Tou Sivisivi Ia “Te ʼu Meʼa Loloto ʼa Te ʼAtua”

“Ko te laumālie ʼe ina sivisivi ia meʼa fuli, māʼiapē lā mo te ʼu meʼa loloto ʼa te ʼAtua.”—1 Kolonito 2:10.

1. Ko te ʼu moʼoni fea ʼo te Tohi-Tapu ʼaē ʼe fakafiafia kiai he kau ako foʼou ʼo te Tohi-Tapu?

TOKOLAHI iā tātou ʼi te kōkelekāsio, ʼe kei tou manatuʼi ia te fiafia ʼaē neʼe tou logoʼi ʼi te temi ʼaē neʼe tou kamata ako ai te moʼoni. ʼI te temi ʼaia neʼe tou mahino ai, pe koʼē ʼe maʼuhiga te huafa ʼo Sehova, pe koʼē neʼe ina fakagafua te mamahi, pe koʼē ko ʼihi ʼe natou ʼolo ʼo māʼuʼuli ʼi te lagi, pea koteā te kā haʼu kiā nātou ʼaē ʼe agatonu ʼi te mālamanei. Neʼe lagi tou lau te Tohi-Tapu ki muʼa atu, kae neʼe mole tou mahino ki te ʼu manatu ʼaia, ohagē pē ko te tokolahi ʼi te mālamanei. ʼE tou hagē ko he tagata ʼe sio ʼi te fuga tai ki he lauhakau feoʼia. Kapau ʼe sio fēia pē, pea ʼe mole lelei anai tana mamata ki te ʼu meʼa matalelei ʼaē ʼi te loto tai. Kae kapau ʼe ina fakaʼaogaʼi he ʼu foʼi mata uku peʼe sio ifo ki te tai ʼi te sioʼata ʼo te takele ʼo te vaka, ʼe ofo anai ʼi tana sio ki te ʼu feo lanu kehekehe, mo te ʼu ika, mo te ʼu kiʼi manu ʼo te tai pea mo ʼihi age faʼahiga manu matalelei ʼo te tai. ʼE toe fēia pē, ʼi te kamata fakamahino mai ʼa he tahi kiā tātou te Tohi-Tapu, neʼe tou kamata sisio ai ki “te ʼu meʼa loloto ʼa te ʼAtua.”—1 Kolonito 2:8-10.

2. He koʼē ʼe feala ke heʼegata ia tatatou fiafia ʼi te ako ʼo te Folafola ʼa te ʼAtua?

² ʼE tonu pē koa ke tou fiafia ʼi tatatou mālama ki te moʼoni ʼo te Tohi-Tapu? Ko te kupusiga palalau ʼaē “te ʼu meʼa loloto ʼa te ʼAtua” ʼe faka ʼuhiga ki te mahino ki te poto ʼo te ʼAtua ʼaē neʼe fakahā e te laumālie māʼoniʼoni ki te kau Kilisitiano kae fakapōʼuli kiai ʼihi. (1 Kolonito 2:7) ʼE mole he gataʼaga ʼo te poto ʼo te ʼAtua pea ʼe tou fiafia lahi mokā tou kumi ke tou mahino ki tona ʼu ala! ʼE mole tou ʼiloʼi fuli anai ia te ʼu meʼa ʼo ʼuhiga mo te poto ʼo te ʼAtua. Ko te fiafia ʼaē neʼe tou maʼu ʼi tatatou kamata ʼiloʼi te ʼu ʼuluaki akonaki ʼo te Tohi-Tapu, ʼe mole puli anai mo kapau ʼe tou haga kumi ia “te ʼu meʼa loloto ʼa te ʼAtua.”

3. He koʼē ʼe ʼaoga ke tou mahino lelei ki te ʼu faʼahi ʼaē ʼe fakatafito kiai tatatou ʼu akonaki?

³ He koʼē ʼe tonu ke tou mahino ki “te ʼu meʼa loloto” ʼaia? Kapau ʼe tou mahino ki te ʼu meʼa ʼaē ʼe tou tui kiai, pea mo te tupuʼaga ʼo tatatou tui kiai—te ʼu faʼahi ʼaē ʼe fakatafito kiai tatatou ʼu akonaki—pea ʼe mālohi ai tatatou tui pea mo tatatou falala. ʼE ʼui mai ʼi te Tohi-Tapu ke tou fakaʼaogaʼi totatou ‘ ʼatamai ke feala ai hatatou ʼiloʼi papau peʼe koteā te finegalo ʼo te ʼAtua, tona lelei, tona tali lelei, pea mo tona haohaoa.’ (Loma 12:1, 2) Kapau ʼe tou mahino ki te tupuʼaga ʼo te kole mai ʼaē e Sehova ke tou mulimuli ki he faʼahiga maʼuli, pea ʼe fakatuputupu ai tatatou fia fakalogo ʼaē kiā te ia. Koia, ʼaki tatatou mahino ki “te ʼu meʼa loloto,” ʼe tou maʼu ai te mālohi moʼo tekeʼi tatatou lagi fia maumauʼi he lao, kae ʼe ina uga tātou ke tou ‘faʼafai ki he ʼu gāue lelei.’—Tito 2:14.

4. Koteā ʼaē ʼe fakamaʼua ki te ako ʼo te Tohi-Tapu?

⁴ Ke tou mahino ki te ʼu meʼa loloto ʼa te ʼAtua, ʼe tonu ke tou ako ia te Tohi-Tapu. Kae ko te ako ʼo te Tohi-Tapu ʼe mole hagē leva ko hatatou lau pē he tohi kae mole tou fakakaukauʼi. ʼE tonu ki te ako ʼaia, ke tou vakavakaʼi fakalelei te ʼu manatu ʼaē ʼe tou ako, ia tona pikipikiga mo te ʼu meʼa ʼaē kua tou ʼiloʼi. (2 Timoteo 1:13) Ko te ako ʼaia ʼe ina fakamaʼua mai ke tou kumi ke tou mahino ki te tupuʼaga ʼo te manatu. Kā tou ako te Tohi-Tapu, ʼe tonu foki ke tou metitāsioʼi peʼe feafeaʼi hatatou fakaʼaogaʼi te ʼu manatu ʼaē ʼe tou lolotoga ako moʼo fai he ʼu tonu ʼe lelei pea mo tokoni ki niʼihi. Koia, mai tona ʼaluʼaga ʼaē ko “te Tohi-Tapu kātoa ʼe haʼu mai te ʼAtua pea ʼe ʼaoga,” pea ʼe tonu ke tou ako “te folafola fuli pē ʼe haʼu mai te gutu ʼo Sehova.” (2 Timoteo 3:16, 17; Mateo 4:4) Ko te ako ʼo te Tohi-Tapu ʼe feala ke liliu ko he gāue lahi! Kae ʼe toe feala pē ke liliu ko he meʼa lelei, pea ko te mahino ki “te ʼu meʼa loloto ʼa te ʼAtua” ʼe mole faigataʼa fau ia.

ʼE Tokoni Ia Sehova Ki Te Hahaʼi Agavaivai Ke Natou Mahino

5. Ko ai ʼaē ʼe feala ke mahino ki “te ʼu meʼa loloto ʼa te ʼAtua”?

⁵ Tatau aipē mo kapau neʼe mole kotou faʼa popoto ʼi te faleako pea ʼe mole ko hakotou agamāhani ia te ako, kae ʼaua naʼa kotou manatu ʼe mole feala hakotou mahino ki “te ʼu meʼa loloto ʼa te ʼAtua.” Lolotoga te minisitelio ʼa Sesu ʼi te kele, neʼe fakahā e Sehova Tana fakatuʼutuʼu ki te hahaʼi ke natou mahino kiai, te hahaʼi ʼaē neʼe hagē pē ko te hahaʼi fuli pea neʼe natou agavaivai ke feala honatou akoʼi e te ʼu kaugana ʼa te ʼAtua, kae neʼe mole ina fakahā te faʼahi ʼaia ki te hahaʼi popoto pea mo ʼatamai. Neʼe natou hagē ko he ʼu toe meamea mokā neʼe fakatatau kiā nātou ʼaē ʼe ako ʼi te ʼu faleako. (Mateo 11:25; Gāue 4:13) ʼO ʼuhiga mo “te ʼu meʼa ʼaē neʼe teuteuʼi e te ʼAtua maʼa nātou ʼaē ʼe ʼoʼofa kiā te ia,” neʼe ʼui fēnei e te ʼapositolo ko Paulo ki tona ʼu tehina mo tuagaʼane: “Ko tātou ʼaē neʼe fakahā kiai e te ʼAtua ʼaki tona laumālie, heʼe ko te laumālie ʼe ina sivisivi ia meʼa fuli, māʼiapē lā mo te ʼu meʼa loloto ʼa te ʼAtua.”—1 Kolonito 2:9, 10.

6. Koteā te faka ʼuhiga ʼo te ʼu palalau ʼaē iā 1 Kolonito 2:10?

⁶ ʼE sivisivi feafeaʼi e te laumālie ʼo te ʼAtua “ia meʼa fuli, māʼiapē lā mo te ʼu meʼa loloto ʼa te ʼAtua”? ʼE mole fakahā e Sehova tana ʼu fakatuʼutuʼu ki te kau Kilisitiano takitokotahi, kae ʼaki tona laumālie ʼe ina takitaki tana kautahi, ʼaē ʼe feala ai ke ina foaki ki te hahaʼi logo tahi ʼa te ʼAtua te mahino ki te Tohi-Tapu. (Gāue 20:28; Efesi 4:3-6) ʼI te mālamanei kātoa, ʼe maʼu ʼi te ʼu kōkelekāsio fuli ia te taʼi polokalama ako Tohi-Tapu ʼaia. Talu mai fualoa, ʼe fakamahino ʼi te ʼu kōkelekāsio te ʼu tuʼuga akonaki faka Tohi-Tapu. ʼE gāue te laumālie māʼoniʼoni ki te kōkelekāsio moʼo tokoni ki te hahaʼi ke natou maʼu te manatu ʼaē ʼe lelei ke feala hanatou mahino ki “te ʼu meʼa loloto ʼa te ʼAtua.”—Gāue 5:32.

Koteā ʼAē ʼe Kau Ki “Te ʼu Meʼa Loloto ʼa Te ʼAtua”?

7. He koʼē e tokolahi te hahaʼi ʼe mole natou mahino ki “te ʼu meʼa loloto ʼa te ʼAtua”?

⁷ ʼE mole tonu leva ke tou manatu ko “te ʼu meʼa loloto” ʼe ko he ʼu meʼa ʼe faigataʼa. Ko te ʼatamai mālama ʼo ʼuhiga mo “te ʼu meʼa loloto ʼa te ʼAtua” ʼe fakapōʼuligia ki te hahaʼi tokolahi. Pea ʼe mole natou fakapōʼuli ʼuhi heʼe faigataʼa fau te maʼu ʼo te poto ʼo te ʼAtua, kae ʼuhi heʼe ko Satana ʼe ina fakahalaʼi te hahaʼi ke mole natou tali te tokoni ʼaē ʼe foaki mai e Sehova ʼaki Tana kautahi.—2 Kolonito 4:3, 4.

8. Koteā te ʼu meʼa loloto ʼaē neʼe talanoa kiai Paulo ʼi te kāpite tolu ʼo tana tohi ʼaē ki te kau Efesi?

⁸ Ko te kāpite tolu ʼo te tohi ʼa Paulo ki te kau Efesi, ʼe fakahā ai ʼe kau ki “te ʼu meʼa loloto ʼa te ʼAtua” te ʼu moʼoni ʼaē kua mahino lelei kiai te hahaʼi tokolahi ʼa Sehova, ohagē lā ko te ʼiloʼi ʼaē pe ko ai te Hako ʼaē neʼe fakapapauʼi mai, te filifili ʼo nātou ʼaē kā ʼolo ʼo māʼuʼuli ʼi te lagi, pea mo te Puleʼaga ʼo Te Mēsia. Neʼe tohi fēnei e Paulo: “ ʼI te tahi ʼu taʼiake neʼe mole fakahā te meʼa fakalilo tapu ʼaenī ke mahino kiai te ʼu foha ʼo te tagata ohagē ko tona fakahā ʼaenī e te laumālie ki tana kau ʼapositolo māʼoniʼoni pea mo te kau polofetā, ko tona faka ʼuhiga ko te ʼu hahaʼi ʼo te puleʼaga ʼe tonu ke natou kaugā hau pea mo kau ki te sino e tahi, pea mo natou maʼu mo tātou ia te fakapapau ʼo tahi mo Kilisito Sesu.” Neʼe ʼui e Paulo neʼe fakanofo ia ia ke ina “faka mālamaʼi ni tagata ke natou ʼiloʼi peʼe feafeaʼi te gāue ʼa te meʼa fakalilo taputapu, ʼaē talu mai fualoa neʼe fufū e te ʼAtua.”—Efesi 3:5-9.

9. He koʼē ʼe ko he pilivilēsio ia tatatou mahino ki “te ʼu meʼa loloto ʼa te ʼAtua”?

⁹ Neʼe toe fakamahino e Paulo ko te finegalo ʼo te ʼAtua ke ‘fakamahino, ʼaki te kōkelekāsio, ki te ʼu pule ʼaē ʼi te lagi te poto lahi pea mo kehekehe ʼa te ʼAtua.’ (Efesi 3:10) ʼE maʼu e te kau ʼāselo he ʼu fua lelei ʼi tanatou sisio ifo pea mo mahino ki te poto ʼo Sehova ʼi tana ʼu felōgoi ʼaē mo te kōkelekāsio faka Kilisitiano. ʼE ko he pilivilēsio ʼe tou maʼu ʼi tatatou mahino ki te ʼu meʼa ʼe toe fia mahino kiai mo te kau ʼāselo! (1 Petelo 1:10-12) Ki muli age, ʼe ʼui e Paulo ʼe tonu ke tou faiga ke tou ‘mahino mo te kau māʼoniʼoni fuli ki te laulahi, mo te loaloaga, pea mo te māʼoluga, pea mo te loloto’ ʼo te tui faka Kilisitiano. (Efesi 3:11, 18) Tou vakaʼi age muʼa te ʼu faʼifaʼitaki ʼo ʼuhiga mo te ʼu meʼa loloto ke feala ai he toe lahi age ʼo tatatou mahino.

Te ʼu Faʼifaʼitaki ʼo ʼUhiga Mo Te ʼu Meʼa Loloto

10, 11. ʼI te Tohi-Tapu, ko te temi fea ʼaē neʼe liliu ai ia Sesu ko te ʼuluaki koga ʼo te “hako” ʼo te “ ʼohoana” ʼo te ʼAtua ʼi selō?

¹⁰ ʼE tou ʼiloʼi ko Sesu ʼe ko te ʼuluaki koga ʼo te “hako” ʼo te “ ʼohoana” ʼo te ʼAtua ʼi selō ʼaē ʼe talanoa kiai iā Senesi 3:15. Ke toe lahi age tatatou mahino, ʼe feala ke tou fai ia te ʼu fehuʼi ʼaenī: ‘Ko te temi fea ʼaē neʼe liliu ai ia Sesu ko te Hako ʼaē neʼe fakapapauʼi mai? Neʼe ko te temi koa ʼaē neʼe maʼuli ai ʼi te lagi, ʼi tana tupu tagata ʼi te kele, ʼi te temi ʼaē neʼe papitema ai, peʼe ʼi te temi ʼaē neʼe fakatuʼuake ai?’

¹¹ Neʼe fakapapau e te ʼAtua ko te koga ʼo tana kautahi ʼaē ʼi selō, ʼaē neʼe talanoa kiai ʼi te lea faka polofetā ohagē ko hona “ ʼohoana,” ʼe ina fakatupu mai anai he hako kā ina maumauʼi anai te ʼulu ʼo te gata. Kae hili kiai te ʼu taʼu e lauʼi afe, pea ko te ʼohoana ʼo te ʼAtua neʼe mole ina fakatupu he hako neʼe feala ke ina maumauʼi ia Satana pea mo tana ʼu gāue. Koia ʼe ʼui ai ʼi te lea faka polofetā ʼa Isaia ko he fafine ʼe “paʼa” pea ʼe “mamahi ʼi te ʼatamai.” (Isaia 54:1, 5, 6) Ki muli age leva, neʼe tupu ia Sesu ʼi Petelehemi. Kae ʼi te hili pē ʼo tona papitema, ʼi te temi ʼaē neʼe fakanofo ai ia ia e te laumālie ke liliu ko he foha fakalaumālie ʼo te ʼAtua, neʼe ʼui fēnei e Sehova: “Ko ia nei ko toku ʼAlo.” (Mateo 3:17; Soane 3:3) ʼI te temi leva ʼaia neʼe hā ai ia te ʼuluaki koga ʼo te “hako” ʼo te fafine. Ki muli age, neʼe toe fakanofo e te laumālie māʼoniʼoni ia te ʼu tisipulo ʼa Sesu ke natou liliu ko te ʼu foha ʼo te ʼAtua. Ko te “ ʼohoana” ʼo Sehova, ʼaē neʼe hagē ko ‘he fafine neʼe mole fānaunau,’ neʼe kua feala leva ke ‘kalaga fakafiafia.’—Isaia 54:1; Kalate 3:29.

12, 13. Ko te ʼu vaega faka Tohi-Tapu fea ʼaē ʼe natou fakamoʼoni mai ko te kau Kilisitiano fakanofo fuli ʼaē ʼi te kele ʼe natou faʼufaʼu ia “te tagata kaugana agatonu mo poto”?

¹² Ko te lua faʼifaʼitaki ʼo ʼuhiga mo te ʼu meʼa loloto ʼaē neʼe fakahā mai kiā tātou, ʼe ko te fakatuʼutuʼu ʼa te ʼAtua ke ina filifili te toko 144 000 hahaʼi ʼi te kele. (Fakahā 14:1, 4) ʼE tou mahino pea mo falala ko te kau fakanofo fuli ʼaē ʼe māʼuʼuli ʼi te kele ʼi tonatou temi, ʼe natou faʼufaʼu “te tagata kaugana agatonu mo poto” ʼaē neʼe ʼui e Sesu ʼe natou foaki anai ʼi tona temi totonu ia te “meʼa kai” ki tana ʼu hahaʼi fai fekau. (Mateo 24:45) Ko te vaega fea ʼaē ʼe fakamoʼoni ai, ko te mahino ʼaia ʼe totonu? ʼE lagi neʼe fia talanoa ia Sesu ki he Kilisitiano pē ʼe ina fia fakaloto mālohiʼi hona ʼu tehina ʼi te faʼahi fakalaumālie?

¹³ Neʼe ʼui fēnei e te ʼAtua ki Iselaele: “Ko koutou ko taku kau fakamoʼoni . . . ko taku kaugana ʼaē neʼe au fili.” (Isaia 43:10) Kae ʼi te ʼaho 11 ʼo Nisani ʼo te taʼu 33 ʼo totatou temi, neʼe ʼui e Sesu ki te kau takitaki ʼo Iselaele, ko te ʼAtua kua fakafisi ki tonatou puleʼaga ke liliu ko Hana kaugana. Neʼe ina ʼui fēnei: “Ko te puleʼaga ʼo te ʼAtua ʼe toʼo anai iā koutou pea ʼe foaki anai ia ki he hahaʼi kā natou fakatupu anai hona ʼu fua.” Neʼe ʼui fēnei e Sesu ki te hahaʼi tokolahi: “Koʼenī! Ko tokotou ʼapi kua liʼaki atu kiā koutou.” (Mateo 21:43; 23:38) ʼI tona ʼuhiga kaugana ʼa Sehova, ko te fale ʼo Iselaele neʼe mole agatonu pea neʼe mole poto. (Isaia 29:13, 14) Ki muli age ʼo te ʼaho pē ʼaia, neʼe fehuʼi fēnei e Sesu: “Ko ai moʼoni te tagata kaugana agatonu mo poto?” ʼI tona ʼuhiga moʼoni, neʼe ina fia kumi te faʼahi ʼaenī: ‘Ko te puleʼaga agatonu fea ʼaē kā ina fetogi anai ia Iselaele ke liliu ko te kaugana agatonu ʼa te ʼAtua?’ Neʼe foaki e te ʼapositolo ko Petelo ia te tali ʼi tana ʼui ʼaenī ki te kōkelekāsio ʼo te kau Kilisitiano fakanofo: “Ko koutou, . . . ‘ko he puleʼaga māʼoniʼoni, ko he hahaʼi kua tuku ke liliu ko hona koloa makehe.’ ” (1 Petelo 1:4; 2:9) Ko te puleʼaga fakalaumālie ʼaia, “te Iselaele ʼo te ʼAtua,” neʼe liliu ko he kaugana foʼou ʼa Sehova. (Kalate 6:16) Ohagē pē ko te hahaʼi fuli ʼo Iselaele ʼaē neʼe natou faʼufaʼu he “kaugana,” ʼe toe fēia mo te kau Kilisitiano fakanofo fuli ʼaē ʼi te kele ʼe natou faʼufaʼu te “tagata kaugana agatonu mo poto.” ʼE ko he pilivilēsio kiā tātou ke tou maʼu ia te “meʼa kai” mai te kaugana ʼa te ʼAtua!

Tou Fiafia ʼi Tatatou Ako Takitokotahi

14. He koʼē ʼe tou fiafia ʼi tatatou ako te Tohi-Tapu, heʼe mole gata pē ʼi tatatou lau?

¹⁴ Kā tou mahino ki he puani foʼou ʼi te Tohi-Tapu, ʼe mole tou fiafia ai koa lā heʼe ina fakamālohi ai tatatou tui? Ko te tupuʼaga lā ʼaia ʼo tatatou fiafia ʼi te ako ʼo te Tohi-Tapu, heʼe mole gata pē ʼi tatatou lau. Tahi ʼaē, kā kotou lau te ʼu tohi faka Tohi-Tapu, kotou fai ia te ʼu fehuʼi ʼaenī: ‘ ʼE feafeaʼi te fakamahino ʼaenī pea mo ʼaē neʼe kua au mahino kiai? Koteā he tahi age ʼu vaega faka Tohi-Tapu peʼe ko he ʼu fakamahino ʼe au lava fakakaukauʼi ke toe lahi age taku mahino ki te ʼalatike ʼaenī?’ Kapau ʼe tonu ke fai he tahi age ʼu kumi, kotou tohi te fehuʼi ʼaē ʼe kotou loto anai ke kotou maʼu he tali kiai, pea kotou fakatuʼutuʼu ke kotou ako te manatu ʼaia ʼi he tahi ako.

15. Ko te ʼu manatu fea ʼaē ʼe feala ke kotou fakatuʼutuʼu ke kotou ako ke kotou fiafia ai, pea koteā ʼaē ʼe kotou lava fai ke kotou maʼu ai hona ʼu fua lelei ʼe tologa?

¹⁵ Ko te ʼu manatu fea ʼaē ʼe feala ke kotou fakatuʼutuʼu ke kotou ako, ke kotou fiafia ai ʼi takotou toe maʼu he mahino foʼou? Ohagē lā, ʼe feala ke kotou hikihiki takotou mahino ʼaki takotou ako te ʼu faʼahiga fuakava kehekehe ʼaē neʼe fai e te ʼAtua maʼa te mālamanei. ʼE feala hakotou fakaloto mālohiʼi takotou tui ʼaki hakotou ako te ʼu lea faka polofetā ʼaē ʼe talanoa ai ʼo ʼuhiga mo Sesu Kilisito peʼe ko te ʼu vaega takitahi ʼo he lea faka polofetā ʼo he tohi ʼi te ʼu tohi ʼo te Tohi-Tapu. Ke toe fakaloto mālohiʼi takotou tui, ʼe ʼi ai mo te ʼu fakamatala ʼo te hisitolia ʼo te kau Fakamoʼoni ʼa Sehova ʼo te temi nei ʼi te tohi Les Témoins de Jéhovah : Prédicateurs du Royaume de Dieu, mo kapau ʼe kotou maʼu ia te tohi ʼaia ʼi takotou lea.a Pea ko he toe vakaʼi ʼo te ʼu ʼalatike “Te ʼu Fehuʼi ʼa Te Kau Lautohi” ʼaē neʼe tā ʼi Te Tule Leʼo, ʼe toe tokoni atu anai ke kotou mahino lelei ki ʼihi vaega ʼo te Tohi-Tapu. Kotou tokagaʼi ia te ʼu manatu faka Tohi-Tapu ʼaē neʼe fakaʼaogaʼi moʼo tali ki te fehuʼi ʼaē neʼe lagaʼi. ʼE tokoni atu anai kiā koutou ke kotou akoako tokotou “ ʼu fealagia fakakaukau” pea mo fakatuputupu iā koutou takotou fakasiosio mamaʼo. (Hepeleo 5:14) Kā kotou ako, kotou tohi hakotou ʼu nota ʼi takotou Tohi-Tapu peʼe ki he lau pepa, ke kotou maʼu ai te ʼu fua lelei ʼe tologa kiā koutou totonu pea mo nātou ʼaē ʼe kotou lava tokoni ki ai.

Kotou Tokoni Ki Te Kau Tūpulaga Ke Natou Leleiʼia Te Ako ʼo Te Tohi-Tapu

16. ʼE feafeaʼi hakotou tokoni ki te kau tūpulaga ke natou leleiʼia ia te ako ʼo te Tohi-Tapu?

¹⁶ ʼE lahi te ʼu puleʼaki ʼe feala ke fai e te ʼu mātuʼa moʼo uga tanatou fānau ke natou manako ki te ʼu meʼa fakalaumālie. ʼAua naʼa kotou manatu ʼe faigataʼa fau ki te kau tūpulaga hanatou mahino ki te ʼu meʼa loloto. Kapau ʼe kotou kole age kiā nātou liliki ke natou fai he ʼu kumi moʼo teuteuʼi ia te ako faka fāmili ʼo te Tohi-Tapu, ʼe feala hakotou fakalavelave age pe koteā ʼaē neʼe natou tāʼofi mai tanatou ʼu kumi ʼaia. ʼE feala pē foki ʼi te temi ʼaē ʼe fai ai te ako faka fāmili, ke fai he ʼu faʼifaʼitaki moʼo tokoni kiā nātou ke natou ʼiloʼi peʼe feafeaʼi hanatou fakamahino ia tanatou tui pea mo fakamoʼoni ki te ʼu meʼa ʼaē ʼe natou ako. ʼE feala hakotou toe fakaʼaogaʼi mo te kaupepa lahi ‘ Voyez le bon pays ’ b ke natou ʼiloʼi te ʼu tuʼuʼaga ʼo te ʼu fenua ʼaē ʼe talanoa kiai te Tohi-Tapu pea mo natou mahino ki te ʼu fakamatala ʼo te ʼu koga tohi faka Tohi-Tapu ʼaē ʼe kotou lau ʼi te vāhaʼa fuli.

17. He koʼē ʼe ʼaoga ke tou fakafuafua lelei tatatou fakatuʼutuʼu ʼaē ke tou ako takitokotahi ia te Tohi-Tapu?

¹⁷ Ko te fakatuʼutuʼu ʼaē ke tou ako takitokotahi ia te Tohi-Tapu, ʼe lelei pea mo faka mālohiʼi te tui, kae kotou tōkakaga naʼa liliu takotou ako ʼaia ʼo faʼao ia te temi ʼaē ʼe tonu ai ke kotou teuteuʼi takotou ʼu fono. Ko te ʼu fono ʼe ko he tahi ʼaia fakatuʼutuʼu ʼe fakaʼaogaʼi e Sehova moʼo akoʼi tātou ʼaki “te tagata kaugana agatonu mo poto.” Kae kā kotou fai he ʼu kumi pea ʼe tokoni atu ke kotou fai hakotou ʼu tali lelei ʼi te ʼu fono—ohagē lā, ʼi te Ako Tohi peʼe ʼi te Ako Faka Teokalatike lolotoga te akonaki ʼaē ʼe fai ai te ʼu puani ʼaoga ʼo te Tohi-Tapu ʼaē ʼe lau ʼi te vāhaʼa fuli.

18. He koʼē ʼe fakapale lahi takotou kātaki ʼo ako “te ʼu meʼa loloto ʼa te ʼAtua”?

¹⁸ Ko tatatou ako fakaloloto ia te Folafola ʼa te ʼAtua ʼe ina fakaovi ai tātou kiā Sehova. Koia, moʼo fakahā te maʼuhiga ʼo te taʼi ako ʼaia, ʼe ʼui fēnei ʼi te Tohi-Tapu: “[ʼE] ʼaoga te poto moʼo puipui ohagē ko te falā ʼe ʼaoga ki te puipui; kae ko te maʼuhiga ʼo te ʼatamai mālama, heʼe ko te poto ʼe ina taupau ke māʼuʼuli ia nātou ʼaē ʼe natou maʼu.” (Tagata Tānaki 7:12) Koia ʼe fakapale lahi takotou kātaki ʼo fakaloloto takotou mahino ʼaē ki te ʼu meʼa fakalaumālie. ʼE tou maʼu te fakapapau ʼaenī ʼi te Tohi-Tapu ʼo ʼuhiga mo nātou ʼaē ʼe natou haga kumi: “ ʼE ke maʼu . . . anai te ʼatamai mālama ʼo ʼuhiga mo te ʼAtua.”—Tāʼaga Lea 2:4, 5.

[Kiʼi nota]

ʼE Feala Koa Hakotou Fakamahino?

• Koteā “te ʼu meʼa loloto ʼa te ʼAtua”?

• He koʼē ʼe tonu ke tou ako tuʼumaʼu ia te ʼu meʼa loloto?

• He koʼē ʼe feala ke maʼu e te kau Kilisitiano fuli ia te fiafia ʼo te mahino ki “te ʼu meʼa loloto ʼa te ʼAtua”?

• ʼE fua lelei feafeaʼi kiā koutou “te ʼu meʼa loloto ʼa te ʼAtua”?

[Paki ʼo te pasina 28]

Ko te temi fea ʼaē neʼe liliu ai Sesu ko te Hako ʼaē neʼe fakapapauʼi mai?

[Paki ʼo te pasina 31]

ʼE feala ke kole age e te ʼu mātuʼa ki tanatou fānau ke natou fai he ʼu kumi moʼo teuteuʼi ia te ako faka fāmili