Te ʼu Fehuʼi ʼa Te Kau Lautohi

Kapau neʼe fakatotonu ki te kau Sutea ke ʼaua ‘naʼa natou fakaʼaogaʼi he meʼa fakatupu’ lolotoga te Pāsikate, kae he koʼē ʼi te fakatuʼu e Sesu ia te ʼAho Fakamanatu ʼo tona mate neʼe ina fakaʼaogaʼi ia te vino: ko he huʼa vino neʼe huʼi?—Ekesote 12:20; Luka 22:7, 8, 14-20.

Ko te Pāsikate neʼe fakatuʼu ʼi te taʼu 1513 ʼi muʼa ʼo totatou temi, ʼo fakaʼiloga ai te mavae ʼa te ʼu foha ʼo Iselaele mai Esipito. ʼI te temi ʼaē neʼe foaki ai te ʼu fakatotonu ʼo ʼuhiga mo tona faʼahiga fai, neʼe ʼui fēnei e Sehova: “ ʼE mole kotou kai anai he meʼa kai neʼe fai ʼaki he meʼa fakatupu. ʼI te ʼu koga meʼa ʼaē kā kotou nonofo ai anai ʼe kotou kai anai te ʼu keke neʼe mole ʼai hona meʼa fakatupu.” (Ekesote 12:11, 20) Neʼe tapuʼi pē e te ʼAtua ia te faʼahi ʼaia ki te pane ʼaē neʼe kai lolotoga te Pāsikate. ʼE mole talanoa ʼi henī ki he fakaʼaogaʼi ʼo he vino.

Ko te tupuʼaga ʼuluaki ʼo te tapuʼi ʼo te fakaʼaogaʼi ʼo te meʼa fakatupu, ʼuhi ko te mavae fakavilivili ʼa te kau Iselaele mai Esipito. ʼE ʼui fēnei iā Ekesote 12:34: “Neʼe toʼo e te hahaʼi tana falena kae mole heʼeki tupu, mo tanatou ʼu natuʼaga falena ʼe kofukofu ʼi tonatou ʼu kofu [ʼo hili] ki tonatou ʼu fugauma.” Ko te mole ʼi ai ʼo he meʼa fakatupu ʼi te ʼu Pāsikate ki muli age, neʼe ko he fakamanatu ki te ʼu taʼiake ʼe muli mai ia te meʼa maʼuhiga ʼaia neʼe hoko.

ʼAki te temi, neʼe tautau fakatā e te meʼa fakatupu ia te agahala. Ohagē lā, moʼo talanoa ki te tagata ʼaē neʼe ina fai te aga heʼeʼaoga ʼi te kōkelekāsio, neʼe fai e te ʼapositolo ko Paulo ia te fehuʼi ʼaenī: “ ʼE puli koa kiā koutou ʼaē ko he kiʼi meʼa fakatupu ʼe ina fakakoa te fua kātoa?” ʼOsi ʼaia neʼe ina ʼui fēnei: “Kotou toʼo kehe te meʼa fakatupu ʼāfea, ke kotou liliu ko he pūpū falaoa foʼou, ʼi te mole iā koutou ʼaē ʼo he meʼa fakatupu. Heʼe ko Kilisito totatou Pāsikate, neʼe kua sākilifisioʼi moʼoni. Koia ke tou fai te lafeti, ʼo mole fai ʼaki te meʼa fakatupu ʼāfea, peʼe ʼaki he meʼa fakatupu ʼo te kākā pea mo te agakovi, kae ke fai ʼaki he ʼu keke ʼo te fakahagatonu pea mo te moʼoni, ʼaē ʼe mole ʼi ai honatou meʼa fakatupu.” (1 Kolonito 5:6-8) ʼE gata pē ki te pane ʼe mole ʼi ai hona meʼa fakatupu neʼe ina lava fakatātā ia te sino haohaoa ʼo Sesu.—Hepeleo 7:26.

Neʼe ko te kau Sutea ki muli age ʼaē neʼe natou fakaʼaogaʼi te vino ʼi te toʼotoʼoga ʼo te Pāsikate. Lagi neʼe natou fakaʼaogaʼi te vino ʼi tanatou liliu mai tanatou ʼaunofo ʼaē ʼi Papiloni. ʼE mole fakahā ʼi te Tohi-Tapu he fakafeagai neʼe fai ʼo ʼuhiga mo te faʼahi ʼaia, pea koia neʼe feala ai kiā Sesu ke ina fakaʼaogaʼi te vino ʼi te taumafa ʼo te Pāsikate. ʼIo, ko te meʼa fakatupu ʼaē neʼe fakaʼaogaʼi ʼi te temi muʼa neʼe kehe ia mo te meʼa fakatupu ʼaē neʼe fai ki te pane. ʼO ʼuhiga mo te falena ʼaē neʼe natu, neʼe tonu ke ʼai kiai he meʼa fakatupu. Ko te vino ʼaē mai te ʼu huʼa vite neʼe mole tonu ia ke huʼi, he kua maʼu pē ia meʼa fuli ʼi te vite. Ko te huʼa vite taufua neʼe mole hona ʼaoga ʼi te Pāsikate koteʼuhi ʼe mole koa mai te taʼukai ʼo aʼu ki te Pāsikate ʼo te fasiga taʼu matala.

Koia, ko te fakaʼaogaʼi e Sesu ia te vino ʼi te ʼAho Fakamanatu moʼo fakatā ki tona taʼataʼa, ʼe mole fakafeagai ia ki te ʼu fakatotonu ʼo ʼuhiga mo te meʼa fakatupu ʼaē ki te Pāsikate. Ko he vino kula ʼe mole huʼa malie, pea mole mālohi, pea neʼe mole huʼi, ʼe lelei ke fakaʼaogaʼi moʼo fakatātā ia te “taʼataʼa maʼuhiga” ʼo Kilisito.—1 Petelo 1:19.