Kotou Fakaovi Ki Te ʼAtua
Peʼe ʼi Ai Koa He Meʼa ʼe Ina Lava “Fakamavae . . . Tātou Mai Te ʼOfa ʼo Te ʼAtua”?
ʼE ʼI AI koa he tahi iā tātou ʼe mole loto ke ʼofainaʼi? ʼE mahino ia, ʼe tou fiafia mokā tou logoʼi ʼe ʼofainaʼi tātou e totatou fāmili pea mo totatou ʼu kaumeʼa. Kae meʼa fakaʼofaʼofa, heʼe feala ke maumauʼi he ʼu felōgoi lelei peʼe fetogi ʼaki te temi pea mo te ʼu ʼaluʼaga ʼaē ʼe hoko. Ko te hahaʼi ʼaē neʼe tou ʼoʼofa ai ʼe lagi natou fakalotomamahiʼi tātou peʼe natou liʼakina tātou. Kae ʼe ʼi ai te tahi ʼe mole fetogi anai tona ʼofa ʼi he temi. Ko te ʼofa ʼo Sehova ʼAtua ki tana kau ʼatolasio ʼe fakamatala ʼi hona ʼaluʼaga matalelei iā Loma 8:38, 39.
ʼE ʼui fēnei e te ʼapositolo ko Paulo: “Kua au tui papau.” Kae neʼe tui papau kiteā? Neʼe kua tui papau ia ʼe mole he meʼa ʼe feala anai ke ina “fakamavae . . . tātou mai te ʼofa ʼo te ʼAtua.” ʼE mole palalau pē ia Paulo maʼa ia tokotahi kae ʼe toe palalau maʼa “tātou”—ko tona fakaʼuhiga, kiā nātou fuli ʼaē ʼe natou tauhi agatonu ki te ʼAtua. Moʼo fakamaʼuhigaʼi ia tana manatu ʼaia, ʼe tohi e Paulo te lisi ʼo he ʼu meʼa ʼe mole natou tāʼofi anai ia Sehova ke kaku tona ʼofa ki tana ʼu kaugana ʼaē ʼe tauhi fakamālotoloto kiā te ia.
“ ʼE mole he mate, he maʼuli.” Ko te ʼofa ʼo Sehova ki tana hahaʼi ʼe mole gata ia ʼi te mate. Moʼo fakamoʼoni ia tona ʼofa, ʼe manatuʼi tuʼumaʼu pē e te ʼAtua ia nātou ʼaē kua mamate, pea ʼe ina fakatuʼuake anai nātou ʼi te mālama foʼou ʼaē kā hoko mai. (Soane 5:28, 29; Fakahā 21:3, 4) Kae ʼi te temi nei, ko te ʼofa ʼo te ʼAtua ki tana kau ʼatolasio agatonu ʼe tuʼumaʼu pē ia logopē lā te ʼu meʼa ʼaē ʼe hoko kiā nātou ʼi te mālama ʼaenī.
“ ʼE mole . . . he ʼu ʼāselo, he ʼu puleʼaga.” ʼE feala ke malave ki te hahaʼi ia te mālohi ʼa he kau takitaki peʼe ko he faʼahiga puleʼaga, kae ʼe mole fēia ia Sehova. Ko te ʼu ʼāselo mālolohi, ohagē ko te ʼāselo ʼaē neʼe liliu ko Satana, ʼe mole feala ke natou fakalotoʼi ia te ʼAtua ke tuku tana ʼofa ki tana kau kaugana. (Fakahā 12:10) ʼO fēia mo he ʼu puleʼaga, ʼaē ʼe lagi fakafeagai ki te kau Kilisitiano moʼoni, ʼe mole feala ke natou fetogi ia te manatu ʼa te ʼAtua ʼo ʼuhiga mo tana ʼu kaugana.—1 Kolonito 4:13.
“ ʼE mole . . . he ʼu meʼa ʼo te temi nei, he ʼu meʼa kā hoko mai.” ʼE mole siʼisiʼi ia te ʼofa ʼo te ʼAtua ʼaki te temi. ʼE mole he meʼa ʼe feala ke hoko ʼi te temi nei ki tana ʼu kaugana peʼe ʼi te kā haʼu, ʼe feala anai ke ina fakagata te ʼofa ʼo te ʼAtua kiā nātou.
“ ʼE mole . . . he ʼu mālohi.” Neʼe talanoa ia Paulo ki te ʼu pule ʼi te lagi pea mo te kele—ki “he ʼu ʼāselo” pea mo “he ʼu puleʼaga”—kae ʼi te temi nei ʼe talanoa ʼo ʼuhiga mo “he ʼu mālohi.” Ko te kupu Fakakeleka ʼaē ʼe fakaʼaogaʼi ʼi henī ʼe feala ke fakaʼuhiga ki te ʼu meʼa kehekehe. Tatau aipē pe koteā tona fakaʼuhiga totonu, kae ko te meʼa e tahi ʼe tou tui papau kiai: ʼE mole he mālohi ʼi selō peʼe ʼi te kele ʼe feala ke ina tāʼofi ia te ʼofa ʼo Sehova ki tana hahaʼi.
“ ʼE mole . . . he māʼoluga, he loloto.” ʼE ʼofa ia Sehova ki tana hahaʼi logo aipē he ʼu ʼaluʼaga—peʼe lelei, peʼe kovi—ʼaē ʼe hoko kiā nātou ʼi he temi pē.
“ ʼE mole . . . he tahi age meʼa neʼe fakatupu.” ʼI tana talanoa ʼo ʼuhiga mo te ʼu meʼa fuli ʼaē neʼe fakatupu, ʼe ʼui e Paulo ʼe mole he meʼa e tahi ʼe feala ke ina fakamavae te kau ʼatolasio agatonu mai te ʼofa ʼo Sehova.
ʼO mole hagē ko te ʼofa ʼo te tagata, ʼaē ʼe feala ke fetogi peʼe ke puli ʼaki te temi, ko te ʼofa ʼo te ʼAtua kiā nātou ʼaē ʼe natou haga tui kiā te ia ʼe mole puli anai ʼi he temi; ʼe heʼegata ia. Ko tatatou ʼiloʼi ia te faʼahi ʼaia ʼe ina uga tātou ke tou fakaovi kiā Sehova pea mo tou faiga mālohi ke tou fakamoʼoni totatou ʼofa kiā te ia.