Kotou Tekeʼi Ia “Te Laumālie ʼo Te Mālamanei”

“Neʼe mole tou tali te laumālie ʼo te mālamanei, kae ko te laumālie ʼaē ʼe haʼu mai te ʼAtua.”—1 KO. 2:12.

1, 2. (a) ʼI te temi muʼa, he koʼē neʼe ʼi ai te ʼu kiʼi manulele legalega ʼi te ʼu lameni ʼi Pilitānia? (b) Ko te tuʼutāmaki fea ʼaē ʼe felāveʼi mo te kau Kilisitiano?

ʼI TE taʼu 1911, ko te kau takitaki ʼo Pilitānia neʼe natou fakatuʼu ia te lao ʼi te ʼu lameni ʼo ʼuhiga mo te haofaki ʼo te maʼuli ʼo te hahaʼi ʼaē ʼe gāue ai. ʼI te ʼu lameni fuli ʼaia neʼe fakamaʼua ke ʼi ai he ʼu kiʼi manulele legalega e lua. Koteā tona tupuʼaga? Koteʼuhi kapau ʼe hoko he vela ʼi te lameni, pea ʼe hū anai ia te hahaʼi haofaki ki te ʼu pū ʼo te lameni mo te ʼu manulele ʼaia, heʼe mamanu fakavilivili e te ʼu manulele ʼaia ia te kasa, ohagē lā ko te monoxyde de carbone. Kapau kua mafola te kasa ʼaia ʼi te ʼaele, pea ʼe ʼiloga anai ʼi te agaaga ʼo te ʼu kiʼi manulele ʼaia, ʼo feala ai ke natou fetōki mai ʼi te ʼakau ʼaē ʼe feʼāveʼaki ai nātou. Neʼe maʼuhiga ʼaupitō ia te ʼu fakaʼiloga ʼaia. Ko te monoxyde de carbone ʼe ko he kasa ia ʼe mole lanu pea ʼe mole mamanu, pea ʼe mate ai te hahaʼi heʼe ina tāʼofi te gāue ʼa te ʼu selule kula ʼo te toto ke ʼaua naʼa ʼave te oxygène ki te ʼu selule ʼo te sino. Kapau ʼe mole ʼiloʼi tautonu ia te kasa ʼaia, pea ʼe feala pē ki te hahaʼi haofaki ke natou pogia pea mo mamate kae mole natou ʼiloʼi pē lā neʼe natou mānava ki te kasa kona ʼaia.

² ʼO toe fēia pē mo te kau Kilisitiano, ʼe natou felāveʼi mo te ʼaluʼaga ʼe tatau mo te kau gāue ʼo te ʼu lameni. ʼO feafeaʼi? ʼI te temi ʼaē neʼe fakatotonu ai e Sesu ki tana ʼu tisipulo ke natou fakamafola ia te logo lelei ʼi te mālamanei kātoa, neʼe ina ʼiloʼi ʼe natou tau anai mo te ʼu fakahala, ʼi he mālama ʼe puleʼi e Satana pea mo te laumālie ʼo te mālamanei. (Mat. 10:16; 1 Soa. 5:19) ʼI te tuʼaniaʼi ʼaē e Sesu ʼo ʼuhiga mo tana ʼu tisipulo, ʼi te pō ʼi muʼa ʼo tona mate, neʼe faikole fēnei ki tana Tamai: “ ʼE mole au kole atu kiā te koe ke ke toʼo kehe ia nātou ʼi te mālamanei, kae ke ke leʼoleʼo kiā nātou ʼuhi ko ia ʼaē ʼe agakovi.”—Soa. 17:15.

3, 4. Koteā te fakatokaga neʼe fai e Sesu ki tana ʼu tisipulo, pea he koʼē ʼe ʼaoga kiā tātou ia te fakatokaga ʼaia?

³ Neʼe fai e Sesu te fakatokaga ki tana ʼu tisipulo ʼo ʼuhiga mo te tuʼutāmaki fakalaumālie ʼe hagē ko he māʼumoea ʼe feala ke natou mamate ai. ʼE ʼaoga tāfito ia te ʼu palalau ʼa Sesu kiā tātou heʼe tou māʼuʼuli ʼi te temi fakaʼosi ʼo te tuʼu ʼo te ʼu faʼahiga meʼa ʼaenī. Neʼe ina fakalotomālohiʼi fēnei ia tana ʼu tisipulo: “Ke kotou nonofo ʼalaʼala . . . ke feala ai hakotou hao ʼi te ʼu meʼa fuli ʼaia ʼaē ʼe tonu ke hoko mai, pea mo kotou tutuʼu iā muʼa ʼo te Foha ʼo te tagata.” (Luka 21:34-36) Kae meʼa lelei, he neʼe toe fakapapauʼi mai e Sesu, ko tana Tamai ʼe ina foaki mai anai ia te laumālie māʼoniʼoni moʼo fakafīmālieʼi tonatou ʼu ʼatamai pea mo tokoni kiā nātou ke natou nonofo ʼalaʼala pea mo mālolohi.—Soa. 14:26.

⁴ ʼE feafeaʼi kiā tātou iā ʼaho nei? ʼE tou maʼu koa te laumālie māʼoniʼoni ʼaia moʼo tokoni mai kiā tātou? Kapau koia, pea koteā ʼaē ʼe tonu ke tou fai ke tou maʼu ia te laumālie māʼoniʼoni ʼaia? Koteā koa te laumālie ʼo te mālamanei, pea ʼe feafeaʼi ia tana gāue? Pea ʼe feafeaʼi anai ia hatatou tekeʼi ia te laumālie ʼaia ʼo te mālamanei?—Lau ia 1 Kolonito 2:12.

Ko Te Laumālie Māʼoniʼoni Peʼe Ko Te Laumālie ʼo Te Mālamanei?

5, 6. Koteā ʼaē ʼe lava fai e te laumālie māʼoniʼoni maʼa tātou, kae koteā ʼaē ʼe tonu ke tou fai moʼo maʼu ia te laumālie?

⁵ Ko te maʼu ʼo te laumālie māʼoniʼoni neʼe mole fakatuʼakoi pē ki te kau Kilisitiano ʼo te ʼuluaki sēkulō. ʼE kei tou maʼu pē tana tokoni iā ʼaho nei, pea ʼe feala ki te laumālie ʼo te ʼAtua ke ina foaki mai ia he mālohi moʼo fai ia te meʼa ʼaē ʼe lelei pea mo faʼafai ʼi tatatou tauhi. (Loma 12:11; Filp. 4:13) ʼE toe tokoni mai ke tou maʼu ia he ʼu kalitātē lelei, ohagē ko te ʼofa, te agalelei, pea mo te lotoʼofa, ko he “fua [ʼaia] ʼo te laumālie.” (Kal. 5:22, 23) Kae ko Sehova ʼAtua ʼe mole ina fakaʼaogaʼi fakamālohi ia tona laumālie māʼoniʼoni ke gāue ki he hahaʼi ʼaē ʼe mole natou loto kiai.

⁶ Koia ʼe ʼaoga anai ke tou fai ia te fehuʼi ʼaenī kiā tātou: ‘Koteā ʼaē ʼe feala ke au fai moʼo maʼu ia te laumālie māʼoniʼoni?’ ʼE fakahā ʼi te Tohi-Tapu, ʼe lahi te ʼu meʼa ʼe feala ke tou fai. Ko te faʼahi ʼe maʼuhiga pea mo faigafua, ke tou kole ki te ʼAtua ia tona laumālie. (Lau ia Luka 11:13.) Ko te tahi faʼahi ʼe maʼuhiga: Ke tou ako pea mo maʼuliʼi ia te ʼu tokoni ʼo te Folafola ʼa te ʼAtua ʼaē neʼe takitaki tona tohi e te laumālie māʼoniʼoni ʼo te ʼAtua. (2 Tim. 3:16) ʼE mahino ia, ʼe mole ko te hahaʼi fuli leva ʼaē ʼe natou lau ia te Tohi-Tapu ʼaē kā natou maʼu anai ia te laumālie ʼo te ʼAtua. Kae kapau ʼe ako e he Kilisitiano fakamālotoloto ia te Folafola ʼa te ʼAtua, pea ʼe feala ke ina fakaʼaogaʼi ia te ʼu kalitātē pea mo te ʼu manatu ʼaē ʼe maʼu ʼi tona ʼu fakamatala. ʼE toe maʼuhiga foki ke tou tali ko Sehova neʼe ina fakanofo Sesu ko Tana tagata fakafofoga pea ʼaki ia ia neʼe foaki e te ʼAtua ia tona laumālie. (Kol. 2:6) Koia, ʼe tou fia muliʼi ia te faʼifaʼitaki ʼa Sesu pea mo tana ʼu faiakonaki. (1 Pet. 2:21) Kapau ʼe lahi ia tatatou muliʼi ia te faʼifaʼitaki ʼa Kilisito, pea ʼe toe lahi anai mo te tokoni mai ʼa te laumālie māʼoniʼoni.

7. ʼE fakahalaʼi feafeaʼi ia te hahaʼi e te laumālie ʼo te mālamanei?

⁷ Kae ko te laumālie ʼo te mālamanei ʼe ina fakahalaʼi ia te hahaʼi ke natou faʼifaʼitakiʼi ia te aga ʼa Satana. (Lau ia Efesi 2:1-3.) ʼE lahi ia te ʼu faʼahiga ʼaluʼaga kehekehe ʼe gāue ai ia te laumālie ʼo te mālamanei. ʼE tou fakatokagaʼi lelei ʼi te mālama iā ʼaho nei, ʼe ina fakaneke ia te hahaʼi ke natou fakafeagai ki te ʼu lēkula ʼa te ʼAtua. ʼE ina fakaneke ia te hahaʼi ki “te holi ʼo te kakano, te holi ʼo te ʼu mata pea mo te fakahāhā ʼo tota ʼu koloa.” (1 Soa. 2:16) ʼE ina fakatupu ia te ʼu gāue ʼo te kakano, ohagē ko te fai folonikāsio, te tauhi tamapua, te ʼu gāue faifakalauʼakau, te maheka, te loto ʼita, pea mo te ʼinu kava fakavale. (Kal. 5:19-21) Pea ʼe ina fakamafola ia te ʼu akonaki ʼa te kau ʼapositā ʼaē ʼe fakafeagai ki te meʼa ʼaē ʼe taputapu. (2 Tim. 2:14-18) Koia kapau ʼe kita tō ki te ʼu fakahala ʼa te laumālie ʼo te mālamanei, pea ʼe kita liliu anai ʼo faʼifaʼitakiʼi ia te aga ʼa Satana.

8. Koteā ʼaē ʼe tonu ke tou filifili takitokotahi?

⁸ ʼE mole feala leva ʼi te temi fuli ke tou fakamamaʼo mai te ʼu fakahala. ʼE tonu kiā tātou takitokotahi ke tou filifili ia te meʼa ʼaē kā ina takitaki anai totatou maʼuli—ko te laumālie māʼoniʼoni peʼe ko te laumālie ʼo te mālamanei. Ko nātou ʼaē ʼe mulimuli ʼi te temi nei ki te laumālie ʼo te mālamanei ʼe feala ke natou ʼāteaina mai tana fakahala pea mo tuku ia te laumālie māʼoniʼoni ke ina takitaki tonatou maʼuli. Kae ʼe toe feala pē foki ke tou liʼaki ia te takitaki ʼa te laumālie māʼoniʼoni, ʼo tou mulimuli ki te laumālie ʼo te mālamanei. Ko nātou ʼaē ʼe natou tuku fakatemi ia te takitaki ʼa te laumālie māʼoniʼoni, ʼe feala pē ke natou tō ki te hele ʼo te laumālie ʼo te mālamanei. (Filp. 3:18, 19) Tou vakaʼi age muʼa peʼe tou lava tekeʼi feafeaʼi ia te laumālie ʼo te mālamanei.

Ke Tou ʼIloʼi Ia Te ʼu ʼUluaki Fakaʼiloga

9-11. Koteā he ʼu fakaʼiloga ʼe lagi fakahā ai kua fakahalaʼi tātou e te laumālie ʼo te mālamanei?

⁹ Ko te kau gāue lameni ʼo Pilitānia ʼaē neʼe tou talanoa ki ai ʼi te kamataʼaga ʼo te ʼalatike, neʼe natou fakaʼaogaʼi ia te ʼu kiʼi manulele moʼo ʼiloʼi fakavilivili peʼe ʼi ai he kasa kona ʼi te lameni. Kapau neʼe sio he tahi ʼe mate he manulele, pea neʼe ina ʼiloʼi ʼe tonu ke ina foimo fai he puleʼaki moʼo haofaki tona maʼuli. ʼO toe fēia ʼi te faʼahi fakalaumālie, koteā te ʼu ʼuluaki fakaʼiloga ʼaē ʼe tou ʼiloʼi ai kua fakahalaʼi tātou e te laumālie ʼo te mālamanei?

¹⁰ ʼI te temi ʼaē neʼe tou kamata ako ai ia te ʼu moʼoni ʼaē ʼe maʼu ʼi te Folafola ʼa te ʼAtua pea mo foaki ia totatou maʼuli kiā Sehova, neʼe lagi tou fiafia ʼi te lau ʼo te Tohi-Tapu. Neʼe lagi tou faikole fakamālotoloto pea mo fai tuʼumaʼu. Pea neʼe tou fiafia ʼi te kau ki te ʼu fono ʼo te kōkelekāsio, mo sio ki ʼotatou tehina mo tuagaʼane neʼe ko he meʼa fakatupu lotomālohi, ohagē pē ko he matapuna vai ʼe feala ke fakamokomoko ai ia he tagata ʼe fia ʼinu. Ko te taʼi maʼuli ʼaia neʼe tokoni mai ke tou fakamamaʼo mai te laumālie ʼo te mālamanei pea mo ʼāteaina mai ai.

¹¹ ʼE kei tou faiga koa ke tou lau ia te Tohi-Tapu ʼi te ʼaho fuli? (Pes. 1:2) ʼE tou faikole tuʼumaʼu koa pea mo fai ʼaki he loto kātoa? ʼE tou leleiʼia koa tatatou ʼu fono, ʼo tou kau ki te ʼu fono fuli ʼaē ʼe fai ʼi te vāhaʼa fuli? (Pes. 84:10) Peʼe kua tou tōtō koa ʼi tatatou ʼu agamāhani ʼaia? ʼE moʼoni, lagi ʼe lahi te ʼu maʼua ʼe tou fakaʼaogaʼi kiai totatou temi pea mo totatou mālohi, pea ʼe feala ke faigataʼa ia tatatou fakahoko kātoa ia tatatou tauhi ʼaē ki te ʼAtua. Kae kapau ʼaki te temi, kua tōtō tatatou ʼu agamāhani ʼaia, ʼe mole koa lā ko he fakaʼiloga ʼaia kua fakahalaʼi tātou e te laumālie ʼo te mālamanei? ʼE tou faiga atu anai koa ke tou toe fai ia te ʼu agamāhani lelei ʼaē neʼe tou maʼu ʼi muʼa atu?

“Naʼa Mamafa Tokotou ʼu Loto”

12. Koteā ʼaē neʼe ʼui age e Sesu ki tana ʼu tisipulo ke natou ‘tōkakaga’ kiai, pea koteā tona tupuʼaga?

¹² Koteā he tahi age puleʼaki ʼe tou lava fai moʼo tekeʼi ia te laumālie ʼo te mālamanei? ʼI te temi ʼaē neʼe tokoniʼi ai e Sesu tana ʼu tisipulo “ke [natou] nonofo ʼalaʼala,” neʼe ko te ʼu tuʼutāmaki tāfito ʼaē neʼe ina fakatokagaʼi age. Neʼe ina ʼui fēnei age: “Ke kotou tokaga kiā koutou totonu, talia naʼa mamafa tokotou ʼu loto ʼi te lahi fau ʼo te kai, pea mo te lahi fau ʼo te ʼinu, pea mo te ʼu tuʼania ʼo te maʼuli, pea mo fokifā pē kua hoko fakapunamaʼuli mai kiā koutou te ʼaho ʼaia ohagē ko he hele.”—Luka 21:34, 35.

13, 14. Koteā ia te ʼu faʼahiga fehuʼi ʼo ʼuhiga mo te kai pea mo te ʼinu ʼe lelei anai ke tou fai kiā tātou totonu?

¹³ Kotou fakakaukauʼi age muʼa te fakatokaga ʼaia. Neʼe tauteaʼi koa e Sesu ia te fakafiafia ʼaē ʼi te meʼa kai pea mo te meʼa ʼinu? Kailoa ia! Neʼe ina ʼiloʼi lelei ia te ʼu palalau ʼaenī ʼa Salomone: “Kua au ʼiloʼi ʼe mole ʼi ai he meʼa ʼe lelei age maʼa nātou ʼi hanatou fakafiafia pea mo hanatou fai te meʼa ʼaē ʼe lelei lolotoga tonatou maʼuli; pea ke kai foki te tagata fuli pē, ʼio ke ʼinu, pea mo mamata ki te lelei ʼo tana gāue kinakina kātoa. ʼE ko te meʼa ʼofa ia ʼo te ʼAtua.” (Tnk. 3:12, 13) Kae neʼe ʼiloʼi e Sesu ʼo ʼuhiga mo te ʼu faʼahi ʼaia, ʼe fakaʼaogaʼi fakavalevale e te hahaʼi ia te kai pea mo te ʼinu ʼuhi ko te laumālie ʼo te mālamanei.

¹⁴ ʼE feafeaʼi hatatou ʼiloʼi ko te laumālie ʼo te mālamanei kua ina fakakiviʼi tātou ʼo ʼuhiga mo te ʼu tuʼutāmaki ʼo te lahi fau ʼo te kai, pea mo te lahi fau ʼo te ʼinu? ʼE lagi tou lava fai ia te ʼu fehuʼi ʼaenī kiā tātou totonu: ‘ ʼE au tali feafeaʼi anai mo kapau ʼe au lau he tokoni ʼi te Tohi-Tapu peʼe ʼi tatatou ʼu tohi ʼo ʼuhiga mo te kai vale? ʼE mole au mulimuli anai koa ki te tokoni ʼaia koteʼuhi ʼe fefeka fau, peʼe lagi ʼe au fia tonuʼia ʼi te ʼu aga ʼaē ʼe au fai?a Koteā taku manatu ki te tokoni ʼo ʼuhiga mo te kava, mo tona fakaʼaogaʼi fakapotopoto pea mo liʼaki fakalelei ia te “ ʼinu kava fakavale”? ʼE au meʼa noaʼi koa ia te tokoni ʼaia, heʼe ʼi taku manatu ʼe mole hona ʼaoga ia kiā au? Kapau ʼe tuʼaniaʼi e ʼihi ia taku ʼinu, ʼe au fia tonuʼia koa peʼe au ʼita? ʼE au fakaneke koa ʼihi ke mole natou fakalogo ki te tokoni Fakatohi-tapu ʼaia?’ ʼEī, ʼe tou ʼiloʼi ʼaki te aga ʼa he tahi peʼe kua mulimuli ki te laumālie ʼo te mālamanei.—Vakaʼi ia Loma 13:11-14.

ʼE Mole Tou Hoha Fau Anai

15. Ko te aga fea ʼaē neʼe fakatokaga mai e Sesu kiai?

¹⁵ Ko te tahi puleʼaki ʼe tou lava fai moʼo tekeʼi ia te laumālie ʼo te mālamanei ʼe ko te lolomi ʼo tatatou lotohoha. Neʼe ʼiloʼi e Sesu ʼi totatou ʼuhiga heʼe haohaoa ʼe tou hoha anai ki te ʼu meʼa māhani ʼo te maʼuli. ʼAki te ʼofa neʼe ina ʼui fēnei age ki tana ʼu tisipulo: “Tuku takotou hoha.” (Mat. 6:25) ʼE mahino ia ʼe tou tuʼaniaʼi ia te ʼu faʼahi tāfito ʼo te maʼuli, ohagē lā ko te fakafiafiaʼi ia te loto ʼo te ʼAtua, mo te fakahoko ʼo te ʼu maʼua Fakakilisitiano, pea mo te kumi ʼo te ʼu meʼa fakasino ʼaē ʼe ʼaoga ki totatou fāmili. (1 Ko. 7:32-34) Koia, koteā te ako ʼe tou maʼu mai te fakatokaga ʼaē neʼe fai e Sesu?

16. ʼE malave feafeaʼi ia te laumālie ʼo te mālamanei ki te maʼuli ʼo te hahaʼi tokolahi?

¹⁶ Ko te laumālie ʼo te mālamanei, ʼaē ʼe ina fakamuʼamuʼa ia te fakahāhā ʼo tokita ʼu koloa, ʼe tupu ai te lotohoha ʼa te hahaʼi ʼo fakatupu kovi ki tonatou maʼuli. ʼE loto e te mālamanei ke tou tui ʼe tou maʼu ia te fīmālie ʼaki te paʼaga, pea ʼe tou liliu anai ko he tahi ʼe maʼuhiga, ʼe mole ʼaki totatou ʼu kalitātē fakalaumālie kae ʼaki pē te lahi pea mo te lelei ʼo tatatou ʼu koloa. Ko nātou ʼaē neʼe kākāʼi e te ʼu fakahala ʼaia ʼe natou maʼuli pōpula anai ke natou maʼu koloa pea ʼe natou hoha tuʼumaʼu ke natou maʼu he ʼu meʼa foʼou, mo lelei ʼaupitō age, pea mo laka age ʼi te ʼu meʼa fuli. (Taag. 18:11) Ko te taʼi manatu hala ʼaia ʼo ʼuhiga mo te ʼu koloa fakamālama ʼe ina fakatuputupu ia te lotohoha, ʼaē ʼe ina tāʼofi ai ia te tuputupu ʼi te faʼahi fakalaumālie ʼa he tahi.—Lau ia Mateo 13:18, 22.

17. ʼE feafeaʼi ke mole tou hoha fau anai?

¹⁷ ʼE mole tou hoha fau anai ki he meʼa mo kapau ʼe tou fakalogo ki te fakatotonu ʼaenī ʼa Sesu: “Ke kotou haga kumi muʼa te puleʼaga pea mo [te] faitotonu [ʼa te ʼAtua].” ʼE fakapapau mai e Sesu mo kapau ʼe tou fai ia te faʼahi ʼaia, pea ko te ʼu meʼa ʼaē ʼe ʼaoga moʼoni kiā tātou ʼe ina foaki mai anai. (Mat. 6:33) ʼE feafeaʼi hatatou fakahā ʼe tou tui ki te fakapapau ʼaia? ʼAki tatatou kumi muʼa ia te faitotonu ʼa te ʼAtua—ʼo tou fakalogo ki te lēkula ʼa te ʼAtua ʼo ʼuhiga mo te fai ʼo te meʼa ʼaē ʼe totonu ʼi te ʼu gāue fakapaʼaga. Ohagē lā, ʼe tou fakahā fakalelei anai ia te lahi ʼo tata falā ʼaē ʼe kita maʼu ʼi te pepa ʼaē ʼe tohi kiai ʼo ʼuhiga mo te tukuhau, pea ʼe tou palalau ʼaki te moʼoni mokā ʼe tou felōgoi ki he ʼu gāue. ʼE tou totogi fakalelei anai ia totatou ʼu maʼua fakapaʼaga, ʼo tou manatuʼi kapau neʼe tou ʼio kiai pea ʼe tonu ke tou fakahoko fakalelei ia te faʼahi ʼaia. (Mat. 5:37; Pes. 37:21) ʼE lagi mole tuputupu anai ʼo lahi takita ʼu koloa ʼaki te taʼi aga fakahagatonu ʼaia, kae ʼe maʼu ai ia te ʼofa ʼo te ʼAtua, pea mo he leʼo ʼo loto ʼe maʼa, pea ʼe fakasiʼisiʼi ai hakita loto hoha.

18. Koteā ia te faʼifaʼitaki lelei neʼe tuku mai e Sesu, pea ʼe fua lelei feafeaʼi anai kiā tātou mo kapau ʼe tou muliʼi ia tana faʼifaʼitaki?

¹⁸ Ko te kumi muʼa ʼaē ʼo te Puleʼaga, ko tona fakaʼuhiga ke tou ʼiloʼi ia te ʼu meʼa ʼaē ʼe tonu ke tou fakamuʼamuʼa ʼi totatou maʼuli. Tou fakatokagaʼi age muʼa ia te faʼifaʼitaki ʼa Sesu. ʼI te tahi temi, neʼe kofu ki tona kofu totogi kovi. (Soa. 19:23) Neʼe kai pea mo ʼinu ia te vino mo tona ʼu kaumeʼa lelei. (Mat. 11:18, 19) Kae ʼi te maʼuli ʼo Sesu neʼe mole ina fakamuʼamuʼa ia te ʼu koloa pea mo te ʼu fakafiafia. Ko te fai ʼo te finegalo ʼo Sehova ʼaē neʼe hagē kiā Sesu ko hana meʼa kai tāfito ʼaia. (Soa. 4:34-36) Kapau ʼe tou muliʼi ia te faʼifaʼitaki ʼa Sesu pea ʼe koloaʼia aipē totatou maʼuli! ʼE tou fiafia ʼi te tokoni ki te hahaʼi ʼaē ʼe lotomamahi ke natou maʼu ia he fīmālie mai te Tohi-Tapu. ʼE tou maʼu ia te ʼofa pea mo te tokoni ʼa te kōkelekāsio. Pea ʼe tou fakafiafia ia te loto ʼo Sehova. Kapau ʼe tou fakahoahoa lelei ia te ʼu meʼa ʼaē ʼe tou fakamuʼamuʼa ʼi totatou maʼuli, pea ʼe mole puleʼi anai tātou e te ʼu koloa pea mo te ʼu fakafiafia. Heʼe ko te ʼu faʼahi ʼaia, ʼe tokoni mai pē ki tatatou tauhi ʼaē kiā Sehova. Pea kapau ʼe tou lagolago mālohi ki te ʼu gāue ʼo te Puleʼaga ʼo te ʼAtua, pea ʼe mole mālo anai ia te laumālie ʼo te mālamanei iā tātou.

Tou Taupau Ia Te ‘Manatu ʼa Te Laumālie’

19-21. ʼE feafeaʼi hatatou haga “manatu ki te laumālie,” pea he koʼē ʼe tonu anai ke tou fai ia te faʼahi ʼaia?

¹⁹ ʼE tou fakakaukauʼi tuʼumaʼu ia muʼa ʼo hatatou fai he meʼa. Ko te ʼu meʼa ʼaē ʼe ʼui e te tokolahi ko he ʼu aga neʼe fai fakafuanoa, ʼi te agamāhani ʼe ko he ʼu aga ia neʼe fai ʼaki he ʼu manatu fakatagata. Koia, ʼe fakamanatuʼi mai e te ʼapositolo ko Paulo ia te ʼaoga ʼaē ke tou puipui ia tatatou ʼu manatu. Neʼe ina tohi fēnei: “Ko nātou ʼaē ʼe natou mulimuli ki te kakano ʼe natou manatu ki te ʼu meʼa ʼo te kakano, kae ko nātou ʼaē ʼe natou mulimuli ki te laumālie ʼe natou manatu ki te ʼu meʼa ʼo te laumālie.”—Loma 8:5.

²⁰ Koteā ʼaē ʼe tonu ke tou fai ke mole puleʼi e te laumālie ʼo te mālamanei ia tatatou ʼu manatu pea mo tatatou aga? ʼE tonu ke tou puipui ia totatou ʼatamai ʼo ʼuhiga mo te ʼu meʼa ʼaē ʼe tou fakahū kiai, ʼo tou tekeʼi mālohi ia te ʼu manatu ʼo te mālamanei. Ohagē lā, kā tou filifili he fakafiafia, ʼe mole tou tuku anai ia totatou ʼatamai ke ʼulihi e he ʼu polokalama ʼe fakahāhā ai he ʼu aga heʼeʼaoga pea mo he ʼu agamālohi. ʼE tou ʼiloʼi ko te laumālie māʼoniʼoni ʼo te ʼAtua peʼe ko tona laumālie taputapu, ʼe mole nofo anai ʼi he ʼatamai ʼe ʼuli. (Pes. 11:5; 2 Ko. 6:15-18) Tahi ʼaē, ʼe tou fakafealagia ki te laumālie ʼo te ʼAtua ke gāue ki totatou ʼatamai mokā ʼe tou lau tuʼumaʼu ia te Tohi-Tapu, pea mo tou faikole, mo metitāsioʼi ki te ʼu meʼa ʼaē ʼe tou lau, pea mo tou kau ki te ʼu fono. Pea ʼe tou gāue mo te laumālie ʼaia mokā ʼe tou kau tuʼumaʼu ki te fai fakamafola.

²¹ ʼE mahino ia, ʼe tonu ke tou tekeʼi ia te laumālie ʼo te mālamanei pea mo te ʼu holi ʼo te kakano ʼaē ʼe tupu mai ai. Kapau ʼe tou fai ia te faʼahi ʼaia, pea ʼe mole vaʼiganoa anai, heʼe ʼui fēnei e Paulo: “Ko te manatu ki te kakano ko tona fakaʼuhiga ko te mate, kae ko te manatu ki te laumālie ko tona fakaʼuhiga ko te maʼuli pea mo te tokalelei.”—Loma 8:6.

[Nota]

ʼE Kei Kotou Manatuʼi Koa?

• Ke tou maʼu ia te laumālie māʼoniʼoni, koteā ʼaē ʼe tonu anai ke tou fai?

• Ko te ʼu faʼahiga ʼaluʼaga kehekehe fea ʼaē ʼe feala ai ki te laumālie ʼo te mālamanei ke ina fakahalaʼi tātou?

• ʼE feafeaʼi hatatou tekeʼi ia te laumālie ʼo te mālamanei?

[Paki ʼo te pasina 25]

ʼI muʼa ʼo takotou ʼolo ʼo gāue peʼe ki te faleako, kotou kole ia te laumālie māʼoniʼoni

[Paki ʼo te pasina 27]

ʼE tonu ke tou puipui totatou ʼatamai ke maʼa, mo tou taupau ia he ʼu felōgoi lelei ʼi te gāue, pea mo tou fakapotopoto ʼi tatatou ʼu agamāhani