ʼE Kotou “Maʼu Koloa Koa Ki Te ʼAtua”?
“ ʼE fēia anai ki te tagata ʼaē ʼe ina tānaki he ʼu koloa maʼa ia totonu, kae ʼe mole maʼu koloa ki te ʼAtua.”—Luka 12:21.
1, 2. (a) ʼE tali e te hahaʼi ke natou fai he ʼu toe sākilifisio ke natou maʼu teā? (b) Koteā te faigataʼaʼia pea mo te tuʼutāmaki ʼaē ʼe tonu ke tōkakaga kiai ia te kau Kilisitiano?
KO TE gaoʼi ʼaē ko te kumi ʼo he koloa neʼe fufū, ʼe mole ko he gaoʼi ʼe leleiʼia pē e te kau tamaliki. ʼE ko he meʼa neʼe hoko tuʼumaʼu ʼi te temi fuli pē pea ʼi te ʼu sōsiete fuli pē. Ohagē lā ko te kumi ʼaulo ʼaē neʼe hoko ʼi te 19 sēkulō ʼi Ositalalia, ʼi te Potu Sautē ʼo Afelika, ʼi Kanata, pea mo ʼi Amelika, neʼe tupu ai te ʼomai ʼa te hahaʼi mai mamaʼo, neʼe natou mavae ʼi tonatou ʼu ʼapi pea mo te ʼu hahaʼi ʼaē neʼe ʼoʼofa ai, he neʼe natou leleiʼia te ʼolo ʼo kumi paʼaga ʼi he ʼu fenua neʼe mole natou ʼiloʼi pea neʼe lahi ai mo te ʼu faigataʼaʼia. ʼE moʼoni, tokolahi te hahaʼi ʼe natou tali ke natou tuʼutāmakiʼia pea mo fai he ʼu toe sākilifisio ke feala hanatou maʼu te ʼu koloa ʼaē ʼe natou loto kiai.
2 Logolā iā ʼaho nei ʼe mole kau te hahaʼi fuli ki he kumi moʼoni ʼo he koloa neʼe fufū, kae ʼe tonu ke natou gāue kinakina moʼo taupau tonatou maʼuli. ʼI te tuʼu ʼaenī, ko te faʼahi ʼaia ʼe faigataʼa pea mo fakakinakina ʼaupitō. ʼE faigafua hakita tokaga tāfito ki te meʼa kai, ki te ʼu mutuʼi meʼa pea mo te nofoʼaga, kae mole kei kita tokaga kita ki te ʼu meʼa ʼaē ʼe maʼuhiga tāfito, peʼe kita galoʼi ia te ʼu meʼa ʼaia. (Loma 14:17) Neʼe fai e Sesu ia te lea fakatātā ʼe ina fakamatala lelei ai te taʼi aga ʼaia ʼa te tagata. ʼE tou maʼu iā Luka 12:16-21.
3. Kotou fakamatala fakanounou ia te lea fakatātā ʼa Sesu ʼaē ʼe tuʼu iā Luka 12:16-21.
3 ʼI tana fakatokaga ʼaē neʼe fai ʼo ʼuhiga mo te mānumānu, ʼaē neʼe tou vakaʼi ʼi te ʼuluaki ʼalatike, neʼe fai e Sesu tana lea fakatātā. ʼI tana ʼosi fai tana fakatokaga ʼo ʼuhiga mo te mānumānu, neʼe talanoa ia Sesu ʼo ʼuhiga mo te tagata maʼu koloa neʼe mole ina feʼaugaʼia te kua fonu ʼo tona ʼu fale tānakiʼaga koloa ʼi te ʼu tuʼuga meʼa lelei, kae neʼe ina holoʼi pea ina toe laga he ʼu fale tānakiʼaga koloa ʼe lalahi age moʼo tānaki ai he tahi ʼu meʼa lelei. ʼI tana manatu ʼaē kua feala hana mālōlō pea mo fakafiafia ʼi tona maʼuli, ʼe ʼui age e te ʼAtua ʼe mate anai, pea ko te ʼu koloa fuli ʼaē neʼe ina tānaki ʼe maʼu anai e he tahi kehe. Pea neʼe fakaʼosi fēnei e Sesu tana fakamatala: “ ʼE fēia anai ki te tagata ʼaē ʼe ina tānaki he ʼu koloa maʼa ia totonu, kae ʼe mole maʼu koloa ki te ʼAtua.” (Luka 12:21) Koteā te ako ʼe tou lava tāʼofi mai te lea fakatātā ʼaia? ʼE tou lava maʼuliʼi feafeaʼi te ako ʼaia?
Te Fihifihia ʼa Te Tagata
4. Koteā ʼaē ʼe tou lava ʼui ʼo ʼuhiga mo te faʼahiga tagata ʼaē neʼe talanoa kiai Sesu ʼi tana lea fakatātā?
4 Ko te lea fakatātā ʼa Sesu ʼe ko he ʼaluʼaga ʼe hoko māhani. ʼE tou tokagaʼi neʼe kamata e Sesu te hisitolia ʼo ina ʼui fēnei: “Ko te ʼu kele ʼo te tagata maʼu koloa neʼe fua ʼo lahi ʼaupitō.” Neʼe mole ʼui e Sesu neʼe maʼu e te tagata tona ʼu koloa ʼaki hana ʼu aga fakakākā peʼe ʼaki he ʼu gāue ʼe fakafeagai ki te ʼu lao. Neʼe mole ʼui e Sesu neʼe ko he tagata agakovi. ʼI te ʼu palalau ʼa Sesu, ʼe mahino mai ko te tagata ʼo te lea fakatātā neʼe gāue kinakina. Pea lagi ko he tagata neʼe ina fai he ʼu fakatuʼutuʼu pea neʼe ina tānaki hona ʼu koloa ki te kā haʼu, moʼo puipui te maʼuli ʼo tona fāmili. Koia, ʼi te sio faka tagata, ʼe ina fakatātā he tagata ʼe gāue kinakina pea mo ina fakahoko fakalelei tona ʼu maʼua.
5. Koteā te ʼaluʼaga ʼaē neʼe hoko ki te tagata ʼi te lea fakatātā ʼa Sesu?
5 Kae ʼi tana lea fakatātā, neʼe ʼui e Sesu ʼe ko he tagata maʼu koloa, ko tona faka ʼuhiga neʼe kua ina maʼu tona ʼu tuʼuga koloa. Kae ohagē ko tona fakamatala e Sesu, neʼe ʼi ai te fihifihia ʼa te tagata maʼu koloa. Neʼe kua lahi ʼaupitō te ʼu fua ʼo tona kele, ʼo laka maumau pea mo faigataʼa tana taupau fuli. Koteā ʼaē neʼe tonu ke ina fai?
6. Iā ʼaho nei, koteā te ʼu ʼaluʼaga ʼaē ʼe felāveʼi mo te tokolahi ʼo te ʼu kaugana ʼa te ʼAtua?
6 Iā ʼaho nei, ʼe tokolahi te ʼu kaugana ʼa Sehova ʼe tatau tonatou ʼaluʼaga mo te tagata maʼu koloa. Ko te kau Kilisitiano moʼoni ʼe natou faiga ʼi tanatou gāue, ke natou aga fakahagatonu, mo faʼafai, pea mo gāue lelei. (Kolose 3:22, 23) Peʼe natou gāue maʼa he pātolō peʼe natou pātolō, ʼi te agamāhani ʼe fua lelei tanatou gāue, peʼe natou leleiʼia ʼaupitō tanatou ʼu gāue. Kā foaki age kiā nātou he tuʼulaga gāue ʼe totogi lelei age peʼe ko he tahi gāue lelei, ʼe tonu ke natou fai he tonu. ʼE natou tali anai koa peʼe natou faiga anai koa ke lahi age tanatou falā? ʼO toe fēia pē, tokolahi te kau Fakamoʼoni tūpulaga ʼe natou gāue lelei ʼi te faleako. ʼE feala ai ke foaki kiā nātou hanatou falā e te puleʼaga ke hoko atu tanatou ako ʼi he ʼu faleako lalahi pea mo ʼiloa. ʼE natou mulimuli anai koa kiai pea mo natou tali?
7. ʼI te lea fakatātā ʼa Sesu, koteā ʼaē neʼe fai e te tagata ʼo ʼuhiga mo te ʼaluʼaga ʼaē neʼe hoko kiā ia?
7 Tou toe talanoa ʼo ʼuhiga mo te lea fakatātā ʼa Sesu. Koteā ʼaē neʼe fai e te tagata maʼu koloa ʼi te lahi ʼo te ʼu fua ʼo tona kele, ʼo mole kei feʼauga tana ʼu fale tānakiʼaga koloa? Neʼe ina fakatotonu ke ina holoʼi te ʼu fale tānakiʼaga koloa ʼaē kua ina maʼu pea mo toe laga he ʼu fale tānakiʼaga koloa ʼe lalahi age moʼo tānaki ai te ʼu tuʼuga pulapula pea mo te ʼu meʼa lelei fuli. ʼI tana manatu, ʼaki tana fakatuʼutuʼu ʼaia, ʼe ina maʼu anai he fīmālie pea mo he fiafia, he neʼe ina ʼui fēnei ʼi tona loto: “ ʼE au ʼui age anai ki toku nefesi: ‘Toku nefesi, ʼe lahi ʼaupitō tau ʼu meʼa lelei kua tānaki ki he ʼu taʼu e lahi; mālōlō koe, kai, ʼinu, pea mo ke fakafiafia.’ ”—Luka 12:19.
He Koʼē Neʼe Ko He Aga “Vale” Ia?
8. Koteā te meʼa maʼuhiga ʼaē neʼe galo ki te tagata ʼaē ʼi te lea fakatātā ʼa Sesu?
8 Kae ohagē ko tona ʼui e Sesu, ko te fakatuʼutuʼu ʼa te tagata maʼu koloa neʼe mole ina maʼu ai hona fīmālie. ʼE hagē neʼe lelei, kae neʼe ʼi ai te faʼahi maʼuhiga neʼe galo kiā ia—ko te finegalo ʼo te ʼAtua. Neʼe manatu pē ia kiā ia totonu, peʼe feafeaʼi hana mālōlō, mo kai, mo ʼinu pea mo fiafia. Neʼe manatu ia ʼi te “lahi ʼaupitō [ʼo tana] ʼu meʼa lelei,” neʼe toe ‘lahi foki mo tona ʼu taʼu’ maʼuli. Kae meʼa fakaʼofaʼofa kiā ia, he neʼe mole hoko te ʼu meʼa ʼaia. Ohagē ko tona ʼui e Sesu ki muʼa atu, “tatau aipē peʼe nofo he tahi ʼi te mahu, ko tona maʼuli ʼe mole haʼu mai te ʼu meʼa ʼaē ʼe ina maʼu.” (Luka 12:15) ʼI te pō pē ʼaia, ko te ʼu meʼa fuli ʼaē neʼe gāue te tagata ke ina maʼu neʼe puli fuli, he neʼe ʼui fēnei e te ʼAtua kiā ia: “ ʼAē tagata vale, ʼi te pō pē ʼaenī ʼe toʼo anai tou nefesi. Pea ko te ʼu meʼa ʼaē neʼe ke tānaki, ko ai anai kā ina maʼu?”—Luka 12:20.
9. He koʼē neʼe ʼui ko te tagata ʼaē ʼi te lea fakatātā ʼe ko he tagata vale?
9 Kua tou aʼu ki te puani tāfito ʼo te lea fakatātā ʼa Sesu. Neʼe ʼui e te ʼAtua ʼe ko he tagata vale. ʼI te tikisionalio (Exegetical Dictionary of the New Testament) ʼe fakamahino ai ko te kupu Faka Keleka ʼaē neʼe fakaʼaogaʼi ki te kupu vale ʼe “faka ʼuhiga tuʼumaʼu ʼo ʼuhiga mo he tahi ʼe mole mahino.” ʼE ʼui ʼi te tikisionalio ʼaia, ko te ʼAtua, ʼi te lea fakatātā ʼaia, ʼe ina fakaʼaogaʼi te kupu vale moʼo fakahā ia “te tō noa ʼo te ʼu fakatuʼutuʼu ʼa te tagata maʼu koloa ʼo ʼuhiga mo te temi kā haʼu.” ʼE mole faka ʼuhiga te kupu ki he tahi ʼe mole fakakaukau, kae ki “he tahi ʼe mole fia falala ki te ʼAtua.” Ko te fakamatala ʼa Sesu ʼo ʼuhiga mo te tagata maʼu koloa ʼe ina fakamanatuʼi mai ia tana ʼu palalau ʼaē neʼe ina fai ki ʼamuli ʼi te ʼuluaki sēkulō, ki te kau Kilisitiano ʼo Laotisē, ʼi Asia Veliveli: “ ʼE ke ʼui: ‘ʼE au koloaʼia pea ʼe au maʼu koloa, ʼe mole kei ʼaoga he meʼa kiā te au,’ kae ʼe mole ke ʼiloʼi e ke fakaʼofaʼofa, mo malaʼia pea mo masiva, mo kivi pea mo telefua.”—Fakahā 3:17.
10. He koʼē ʼe mole tou maʼu anai “he ʼu taʼu e lahi” mo kapau ʼe “lahi ʼaupitō [te] ʼu meʼa lelei” ʼaē ʼe tou maʼu?
10 ʼE lelei ke tou metitāsio ki te ako ʼaē ʼe tou tāʼofi mai ai. ʼE tou hagē koa ko te tagata ʼaē ʼi te lea fakatātā—ke tou gāue kinakina ke “lahi ʼaupitō [te] ʼu meʼa lelei” ʼaē ʼe tou maʼu, kae mole tou fai tātou te ʼu meʼa ʼaē ʼe ʼaoga ke tou maʼu ai “he ʼu taʼu e lahi”? (Soane 3:16; 17:3) ʼE ʼui fēnei ʼi te Tohi-Tapu: “Ko te ʼu koloa ʼe mole ʼi ai anai honatou ʼaoga ʼi te ʼaho ʼo te hauhau,” pea “ko ia ʼaē ʼe falala ki tona ʼu koloa ʼe toka anai ia.” (Tāʼaga Lea 11:4, 28) Koia, neʼe fakaʼosi fēnei e Sesu ia te lea fakatātā: “ ʼE fēia anai ki te tagata ʼaē ʼe ina tānaki he ʼu koloa maʼa ia totonu, kae ʼe mole maʼu koloa ki te ʼAtua.”—Luka 12:21.
11. He koʼē ʼe vaʼiganoa hatatou falala pea mo kumi puipui ki te ʼu koloa?
11 ʼI te ʼui ʼaē ʼa Sesu “ ʼe fēia anai,” neʼe ina fakahā lelei ai ko te meʼa ʼaē neʼe hoko ki te tagata maʼu koloa ʼi te lea fakatātā, ʼe toe hoko pē anai kiā nātou ʼaē ʼe natou falala pea mo kumi puipui ki te ʼu koloa ʼāteaina pē. Ko te meʼa ʼaē ʼe kovi ʼe ko te tānaki ʼa he tahi he ʼu koloa maʼa ia totonu pea mo tana mole kumi ʼaē ke “maʼu koloa ki te ʼAtua.” Neʼe fai e te tisipulo ko Sake te fakatokaga fēia ʼo ina tohi fēnei: “Pea kiā koutou ʼaē ʼe kotou ʼui fēnei: ‘ʼI te ʼaho nei peʼe ko ʼapogipogi ʼe matou ʼolo anai ki te kolo ʼaenī, ʼe matou nonofo ai anai ʼi te taʼu kātoa, pea ʼe matou fai koloa anai pea mo fakatupu anai tamatou ʼu koloa,’ ʼe mole kotou ʼiloʼi peʼe feafeaʼi anai tokotou maʼuli ʼapogipogi.” Koteā ʼaē ʼe tonu ke natou fai? “Kae ʼe tonu ia ke kotou ʼui fēnei: ‘Kapau ʼe finegalo kiai ia Sehova, pea ʼe tou māʼuʼuli anai pea mo fai anai te meʼa ʼaenī peʼe ko te meʼa ʼaenā.’ ” (Sake 4:13-15) Tatau aipē peʼe maʼu koloa he tahi, kae ʼe vaʼiganoa anai ia te ʼu meʼa fuli ʼaia mo kapau ʼe mole maʼu koloa ki te ʼAtua. Koteā tona faka ʼuhiga ke tou maʼu koloa ki te ʼAtua?
Tou Maʼu Koloa Ki Te ʼAtua
12. Koteā ʼaē ʼe tonu anai ke tou fai ke feala hatatou maʼu koloa ki te ʼAtua?
12 ʼI te fakamatala ʼa Sesu, ko he tahi ʼe maʼu koloa ki te ʼAtua ʼe kehe ia mo he tahi ʼe ina tānaki hana ʼu koloa maʼa ia totonu, peʼe faiga ke koloaʼia. Koia, neʼe ʼui e Sesu ʼe mole tonu ke tou tōkakaga pē ʼo tānaki koloa peʼe tou fakafīfīmālie ki te ʼu meʼa ʼaē ʼe tou maʼu. Kae ʼe tonu ke tou fakaʼaogaʼi totatou ʼu koloa moʼo hikihiki, peʼe moʼo fakamālohiʼi tatatou ʼu felōgoi mo Sehova. Kapau ʼe tou fai fēia, pea ʼe tou maʼu koloa anai ki te ʼAtua. Koteā tona tupuʼaga? Heʼe feala anai ke ina tapuakina lahi tātou. ʼE ʼui fēnei mai ʼi te Tohi-Tapu: “Ko te tapuakina ʼa Sehova—koʼenā te meʼa ʼaē ʼe ina fakakoloaʼia, pea ʼe mole maʼu ai he mamahi.”—Tāʼaga Lea 10:22.
13. ʼE ‘fakakoloaʼia’ feafeaʼi e te tapuakina ʼa Sehova?
13 Kā tuku ifo e Sehova he ʼu tapuakina ki tana hahaʼi, pea ʼe ina foaki tuʼumaʼu pē te meʼa ʼaē ʼe lelei. (Sake 1:17) Ohagē lā, ʼi te foaki e Sehova ki te kau Iselaele honatou nofoʼaga, neʼe ko “he fenua [neʼe] tafe ai te huʼa pipi pea mo te meli.” Logolā neʼe ʼui neʼe fēia mo te fenua ʼo Esipito, kae neʼe ʼi ai te faʼahi maʼuhiga neʼe mole tatau ai mo te fenua ʼaē neʼe foaki e Sehova ki te kau Iselaele. He neʼe ʼui e Moisese ki te kau Iselaele, ko “he fenua ʼe tokaga fakalelei kiai tou ʼAtua.” Ko tona faka ʼuhiga, ʼe natou mahu anai ʼuhi heʼe tokaga Sehova kiā nātou. Kapau neʼe nonofo agatonu te kau Iselaele kiā Sehova, pea neʼe tapuakina lahi nātou e Sehova pea neʼe lelei age tonatou maʼuli ʼi te maʼuli ʼo te ʼu puleʼaga fuli ʼaē neʼe ʼi tonatou ʼu tafaʼaki. ʼEī, ʼe ko te tapuakina ʼa Sehova ʼaē “ ʼe ina fakakoloaʼia”!—Faka au 16:13; Teutalonome 4:5-8; 11:8-15.
14. Koteā ʼaē ʼe logoʼi e nātou ʼaē ʼe natou maʼu koloa ki te ʼAtua?
14 Ko te kupuʼi palalau ʼaē ʼe “maʼu koloa ki te ʼAtua” ʼe toe fakaliliu fēnei “ ʼE koloaʼia kiā mata ʼo te ʼAtua.” (Today’s English Version) Ko nātou ʼaē ʼe maʼu koloa, ʼi te agamāhani, ʼe natou tuʼania peʼe natou feafeaʼi kiā mata ʼo te hahaʼi. ʼE hā ʼi ʼihi temi te faʼahi ʼaia ʼi tonatou faʼahiga maʼuli. ʼE natou loto ke tokagaʼi nātou e te hahaʼi ʼaki te faʼahi ʼaē ʼe ʼui ʼi te Tohi-Tapu, ʼe ko “te fakahāhā ʼo [tonatou] ʼu koloa.” (1 Soane 2:16) Kae ko nātou ʼaē ʼe maʼu koloa ki te ʼAtua ʼe tali lelei nātou e te ʼAtua pea mo mahu iā nātou tona ʼofa makehe pea mo natou felōgoi lelei mo ia. ʼI tanatou maʼu ia te ʼu tapuakina ʼaia, ʼe mahino ia ʼe natou logoʼi he fiafia pea mo he fīmālie, ʼo laka age ʼi te fiafia pea mo te fīmālie ʼaē ʼe lava foaki e te ʼu koloa. (Isaia 40:11) Kae ʼe tou lava lagaʼi te fehuʼi ʼaenī: “Koteā ʼaē ʼe tonu ke tou fai ke feala hatatou koloaʼia kiā mata ʼo te ʼAtua?”
Tou Koloaʼia Kiā Mata ʼo Te ʼAtua
15. Koteā ʼaē ʼe tonu ke tou fai ke feala hatatou maʼu koloa ki te ʼAtua?
15 ʼI te lea fakatātā ʼa Sesu, ko te tagata neʼe fai fakatuʼutuʼu pea neʼe gāue kinakina tāfito pē ke ina maʼu he ʼu koloa maʼa ia totonu, pea neʼe ʼui ʼe ko he tagata vale. Koia ke tou maʼu koloa ki te ʼAtua, ʼe tonu ke tou faiga ke tou gāue kinakina pea mo lagolago mālohi ki te ʼu gāue ʼaē ʼe maʼuhiga moʼoni pea mo lelei kiā mata ʼo te ʼAtua. ʼE kau kiai te gāue ʼaē neʼe fakatotonu mai e Sesu: “Kotou ʼolo pea ke kotou fai ni ʼu tisipulo ʼi te hahaʼi ʼo te ʼu fenua fuli pē.” (Mateo 28:19) Kapau ʼe tou fakaʼaogaʼi totatou temi, totatou mālohi, pea mo tatatou ʼu fealagia ʼi te gāue ʼaē ko te faka mafola ʼo te Puleʼaga pea mo te fai ʼo ni ʼu tisipulo, kae mole tou fakaʼaogaʼi moʼo fakakoloaʼia totatou maʼuli, pea ʼe hagē pē anai ko hatatou foaki ʼo hatatou paʼaga ki he ʼu sōsiete ke natou fakatuputupu. Ko nātou ʼaē ʼe natou fai fēia, ʼe natou maʼu he ʼu vahe fakalaumālie ʼe maʼuhiga, ohagē ko tona hā ʼi te ʼu faʼifaʼitaki ʼaē kā hoa mai.—Tāʼaga Lea 19:17.
16, 17. Koteā te ʼu faʼifaʼitaki ʼaē ʼe feala ke kotou fakamatala moʼo fakahā te maʼuli ʼaē ʼe fakakoloaʼia ai he tahi kiā mata ʼo te ʼAtua?
16 Kotou tokagaʼi te tagata Kilisitiano ʼe maʼuli ʼi he fenua ʼi Asia. Neʼe lelei tana lītotogi ʼi tana gāue ʼaē ko te faʼu ʼo te ʼu olotinatea. Kae ko tona temi kātoa neʼe ina fakaʼaogaʼi ki tana gāue pea neʼe ina logoʼi ai tona masiva ʼi te faʼahi fakalaumālie. Ki muli age, neʼe mole ina faigaʼi ke hikihiki tona tuʼulaga ʼi te gāue, kae neʼe mavae ia pea mo ina fakatuʼu tana kiʼi matagi gāue, ko te fakatau ʼo he ʼu sōpe ʼi te ala ke feala ai hana fakaʼaogaʼi he temi ki te ʼu meʼa fakalaumālie pea mo tana ʼu maʼua fakalaumālie. Ko ʼihi ʼo tana ʼu kaugā gāue ʼāfea neʼe natou vāʼi ia ia, kae koteā ʼaē neʼe hoko kiā ia? Neʼe ina ʼui fēnei: “ ʼI te temi nei, ʼe au fīmālie age ʼi te faʼahi faka paʼaga ʼi te temi ʼaē neʼe au gāue ai ʼi te faʼu olotinatea. ʼE au fiafia lahi age heʼe mole kei au loto hoha pea mo tuʼania ohagē ko te temi ʼo taku ʼuluaki gāue. Pea ko te meʼa ʼaē ʼe maʼuhiga age, heʼe ʼi te temi nei ʼe au ovi ʼaupitō age kiā Sehova.” ʼAki te fetogi ʼaia, neʼe feala ai ki te Kilisitiano ʼaia ke liliu ʼo pioniē kātoa, pea ʼi te temi nei ʼe gāue ʼi te Petele ʼa te kau Fakamoʼoni ʼa Sehova ʼo tona fenua. ʼE moʼoni, ko te tapuakina ʼa Sehova “ ʼe ina fakakoloaʼia.”
17 Ko te tahi faʼifaʼitaki ʼaenī ʼo te fafine neʼe lahilahi ake ʼi he fāmili neʼe maʼuhiga kiā nātou te ako. Neʼe ako ʼi te ʼu univelesitē ʼi Falani, mo Mekesike pea mo Suisi, pea neʼe tonu ia ke ina maʼu he gāue lelei ʼaupitō. Neʼe ina ʼui fēnei: “Neʼe au maʼu ia meʼa fuli; neʼe fakaʼapaʼapaʼi au pea mo au maʼu ni ʼu lelei, kae ʼi toku loto, neʼe mole au maʼu te fiafia moʼoni.” Pea neʼe ina ako ke ina ʼiloʼi ia Sehova. Neʼe ina ʼui fēnei: “ ʼI taku tuputupu ʼi te faʼahi fakalaumālie, ko taku fia fakafiafia ʼaē ia Sehova pea mo au liufaki age he kiʼi koga veliveli pē ʼo te ʼu meʼa ʼaē neʼe ina foaki mai, neʼe tokoni mai ke au ʼiloʼi lelei te ala ʼaē ʼe tonu ke au muliʼi—ke au tauhi kiā te ia ʼi te temi kātoa.” Neʼe mavae ʼi tana gāue pea mole tuai, pea neʼe papitema. ʼI te ʼu taʼu e 20 ʼaenī kua hili, ʼe tauhi ʼaki he lotofiafia ʼi tana selevisi pioniē kātoa. ʼE ina fakamatala fēnei: “ ʼE manatu e ʼihi neʼe mole au fakaʼaogaʼi te ʼu fealagia ʼaē neʼe au maʼu, kae ʼe natou fakamoʼoni ʼe au fiafia, pea ʼe natou fakaʼapaʼapa ki te ʼu pelesepeto ʼaē ʼe au mulimuli kiai ʼi toku maʼuli. ʼE au faikole ʼi te ʼaho fuli kiā Sehova ke tokoni mai ke au agavaivai ke feala haku maʼu tana ʼu tapuakina.”
18. Ohagē ko Paulo, koteā ʼaē ʼe tonu ke tou fai ke feala hatatou maʼu koloa ki te ʼAtua?
18 Ko Saulo, ʼaē neʼe liliu ko te ʼapositolo ko Paulo, neʼe feala ke ina maʼu he gāue lelei. Kae neʼe ina tohi fēnei ki muli age: “ ʼE au faka ʼuhiga ko te ʼu meʼa fuli ʼe puli noa ʼuhi ko te ʼuhiga māʼoluga ʼo te mālama ʼo Kilisito Sesu, toku ʼAliki.” (Filipe 3:7, 8) Kiā Paulo, ko te ʼu koloa ʼaē neʼe ina maʼu ʼaki ia Kilisito neʼe maʼuhiga age ia ʼi te ʼu meʼa ʼaē neʼe feala ke foaki age e te mālamanei. ʼO toe fēia pē, ʼi tatatou tuku te kumi ʼo te ʼu meʼa ʼaē ʼe ʼaoga maʼa tātou totonu pea mo tou māʼuʼuli ʼo pipiki ki te ʼAtua, ʼe toe feala ai ke tou maʼu he maʼuli ʼe koloaʼia kiā mata ʼo te ʼAtua. ʼE fakapapau fēnei mai ʼi te Folafola ʼa te ʼAtua: “Ko te ikuʼaga ʼo te agavaivai pea mo te manavasiʼi kiā Sehova, ʼe ko te ʼu koloa, mo te kolōlia, pea mo te maʼuli.”—Tāʼaga Lea 22:4.
ʼE Feala Koa Hakotou Fakamahino?
• Neʼe koteā te fihifihia ʼa te tagata ʼaē ʼi te lea fakatātā ʼa Sesu?
• He koʼē neʼe ʼui ko te tagata ʼaē ʼi te lea fakatātā ʼe ko he tagata vale?
• Koteā te faka ʼuhiga ʼo hatatou maʼu koloa ki te ʼAtua?
• ʼE feafeaʼi hatatou maʼu koloa ki te ʼAtua?
[Paki ʼo te pasina 28]
He koʼē neʼe ʼui ko te tagata maʼu koloa ʼe ko he tagata vale?
[Paki ʼo te pasina 29]
He koʼē ʼe ko he fihifihia moʼoni mo kapau ʼe feala ke hikihiki totatou tuʼulaga ʼi te gāue?
[Paki ʼo te pasina 30]
“Ko te tapuakina ʼa Sehova—koʼenā te meʼa ʼaē ʼe ina fakakoloaʼia”