Te ʼu Fehuʼi ʼa Te Kau Lautohi
Neʼe kovi koa te loi ʼaē neʼe fai e Sakopo, ʼi tana ʼui ʼaē ko ia ko Esau iā Senesi 27:18, 19?
ʼE lagi neʼe kua kotou logo pē ki te hisitolia ʼaia. ʼI te temi matuʼa ʼo Isaake neʼe ina fekauʼi ia Esau ke ʼalu ʼo kapu manu, ʼo ina ʼui age: “Ke au kai, ke tupu ai haku tapuakiʼi ia koe ʼi muʼa ʼo toku mate.” ʼI te logo ʼaē ʼa Lepeka ki te ʼu palalau ʼo tona ʼohoana, neʼe ina teuteuʼi te meʼa kai kano lelei, pea mo ina fakatotonu fēnei kiā Sakopo: “ ʼE tonu ke ke ʼave [te meʼa kai] ki tau tamai, pea ʼe tonu ke ina kai, ke tupu ai hana tapuakiʼi ia koe ʼi muʼa ʼo tona mate.” ʼI te ʼosi kofuʼi e Sakopo ia te ʼu teu ʼo Esau, pea mo ʼai te ʼu fuluʼi tao ki tona kia pea mo tona ʼu nima, neʼe ʼalu ai leva mo te pā meʼa kai kano lelei ki tana tamai. ʼI te fehuʼi age e Isaake: “Foha, ko ai ia koe?” Neʼe tali maʼa Sakopo: “Ko au ia Esau, tou foha ʼuluaki.” Pea neʼe tui ia Isaake ki tana palalau pea neʼe ina foaki age ai ki ai ia te tapuakina.—Senesi 27:1-29.
ʼE mole fakahā mai ʼi te Tohi-Tapu te ʼu faʼahi fuli ʼaē neʼe tupu ai te fai e Lepeka pea mo Sakopo ia te faʼahi ʼaia, kae ʼe ina fakahā mai pē neʼe hoko fakapunamaʼuli ia te ʼaluʼaga ʼaia. ʼE tou fakatokagaʼi, ko te Folafola ʼa te ʼAtua ʼe mole ina faka lakatonuʼi peʼe mo tauteaʼi ia te meʼa ʼaē neʼe fai e Lepeka pea mo Sakopo, ke hagē leva ke takuʼaki ai te ʼu loi pea mo te kākā. Kae ko te Tohi-Tapu ʼe ina fakahāhā mai ia te meʼa ʼaē neʼe hoko.
ʼUluaki, ʼe fakahā lelei mai e te hisitolia ko Sakopo neʼe tuha mo ia ke ina maʼu ia te tapuakina ʼa tana tamai, kae mole ko Esau. ʼI muʼa atu, neʼe kua totogi e Sakopo te tofiʼa ʼo te ʼuluaki tupu mai tona māhaga heʼe loto fakafetaʼi ʼaē neʼe ina fakatau te tuʼulaga ʼaia moʼo maʼu ʼo hana meʼa kai. “Neʼe fehiʼa . . . ia Esau ki te tofiʼa ʼo te ʼuluaki tupu.” (Senesi 25:29-34) Koia ʼi te fakaovi ʼaē ʼa Sakopo ki tana tamai, neʼe ina fia maʼu tonu he tapuakina neʼe tuha mo ia.
Lua, ʼi te temi ʼaē neʼe mahino ai ia Isaake neʼe ina foaki ia te tapuakina kiā Sakopo, neʼe mole faiga ia ke ina fetogi te meʼa ʼaē neʼe kua ina fai. ʼE lagi neʼe ina manatuʼi te palalau ʼaē neʼe fai e Sehova kiā Lepeka ʼi muʼa ʼo tana fānauʼi te ʼu māhaga: “ ʼE kaugana anai te ʼuluaki ki te lua.” (Senesi 25:23) ʼE tou toe fakatokagaʼi ʼi te teuteu mavae ʼa Sakopo ʼo ʼalu ki Halane, neʼe toe fai age e Isaake ia te tapuakina ʼaē neʼe ina foaki age kiā te ia ʼi te kamata.—Senesi 28:1-4.
Tahi ʼaē, tou manatuʼi ko Sehova neʼe mahino pea mo tokaga ki te ʼu meʼa fuli ʼaē neʼe lolotoga hoko. Ko te tapuakina ʼaē neʼe foaki e Isaake neʼe ʼalutahi mo te fakapapau ʼaē neʼe fai e te ʼAtua kiā Apalahamo. (Senesi 12:2, 3) Kanapau lā neʼe mole loto ia te ʼAtua ke maʼu e Sakopo ia te tapuakina, neʼe feala pē ke ina fai he puleʼaki ki te faʼahi ʼaia. Kae neʼe fakamoʼoni age e Sehova ia te faʼahi ʼaia kiā Sakopo, ʼo ʼui māʼana: “ ʼAki tou hako ʼe tapuakinaʼi moʼoni anai ia te ʼu fāmili fuli pē ʼi te kele.”—Senesi 28:10-15.