu kaugana ʼa Sehova ʼo ʼuhiga mo te Puleʼaga ʼo Te Mesia. Logola tanatou māʼuʼuli ʼi te ʼu ʼaluʼaga kovi ʼo te malamanei kae ko “te ala ʼo te kau faitotonu ʼe hage ko te mālama gigila ʼaē ʼe ʼāsili tana mālama ʼo aʼu ki te mafoa lelei ʼo te ʼaho.”​—Tāʼaga Lea 4:18.

²⁰ ʼI muʼa ʼo te taʼu 1914, neʼe kamata mahino ia te kiʼi kūtuga ʼo te kau Kilisitiano fakanofo ki te ʼu moʼoni maʼuhiga ʼo ʼuhiga mo te toe liliu mai ʼa te ʼAliki. Neʼe nātou mahino ʼe fakapulipuli anai tana toe liliu mai, ohage pe ko tona fakahā ʼi te taʼu 33 ʼo totatou temi e te ʼu ʼāselo e toko lua ki te ʼu tisipulo ʼi te temi ʼaē neʼe hake ai Sesu ki selo. ʼI te ʼosi fakaʼūgia ʼo Sesu e te ʼao ke mole kei sio ki ai te kau tisipulo, neʼe ʼui fēnei e te ʼu ʼāselo: “Ko Sesu aeni kua tooʼake maia koutou ki Selo, e haele feia mai anai o hagepe ko tautou mamata ki tana hake.”​—Gaue 1:9-11.

21. Koteā ʼaē ka tou talanoa anai kiai ʼi te alatike ka hoa mai?

²¹ Neʼe ko te ʼu tisipulo agatonu pe ʼa Sesu ʼaē neʼe mamata ki tana mavae. ʼO feiā mo te temi ʼaē neʼe fetogi faka milakulo ai Sesu, neʼe mole kaugamālie ia nātou ʼaē neʼe sisio kiai; māʼiape la mo te hahaʼi ʼo te temi ʼaia neʼe mole nātou ʼiloʼi ia te meʼa ʼaē neʼe hoko. ʼE toe feiā pe anai mokā toe liliu mai ia Kilisito ʼi tona Puleʼaga. (Soane 14:19) ʼE ko tana kau tisipulo fakanofo agatonu pe ʼaē ka nātou mahino ki tana ʼi henī. ʼI te alatike ka hoa mai, ʼe tou vakaʼi anai pe malave mālohi feafeaʼi kiā nātou ia tanatou mahino ʼaia. Pea ʼe hoko ai mo te tānaki ʼo te ʼu lauʼi miliona hahaʼi ʼaē ka fakalogo anai kiā Sesu ʼi te kele.​—Apokalipesi 7:9, 14.

[Kiʼi nota]

ʼE Kei Koutou Manatuʼi Koa?

• ʼI te tukugakoviʼi ʼo Sesu ʼe ina maumauʼi ia te Sapato pea mo fasituʼu, koteā te fakamoʼoni neʼe ina foaki moʼo fakahā neʼe ko ia ko te Mesia?

• Ko te fetogi faka milakulo neʼe fua lelei feafeaʼi ki te kau ʼuluaki tisipulo ʼa Sesu?

• ʼE faka ʼuhiga feafeaʼi ia te ʼui ʼaē e Sesu ko Soane ʼe maʼuli anai ʼo aʼu ki tana toe liliu mai?

• Koteā te fakapapau ʼaē neʼe hoko moʼoni ʼi te taʼu 1914?

[Paki ʼo te pasina 10]

Neʼe foaki e Sesu ia te ʼu fakamoʼoni ki tona ʼuhiga Mesia

[Paki ʼo te pasina 12]

Ko te fetogi faka milakulo neʼe ina fakaloto mālohiʼi ia te tui

[Paki ʼo te pasina 13]

Neʼe tonu ke maʼuli ia Soane ʼo aʼu ki te ‘haʼu’ ʼa Sesu