“Neʼe Koutou Logo Ki Te Faʼa Kātaki ʼa Sopo”

“Neʼe koutou logo ki te faʼa kātaki ʼa Sopo pea mo te ikuʼaga ʼaē neʼe tuku ake e Sehova, ko Sehova ʼe fonu ʼi te ʼofa pea mo te manavaʼofa.”​—Sakopo 5:​11, MN.

1, 2. Koteā te ʼu faigataʼaʼia neʼe hoko ki te taumātuʼa ʼi Polonia?

KO HARALD ABT neʼe kua taʼu kātoa tana kau ʼi te kau Fakamoʼoni ʼa Sehova, ʼi te temi ʼaē neʼe puleʼi ai e te kautau ʼo Itilele ia te kolo ʼo Danzig (ʼi te temi nei ko Gdańsk) ʼi te potu noleto ʼo Polonia. Neʼe liliu ʼo faigataʼa ʼaupito maʼa te kau Kilisitiano, he neʼe tuʼutāmakiʼia tonatou maʼuli ʼi te kolo ʼaia. Neʼe faiga e te kau Nasi ke sinie e Harald te pepa neʼe tohi ai tana fakafisi ki tana tui, kae neʼe mole loto ia kiai. Hili ni ʼu vāhaʼa ʼi te fale pilisoni, neʼe ʼave ia Harald ki te lotoʼā fakamamahi ʼo Sachsenhausen, ʼaē neʼe fakamatakuʼi pea mo tā tuʼumaʼu ai. Neʼe fakahā age e te tagata ofisie kiā Harald te ʼu fale ʼaē neʼe tutu ai te hahaʼi pea neʼe hake mai ai te kohu, pea neʼe ina ʼui fēnei ki ai: “Kapau ʼe ke haga taupau pe tau tui, pea ʼi muʼa ʼo te ʼu vāhaʼa e lua ʼe ke hake anai ʼo fakatahi mo tau Sehova.”

² ʼI te temi ʼaē neʼe puke ai ia Harald, ko tona ʼohoana ia Elsa, neʼe kei ina fafaga tanā kiʼi tamasiʼi fafine neʼe māhina hogofulu. Kae neʼe leʼoleʼo tuʼumaʼu pe e te kau Nasi ia Elsa. Mole fualoa, pea neʼe toʼo kehe tana tamasiʼi mai iā ia, pea neʼe ʼave te tuagaʼane ki te lotoʼā fakamamahi ʼo Auschwitz. Kae ʼi tana nofo ai lolotoga ni ʼu taʼu, neʼe hāo ai ohage pe ko Harald. ʼI Te Tule Leʼo Fakafalani ʼo te ʼaho 15 ʼo Sūlio 1980, ʼe koutou maʼu ai he tahi ʼu manatu ʼo ʼuhiga mo tanā kātakiʼi. Neʼe tohi fēnei e Harald: “Ko tona faka kātoa, ko taʼu e 14 ʼo toku maʼuli ʼaē neʼe au nofo ai ʼi te ʼu lotoʼā fakamamahi pea mo te ʼu fale pilisoni ʼuhi ko taku tui ki te ʼAtua. Neʼe fai mai kiā te au te fehuʼi ʼaenī: ‘Neʼe tokoni atu koa tou ʼohoana ke ke kātakiʼi te ʼu faʼahi fuli ʼaia?’ Neʼe tokoni mai kiā au! Neʼe au ʼiloʼi talu mai te kamata ʼe mole lītuʼa anai ki tana tui, pea ko taku ʼiloʼi te faʼahi ʼaia neʼe tokoni mai kiā au. Neʼe au ʼiloʼi neʼe ina leleiʼia age ke au mate agatonu ʼi tana logo ʼaē neʼe faka ʼāteaina au ʼuhi he neʼe au kākā. . . . Neʼe tauʼi e Elsa te ʼu tuʼuga faigataʼaʼia ʼi te ʼu taʼu ʼaē neʼe nofo ai ʼi te ʼu lotoʼā fakamamahi.”

3, 4. (a) Ko te ʼu faʼifaʼitaki ʼo ʼai ʼaē ʼe feala ke ina fakaloto mālohiʼi te kau Kilisitiano ke nātou faʼa kātaki? (b) He koʼe ʼe fakaloto mālohiʼi tatou ʼi te Tohi-Tapu ke tou vakavakaʼi te faʼifaʼitaki ʼa Sopo?

³ ʼE mole faigafua te kātakiʼi ʼo te agakovi, pea tokolahi te kau Fakamoʼoni ʼa Sehova ʼe nātou ʼiloʼi te faʼahi ʼaia. Koia ʼe tokoni fēnei ʼi te Tohi-Tapu ki te kau Kilisitiano fuli: “ ʼO ʼuhiga mo te ʼūtakiʼi ʼo te mamahi pea mo te loto faʼa kātaki, koutou mulimuli ki te faʼifaʼitaki ʼa te kau polofeta ʼaē neʼe nātou palalau ʼaki te huafa ʼo Sehova.” (Sakopo 5:​10, MN ) ʼI te hisitolia, tokolahi te kau kaugana ʼa te ʼAtua neʼe fakatagaʼi nātou kae neʼe mole nātou fai he aga ʼe kovi. Ko te ʼu faʼifaʼitaki ʼaē neʼe tuku mai e te “ao [lahi ʼaia] . . . o te kau fakamooni” ʼe feala ke ina fakaloto mālohiʼi tatou ke tou haga kātaki ʼo tou lele ʼi te lele faka Kilisitiano.​—Hepeleo 11:​32-38; 12:⁠1.

⁴ ʼI te Tohi-Tapu, ko Sopo ʼe ko he faʼifaʼitaki lelei ʼaupito ʼo he tahi neʼe faʼa kātaki. Neʼe tohi fēnei e Sakopo: “Koutou vakaʼi! ʼE mātou kalagaʼi ʼe manuʼia ia nātou ʼaē neʼe nātou faʼa kātaki. Neʼe koutou logo ki te faʼa kātaki ʼa Sopo pea mo te ikuʼaga ʼaē neʼe tuku ake e Sehova, ko Sehova ʼe fonu ʼi te ʼofa pea mo te manavaʼofa.” (Sakopo 5:​11, MN ) Ko te meʼa ʼaē neʼe hoko kiā Sopo ʼe fakahā aki ai te fakapale ʼaē ka maʼu e nātou ʼaē ʼe agatonu, pea mo tapuakinaʼi e Sehova. Ko te faʼahi ʼaē ʼe maʼuhiga age, ʼe ina fakahā mai te ʼu moʼoni ʼaē ka ʼaoga anai kiā tatou ʼi te ʼu temi faigataʼaʼia. Ko te tohi ʼa Sopo ʼe tokoni mai ke tou tali ki te ʼu fehuʼi ʼaenī: Ka ʼahiʼahiʼi tatou, he koʼe ʼe tonu ke tou faiga ke tou mahino ki tona tupuʼaga? Koteā te ʼu kalitātē pea mo te aga ʼaē ka tokoni mai ke tou faʼa kātaki? ʼE tou lava fakaloto mālohiʼi feafeaʼi totatou ʼu tēhina mo tuagaʼane ʼaē ʼe mamahi?

Tou Mahino Ki Te ʼu Tupuʼaga Fuli ʼAē ʼe Tonu Ai Ke Tou Faʼa Kātaki

5. Ko te faʼahi tāfito fea ʼaē ʼe tonu ke tou manatuʼi mokā tou tau mo he ʼu fihifihia peʼe ko he ʼu fakahala?

⁵ Ke tou mālolohi ʼi te faʼahi fakalaumālie ʼi te ʼu temi ʼaē ʼe tou tau ai mo te ʼu faigataʼaʼia, ʼe tonu ke tou mahino ki te ʼu tupuʼaga fuli ʼo te ʼu faigataʼaʼia ʼaia. Kapau ʼe mole tou mahino kiai, pea ʼe feala ke tou tōkakaga fau leva ki totatou ʼu fihifihia kae mole kei tou tokagaʼi te ʼu faʼahi fakalaumālie. Ko te nofo agatonu ki te ʼAtua ʼe ko te faʼahi maʼuhiga ʼaia. ʼE fai mai e totatou Tāmai ʼaē ʼe ʼi selo he kole ʼe malave ki totatou loto, ʼo ina ʼui fēnei: “Ke ke fakapotopoto toku foha pea mo ke fakafiafiaʼi toku loto, ke feala haku tali kiā ia ʼaē ʼe manukinuki kiā te au.” (Tāʼaga Lea 27:11) ʼE ko he pilivilesio makehe ʼaia ʼe tou maʼu! Logola totatou ʼu vaivaiʼaga pea mo totatou ʼuhiga agahala, kae ʼe feala ke tou fakafiafiaʼi totatou Tupuʼaga. ʼE tou lava fai te faʼahi ʼaia mokā tou kātakiʼi te ʼu fihifihia pea mo te ʼu fakahala heʼe tou ʼofa kiā Sehova. Ko te ʼofa faka Kilisitiano moʼoni ʼe ina kātakiʼi ia meʼa fuli pe. ʼE mole puli anai ʼi he temi.​—1 Kolonito 13:​7, 8.

6. ʼE manukiʼi feafeaʼi e Satana ia Sehova, pea ʼe aʼu kiā ʼai tana manukinuki?

⁶ ʼI te tohi ʼa Sopo, ʼe fakahā lelei ai ko Satana ʼaē ʼe ina manukiʼi ia Sehova. ʼE toe fakahā ai te agakovi ʼo te fili fakapulipuli ʼaia pea mo tona loto ʼaē ke ina maumauʼi tatatou ʼu felogoi mo te ʼAtua. Ohage ko tona hā mai ʼi te ʼaluʼaga ʼo Sopo, ʼe tukugakoviʼi e Satana te kau kaugana fuli ʼa Sehova ʼo ina ʼui ʼe nātou manatu pe kiā nātou pea ʼe ina faiga ke ina fakahā ʼe feala ke nātou līaki tonatou ʼofa ki te ʼAtua. ʼE manukinuki feiā ki te ʼAtua talu mai te ʼu taʼu e lauʼi afe. ʼI te temi ʼaē neʼe kapu ifo ai ia Satana mai te lagi, neʼe ʼui e te leʼo mai lagi ʼe ko ia ʼaē “ ʼe ina fakakoviʼi totatou ʼu tēhina” pea mo ina fai te ʼu tukugakoviʼi ʼaia “ ʼi te ʼaho mo te po iā muʼa ʼo totatou ʼAtua.” (Apokalipesi 12:​10, MN ) Ka tou kātaki ʼaki he agatonu, ʼe feala ke tou fakahā ai tana gutu loi.

7. Koteā ʼaē ʼe feala ke tou fai ke mole tou tō ki hotatou vaivaiʼaga fakasino?

⁷ ʼE tonu ke tou manatuʼi ko te Tevolo ʼe ina fakaʼaogaʼi anai te ʼu mamahi fuli ʼaē ʼe tou tau mo ia, moʼo fakamamaʼoʼo tatou mai iā Sehova. Ko te temi fea ʼaē neʼe ina ʼahiʼahiʼi ai Sesu? Neʼe ko te temi ʼaē neʼe fia kai ai ia Sesu he neʼe mole kai lolotoga ni ʼu ʼaho. (Luka 4:​1-3) Kae ko Sesu neʼe mālohi ʼi te faʼahi fakalaumālie, koia neʼe feala ai ke fakafisi mālohi ki te ʼu fakahala ʼa te Tevolo. Tou tauʼi totatou ʼu vaivaiʼaga, ʼaē ʼe lagi tupu ʼuhi he tou māhahaki peʼe kua tou mātutuʼa, ʼo tou mālolohi ʼi te faʼahi fakalaumālie. Tatau aipe peʼe ko te “ ʼuhigaʼi tagata ʼaē ʼi tuʼa ʼe fakaauau sino,” kae ʼe mole tonu ke tou līaki, heʼe ko te “tagata ʼaē ʼi loto ʼe fakafoʼou ʼi te ʼaho mo te ʼaho.”​—2 Kolonito 4:​16, MN.

8. (a) ʼE lava fua kovi feafeaʼi ki he tahi he ʼu manatu ʼe mole lelei? (b) Koteā te manatu ʼaē neʼe maʼu e Sesu?

⁸ Tahi ʼaē meʼa, kapau ʼe maʼu e he tahi he ʼu manatu ʼe mole lelei, pea ʼe fua kovi anai ki tona ʼaluʼaga fakalaumālie. ʼE feala ke feʼekeʼaki fēnei e he tahi: ‘He koʼe neʼe tuku e Sehova ke hoko te meʼa ʼaenī?’ ʼE feala ke feʼekeʼaki fēnei e he tahi mokā neʼe mole fakaʼapaʼapaʼi ia ia: ‘ ʼE lava feafeaʼi ki he tēhina ke ina gaohi fēiaʼi au?’ Ko te ʼu ʼaluʼaga ʼaia ʼe feala ke tupu ai hatatou mole kei tou tokagaʼi te ʼu faʼahi maʼuhiga ʼaē ʼe pipiki kiai pea mo tou tōkakaga ʼāteaina pe tatou ki totatou ʼaluʼaga. Ko te ʼita ʼa Sopo ʼuhi ko tona ʼu kaumeʼa loi e toko tolu, neʼe hage ia neʼe lahi age te mamahi ʼo tona loto ʼi te mamahi ʼo tona sino ʼuhi ko tona mahaki. (Sopo 16:20; 19:2) ʼO toe feiā pe, neʼe fakahā e Paulo ko te taupau ʼo te ʼita ʼe feala ko he “faigamalie ki te temonio.” (Efeso 4:​26, 27) ʼE mole haga lau e te kau Kilisitiano mokā nātou ʼiʼita ki he tahi peʼe nātou tōkakaga fau ki he ʼaluʼaga neʼe gaohi koviʼi ai nātou, kae ʼe nātou faʼifaʼitakiʼi ia Sesu ʼi hanatou “haga tuku aipe kiā ia ʼaē ʼe fakamāu ʼaki te faitotonu” ia Sehova ʼAtua. (1 Petelo 2:​21-23, MN ) Ko te maʼu ʼo te “manatu” ʼa Sesu ʼe feala ke tokoni ʼaupito kiā koutou ke koutou tauʼi te ʼu ʼohofi ʼa Satana.​—1 Petelo 4:⁠1.

9. Koteā ʼaē ʼe fakapapau e te ʼAtua ʼe ina foaki mai ʼo ʼuhiga mo te ʼu kavega ʼaē ʼe tou ʼamo peʼe ko he ʼu fakahala ʼe hoko kiā tatou?

⁹ Kae tāfito, ʼe mole tonu ke tou manatu ʼe hoko hotatou fihifihia ʼuhi he mole ʼofa te ʼAtua kiā tatou. Ko te mahino hala ʼaia neʼe mamahi ai Sopo ʼi te temi ʼaē neʼe logo ai ki te ʼu tuʼuga palalau fefeka neʼe fai e nātou ʼaē neʼe tonu ke nātou fakaloto fīmālieʼi ia ia. (Sopo 19:​21, 22) ʼE ʼui papau fēnei mai ʼi te Tohi-Tapu: “ ʼE mole feala ke ʼahiʼahiʼi te ʼAtua ʼaki he ʼu meʼa ʼe kovi, pea ko ia totonu ʼe mole ina ʼahiʼahiʼi he tahi.” (Sakopo 1:​13, MN ) Kae ʼe fakapapau mai e Sehova ʼe tokoni mai kiā tatou ke tou ʼamo te ʼu kavega ʼaē ʼe hilifaki mai kiā tatou pea mo tuku mai he faigamālie ke tou hāo mai hotatou fakahalaʼi. (Pesalemo 55:22; 1 Kolonito 10:13) Kapau ʼe tou fakaōvi ki te ʼAtua ʼi te ʼu temi faigataʼaʼia, pea ʼe feala ai ke tou manatuʼi te ʼu meʼa ʼaē ʼe maʼuhiga pea mo tou mālo ʼi tatatou fakafeagai ki te Tevolo.​—Sakopo 4:​7, 8.

Ko He ʼu Tokoni Ke Tou Faʼa Kātaki

10, 11. (a) Koteā ʼaē neʼe tokoni kiā Sopo ke faʼa kātaki? (b) Neʼe tokoni feafeaʼi kiā Sopo ke ina maʼu he leʼo ʼo loto ʼe lelei?

¹⁰ Logola te ʼu malaʼia ʼaē neʼe hoko kiā Sopo—ʼo kau kiai te ʼu palalau fefeka ʼo nātou ʼaē neʼe ʼui ko tona ʼu “tagata fakaloto fimālie” pea mo tana mole kei ʼiloʼi te tupuʼaga moʼoni ʼo tona ʼu malaʼia—kae neʼe haga nofo agatonu aipe ia Sopo. Koteā ʼaē ʼe feala ke tou ako mai tana faʼa kātaki ʼaia? ʼE mahino ia, ko te tupuʼaga tāfito ʼo tana lava kātakiʼi, neʼe ko tana agatonu kiā Sehova. ‘Neʼe manavasiʼi ia ki te ʼAtua pea neʼe maliu kehe ia mai te agakovi.’ (Sopo 1:1) Neʼe feiā tona maʼuli. Neʼe mole fia lītuʼa Sopo kiā Sehova, logola tana mole mahino pe koʼe neʼe hoko fakafokifā te ʼu malaʼia. Neʼe tui e Sopo ʼe tonu ke tauhi ki te ʼAtua ʼi te ʼu temi lelei pea mo te ʼu temi ʼaē ʼe kovi.​—Sopo 1:21; 2:⁠10.

¹¹ Ko tana maʼu he leʼo ʼo loto ʼe lelei neʼe toe fakaloto fīmālieʼi ai ia Sopo. ʼI te fakaʼosi ʼo tona maʼuli, neʼe loto fīmālie ʼi tana ʼiloʼi ʼaē neʼe ina fai ia meʼa fuli moʼo tokoni ki te hahaʼi, mo mulimuli ki te ʼu lēkula faitotonu ʼa Sehova, pea mo ina tekeʼi te tauhi hala.​—Sopo 31:​4-11, 26-28.

12. Neʼe tali feafeaʼi e Sopo ia te tokoni ʼaē neʼe fai age e Eliu?

¹² ʼE moʼoni neʼe tonu ke fakatonutonuʼi te manatu ʼa Sopo ʼi ʼihi faʼahi. Pea neʼe ina tali ʼaki he agavaivai te tokoni ʼaia​—ko he tahi faʼahi neʼe tokoni kiā ia ke faʼa kātaki. Neʼe fakalogo ia Sopo ʼaki he agavaivai ki te tokoni poto ʼa Eliu, pea neʼe ina tali tona fakatonutonuʼi e Sehova. Neʼe ina ʼui fēnei: “Neʼe au palalau, kae neʼe mole au mahino ki he ʼu meʼa . . . ʼe au fakahemala ki ʼaku palalau, pea ʼe au fakahemala ʼi te efu pea mo te lefulefu.” (Sopo 42:​3, 6) Logola tana tauʼi te mahaki, kae neʼe fiafia ia Sopo he ko te fakatonutonuʼi ʼaia ʼo tana manatu neʼe ina fakaōvi ia ia ki te ʼAtua. Neʼe ʼui fēnei e Sopo: “Kua au ʼiloʼi ʼe . . . lava fai [e Sehova] ia meʼa fuli.” (Sopo 42:2) ʼI tana fakafetaʼi ʼaē kiā Sehova ʼi tana fakamatala age Tona māʼoluga, neʼe mahino lelei ai ia Sopo ki tona tuʼulaga mokā fakatatau mo te Tupuʼaga.

13. Neʼe fua lelei feafeaʼi kiā Sopo tana fakahā te manavaʼofa?

¹³ Ki muli age, neʼe fakahā e Sopo he faʼifaʼitaki lahi ʼo te loto manavaʼofa. Neʼe lavea loloto ʼuhi ko tana ʼu tagata fakaloto fīmālie loi, kae ʼi te kole ʼaē e Sehova kiā Sopo ke faikole maʼa nātou, neʼe mulimuli kiai. Ki muli age neʼe fakamālōlō ia ia e Sehova ʼi tana mahaki. (Sopo 42:​8, 10) ʼE hā lelei mai kiā tatou, kapau ʼe tou taupau he lotokovi pea ʼe mole tokoni mai anai ke tou faʼa kātaki, kae ʼe feala anai ke tou faʼa kātaki ʼaki te ʼofa pea mo te manavaʼofa. ʼE tou mālolohi anai ʼi te faʼahi fakalaumālie mo kapau ʼe tou pulihi totatou lotokovi, pea ʼe tapuakinaʼi anai tatou e Sehova mokā tou fai feiā.​—Maleko 11:⁠25.

Ko He Hahaʼi Faka Loto Fīmālie Fakapotopoto ʼe Tokoni Mai Ke Tou Faʼa Kātaki

14, 15. (a) Koteā te ʼu kalitātē ʼe tonu ke maʼu e he tahi ʼe fai tokoni ke ina fakaloto mālohiʼi niʼihi? (b) Koutou fakamahino pe koʼe neʼe fua lelei te tokoni ʼa Eliu kiā Sopo.

¹⁴ Ko te tahi ako ʼe feala ke tou tāʼofi mai te hisitolia ʼo Sopo, ʼe ko te maʼuhiga ʼaē ʼo he hahaʼi fakaloto fīmālie fakapotopoto. Ko te hahaʼi ʼaia ʼe ko he ʼu tēhina ‘neʼe tutupu ki te ʼu ʼaho mamahi.’ (Tāʼaga Lea 17:17) Kae ohage ko tona hā mai ʼi te meʼa ʼaē neʼe hoko kiā Sopo, ko ʼihi hahaʼi fakaloto fīmālie ʼe feala ke nātou fakaloto mamahi kae mole nātou fakaloto fiafia. Ko he tahi e fai tokoni lelei ʼe ina fakahā te lotomahino, te fakaʼapaʼapa, pea mo te agalelei, ohage ko tona fai e Eliu. ʼE lagi tonu ki te ʼu tagata ʼāfea pea mo ʼihi Kilisitiano kua fotufotuʼa ke nātou fakatonutonuʼi te manatu ʼa ʼihi tēhina ʼe lahi ʼaupito tonatou ʼu fihifihia, pea ʼe feala ke ʼaoga ʼaupito ki te kau fakaloto fīmālie ʼaia ia te ʼu ako ʼe nātou tāʼofi ʼi te tohi ʼo Sopo.​—Kalate 6:1; Hepeleo 12:​12, 13.

¹⁵ ʼE lahi te ʼu ako ʼe feala ke tou tāʼofi mai te faʼahiga fai ʼa Eliu. Neʼe fakalogo fualoa ʼi muʼa ʼo tana tali ki te ʼu palalau hala ʼo te ʼu kaumeʼa e toko tolu ʼo Sopo. (Sopo 32:11; Tāʼaga Lea 18:13) Neʼe fakaʼaogaʼi e Eliu te higoa ʼo Sopo pea neʼe palalau age ohage ko he kaumeʼa. (Sopo 33:1) ʼO mole hage ko te ʼu tagata fakaloto fīmālie loi e toko tolu, neʼe mole manatu Eliu neʼe māʼoluga age ia ia Sopo. Neʼe ina ʼui fēnei: “Ko au la ʼaenī neʼe faʼu pe au ʼaki te kele.” Neʼe mole loto ia ke toe ʼāsili age te mamahi ʼo Sopo ʼaki hana fai he ʼu palalau neʼe mole ina fakakaukauʼi. (Sopo 33:​6, 7; Tāʼaga Lea 12:18) Neʼe mole valokiʼi e Eliu te aga ʼaē neʼe fai e Sopo ʼi te temi muʼa, kae neʼe ina vikiʼi ia ia ʼi tana nofo agatonu. (Sopo 33:32) Ko te meʼa ʼaē ʼe maʼuhiga ʼaupito, neʼe manatu ia Eliu ohage ko te ʼAtua, pea neʼe tokoni kiā Sopo ke ina manatuʼi tāfito ʼe mole feala ke fai e Sehova he aga heʼe faitotonu. (Sopo 34:​10-12) Neʼe ina fakaloto mālohiʼi ia Sopo ke ʼatalitali kiā Sehova, kae ke mole ina faigaʼi ke ina fakahā tona ʼuhiga faitotonu ʼo ia. (Sopo 35:2; 37:​14, 23) ʼE feala ke ʼaoga moʼoni ki te kau tagata ʼāfea pea mo ʼihi atu Kilisitiano te ʼu ako ʼaē ʼe tou lava tāʼofi mai ai.

16. Neʼe fakaʼaogaʼi feafeaʼi e Satana ia te ʼu tagata fakaloto fīmālie loi e toko tolu?

¹⁶ Neʼe kehekehe ʼaupito te tokoni fakapotopoto ʼa Eliu mo te ʼu palalau fakaloto mamahi ʼa Elifasi, mo Pilitate, pea mo Sofale. Neʼe ʼui fēnei Sehova kiā nātou: “Neʼe mole koutou fakamatala, ʼo ʼuhiga pea mo au, ia te meʼa ʼaē ʼe moʼoni.” (Sopo 42:7) Tatau aipe pe neʼe nātou ʼui neʼe nātou fai tokoni ʼaki he ʼu manatu ʼe lelei, kae neʼe mole ko he ʼu kaumeʼa agatonu ia, koteʼuhi neʼe fakaʼaogaʼi nātou e Satana. Ko nātou toko tolu ʼaia neʼe nātou ʼui talu mai te kamataʼaga neʼe fai e Sopo he meʼa ʼe kovi ʼo tupu ai tona ʼu malaʼia. (Sopo 4:​7, 8; 8:6; 20:​22, 29) ʼO mulimuli ki te ʼu palalau ʼa Elifasi, ʼe mole falala te ʼAtua ki tana ʼu kaugana, pea ʼe mole maʼuhiga ia kiā te Ia peʼe tou agatonu peʼe kailoa. (Sopo 15:15; 22:​2, 3) Neʼe tukugakoviʼi e Elifasi ia Sopo ʼo ʼuhiga mo he ʼu hala neʼe mole ina fai. (Sopo 22:​5, 9) Kae ko Eliu neʼe tokoni kiā Sopo ʼi te faʼahi fakalaumālie, pea ʼe ko te faʼahi ʼaia ʼaē ʼe tonu ke fai e he tahi ʼe ina fakaloto fīmālieʼi he tahi ʼaki te ʼofa.

17. Koteā ʼaē ʼe tonu ke tou manatuʼi mokā tou tau mo ni ʼu faigataʼaʼia?

¹⁷ ʼE ʼi ai te tahi ako ʼo ʼuhiga mo te faʼa kātaki ʼe feala ke tou maʼu ʼi te tohi ʼa Sopo. ʼE tokagaʼi e totatou ʼAtua ʼofa ia totatou ʼaluʼaga pea ʼe fia tokoni mai pea ʼe feala ke tokoni mai ʼi he ʼu ʼaluʼaga kehekehe. ʼI te kamata mai, neʼe tou vakaʼi te ʼu meʼa neʼe hoko kiā Elsa Abt. Tou fakakaukauʼi te ʼu palalau ʼaenī neʼe ina fai: “ ʼI muʼa atu ʼo toku puke, neʼe au lau te tohi ʼa te tuagaʼane neʼe ina ʼui ai ka fakatagaʼi kovi tatou, pea ko te laumālie ʼo Sehova ʼe ina taupau tatou ʼi te tokalelei. Neʼe au manatu ʼe lagi lahi fau leva te ʼu palalau ʼaia ʼa te tēhina. Kae ʼi te temi ʼaē neʼe fakatagaʼi ai au, neʼe au ʼiloʼi ai neʼe moʼoni tana ʼu palalau. Neʼe ko te meʼa ʼaia neʼe hoko moʼoni kiā te au. ʼE faigataʼa hakotou mahino kiai mo kapau neʼe mole heʼeki hoko he ʼaluʼaga feiā kiā koutou. Kae neʼe hoko moʼoni te faʼahi ʼaia kiā te au. ʼE tokoni mai ia Sehova.” Neʼe mole talanoa ia Elsa ʼo ʼuhiga mo te meʼa ʼaē neʼe lava fai e Sehova peʼe ko te ʼu meʼa neʼe ina fai ʼi te temi ʼo Sopo, kua hili kiai te ʼu taʼu e lauʼi afe. Neʼe talanoa ia ʼo ʼuhiga mo totatou temi. Ei, “ ʼe tokoni mai ia Sehova”!

Fiafia Te Tagata ʼAē ʼe Faʼa Kātaki

18. Ko te ʼu fua lelei fea neʼe maʼu e Sopo ʼi tana faʼa kātaki?

¹⁸ Tokosiʼi iā tatou ʼe tou tau mo ni ʼu faigataʼaʼia ohage ko Sopo. Kae tatau aipe te ʼu faigataʼaʼia ʼaē ʼe feala ke hoko kiā tatou ʼi te tuʼu ʼaenī, kae ʼe ʼi ai te ʼu tupuʼaga maʼuhiga ke tou taupau tatatou agatonu ohage ko Sopo. ʼI tona ʼuhiga moʼoni, neʼe fua lelei kiā Sopo tana faʼa kātaki. Neʼe hikihiki ai ia Sopo, ʼo liliu ai ko he tahi kua kātoa. (Sakopo 1:​2-4) Neʼe mālohi ai tana ʼu felogoi mo te ʼAtua. Neʼe ʼui fēnei e Sopo: “Neʼe au logo ki te talanoa ʼo ʼuhiga mo koe, kae ʼi te temi nei ʼe sio toku mata kiā te koe.” (Sopo 42:5) Neʼe gutu loi ia Satana he neʼe mole feala ke ina maumauʼi te agatonu ʼa Sopo. ʼI ni ʼu taʼu e teau ki muli age, neʼe kei talanoa pe ia Sehova ʼo ʼuhiga mo tana kaugana ko Sopo, ʼo ina ʼui neʼe ko te faʼifaʼitakiʼaga ʼaia ʼo te faitotonu. (Esekiele 14:14) Ko te fakamatala ʼo tana nofo agatonu pea mo tana faʼa kātaki ʼe ina fakaloto mālohiʼi te hahaʼi ʼa te ʼAtua iā ʼaho nei.

19. Kiā koutou, he koʼe ʼe tonu ke tou maʼu te faʼa kātaki?

¹⁹ ʼI te faitohi ʼa Sakopo ki te ʼu Kilisitiano ʼo te ʼuluaki sēkulō ʼo ʼuhiga mo te faʼa kātaki, neʼe talanoa ki te fiafia ʼaē ʼe kita maʼu mokā tou faʼa kātaki. Pea neʼe ina toʼo te faʼifaʼitaki ʼo Sopo moʼo fakamanatuʼi kiā nātou ko Sehova ʼe ina fakapale lahi tana ʼu kaugana agatonu. (Sakopo 5:11) ʼE tou lau fēnei iā Sopo 42:12: “Kiā Sehova, ki muli age, neʼe ina tapuakiʼi te temi fakaʼosi ʼo Sopo ʼo laka age ʼi te kamata.” Neʼe foaki e te ʼAtua ʼo tuʼa lua age ʼi te ʼu meʼa ʼaē neʼe puli ia Sopo, pea neʼe hoko fualoa atu tona maʼuli pea neʼe fiafia. (Sopo 42:​16, 17) ʼO toe feiā aipe, ko te lotomamahi, mo te ʼu mamahi fuape ʼaē ʼe tou tau mo ia ʼi te fakaʼosi ʼo te tuʼu ʼaenī, ʼe pulihi anai pea mo galoʼi anai ʼi te mālama foʼou ʼa te ʼAtua. (Isaia 65:17; Apokalipesi 21:4) Neʼe tou logo ki te faʼa kātaki ʼa Sopo, pea ʼe tou fakatotonu ʼaki te tokoni ʼa Sehova, ke tou faʼifaʼitakiʼi ia Sopo. ʼE fakapapau fēnei mai ʼi te Tohi-Tapu: “Manuia te tagata e ina katakiʼi te ahiahi! Koteuhi, i te hili o tona ahiahiʼi, e ina tali anai te kolona o te mauli nee fakapapau e te Aliki kia natou e oʼofa ia te ia.”​—Sakopo 1:⁠12.

ʼE Koutou Tali Feafeaʼi Anai?

• ʼE tou lava fakafiafiaʼi feafeaʼi te loto ʼo Sehova?

• He koʼe ʼe mole tonu ke tou manatu ʼe hoko kiā tatou he ʼu faigataʼaʼia heʼe mole ʼofa te ʼAtua kiā tatou?

• Koteā ʼaē neʼe tokoni ai kiā Sopo ke faʼa kātaki?

• ʼE tou lava faʼifaʼitaki feafeaʼi ia Eliu mokā tou fakaloto mālohiʼi he tēhina peʼe ko he tuagaʼane?

[Paki ʼo te pasina 20]

Ko he tahi ʼe fai tokoni lelei ʼe lotomahino, mo fakaʼapaʼapa, pea mo agalelei

[Paki ʼo te pasina 21]

Ko Elsa pea mo Harald Abt