Te ʼu Fehuʼi ʼa Te Kau Lautohi
ʼE ʼUi Pē Koa e Te Kau Fakamoʼoni ʼa Sehova ʼe Ko Nātou Pē ʼAē Kā Haofaki Anai?
ʼI te manatu ʼa te kau Fakamoʼoni ʼa Sehova kua natou maʼu ia te lotu moʼoni. Kanapau lā ʼi tanatou manatu neʼe heʼeki natou maʼu, kanaʼaua lā kua fetogi ia tanatou ʼu akonaki. Ohagē ko te kau ʼatolasio ʼo te ʼu tuʼuga lotu, ʼe falala ia te kau Fakamoʼoni ʼa Sehova ʼe haofaki anai nātou. Kae ʼe natou toe ʼiloʼi pē foki, ʼe mole fakalogo kiā nātou, pe ko ai anai ʼaē kā haofaki. ʼI tona fakahagatonu, ʼe ko te ʼAtua ia te Tuʼi Fakamāu. ʼE ko ia ʼaē ʼe fakalogo ki ai ia te faʼahi ʼaia.—Isaia 33:22.
ʼE fakahā ʼi te Folafola ʼa te ʼAtua, ko nātou ʼaē kā haofaki anai, ʼe mole fakalogo pē ki tanatou loto ʼaē ke haofaki nātou, kae ʼe tonu foki ke natou toe lagolago ki te Haofakiʼaga. Tou toʼo he fakatā: Kotou fakakaukauʼi age muʼa he tagata haʼele kua hehē ʼi te toafa. ʼE faiga fakamālotoloto ke ina maʼu ia tona ala. ʼE mate anai koa, peʼe hao anai koa mai te tuʼutāmaki ʼaia? ʼE fakalogo ia te faʼahi ʼaia ki tana tali ʼaē ʼo te tokoni kā fai age kiā te ia. Kapau ʼe mole agavaivai, pea ʼe lagi mole ina tali anai ia te tokoni peʼe ko te fakatuʼutuʼu haofaki ʼaē kā fai age. ʼI te tahi age faʼahi, ʼe feala ke ina tali ʼaki he agavaivai ia te tokoni pea ʼe hao ai anai.
ʼO toe fēia pē, ko te haofaki ʼe fakalogo kiā nātou ʼaē ʼe lagolago ki te Haofakiʼaga ko Sehova ʼAtua. Ko te haofaki ʼe ko he meʼa ʼofa ia mai te ʼAtua, kae ʼe mole ko te hahaʼi fuli ʼaē kā natou maʼu. Ko Sesu ia te ʼAlo ʼo te ʼAtua, neʼe ina ʼui fēnei: “ ʼE mole ko nātou ʼaē ʼe natou ʼui mai kiā te au: ‘ ʼAliki, ʼAliki,’ kā natou hū anai ki te puleʼaga ʼo selō, kae ko ʼaē ʼe ina fai te finegalo ʼo taku Tamai ʼaē ʼe ʼi selō.”—Mateo 7:21.
ʼE tui ia te kau Fakamoʼoni ʼa Sehova ko te ʼAtua ʼe ina haofaki pē ia nātou ʼaē ʼe natou tui ki te sākilifisio faitotonu ʼa Sesu pea mo mulimuli ki te ʼu akonaki ʼa Sesu. (Gāue 4:10-12) Tou vakaʼi age muʼa ia te ʼu fakamaʼua e tolu ʼo ʼuhiga mo te haofaki ʼe fakahā mai ʼi te Folafola ʼa te ʼAtua.
(1) Neʼe ʼui fēnei e Sesu ki tona ʼu kaumeʼa: “ ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe kotou femaʼuʼaki te ʼofa.” (Soane 13:35) Ko te faʼifaʼitaki ʼa Sesu ʼo ʼuhiga mo tana foaki tona maʼuli maʼa ʼihi, neʼe fakahā lelei ai ia te maʼuhiga ʼo te ʼofa. Ko nātou ʼaē ʼe ʼoʼofa ki ʼihi, ʼe natou fakahā ia he kalitātē maʼuhiga ki te haofaki.
(2) Neʼe ʼui fēnei e Sesu ʼi tana faikole ki tana Tamai: “Neʼe au fakaʼilo age kiā nātou tou huafa.” (Soane 17:26) Neʼe ʼiloʼi e Sesu ia te maʼuhiga ʼaē ʼo te huafa ʼo te ʼAtua ko Sehova, ki tana Tamai. Neʼe hūfakiʼi e Sesu ia te huafa ʼo tana Tamai ke “fakatapuhā.” (Mateo 6:9) Ko te fakatapuhā ia te huafa ʼo te ʼAtua, ko tona fakaʼuhiga ke kita ʼiloʼi ia te huafa ʼaia pea mo fai ia te aga ʼaē ʼe tuha mo te huafa maʼuhiga ʼaia pea mo māʼoniʼoni. Ohagē ko Sesu, ko nātou ʼaē ʼe natou kumi ia te haofaki ʼe tonu ke natou fakaʼaogaʼi ia te huafa ʼo te ʼAtua. ʼE tonu foki ke natou akoʼi ki niʼihi ia te huafa ʼo te ʼAtua pea mo tona ʼu kalitātē. (Mateo 28:19, 20) ʼI tona fakahagatonu, ʼe gata pē kiā nātou ʼaē ʼe fetapa ki te huafa ʼo te ʼAtua ʼe haofaki anai.—Loma 10:13.
(3) Neʼe ʼui fēnei e Sesu kiā Posio Pilato: “Ko toku puleʼaga ʼe mole kau ia ʼi te mālama ʼaenī.” (Soane 18:36) Tokosiʼi iā ʼaho nei ʼe natou fakahā ia tanatou tui ʼo ʼuhiga mo te Puleʼaga ʼo te ʼAtua, ʼaē ʼe ʼAfio ai Sesu. Kae ʼe natou falala ki te ʼu fakatuʼutuʼu fakatagata. Kae ko nātou ʼaē kā haofaki anai, ʼe natou lagolago agatonu ki te Puleʼaga ʼo te ʼAtua pea mo akoʼi ʼihi peʼe fakaʼāteaina feafeaʼi anai e te Puleʼaga ʼaia ia te hahaʼi agatonu fuli.—Mateo 4:17.
ʼI tanatou kua ʼosi ako ʼihi fakamaʼua ki te haofaki, neʼe ʼui fēnei e te ʼu tisipulo ʼa Sesu: “Ko ai ʼapē ʼe feala moʼoni ke hao?” Neʼe tali fēnei e Sesu: “Ko te ʼu meʼa ʼaē ʼe faigataʼa ki te tagata ʼe feala ia ki te ʼAtua.” (Luka 18:18-30) ʼE faiga tuʼumaʼu pē ia te kau Fakamoʼoni ʼa Sehova ke natou fakahoko ia te ʼu fakamaʼua ʼaia ʼo ʼuhiga mo te haofaki. ʼE natou toe gāue mālohi moʼo tokoni ki niʼihi ke haofaki mo nātou.