Te ʼu Fehuʼi ʼa Te Kau Lautohi

Kapau neʼe kamata ia te taʼukai ʼi te temi ʼaē neʼe kau fuli ai ia te hahaʼi tagata Iselaele ki te Lafeti ʼo Te ʼu Keke ʼAē ʼe Mole Hona Meʼa Fakatupu, ko ai ʼaē neʼe ina tae ia te ʼu ʼuluaki fua ʼo te olose ʼaē neʼe ʼaumai ki te sagatualio?

Neʼe fakatotonu fēnei e te Lao ʼa Moisese ki te kau Iselaele: “Tuʼa tolu ʼi te taʼu, ʼe tonu ke ʼolo takotou ʼu tagata fuli pē kiā muʼa ʼo Sehova tokotou ʼAtua ʼi te potu ʼaē kā ina fili anai: ki te lafeti ʼo te ʼu keke ʼaē ʼe mole hona meʼa fakatupu, ki te lafeti ʼo te ʼu vāhaʼa pea mo te lafeti ʼo te ʼu fale lau.” (Teutalonome 16:16) Talu mai te temi ʼo te Hau ko Salomone, ko te tuʼulaga ʼaē neʼe fili e te ʼAtua neʼe ko te fale lotu ʼaē ʼi Selusalemi.

ʼI te ʼu lafeti e tolu, ko te ʼuluaki lafeti neʼe fai ʼi te kamataʼaga ʼo te fasigā taʼu mātala. Neʼe fakahigoaʼi ko te Lafeti ʼo Te ʼu Keke ʼAē ʼe Mole Hona Meʼa Fakatupu, pea neʼe kamata atu pē ʼi te ʼosi ʼo te Pāsikate ʼo te ʼaho 14 ʼo Nisani pea neʼe fai hoholo iā ʼaho e fitu ʼo aʼu ki te ʼaho 21 ʼo Nisani. ʼI te ʼaho 16 ʼo Nisani, ia te lua ʼaho ʼo te lafeti, neʼe ko te kamataʼaga ʼo te ʼuluaki taʼukai ʼo te taʼu ʼo mulimuli pē ki te kaletalio taputapu. ʼI te ʼaho ʼaia, neʼe toʼo e te pelepitelō lahi ia “he vaʼa ʼo te ʼu ʼuluaki fua” ʼo te taʼukai ʼo te olose pea neʼe ina lū “iā muʼa ʼo Sehova” ʼi te sagatualio. (Levitike 23:5-12) Mai tona ʼaluʼaga ʼaē neʼe fakamaʼua ki te hahaʼi tagata fuli ke natou kau ki te Lafeti ʼo Te ʼu Keke ʼAē ʼe Mole Hona Meʼa Fakatupu, ko ai ʼaē neʼe ina tae ia te mōlaga ʼaia?

Neʼe ko te puleʼaga kātoa ʼaē neʼe fai kiai te fakatotonu ke natou momoli kiā Sehova ia te ʼu ʼuluaki fua ʼo te taʼukai lolotoga te Lafeti ʼo Te ʼu Keke ʼAē ʼe Mole Hona Meʼa Fakatupu. Neʼe mole fakamaʼua ki te kau Iselaele takitokotahi ke natou kamata tae pea mo ʼaumai ia te ʼu ʼuluaki fua maʼa nātou totonu ki te sagatualio. Kae neʼe ko he maʼua neʼe tuku ki te puleʼaga kātoa ʼo Iselaele ke ʼi ai honatou kau fakafofoga. Koia neʼe feala ke fekauʼi ia he kūtuga ki he gāueʼaga ʼe tuʼu ovi moʼo tuʼusi ʼo he fuhiga olose ki te Lafeti ʼo Te ʼu Keke ʼAē ʼe Mole Hona Meʼa Fakatupu. Pea ki te faʼahi ʼaia, ʼe ʼui fēnei ʼi te tohi Encyclopaedia Judaica: “Kapau neʼe kua mātutuʼa ia te olose ʼaē neʼe toli mai he gāueʼaga ʼe tuʼu ovi ki Selusalemi, neʼe feala pē hona ʼaumai mai he faʼahi pē ʼo Iselaele. Neʼe toli mai e te ʼu tagata e toko tolu, ʼo takitahi pē mo tana pipi pakimaga pea mo tana kato.” Neʼe tonu ke ʼaumai ia te fuhiga olose ki te pelepitelō lahi, ke ina momoli kiā Sehova.

Ko te fakatotonu ʼaē neʼe fai ki te kau Iselaele ke natou momoli ia te ʼu polopolo ʼo te taʼukai neʼe ko he fealagia ke natou fakahā ai ia tonatou loto fakafetaʼi ki te tapuakina ʼa te ʼAtua ʼo ʼuhiga mo tanatou gāue pea mo te taʼukai. (Teutalonome 8:6-10) Kae ko te tahi age meʼa maʼuhiga, ko te temi ʼaē neʼe fai ai te mōlaga neʼe ko “he ata o te u koloa kahau.” (Hepeleo 10:1, Tauhi Foou) Tahi ʼaē meʼa, neʼe fakatuʼuake ia Sesu Kilisito ʼi te ʼaho 16 ʼo Nisani ʼo te taʼu 33 ʼo totatou temi, te ʼaho ʼaē ke momoli ai ia te ʼu ʼuluaki fua ʼo te taʼukai kiā Sehova. ʼO ʼuhiga mo Sesu, neʼe tohi fēnei e te ʼapositolo ko Paulo: “Ko Kilisito neʼe fakatuʼuake ʼi te kau mate, te ʼu polopolo ʼo nātou ʼaē kua momoe ʼi te mate. . . . Kae ʼe takitahi pē ʼi tona lakaga: ko Kilisito te ʼu ʼuluaki fua pea hoko ai mo nātou ʼaē ʼa Kilisito lolotoga tana ʼafio.” (1 Kolonito 15:20-23) Ko te ʼu ʼuluaki fua ʼo te taʼukai ʼaē neʼe polopoloʼi pea neʼe lū e te pelepitelō lahi iā muʼa ʼo Sehova neʼe ina fakakikite ia te fakatuʼuake ʼo Sesu Kilisito—te ʼuluaki ʼaē neʼe fakatuʼuake mai te kau mate ki te maʼuli heʼegata. Koia neʼe tofa e Sesu ia te ala moʼo faka ʼāteaina ʼo te mālamanei mai te agahala pea mo te mate.

[Haʼuʼaga ʼo te paki pasina 12]

© 2003 BiblePlaces.com