Ko He ʼu Fakafiafia Lelei ʼe Nātou Fakaloto Mālohi
“Peʼe koutou kakai, peʼe koutou ʼiʼinu, peʼe ko he faʼahiga meʼa pe ʼe koutou fai, koutou fai te ʼu meʼa fuli moʼo faka kolōliaʼi ʼo te ʼAtua.”—1 Kolonito 10:31.
1, 2. He koʼe ʼe feala ke tou ʼui ko te ʼu fakafiafia ʼe ko he “meʼa ʼofa ia ʼo te ʼAtua,” kae koteā te fakatokaga ʼe fai mai ʼi te Tohi-Tapu?
ʼE TOU fia fai fuli he ʼu gāue ʼe tou fiafia ai. Ko Sehova, totatou ʼAtua fiafia, ʼe loto ke tou fiafia ʼi totatou maʼuli, pea ʼe ina foaki lahi mai meʼa fuape ke tou fiafia ai. (1 Timoteo 1:11; 6:17) Neʼe tohi fēnei e te Hau poto ko Salomone: “Kua au ʼiloʼi ʼe mole ʼi ai he meʼa ʼe lelei age . . . ʼi hanatou fakafiafia; . . . pea ke kai foki te tagata fuli pe, ei ke ʼinu, pea mo mamata ki te lelei ʼo tana gāue kinakina kātoa. ʼE ko te meʼa ʼofa ia ʼo te ʼAtua.”—Tagata Tānaki 3:12, 13.
2 Ko te fakafiafia ʼaia ʼa he tahi ʼuhi ko te gāue ʼaē neʼe ina fai, ʼe mahino ia ʼe fakaloto mālohi, tāfito la mokā fakatahi mo tona famili peʼe ko tona ʼu kaumeʼa. Ko te fakafiafia ʼaia ʼe feala ke ʼui ʼe ko he “meʼa ʼofa ia ʼo te ʼAtua.” ʼE mahino ia ko te foaki lahi ʼaia e te Tupuʼaga meʼa fuape ke tou fiafia ai, ʼe mole ina fakagafua kiā tatou ke tou fai he ʼu fakafiafia fakavalevale. ʼE tauteaʼi ʼi te Tohi-Tapu ia te ʼinu fakavalevale, te kai vale, pea mo te aga ʼuli, ʼo fakatokagaʼi mai, ko nātou ʼaē ʼe nātou fai te ʼu meʼa ʼaia ʼe “mole nātou maʼu anai te puleʼaga ʼa te ʼAtua.”—1 Kolonito 6:9, 10, MN; Tāʼaga Lea 23:20, 21; 1 Petelo 4:1-4.
3. Koteā ʼaē ka tokoni mai ke tou nonofo ʼalaʼala ʼi te faʼahi fakalaumālie pea mo tou manatuʼi te ʼaho lahi ʼo Sehova?
3 ʼI te ʼu ʼaho faigataʼa ʼaenī, ʼo mole hage ko he tahi age temi, ʼe tonu ke māʼuʼuli fakapotopoto ia te kau Kilisitiano ʼi te malamanei aga heʼe maʼa, ʼo nātou tōkakaga ke mole nātou mulimuli ki te ʼu aga ʼaia. (Soane 17:15, 16) Ohage ko tona fakakikite, ko te hahaʼi ʼo te temi ʼaenī ʼe nātou “manako ki te u fiafia kae e mole he ofa ki te Atua” ʼo ʼuta ai mo tanatou ‘mole fakatokagaʼi’ te ʼu fakamoʼoni ʼo te kua ōvi mai ʼo “te mamahi lahi.” (2 Timoteo 3:4, 5; Mateo 24:21, 37-39, MN ) Neʼe fakatokagaʼi fēnei e Sesu tana ʼu tisipulo: “Ke koutou tokaga kiā koutou totonu, talia naʼa mamafa tokotou ʼu loto ʼi te lahi fau ʼo te kai, pea mo te lahi fau ʼo te ʼinu, pea mo te ʼu tuʼania ʼo te maʼuli, pea mo fokifā pe kua hoko fakapunamaʼuli mai kiā koutou te ʼaho ʼaia ohage ko he hele.” (Luka 21:34, 35, MN ) ʼI totatou ʼuhiga kaugana ʼa te ʼAtua, ʼe tou fakatotonu ke tou mulimuli ki te ʼu palalau ʼaia ʼa Sesu. ʼO mole hage ko nātou ʼaē ʼi te malamanei, ʼe tou faiga ke tou nonofo ʼalaʼala ʼi te faʼahi fakalaumālie pea mo manatuʼi te ʼaho lahi ʼo Sehova.—Sofonia 3:8; Luka 21:36.
4. (a) He koʼe ʼe faigataʼa hatatou maʼu he ʼu fakafiafia ʼe lelei? (b) Ko te tokoni fea ʼaē ʼe tou maʼu iā Efeso 5:15, 16 ʼe tonu ke tou maʼuliʼi?
4 ʼE mole faigafua hatatou fakamamaʼo mai te ʼu aga heʼe maʼa ʼo te malamanei, heʼe fai e te Tevolo ke holi kiai te hahaʼi pea mo faigafua tona fai. ʼE faigataʼa tāfito mokā tou kumi he ʼu ʼaluʼaga ke tou fakafiafia ai. ʼE lahi te ʼu fakafiafia ʼo te malamanei ʼe nātou fakaneke “te u holi o te kakano.” (1 Petelo 2:11) ʼE feala ke tou maʼu he ʼu fakafiafia kovi ʼi te potu fuape, māʼiape la ʼi te loto fale ʼaki te ʼu tohi, te televisio, te Internet, pea mo te ʼu ʼata viteo. Koia, ʼe fai te tokoni poto ʼaenī ʼi te Tohi-Tapu ki te kau Kilisitiano: “Ke koutou tōkakaga fakalelei ki takotou faʼahiga haʼele: ke ʼaua naʼa hage ko he kau vavale, kae ke hage ko ni kau popoto, ʼo koutou totogi maʼa koutou te temi faigamālie, koteʼuhi ko te ʼu ʼaho kua agakovi.” (Efeso 5:15, 16, MN ) Kapau ʼe tou mulimuli fakalelei ki te tokoni ʼaia, pea ʼe mole tou holi anai ki te ʼu fakafiafia kovi ʼaia, peʼe tou fakapuli ai totatou temi, pea mo maumauʼi tatatou ʼu felogoi mo Sehova, ʼo iku ai ki totatou fakaʼauha!—Sakopo 1:14, 15.
5. Koteā ʼaē ʼe ina foaki te fīmālie moʼoni?
5 Mai tona ʼaluʼaga ʼaē ʼe maʼumaʼua ʼaupito te kau Kilisitiano, ʼe mahino ia ʼe ʼaoga ʼi ʼihi temi ke nātou fakafiafia. Ohage ko tona ʼui iā Tagata Tānaki 3:4, ʼe ʼi ai “te temi moʼo kata” pea mo “te temi moʼo gaoʼi.” Koia ʼi te Tohi-Tapu ʼe mole ʼui ai ko te temi fakafiafia ʼe ko he maumau temi. Kae ko he temi fakafiafia ʼe tonu ke ina fakaloto mālohiʼi tatou, kae mole fakatupu tuʼutāmaki kiā tatou ʼi te faʼahi fakalaumālie, peʼe tupu ai he mole kei fai ʼo tatatou ʼu gāue fakalaumālie. ʼAki te ʼu meʼa ʼaē kua hoko ki te kau Kilisitiano fakapotopoto, kua mahino kiā nātou ʼe kita maʼu ia te fiafia lahi ʼi tata foaki ki te hahaʼi. ʼE maʼuhiga ʼi tonatou maʼuli te fai ʼo te finegalo ʼo Sehova pea ʼe nātou maʼu moʼoni ai ‘he fīmālie ki tonatou nefesi’ ʼi tanatou tali te ʼakau ʼamo ʼo Sesu.—Mateo 11:29, 30; Gaue 20:35.
Tou Filifili He Fakafiafia ʼe Lelei
6, 7. Koteā ʼaē ka tokoni atu anai ke koutou ʼiloʼi ai peʼe lelei te fakafiafia ʼaia peʼe kailoa?
6 ʼE tou lava ʼiloʼi papau feafeaʼi peʼe ko he fakafiafia ʼe lelei maʼa he Kilisitiano? ʼE feala ke tokoni te ʼu mātuʼa ki tanatou fānau ʼo ʼuhiga mo te faʼahi ʼaia, pea mo te kau tagata ʼāfea mo kapau ʼe ʼaoga. Kae ʼe mole maʼua anai ki ʼihi ke nātou ʼui mai ʼe mole lelei he faʼahiga tohi, he faʼahiga gaoʼi, peʼe ko he meʼe peʼe ko he hiva. Neʼe ʼui e Paulo ko nātou “ ʼaē kua kātoa tonatou ʼuhigaʼi tagata . . . ʼaki tanatou fakaʼaogaʼi, kua nātou maʼu te ʼu fealagia fakakaukau kua akoʼi ke nātou ʼiloʼi te meʼa ʼaē ʼe lelei pea mo te meʼa ʼaē ʼe kovi.” (Hepeleo 5:14, MN; 1 Kolonito 14:20) ʼE foaki mai ʼi te Tohi-Tapu te ʼu pelesepeto. Ko tokotou leʼo ʼo loto, ʼaē ʼe akoʼi ʼaki te Folafola ʼa te ʼAtua, ʼe tokoni atu anai mo kapau ʼe koutou fakalogo kiai.—1 Timoteo 1:19.
7 Neʼe ʼui fēnei e Sesu: “E ko te fua o te akau ae e iloi ai te fuuʼakau.” (Mateo 12:33) Kapau ko he ʼu temi fakafiafia ʼe hoko he agamālohi, he ʼu aga heʼeʼaoga, peʼe ko he fai fakalauʼakau, pea ʼe tonu ke tou līaki ia te ʼu fakafiafia aia. ʼE toe kovi foki mo kapau ʼe feala ke tuʼutāmaki ai te maʼuli ʼo he tahi, peʼe hoko ai he ʼu faigataʼaʼia ʼi te faʼahi ʼo te paʼaga, peʼe ko he lotovaivai, peʼe tūkia ai he tahi. Neʼe fakatokaga mai e te ʼapositolo ko Paulo, kapau ʼe lavea te leʼo ʼo loto ʼo hotatou tēhina ʼuhi ko tatou, pea ʼe ko he agahala ʼaia. Neʼe tohi fēnei e Paulo: “ ʼI te temi ʼaē ʼe koutou fai ai te agahala ʼaia ki tokotou ʼu tēhina, pea mo koutou faka lavea tonatou ʼu leʼo ʼo loto ʼaē ʼe vaivai, ʼe koutou agahala kiā Kilisito. Koia, kapau ʼe faka tūkia he meʼa kai ki toku tēhina, ʼe mole au toe kai anai ki he kanoʼi manu, ke mole au faka tūkia ki toku tēhina.”—1 Kolonito 8:12, 13, MN.
8. Koteā te ʼu tuʼutāmaki ʼo te ʼu gaoʼi ʼaē ʼe gaoʼi ʼaki te ʼolotinatea pea mo te ʼu gaoʼi viteo?
8 ʼI te ʼu fale koloā, ʼe lahi ai te ʼu meʼa gaoʼi ʼo te ʼolotinatea pea mo te ʼu gaoʼi viteo. Ko ʼihi gaoʼi viteo ʼe fakakata pea ʼe feala ke liliu ko he faka māloloʼaga, kae ko te ʼu faʼahiga gaoʼi ʼaia ʼe tau hā ai te ʼu ʼaluʼaga ʼe tauteaʼi e te Tohi-Tapu. ʼE mahino ia ʼe mole feala anai ke tou ʼui ʼe ko he ʼu gaoʼi lelei, mo kapau ʼi te ʼu gaoʼi ʼaia ʼe tonu ke kita matehi he ʼu hahaʼi peʼe kita fai he ʼu aga heʼeʼaoga. ʼE fehiʼa ia Sehova kiā nātou ʼaē “ ʼe manako ki te agamālohi.” (Pesalemo 11:5; Tāʼaga Lea 3:31; Kolose 3:5, 6) Pea kapau ʼi takotou gaoʼi ʼaia ʼe koutou liliu ko he tahi ʼe mānumānu peʼe agamālohi, peʼe tupu ai hokotou gaʼegaʼe, peʼe puli ai tokotou temi, koutou tōkakaga ki tona ʼu fua kovi kiā koutou ʼi te faʼahi fakalaumālie pea mo koutou foimo fai he ʼu fetogi.—Mateo 18:8, 9.
Tou Fakatuʼutuʼu He ʼu Fakafiafia ʼe Lelei Maʼa Tatou
9, 10. Koteā ʼaē ʼe feala ke fai e te hahaʼi fakasiosio poto ke nātou maʼu he ʼu temi fakafiafia ʼe lelei?
9 ʼI ʼihi temi, ʼe fehuʼi fēnei e te kau Kilisitiano: “Koteā te fakafiafia ʼaē ʼe lelei? Heʼe lahi ʼaupito te ʼu fakafiafia ʼi te malamanei ʼe fakafeagai ki te ʼu lēkula ʼa te Tohi-Tapu.” Kae ʼe feala hakotou maʼu he ʼu fakafiafia ʼe lelei, kae ʼe tonu ke kumi fakalelei. ʼE tonu ke koutou fai he ʼu fakatuʼutuʼu lelei, tāfito te ʼu mātuʼa. Tokolahi ʼe nātou leleiʼia tanatou ʼu fakafiafia faka famili pea mo faka kokelekasio. Ko te vaevae ʼo he meʼa kai pea mo te fai palalau ki te ʼu ʼaluʼaga ʼaē neʼe hoko peʼe ko he ʼu manatu ʼi te Tohi-Tapu, ʼe ko he meʼa fakafiafia pea mo fakaloto mālohi. ʼE feala ke koutou fakatuʼutuʼu ke koutou ʼolo ʼo kakai ʼi he matātai, mo fai he ʼu gaoʼi ʼe lelei, peʼe koutou ʼolo ʼo faka motu. Ko te ʼu temi fakafiafia ʼaia ʼe feala ke fua lelei kiā tatou.
10 ʼE ʼui fēnei e te tagata ʼāfea pea mo tona ʼohoana, neʼe nā pusiʼaki tanā ʼu tamaliki e toko tolu: “Talu tanatou kei liliki, neʼe kau tuʼumaʼu tamā ʼu tamaliki ki te filifili ʼo te koga meʼa ʼaē ka mātou ʼolo anai ʼo mālōlō ai. ʼI ʼihi temi, neʼe mā fakagafua ke nātou tahi fakaafe honatou ʼu kaumeʼa lelei, ʼo liliu ai te ʼu temi mālōlō ko he ʼu temi ʼe fakatupu fiafia age. ʼE kei manatuʼi e tamā ʼu tamaliki te ʼu ʼaluʼaga maʼuhiga ʼaē neʼe hoko ʼi tonatou maʼuli. ʼI ʼihi temi neʼe mātou fakaafe homatou famili pea mo he ʼu kaumeʼa ʼo te kokelekasio ki tomatou ʼapi. Neʼe mātou kai tunu pea mo gaoʼi. Neʼe mātou ʼolo motokā ki te ʼu moʼuga, pea neʼe mātou ʼolo ʼo haʼele ai, ʼo fakaʼaogaʼi te ʼu lakaga ʼaia moʼo ako ʼo ʼuhiga mo te ʼu faʼu ʼa Sehova.”
11, 12. (a) Koteā ʼaē ʼe feala ke koutou fai moʼo fakaafe ʼo niʼihi ki takotou ʼu kiʼi temi fakafiafia? (b) Ko te ʼu faʼahiga fakafiafia fea ʼaē neʼe mole galoʼi e te tokolahi?
11 ʼE feala koa hakotou fakaafe ki takotou ʼu kiʼi fakafiafia takitokotahi peʼe faka famili, he tahi ʼu tēhina mo tuagaʼane? Ko ʼihi, ohage ko he tuagaʼane vītua, he selipatea, he tahi ʼe ina taupau tokotahi tana fānau, ʼe lagi ʼaoga kiā nātou he fakaloto mālohi. (Luka 14:12-14) ʼE feala ke koutou fakaafe he ʼu hahaʼi ʼe foʼofoʼou mai, ʼo koutou fakasiosio lelei muʼa naʼa ko he ʼu hahaʼi ʼe ko he ʼu fakakaugā kovi. (2 Timoteo 2:20, 21) Kapau ko he tahi ʼe mole feala hana ʼalu ki he fakaafe heʼe māʼimoa, ʼe lagi feala anai hakotou fakatuʼutuʼu ke koutou ʼolo ʼo kakai fakatahi mo ia ʼi tona ʼapi.—Hepeleo 13:1, 2.
12 Tokolahi ʼe mole nātou galoʼi te ʼu fakatahitahi ʼaē ʼe mole faka ogosia ia te ʼu gaohi meʼa kai, mo tanatou fakalogo ki te ʼu fai fakamatala ʼa ʼihi Kilisitiano pe neʼe feafeaʼi tanatou maʼu ia te moʼoni, pea mo te ʼu faʼahi ʼaē neʼe tokoni age kiā nātou ke nātou nonofo agatonu ki te ʼAtua. ʼE feala ʼi te ʼu kiʼi fakatahitahi ʼaia, ke fai he ʼu fai palalau ʼo ʼuhiga mo he ʼu manatu faka Tohi-Tapu, mo fakakau fuli kiai ia nātou ʼaē neʼe fakaafe, ʼo kau kiai mo te ʼu tamaliki. Ko te ʼu fai palalau ʼaia ʼe feala ke fefakaloto mālohiʼaki ai, kae mole tonu ke ufiufi ai he tahi.
13. Koteā ia te faʼifaʼitaki ʼaē neʼe tuku mai e Sesu pea mo Paulo ʼo ʼuhiga mo te fai fakaafe pea mo te tali ʼo te ʼu fakaafe?
13 Neʼe tuku mai e Sesu ia te faʼifaʼitaki lelei, he neʼe ina fai he ʼu fakaafe pea mo tali ia te ʼu fakaafe. Neʼe ina fakaʼaogaʼi te ʼu ʼaluʼaga ʼaia moʼo palalau ki he ʼu manatu fakalaumālie. (Luka 5:27-39; 10:42; 19:1-10; 24:28-32) Neʼe faʼifaʼitakiʼi ia ia e tana ʼu ʼuluaki tisipulo. (Gaue 2:46, 47) Neʼe tohi fēnei e te ʼapositolo ko Paulo: “E au fakaʼamu lahi ke au sio kia koutou, mo vahevahe kia koutou ia meaofa fakalaumalie ke fakamalohiʼi aki koutou. Ke fakalotomalohiʼi au fakatahi mo koutou iō koutou i te tui fakatahi, a koutou pea mo au.” (Loma 1:11, 12) ʼO toe feiā, ʼe tonu ʼi tatatou ʼu fakatahi ke tou fefakaloto mālohiʼaki.—Loma 12:13; 15:1, 2.
Te ʼu Faʼahi ʼe Tonu Ke Tou Manatuʼi Pea Mo Tōkakaga Kiai
14. He koʼe ʼe mole lelei ke hahaʼi fau he ʼu fakafiafia?
14 ʼE mole lelei ke hahaʼi fau he fakafiafia, heʼe ʼi te agamāhani ʼe faigataʼa tona leʼoleʼo. ʼI te ʼu temi ʼaē ʼe mole tou fai ai he ʼu gāue fakalaumālie, ʼe lagi fia fakatahitahi anai he ʼu famili ʼi te matatai peʼe nātou fai he ʼu gaoʼi ʼe mole ina uga ia te manatu fakataupiepie. Ka kau ki te ʼu fakatahi ʼaia he ʼu tagata ʼāfea, he ʼu tēhina faifekau faka minisitelio, peʼe ko he ʼu tēhina mo tuagaʼane kua nātou fakapotopoto ʼi te maʼuli faka Kilisitiano, ʼe feala ke ʼi ai hona ʼu fua lelei pea mo fakatupu lotomālohi.
15. Kapau ʼe fakatuʼutuʼu e he tahi ke ina fai he kiʼi fakafiafia, he koʼe ʼe tonu ke tokaga ʼo leʼoleʼo fakalelei?
15 ʼI te ʼu kiʼi fakafiafia, ko nātou ʼaē neʼe nātou fakatuʼutuʼu ia te faʼahi ʼaia, ʼe nātou tōkakaga anai ʼo leʼoleʼo fakalelei. Logola ʼe koutou leleiʼia ia te fai fakaafe, kae ʼe koutou lotomamahi anai mo kapau ʼe koutou logoʼi kua lotovaivai he tahi ʼi te kau fakaafe, he neʼe ʼi ai te faʼahi neʼe mole koutou tōkakaga ʼo leʼoleʼo fakalelei ʼi te fakafiafia ʼaia. Tou vakaʼi te pelesepeto ʼaē ʼe talanoa kiai iā Teutalonome 22:8. Ka neʼe laga e he Iselaele hona ʼapi, neʼe fakamaʼua ke ina faʼu he kaupā iā tafaʼaki ʼo te ʼato, heʼe ʼi te agamāhani neʼe nātou kakai mo te kau fakaafe ʼi te fuga ʼato. Koteā tona tupuʼaga? “Ke mole hoko he ligi toto ʼi tou ʼapi heʼe feala ki he tahi ke tō mai ai.” ʼO toe feiā pe, ko te ʼu tonu ʼaē ʼe koutou fai moʼo puipui ʼo takotou kau fakaafe, ʼe tonu ke koutou manatuʼi tonatou lelei fakalaumālie, kae ʼe mole koutou fakamaʼua fakavalevale anai he ʼu tapu.
16. Koteā ʼaē ʼe tonu ke tou tōkakaga kiai mo kapau ʼe fakaʼaogaʼi he kava ʼi he kiʼi fakafiafia?
16 Kapau ʼe ʼi ai he kava, ʼe tonu ke tōkakaga lelei kiai. Tokolahi te kau Kilisitiano ʼe nātou fai he ʼu fakaafe, ʼe nātou fakaʼaogaʼi anai kiai te kava mo kapau ʼe feala ke nātou leʼoleʼo e nātou totonu te fakaʼaogaʼi ʼo te kava ʼi te fakafiafia ʼaia. ʼE mole tonu ke ʼi ai he meʼa ʼe ina fakatupu tūkia anai ki ʼihi peʼe ina ʼeke anai he tahi ke ʼinu fakavalevale. (Efeso 5:18, 19) ʼE lagi fakafisi anai ʼihi kau fakaafe ki te kava, heʼe ʼi ai tona ʼu tupuʼaga. ʼE lahi te ʼu fenua ʼe ʼi ai te lao ʼo ʼuhiga mo te taʼu tupu ʼaē ʼe fakagafua ai ki he tahi ke ʼinu, pea ʼe fia mulimuli ia te kau Kilisitiano ki te ʼu lao ʼaia ʼa Sesale, tatau aipe peʼe hage ʼe fefeka fau te ʼu lao ʼaia.—Loma 13:5.
17. (a) Kapau ʼe fai he musika ʼi he kiʼi fakafiafia, he koʼe ʼe maʼuhiga kiā ia ʼaē ʼe fai fakaafe ke ina filifili lelei te ʼu musika? (b) Kapau ʼe fai he ʼu meʼe ʼi te kiʼi fakafiafia, ʼe tonu ke ʼiloga feafeaʼi ia te aga fakapoipoi?
17 Ko ia ʼaē ʼe fai fakaafe ʼe tonu ke ina vakaʼi ke mulimuli te musika, te ʼu meʼe, peʼe ko he tahi age ʼu gaoʼi, ki te ʼu pelesepeto faka Kilisitiano. ʼE mole tatau te ʼu musika ʼaē ʼe tou leleiʼia, pea ʼe lahi te ʼu faʼahiga musika. Kae ʼe lahi te ʼu musika ʼi te temi nei ʼe nātou fakaneke ia te agatuʼu, te aga heʼeʼaoga, pea mo te agamālohi. ʼE tonu ke tou filifili lelei. Ko te musika ʼaē ʼe lelei ʼe mole ko te ʼu musika pe ʼaē ʼe fakatokatoka, kae ʼe tonu ke tou tōkakaga ki te ʼu kupuʼi hiva ʼaē ʼe nātou fakaneke te ʼu felāveʼi fakasino peʼe ko te ʼu tauvele, pea mo mālohi mo logoaʼa fau. Koutou tōkakaga naʼa filifili te ʼu musika e he tahi ʼe mole heʼeki mahino kātoa ki te maʼuhiga ʼaē ke mole mālohi fau ia te musika. Ko he meʼe ʼe ina fakaneke te holi ʼo te sino, ʼe mole tāu ia mo he Kilisitiano.—1 Timoteo 2:8-10.
18. Koteā ʼaē ʼe lava fai e te ʼu mātuʼa moʼo puipui tanatou fānau ʼi te ʼu fakafiafia ʼaē ʼe fakaafe nātou kiai?
18 ʼE tonu ke ʼiloʼi e te ʼu mātuʼa Kilisitiano te ʼu meʼa ʼaē ka fai ʼi te ʼu fakafiafia ʼaē ʼe fakaafe kiai tanatou fānau, pea ʼe lelei anai ke nātou kaugā ʼolo mo nātou. Meʼa fakaʼofaʼofa foki, he neʼe tuku e te ʼu mātuʼa ke kau tanatou fānau ki he ʼu fakafiafia neʼe mole leʼoleʼo lelei, pea tokolahi neʼe nātou fai te ʼu aga heʼeʼaoga pea mo te ʼu aga ʼe heʼe fakaʼapaʼapa. (Efeso 6:1-4) Tatau aipe peʼe ko ʼihi tamaliki kua lalahi pea mo hage kua nātou ʼiloʼi te meʼa ʼaē ʼe tonu ke fai, kae ʼe kei ʼaoga pe ke koutou tokoni kiā nātou ke nātou “[feholaki] mai te ʼu holi ʼo te temi tūpulaga.”—2 Timoteo 2:22, MN.
19. Koteā ʼaē ʼe feala ke tokoni moʼoni mai ke tou tokagaʼi te meʼa ʼaē ʼe tonu ke tou ‘fakamuʼamuʼa’?
19 ʼE ko he meʼa fakafiafia ʼaupito ki totatou maʼuli, mokā tou fakatuʼutuʼu ʼi ʼihi temi he ʼu kiʼi temi mālōlō pea mo he ʼu kiʼi fakafiafia lelei. ʼE mole tapuʼi mai e Sehova ia te fakafiafia ʼaia, kae ʼe tou ʼiloʼi lelei ko te ʼu fakafiafia ʼaia ʼe mole tokoni mai ke tou tānaki he ʼu koloā fakalaumālie ʼi selo. (Mateo 6:19-21) Neʼe tokoni Sesu ki tana ʼu tisipulo ke nātou mahino ko te “haga kumi muʼa [ʼo] te puleʼaga pea mo [te] faitotonu” ʼa te ʼAtua, ʼe ko te meʼa maʼuhiga ʼaia ʼi te maʼuli, kae ʼe mole ko te meʼa kai peʼe ko te ʼinu peʼe ko te meʼa vala, “te ʼu meʼa fuli ʼaia [ʼaē] ʼe kumi faka mānumānu e te ʼu puleʼaga.”—Mateo 6:31-34, MN.
20. Koteā ʼaē ʼe feala ke ʼamanaki kiai ia te ʼu kaugana agatonu ʼa Sehova, ia ia ʼaē ʼe ina foaki lahi?
20 Ei, “peʼe koutou kakai, peʼe koutou ʼiʼinu, peʼe ko he faʼahiga meʼa pe ʼe koutou fai,” ʼe feala ke koutou “fai te ʼu meʼa fuli moʼo faka kolōliaʼi ʼo te ʼAtua,” ʼo tou fakamālo kiā ia ʼaē ʼe ina foaki lahi mai te ʼu meʼa lelei ke tou fiafia fakapotopoto ai. (1 Kolonito 10:31, MN ) ʼI te Palatiso fakakelekele ʼaē ʼe tou ʼamanaki atu kiai, ʼe lahi anai te ʼu lakaga ke tou fiafia ai ʼaki te ʼu tuʼuga meʼa ʼaē ʼe foaki mai e Sehova, ʼo tou fakatahi lelei anai mo nātou fuli ʼaē ʼe nātou mulimuli ki tana ʼu fakatotonu faitotonu.—Pesalemo 145:16; Isaia 25:6; 2 Kolonito 7:1.
Kei Koutou Manatuʼi?
• He koʼe ʼe faigataʼa ki te kau Kilisitiano iā ʼaho nei ke nātou maʼu he ʼu fakafiafia ʼe lelei?
• Ko te ʼu fakafiafia fea ʼaē neʼe fiafia ai te ʼu famili Kilisitiano?
• Ka fai he kiʼi fakafiafia, koteā te ʼu fakamanatu pea mo te ʼu fakatokaga ʼe mole tonu ke tou galoʼi?
[Paki ʼo te pasina 18]
Koutou filifili he ʼu fakafiafia ʼe nātou fakatupu anai he ʼu fua lelei
[Paki ʼo te pasina 19]
Ko te faʼahiga fakafiafia fea ʼaē ʼe tonu ke fakafisi kiai te kau Kilisitiano?