Te ʼu Fehuʼi ʼa Te Kau Lautohi

He koʼē neʼe fakalavelave age e te Hau ko Saulo kiā Tavite, “Tama, ko koe ko te foha ʼo ʼai?” ʼi te ʼosi matehi e Tavite ia Koliate, logolā neʼe ina fakatotonu ki muʼa atu ia he tahi ke ʼalu ʼo fekauʼi mai ia Tavite ke liliu ko hana tagata gāue?—1 Samuele 16:22; 17:58.

ʼE feala ke tou ʼui neʼe lagi galo kiā Saulo peʼe ko ai ia Tavite, he neʼe nounou tanā ʼuluaki felāveʼi. Kae ʼe mole koia ʼaia, heʼe fakamatala iā 1 Samuele 16:18-23 ko te Hau ko Saulo neʼe ina fekauʼi ke ʼavage ia Tavite pea neʼe ʼofa lahi ia ki ai pea neʼe liliu ia Tavite ko tana tagata ʼaē ʼe ina ʼamo tana ʼu meʼa tau. ʼE mahino ia neʼe ʼiloʼi lelei e Saulo ia Tavite.

Ki ʼihi hahaʼi sivi Tohi-Tapu, ko te ʼu vaega ʼo 1 Samuele 17:12-31 pea mo 17:55–18:5 neʼe hilifaki ki muli age heʼe mole maʼu ia te ʼu vaega ʼaia ʼi ʼihi tohi ʼo te Septante Faka Keleka, ko te fakaliliu ʼo te Tohi-Tapu Faka Hepeleo kātoa ʼi te lua sēkulō ʼi muʼa ʼo totatou temi. Ko te maʼu ʼo te taʼi manatu ʼaia ʼo fakatafito pē ki te ʼu tohi ʼo te Tohi-Tapu ʼo te Septante, ʼe mole fakapotopoto ia, heʼe ko te ʼu vaega ʼaia ʼe hā ʼi te tahi ʼu fakaliliu maʼuhiga ʼo te koga Tohi-Tapu Faka Hepeleo.

ʼE hā ʼaki mai, ʼi tana fakafehuʼi ʼuluaki ia Apinea pea ki muli age ia Tavite, neʼe mole fia ʼiloʼi pē e Saulo ia te higoa ʼo te tamai ʼa Tavite. ʼI tana sio leva ʼaē ki te agaaga ʼo Tavite, ko he tahi ʼe tui mālohi pea mo lototoʼa, neʼe hoki ina matehi age pē ia Koliate, neʼe fia ʼiloʼi ai e Saulo pe ko te faʼahiga tagata fea ʼaē neʼe ina pusiaki ia te tama ʼaia. Neʼe lagi loto e Saulo ke fakahū ia Sese, te tamai ʼa Tavite ki tana kau sōlia peʼe ko he tahi ʼo tona fāmili, heʼe ko te lototoʼa ʼaē neʼe ina fakatokagaʼi iā Tavite, ʼe lagi toe maʼu e nātou ʼaia.

Logolā ʼe tou maʼu iā 1 Samuele 17:58 ia te tali fakanounou fēnei age ʼa Tavite, ko “te foha ʼo tau tagata kaugana ko Sese, te tagata mai Petelehemi,” kae ʼaki te ʼu palalau ʼaē neʼe ina fai ki muli age, ʼe feala ai ke tou manatu neʼe toe loaloaga age te fai palalau. ʼO ʼuhiga mo te faʼahi ʼaia, kotou fakatokagaʼi ia te ʼu palalau ʼaenī ʼaē neʼe fai e C. F. Keil pea mo F. Delitzsch: “ ʼI te kupuʼi palalau ʼaē iā [1 Samuele 18:1], ‘ʼi tana ʼosi palalau mo Saulo,’ ʼe hā lelei mai ai neʼe fai palalau ia Saulo mo Tavite ʼo ʼuhiga mo tona fāmili, heʼe ko te ʼu kupuʼi palalau ʼaia ʼe hā ʼaki ai neʼe ko he fai palalau loaloaga.”

ʼAki te ʼu manatu fuli ʼaia, ʼe feala ke tou mahino ai, ʼaki tana fehuʼi ʼaē “Tama, ko koe ko te foha ʼo ʼai?”, neʼe mole fia ʼiloʼi pē e Saulo pe ko ai ia Tavite, he neʼe kua ina ʼosi mahino ia kiai, kae neʼe ina fia ʼiloʼi ia te haʼuʼaga ʼo Tavite.

[Paki ʼo te pasina 22]

He koʼē neʼe fakalavelave age e Saulo kiā Tavite pe ko ia ko te foha ʼo ʼai?