Neʼe Kotou Fai Koa Ia Te Agahala ʼAē ʼe Fakafeagai Ki Te Laumālie Māʼoniʼoni?
“ ʼE ʼi ai te agahala ʼe ina taki ki te mate.”—1 Soane 5:16.
1, 2. ʼE feafeaʼi hatatou ʼiloʼi ʼe feala hatatou fai ia te agahala ʼaē ʼe fakafeagai ki te laumālie māʼoniʼoni ʼo te ʼAtua?
“NEʼE au hoha pē ʼi te temi fuli, heʼe ʼi taku manatu neʼe au fai ia te agahala ʼaē ʼe fakafeagai ki te laumālie māʼoniʼoni.” Ko te ʼui ʼaia ʼa te tuagaʼane ʼi Siamani, logolā tana tauhi ʼaē ki te ʼAtua. ʼE feala koa ki he Kilisitiano ke ina fai ia te agahala ʼaē ʼe fakafeagai ki te laumālie māʼoniʼoni ʼo te ʼAtua, peʼe ki tona mālohi gāue?
2 ʼEī, ʼe feala ki he tahi ke ina fai te agahala ʼaē ʼe fakafeagai ki te laumālie māʼoniʼoni ʼo Sehova. Neʼe ʼui fēnei e Sesu Kilisito: “Ko te faʼahiga agahala kehekehe pea mo te faʼahiga laukovi kehekehe ʼe fakamolemole anai ia ki te tagata, kae ko te laukovi ki te laumālie ʼe mole fakamolemole anai ia.” (Mateo 12:31) ʼE fai mai ia te fakatokaga ʼaenī kiā tātou: “Kapau ʼe tou maʼuliʼi te agahala ʼi totatou loto faʼifaʼitaliha logopē tatatou kua maʼu ia te mālama totonu ʼo te moʼoni, ʼe mole kei maʼu he sākilifisio ki te ʼu agahala, kae ko he fakamāu fakamataku ʼe ʼamanaki hoko mai.” (Hepeleo 10:26, 27) Pea neʼe ʼui fēnei e te ʼapositolo ko Soane: “ ʼE ʼi ai te agahala ʼe ina taki ki te mate.” (1 Soane 5:16) Kae ko ia ʼaē neʼe ina fai te agahala mamafa, ʼe ina ʼiloʼi koa pe neʼe ina fai “te agahala [ʼaē] ʼe ina taki ki te mate”?
Kapau ʼe Tou Fakahemala Pea ʼe Tou Maʼu Te Fakamolemole
3. Koteā te tahi faʼahi ʼaē kā hoko moʼoni mo kapau ʼe tou lotomamahi ʼaupitō he neʼe tou agahala?
3 Ko Sehova tokotahi pē te Tuʼi Fakamāu ʼo te hahaʼi agahala. Heʼe ko tātou fuli ʼe tonu ke tou huʼi maʼua kiā te ia, pea ʼe ina fai tuʼumaʼu ia te meʼa ʼaē ʼe totonu. (Senesi 18:25; Loma 14:12) Ko Sehova ʼaē ʼe ina fakafuafua pe neʼe tou fai he agahala ʼe mole toe ʼi ai he fakamolemole kiai, pea ko ia tokotahi pē ʼe ina toʼo tona laumālie iā tātou. (Pesalemo 51:11) Kae kapau ʼe tou lotomamahi ʼaupitō he neʼe tou agahala, lagi heʼe tou fakahemala moʼoni. Kae koteā te faka ʼuhiga ʼo te fakahemala moʼoni?
4. (a) Koteā te faka ʼuhiga ʼo te fakahemala? (b) Koteā ʼaē ʼe fakaloto fīmālie ʼi te ʼu palalau ʼo te Pesalemo 103:10-14?
4 Kā tou fakahemala ko tona faka ʼuhiga ʼe tou fetogi tatatou aga ʼo ʼuhiga mo he aga ʼe kovi neʼe tou fai pe neʼe tou fia fakahoko. ʼE tou lotomamahi peʼe tou fakahemala, pea mo tou situʼa mai te agahala. Kapau neʼe tou fai he agahala mamafa kae kua tou fai te ʼu puleʼaki ʼaē ke hā kua tou fakahemala moʼoni, ʼe tou loto fīmālie anai ʼi te ʼu palalau ʼaenī ʼa te tagata fai pesalemo: “[Ko Sehova] neʼe mole ina fai he meʼa kiā tātou ʼo mulimuli ki tatatou ʼu agahala, pea neʼe mole ina tuku mai kiā tātou te tautea ʼaē ʼe tau mo tātou, ʼo mulimuli ki tatatou ʼu hala. Heʼe, ohagē pē ko te māʼoluga ʼo te lagi ʼi te kele, ko tona finegaloʼofa ʼe māʼoluga ia ʼo ʼuhiga mo nātou ʼaē ʼe manavasiʼi kiā te ia. Ohagē ko te mamaʼo ʼo te potu hahake ʼi te potu hihifo, neʼe toe fēia mo tana fakamamaʼo iā tātou tatatou ʼu agahala. Ohagē pē ko te manavaʼofa ʼa he tamai ki tona ʼu foha, ʼe manavaʼofa ia Sehova kiā nātou ʼaē ʼe manavasiʼi kiā te ia. Koteʼuhi ʼe ina ʼiloʼi lelei peʼe faʼu tātou ʼaki teā, ʼo ina manatuʼi ko tātou ʼe tou efu.”—Pesalemo 103:10-14.
5, 6. Kotou tuku mai ia te manatu tāfito ʼo te koga tohi ʼo 1 Soane 3:19-22, pea kotou fakamahinohino ia te ʼu palalau ʼa te ʼapositolo.
5 ʼE toe fakaloto fīmālie te ʼu palalau ʼaenī ʼa te ʼapositolo ko Soane: “ ʼAki te meʼa ʼaia ʼe tou ʼiloʼi ai anai ko tātou ʼe tou ʼi te moʼoni, pea ʼe tou fakafīmālie anai totatou loto ʼi ʼona muʼa, ʼo ʼuhiga mo meʼa fuli ʼe tautea tātou e totatou loto, heʼe ko te ʼAtua ʼe lahi age ia ʼi totatou loto pea ʼe ina ʼiloʼi ia meʼa fuli. Kau ʼofaina, kapau ʼe mole tauteaʼi tātou e totatou loto, ʼe tou felōgoi ʼāteaina mo te ʼAtua; pe koteā he meʼa ʼe tou kole, ʼe tou maʼu mai iā te ia, koteʼuhi ʼe tou taupau tana ʼu fakatotonu pea ʼe tou fai te ʼu meʼa ʼaē ʼe lelei ki ʼona mata.”—1 Soane 3:19-22.
6 ʼE “ ʼiloʼi ai anai ko tātou ʼe tou ʼi te moʼoni” ʼaki te ʼofa fakatautēhina ʼaē ʼe tou maʼu iā tātou pea ʼe mole tou maʼuliʼi te agahala. (Pesalemo 119:11) Kapau ʼe tou logoʼi ʼe vevele totatou loto ʼuhi ko he faʼahi, ʼe tonu ke tou manatuʼi ko te “ ʼAtua ʼe lahi age ia ʼi totatou loto pea ʼe ina ʼiloʼi ia meʼa fuli.” ʼE loto manavaʼofa ia Sehova kiā tātou heʼe ina ʼiloʼi totatou “ ʼofa fakatautēhina ʼe mole mālualoi,” pea mo te tau ʼaē ʼe tou fai ki te agahala, pea mo tatatou ʼu faiga ʼaē ke tou fai ia tona finegalo. (1 Petelo 1:22) ʼE ‘mole tautea anai tātou’ e totatou loto mo kapau ʼe tou falala kiā Sehova, mo tou fakahā totatou ʼofa fakatautēhina, pea ʼe mole tou lakahala ʼi he agahala neʼe tou fai ʼi totatou loto faʼifaʼitaliha. ʼE tou “felōgoi ʼāteaina [anai] mo te ʼAtua” ʼi te faikole, pea ʼe tali mai anai heʼe tou fakalogo ki tana ʼu fakatotonu.
Neʼe Natou Fai Te Agahala ʼAē ʼe Fakafeagai Ki Te Laumālie
7. Koteā ʼaē kā ʼiloʼi ai peʼe feala ke fakamolemole he agahala peʼe kailoa?
7 Ko te ʼu agahala fea ʼaē ʼe mole maʼu he fakamolemole kiai? Moʼo tali ki te fehuʼi ʼaia, tou vakaʼi age muʼa te ʼu faʼifaʼitaki ʼi te Tohi-Tapu. ʼE tou loto fīmālie ai anai mo kapau ʼe tou fakahemala moʼoni logolā kei tou lotomamahi ʼaupitō ki he ʼu agahala mamafa neʼe tou fai. ʼE tou vakaʼi anai ʼe mole tonu pē ke ʼiloʼi pe koteā te aga ʼaē neʼe fai e he tahi; kae ʼe tonu foki ke ʼiloʼi ia te tupuʼaga ʼo tana fai ia te agahala ʼaia, pe neʼe feafeaʼi tona loto pea mo tana holi ʼaē ki te agahala ʼaia, ke ʼiloʼi ai peʼe feala ke fakamolemole peʼe kailoa ia te agahala ʼaia.
8. Neʼe feafeaʼi te agahala ʼaē neʼe fai e ʼihi kau takitaki lotu Sutea ʼo te ʼuluaki sēkulō ki te laumālie māʼoniʼoni?
8 Ko te kau takitaki lotu Sutea ʼo te ʼuluaki sēkulō ʼaē neʼe fakafeagai mālohi kiā Sesu Kilisito, neʼe natou fai ia te agahala ʼe fakafeagai ki te laumālie māʼoniʼoni. Neʼe natou sio lelei ʼe gāue ia Sesu mo te laumālie ʼo te ʼAtua, ʼi tana fai ia te ʼu milakulo moʼo fakavikiviki ia Sehova. Kae ko te ʼu fili ʼaia ʼo Kilisito neʼe natou faka ʼuhiga te mālohi ʼaia kiā Satana te Tēvolo. ʼI te manatu ʼa Sesu, ko nātou ʼaia ʼaē ʼe natou laukovi ki te laumālie māʼoniʼoni ʼo te ʼAtua ʼe natou fai ia te agahala ʼaē ʼe mole maʼu anai he fakamolemole kiai ʼi te “tuʼu ʼo te ʼu faʼahiga meʼa ʼaenī pea mo te tuʼu kā haʼu.”—Mateo 12:22-32.
9. Koteā te faka ʼuhiga ʼo te laukovi, pea koteā ʼaē neʼe ʼui e Sesu ʼo ʼuhiga mo te faʼahi ʼaia?
9 Ko te laukovi ʼe ko he fasituʼu, he palalau fakatupu lotomamahi, peʼe ko he lea kovi. Kapau ko te ʼAtua ʼe ko ia te Matapuna ʼo te laumālie māʼoniʼoni, pea ko tanatou fakafeagai ʼaia ki tona laumālie ʼe hagē pē ʼe natou fakafeagai kiā Sehova. Ko te fakaʼaogaʼi ʼo te taʼi faʼahiga palalau ʼaia kae mole fakahemala, ʼe mole tuha mo te fakamolemole. Neʼe faka ʼuhiga te ʼu palalau ʼa Sesu ʼo ʼuhiga mo te taʼi agahala ʼaia kiā nātou ʼaē ʼe natou fakafeagai ki te gāue ʼa te laumālie māʼoniʼoni ʼo te ʼAtua. He neʼe gāue te laumālie ʼo Sehova mo Sesu kae ko nātou ʼaia neʼe natou fakafeagai kiā te ia, neʼe natou faka ʼuhiga pē ia te mālohi ʼaia ki te Tēvolo, koia neʼe natou agahala ʼo laukovi ki te laumālie. Koia, neʼe ʼui fēnei e Sesu: “Ko ʼaē ʼe laukovi ki te laumālie māʼoniʼoni, ʼe mole ina maʼu ʼi he temi te fakamolemole, kae ʼe maʼua ia ʼi te agahala heʼegata.”—Maleko 3:20-29.
10. He koʼē neʼe fakahigoaʼi e Sesu ia Sutasi ko “te foha ʼo te fakaʼauha”?
10 Kotou toe fakatokagaʼi mo te meʼa ʼaē neʼe hoko kiā Sutasi Isikaliote. Neʼe manako ia ki te agakākā, ʼo ina kaihaʼa te falā ʼo te kēsi ʼaē neʼe foaki age ke tokaga kiai. (Soane 12:5, 6) Ki muli age neʼe ʼalu ia Sutasi ki te kau takitaki Sutea pea mo fonofono ke ina kākāʼi ia Sesu ki te ʼu foʼi piesi siliva e 30. ʼI tana ʼosi fai lavakiʼi Sesu neʼe lotomamahi ia Sutasi, kae neʼe mole fakahemala ia ki te agahala ʼaē neʼe ina fai. Koia, neʼe mole tuha mo Sutasi ke fakatuʼuake, pea neʼe fakahigoaʼi ia ia e Sesu ko “te foha ʼo te fakaʼauha.”—Soane 17:12; Mateo 26:14-16.
Neʼe Mole Natou Fai Te Agahala ʼAē ʼe Fakafeagai Ki Te Laumālie
11-13. Neʼe koteā te agahala neʼe fai e te Hau ko Tavite pea mo Pati-Sepa, pea koteā te fakaloto fīmālie ʼe tou maʼu mai te faʼahiga fakatokatoka ʼaē neʼe fai e te ʼAtua ki tonā fihifihia?
11 ʼI ʼihi temi, ko te kau Kilisitiano ʼaē neʼe natou kōfesioʼi tanatou ʼu agahala mamafa pea neʼe natou maʼu ia te tokoni fakalaumālie mai te ʼu tagata ʼāfea, ʼe lagi kei natou hoha ki he ʼu agahala ʼāfea neʼe natou maumauʼi ai te lao ʼa te ʼAtua. (Sake 5:14) Kapau ʼe tou hoha fēia, ʼe lagi lelei anai ke tou vakaʼi te manatu ʼi te Tohi-Tapu ʼo ʼuhiga mo nātou ʼaē neʼe fakamolemole ki ai tanatou ʼu agahala.
12 Ko te Hau ko Tavite neʼe agahala mamafa mo Pati-Sepa, ia te ʼohoana ʼo Ulia. ʼI tana sio mai tona fakaheketālaʼa ki te māʼanu ʼa te fafine matalelei ʼaia, neʼe ʼaumai ai leva e Tavite ia ia ki tona fale hau pea neʼe ina fai te ʼu felāveʼi fakasino mo ia. ʼI tana ʼiloʼi ki muli age neʼe kua faitama, neʼe ina fakatuʼutuʼu ke haʼu tona ʼohoana ko Ulia ʼo momoe mo ia ke fufū ai tanā tono. ʼI te mole hoko ʼo tana kākā ʼaia, neʼe fakatuʼutuʼu leva e te hau ke matehi ia Ulia ʼi te tau. Neʼe liliu leva ia Pati-Sepa ko te ʼohoana ʼo Tavite, ʼo tupu ai tana tamasiʼi pea neʼe mate ki muli age.—2 Samuele 11:1-27.
13 Neʼe fakatokatoka e Sehova ia te fihifihia ʼaē neʼe hoko kiā Tavite pea mo Pati-Sepa. Neʼe fakamolemole e te ʼAtua ia te agahala ʼa Tavite, lagi neʼe ina tokagaʼi tana fakahemala pea mo te fuakava ʼo te Puleʼaga ʼaē neʼe ina fai mo ia. (2 Samuele 7:11-16; 12:7-14) ʼE mahino ia neʼe fakahemala ia Pati-Sepa ki te agahala ʼaē neʼe ina fai, he neʼe ina maʼu leva te pilivilēsio ke liliu ko te faʼē ʼa te Hau ko Salomone pea mo te kui fafine ʼa Sesu Kilisito. (Mateo 1:1, 6, 16) Kapau neʼe tou agahala, ʼe lelei ke tou manatuʼi ko Sehova ʼe ina tokagaʼi totatou loto fakahemala.
14. ʼE hā feafeaʼi te loto fakamolemole lahi ʼa te ʼAtua ʼi te meʼa ʼaē neʼe hoko ki te Hau ko Manase?
14 Ko te loto fakamolemole lahi ʼa Sehova ʼe toe hā ʼi te meʼa ʼaē neʼe hoko ki te Hau ko Manase ʼo Suta. Neʼe ina fai ia te meʼa ʼaē ʼe kovi kiā mata ʼo Sehova. Neʼe fakatuʼu e Manase ia te ʼu ʼaletale ʼo Paale, ʼo tauhi ki te “ ʼatu kautau fuli ʼo te lagi,” pea mo laga te ʼu ʼaletale ki te ʼu ʼatua hala ʼi te ʼu malaʼe e lua ʼo te fale lotu. Neʼe ina tutu tona ʼu foha ʼi te afi, ʼo uga te hahaʼi ke natou fai te ʼu meʼa faifakalauʼakau, ʼo tupu ai ki te hahaʼi ʼo Suta pea mo Selusalemi ia te “lahi age ʼo tanatou agakovi ʼi te hahaʼi ʼo te ʼu puleʼaga ʼaē neʼe fakaʼauha e Sehova ʼi muʼa ʼo te ʼu foha ʼo Iselaele.” Neʼe mole natou tokagaʼi te ʼu fakatokaga ʼaē neʼe faka mafola e te ʼu polofetā ʼa te ʼAtua. ʼOsi ʼaia, neʼe pilisoniʼi e te hau ʼo Asilia ia Manase. Lolotoga ʼo tona ʼaunofo, neʼe fakahemala ia Manase pea mo faikole ki te ʼAtua ʼaki te agavaivai. Pea neʼe fakamolemole e te ʼAtua kiā te ia, ʼo ina toe fakanofo ia ia ki tona tuʼulaga hau ʼi Selusalemi, pea neʼe ina toe fakatuʼu ai ia te tauhi moʼoni.—2 Fakamatala 33:2-17.
15. Koteā ʼaē neʼe hoko ki te maʼuli ʼo te ʼapositolo ko Petelo ʼe hā ai ko Sehova ʼe fakamolemole “lahi”?
15 ʼI te ʼu sēkulō ki muli age, neʼe agahala mamafa ia te ʼapositolo ko Petelo ʼi tana fakafisi ʼaē kiā Sesu. (Maleko 14:30, 66-72) Kae neʼe fakamolemole “lahi” ia Sehova kiā Petelo. (Isaia 55:7) Koteā tona tupuʼaga? Koteʼuhi neʼe fakahemala moʼoni ia Petelo. (Luka 22:62) Neʼe hā lelei te loto fakamolemole ʼa te ʼAtua, hili ʼaho e 50 ʼi te ʼaho ʼo te Penikositē, neʼe maʼu e Petelo ia te pilivilēsio ke faka mafola ʼo ʼuhiga mo Sesu. (Gāue 2:14-36) ʼE ʼi ai koa he faʼahi ke tou ʼui ai ko te ʼAtua ʼe mole fakamolemole anai ki he Kilisitiano ʼe fakahemala moʼoni iā ʼaho nei? Neʼe hiva fēnei ia te tagata fai pesalemo: “Kanapau lā neʼe ke lamalama te ʼu hala, Ê Sah, Ê Sehova, ko ai koa ʼaē ʼe feala anai ke tuʼu? Heʼe maʼu iā te koe te fakamolemole moʼoni.”—Pesalemo 130:3, 4.
Te Fakaloto Fakafīmālie ʼo ʼUhiga Mo Te Agahala
16. Ko te ʼu ʼaluʼaga fea ʼaē ʼe fakamolemole mai ai te ʼAtua kiā tātou?
16 Ko te ʼu faʼifaʼitaki ʼaenī neʼe tou vakaʼi, ʼe tokoni anai moʼo fakafīmālieʼi totatou loto hoha ʼo ʼuhiga mo he agahala neʼe tou fai ʼe fakafeagai ki te laumālie māʼoniʼoni. ʼE hā mai ʼi te ʼu faʼifaʼitaki ʼaia ko Sehova ʼe fakamolemole ki te kau agahala ʼaē ʼe loto fakahemala. Ko te meʼa ʼaē ʼe maʼuhiga tāfito ʼe ko te faikole fakamālotoloto ki te ʼAtua. Kapau neʼe tou agahala, ʼe tou lava kole ke fakamolemole mai ʼaki te sākilifisio faitotogi ʼa Sesu, ke manavaʼofa mai Sehova kiā tātou, ke fakamolemole mai heʼe tou agahala, pea ke fakamolemole mai ʼuhi ko tatatou tauhi agatonu. Kā tou ʼiloʼi te ʼofa makehe ʼo Sehova, pea ʼe feala ke tou kole ki ai ke fakamolemole mai ki ʼatatou agahala, pea ʼe tou falala ʼe ina tali anai tatatou kole.—Efesi 1:7.
17. Koteā ʼaē ʼe tonu ke tou fai mo kapau neʼe tou agahala pea mo ʼaoga kiā tātou he tokoni fakalaumālie?
17 ʼE feafeaʼi leva mo kapau mole kei tou lava faikole ʼuhi heʼe ko ʼatatou agahala kua ina fakatupu mahaki kiā tātou ʼi te faʼahi fakalaumālie? Ki te faʼahi ʼaia, neʼe tohi fēnei e te tisipulo ko Sake: “Ke . . . pāui [ʼe ia ʼaia] ke ʼomai kiā te ia te ʼu tagata ʼāfea ʼo te kōkelekāsio, pea ke natou faikole ʼo ʼuhiga mo ia, ʼo natou tākai ia ia ʼaki te lolo ʼi te huafa ʼo Sehova. Pea ko te faikole ʼo te tui ʼe ina fakamālōlō anai ia ia ʼaē ʼe mahaki, pea ʼe fakatuʼu anai ia ia e Sehova. . . . Kapau neʼe ina fai he ʼu agahala, pea ʼe fakamolemole anai kiā te ia.”—Sake 5:14, 15.
18. He koʼē ʼe mole feala ke tou ʼui ʼo ʼuhiga mo he tahi neʼe agahala pea mo fakamavae mai te loto kōkelekāsio, ʼe mole kei ʼi ai he fakamolemole kiai?
18 Tatau aipē mo kapau ko he tahi neʼe agahala kae neʼe mole fakahemala, pea kua fakamavae ʼi te kōkelekāsio, ʼe mole faka ʼuhiga leva ko tana agahala ʼe mole kei ʼaoga kiai he fakamolemole. ʼO ʼuhiga mo te tehina fakanofo neʼe agahala pea neʼe fakamavae ʼi Kolonito, neʼe tohi fēnei e Paulo: “Ko te tautea ʼaia ʼaē neʼe tuku ki ai e te tokolahi kua feʼauga ia ki te taʼi tagata ʼaia, ʼo feala lā ʼi te temi nei, ke tonu ke kotou fakamolemole kiā te ia ʼaki he loto kātoa pea mo fakaloto fīmālieʼi, ke ʼaua naʼa taʼomia te taʼi tagata ʼaia ʼi he faʼahiga agaaga pē ʼuhi ko tona lotomamahi ʼaupitō.” (2 Kolonito 2:6-8; 1 Kolonito 5:1-5) Kae ke natou toe maʼu he ʼu felōgoi lelei mo te ʼAtua, ʼe ʼaoga kiā nātou ʼaē kua hehē ke natou tali te tokoni ʼa te kau tagata ʼāfea ʼaē ʼe fakatafito ki te Tohi-Tapu pea mo fakahā tanatou loto fakahemala moʼoni. ʼE tonu ke natou “fakatupu te ʼu fua ʼaē ʼe gali mo te fakahemala.”—Luka 3:8.
19. Koteā ʼaē kā tokoni mai ke tou nonofo ‘mālohi ʼi te tui’?
19 Koteā ʼaē ʼe feala ai ke tou manatu neʼe tou fai te agahala ʼaē ʼe fakafeagai ki te laumālie māʼoniʼoni? ʼE tou lava manatu fēia ʼuhi heʼe tou tuʼania fau naʼa tou fai he meʼa ʼe kovi peʼe ko he vaivaiʼaga fakasino. Koia, ʼe lagi ʼaoga anai ke tou faikole pea mo hilifaki kiai he mālōlō lelei. Heʼe mole tonu ke tou tuku ia Satana ke ina fakaloto vaivaiʼi tātou, ke tou fakagata tatatou tauhi ʼaē ki te ʼAtua. Mai tona ʼaluʼaga ʼaē ko Sehova ʼe mole fiafia ʼi te mate ʼa te tagata agakovi, koia ʼe mole fiafia anai mokā puli hana kaugana. Koia kapau ʼe tou mātataku naʼa tou fai te agahala ʼaē ʼe fakafeagai ki te laumālie, ʼe tonu anai ke tou haga fafaga totatou loto ʼaki te Folafola ʼa te ʼAtua, ʼo tou fakaʼaogaʼi te ʼu Pesalemo fakaloto fīmālie. ʼE tonu ke tou haga kau ki te ʼu fono pea ki te faka mafola ʼo te Puleʼaga. Kapau ʼe tou fai ia te faʼahi ʼaia, pea ʼe tokoni anai kiā tātou ke tou ‘mālohi ʼi te tui’ pea mole tou loto hoha ki he agahala neʼe tou fai ʼe mole ʼi ai he fakamolemole kiai.—Tito 2:2.
20. Koteā te manatu ʼe lava tokoni ki he tahi ke mahino neʼe mole ina fai ia te agahala ʼaē ʼe fakafeagai ki te laumālie māʼoniʼoni?
20 Ko he tahi ʼe mataku he neʼe ina fai te agahala ʼaē ʼe fakafeagai ki te laumālie māʼoniʼoni, ʼe feala ke natou feʼekeʼaki fēnei: ‘Neʼe au laukovi koa ki te laumālie māʼoniʼoni? Kua au fakahemala moʼoni koa ki taku agahala? ʼE au tui koa ki te loto fakamolemole ʼa te ʼAtua? Kua au liliu koa ko he ʼapositā, ʼo au liʼaki te mālama fakalaumālie?’ ʼE lagi ko te taʼi faʼahiga hahaʼi ʼaia ʼe natou mahino anai neʼe mole natou laukovi ki te laumālie māʼoniʼoni ʼo te ʼAtua, pea ʼe mole heʼeki natou liliu ko ni hahaʼi ʼapositā. ʼE natou loto fakahemala, pea ʼe natou haga tui ki te loto fakamolemole ʼa Sehova. Kapau ʼe fēia, pea neʼe mole natou fai ia te agahala ʼaē ʼe fakafeagai ki te laumālie māʼoniʼoni ʼo Sehova.
21. Koteā te ʼu fehuʼi kā tou vakaʼi anai ʼi te ʼalatike kā hoa mai?
21 ʼE ko he tapuakina hata ʼiloʼi papau neʼe mole tou fai te agahala ʼaē ʼe fakafeagai ki te laumālie māʼoniʼoni! Kae ʼe ʼi ai te ʼu fehuʼi ʼe pipiki ki te faʼahi ʼaia, ʼe tou vakaʼi anai ʼi te ʼalatike kā hoa mai. Ohagē lā, ʼe tou lava fai ia te fehuʼi ʼaenī: ‘ ʼE takitaki koa au e te laumālie māʼoniʼoni ʼo te ʼAtua? ʼE hā koa ʼi toku maʼuli ia tona ʼu fua?’
Koteā Takotou Tali?
• He koʼē ʼe feala ke tou ʼui ʼe tou lava fai ia te agahala ʼaē ʼe fakafeagai ki te laumālie māʼoniʼoni?
• Koteā te faka ʼuhiga ʼo te fakahemala?
• Ko ai ʼaē neʼe fai ia te agahala ʼaē ʼe fakafeagai ki te laumālie ʼi te nofo ʼaē ʼa Sesu ʼi te kele?
• ʼE lava tekeʼi feafeaʼi he loto hoha ʼo ʼuhiga mo hata manatu neʼe tou fai he agahala ʼe mole ʼi ai he fakamolemole kiai?