Te Tauhi Fakafāmili ʼe Maʼuhiga ʼAupitō Ki Te Haofaki!
KOTOU fakakaukauʼi age muʼa ia te fakamataku anai ʼo “te tau ʼo te ʼaho lahi ʼo te ʼAtua te Māfimāfi”! (Fakh. 16:14) Neʼe fakamatala e te polofetā ko Mikea peʼe feafeaʼi anai ia te ʼaho ʼaia, ʼo ina tohi fēnei: “ ʼE huhuʼa anai te ʼu moʼuga . . . pea mo makafaʼafaʼa anai te ʼu telea mālalo ohagē ko te sela ʼi te afi, ohagē ko he ʼu vai ʼe mafola ʼi he mahifo.” (Mik. 1:4) Koteā anai ia te ikuʼaga fakaʼofaʼofa kiā nātou ʼaē ʼe mole tauhi kiā Sehova? ʼE ʼui fēnei ʼi te Folafola ʼa te ʼAtua: “ ʼE mahino ia ko te hahaʼi ʼaē kā matematehi anai e Sehova ʼi te ʼaho ʼaia, ʼe leta anai mai te tahi potu taupotu ʼo te kele ʼo aʼu ki te tahi potu taupotu ʼo te kele.”—Sel. 25:33.
ʼO mulimuli ki te ʼu fakatokaga ʼaia, ko te ʼu pule fāmili, ʼaē ʼe tokolahi ʼe natou taupau tokotahi tanatou fānau, ʼe lelei ke natou fai ia te fehuʼi ʼaenī ʼo ʼuhiga mo tanatou fānau ʼaē kua poto ʼi te fakakaukau: ‘ ʼE natou hao anai koa ʼi te ʼaho ʼaia?’ ʼE fakapapau mai ʼi te Tohi-Tapu ʼe natou hao anai mo kapau ʼe natou nonofo mālolohi ʼi te faʼahi fakalaumālie ʼo mulimuli pē ki tonatou ʼu taʼu.—Mat. 24:21.
Te Maʼuhiga ʼAē Ke Maʼu He Temi Ki Te Tauhi Fakafāmili
ʼI tokotou ʼuhiga mātuʼa, kotou vakaʼi fakalelei ke kotou fai ia meʼa fuli pē ʼe kotou lavaʼi moʼo taupau ia takotou fānau ʼi “te akonaki pea mo te ʼu fakatokaga ʼa Sehova.” (Efe. 6:4) ʼE maʼuhiga ʼaupitō ke kotou ako ia te Tohi-Tapu mo takotou fānau. ʼE tou loto ke hagē tatatou fānau ko te kau Kilisitiano ʼo Filipe, ʼaē neʼe vikiʼi e Paulo ʼuhi ko tanatou fia fakalogo ʼaki he lotolelei kiā Sehova. Neʼe ina tohi fēnei: “Naʼi kau ʼofaina, ohagē pē ko takotou fakalogo tuʼumaʼu, ʼo mole gata ʼaki pē ʼi te temi ʼaē neʼe au ʼi henā, kae kua lahi age ʼi te temi nei, ʼi te lolotoga ʼo te temi ʼaē ʼe mole au ʼi henā, kotou haga gāue ki tokotou maʼuli ʼaki te manavahe.”—Filp. 2:12.
Kā kotou pupuli, ʼe fakalogo koa takotou fānau ki te ʼu lao ʼa Sehova? ʼE feafeaʼi mokā natou ʼi te faleako? ʼE kotou lava tokoni feafeaʼi ki takotou fānau ke natou tui ki te fakapotopoto ʼo te ʼu lao ʼa Sehova, ʼo natou mulimuli kiai tatau aipē peʼe kotou pupuli?
Ko te tauhi fakafāmili ʼe maʼuhiga ki te laga ʼaē ʼo te tui ʼo takotou fānau ʼo ʼuhiga mo te faʼahi ʼaia. Koia, tou talanoa kiā faʼahi maʼuhiga e tolu ke fua lelei ai takotou ako Tohi-Tapu fakafāmili.
Ke Fai Tuʼumaʼu
ʼE fakahā ʼi te Tohi-Tapu, ʼe fakaafe ia te ʼu ʼāselo ʼa te ʼAtua ke natou ʼomai ki ʼona muʼa ʼi te ʼu temi kua fakakatofa. (Sopo 1:6) Ke kotou fai fēia mo takotou fānau. Kotou fakatuʼutuʼu he ʼaho pea mo he hola ke fai ai takotou Tauhi Fakafāmili ʼi te afiafi pea kotou mulimuli lelei kiai. Tahi ʼaē meʼa, kotou fakatuʼutuʼu he temi ki he ʼu ʼaluʼaga ʼe feala ke hoko fakafokifā.
ʼI te ʼalu ʼo te temi, ʼaua naʼa kotou maʼu ia te manatu ʼaē ʼe feala pē ke tahitahiga ia te fai ʼo te ako Tohi-Tapu fakafāmili. Kotou manatuʼi, ko takotou kau ako Tohi-Tapu ʼaē ʼe maʼuhiga ʼaupitō age, ʼe ko takotou fānau. Kae ko Satana ʼe ina fia puke nātou. (1 Pet. 5:8) Kapau ʼe mole kotou fai ia te Tauhi Fakafāmili ʼi he afiafi heʼe kotou fia sio televisio peʼe kotou fia fai he tahi age meʼa ʼe mole maʼuhiga, ʼe mālo anai Satana.—Efe. 5:15, 16; 6:12; Filp. 1:10.
Ke ʼAoga Kiā Nātou
Ko te Tauhi Fakafāmili ʼaē ʼe fai ʼi te afiafi, ʼe mole tonu pē ke tuʼakoi ki te akoʼi ʼo he ʼu manatu ki te fānau. Kotou faigaʼi ke ʼaoga kiā nātou ia te ʼu manatu ʼaia. ʼO feafeaʼi? ʼI ʼihi temi, kotou filifili he ʼu ʼalatike ʼe talanoa ki he ʼu ʼaluʼaga ʼe feala ke hoko ki takotou fānau ʼi te ʼu ʼaho ʼaē kā tuʼu mai peʼe ko te ʼu vāhaʼa ʼaē kā haʼu. Ohagē lā, he koʼē ʼe mole kotou fai ʼi te ʼu ako ʼaia ia he ʼu faʼifaʼitaki ki te fai fakamafola? ʼE fia fai e te fānau he ʼu meʼa ʼe natou leleiʼia. Ko te kiʼi faʼifaʼitaki ʼo te tufa ʼo te ʼu nusipepa pea mo te fakakaukauʼi ʼo he ʼu faʼahiga tali ki he ʼu palalau fakafeagai ʼe feala ke fai mai e te hahaʼi, ʼe tokoni anai kiā nātou ke mole natou mātataku mokā natou kau ki te ʼu faʼahi kehekehe ʼo te fakamafola ʼo te Puleʼaga.—2 Tim. 2:15.
ʼE feala ke kotou toe fai he ako ʼe ʼaoga ki takotou fānau, ke natou maʼu he ʼu tokoni moʼo tauʼi ia te ʼu fakaneke ʼo tanatou ʼu kaugā ako. ʼE feala ke kotou fakaʼaogaʼi ia te kāpite 15 ʼo te tohi Fakafalani Les jeunes sʼinterrogent — Réponses pratiques, te 2 Tohi. ʼI te pāsina 132 pea mo 133 ʼi te kupu tāfito “Contre la pression du groupe” (Moʼo Fakafeagai Ki Te Fakaneke ʼo Te Kūtuga), ʼe maʼu ai ia he ʼu tokoni pea mo he ʼu fealagia ke feala ai ki takotou tamasiʼi ke palalau faʼifaʼitaliha. ʼI te lalo pāsina 133, ʼe tuʼu ai te palalau, ʼe fakalotomālohi fēnei te kau tūpulaga: “Entraînez-vous avec votre père, votre mère ou un(e) ami(e) mûr(e)” (Kotou akoako takotou ʼu faʼahiga tali ki takotou ʼu kaugā ako mo takotou tamai, peʼe ko takotou faʼē peʼe ko he kaumeʼa kua fakapotopoto). ʼI ʼihi temi, he koʼē ʼe mole kotou fai ia te akoako ʼaia ʼi te temi ʼaē ʼe kotou fai ai takotou Tauhi Fakafāmili ʼi te afiafi?
Ko te fai ʼo te tauhi fakafāmili, ʼe ko he faigamālie ʼaia ki te ʼu mātuʼa ke natou fakahā fakalelei ki tanatou ʼu fānau ia te ʼu fua lelei ʼo te fai ʼo he ʼu fakatuʼutuʼu fakalaumālie. ʼO ʼuhiga mo te faʼahi ʼaia, ko te 2 Tohi Les jeunes sʼinterrogent, ʼe maʼu ai ia te manatu ʼe lelei ʼaupitō ʼi te kāpite 38, ko tona kupu tāfito “Que vais-je faire de ma vie ?” (ʼE Au Fakaʼaogaʼi Feafeaʼi Anai Koa Toku Maʼuli?) ʼI takotou fai palalau ki te kāpite ʼaia, kotou tokoniʼi takotou tamasiʼi ke mahino kiā ia, ko tana tokaga pē ʼi tona maʼuli ki te tauhi ʼaē kiā Sehova, ʼe ko te faʼahi lelei tokotahi ʼaia ʼe feala ke ina fai. Kotou fakatuputupu ʼi te loto ʼo takotou tamasiʼi hana fia pioniē, peʼe gāue ʼi te Petele, peʼe kau ki te Ako ʼo Te Minisitelio, peʼe ke loto ki he tahi age faʼahiga gāue fēia ʼi te temi kātoa.
Kae tou tōkakaga heʼe ko ʼihi mātuʼa, ʼaki he ʼu manatu ʼe lelei, ʼe natou loto tāfito ke fai e tanatou fānau ia te ʼu meʼa ʼaē ʼe natou loto e nātou mātuʼa, ʼo mole natou vikiʼi ai tanatou fānau ki te ʼu meʼa ʼaē kua natou fai. ʼE mahino ia, ʼe lelei ke kotou fakalotomālohiʼi takotou fānau ke natou fai hanatou ʼu fakatuʼutuʼu lelei ohagē ko te gāue ʼi te Petele pea mo te gāue misionea. Kae kā kotou fakalotomālohiʼi nātou ki te faʼahi ʼaia, kotou tōkakaga naʼa kotou fakatupu ʼita ki takotou tamasiʼi ʼuhi ko takotou ʼu fakaʼamu pea mo tupu ai hana lotovaivai. (Kol. 3:21) Kotou manatuʼi tuʼumaʼu, ʼe tonu ki tokotou foha peʼe ko takotou taʼahine ke ʼofa mo tona loto ʼo ia totonu kiā Sehova kae ʼaua naʼa ʼofa ki te ʼAtua ʼuhi ko koutou ʼaē ʼe kotou loto kiai. (Mat. 22:37) Koia, kotou vikiʼi takotou tamasiʼi mokā ina fai ia he meʼa ʼe lelei, pea ʼaua naʼa kotou valokiʼi pē ia te ʼu meʼa ʼaē ʼe mole ina fai. Kotou fakatuputupu ia he loto fakafetaʼi iā te ia ki te ʼu meʼa fuli pē ʼaē neʼe fai e Sehova. Pea kotou fakafealagia ai leva ki takotou tamasiʼi ke tali mo tona loto ki te agalelei ʼa Sehova.
Ke Liliu Te Ako Fakafāmili Ko He Temi Fakafiafia
Ko te tolu faʼahi ke fua lelei ia te Tauhi Fakafāmili ʼaē ʼe fai ʼi te afiafi, ʼe tonu ke liliu ko he temi fakafiafia. ʼE kotou lava fakahoko feafeaʼi ia te faʼahi ʼaia? ʼI ʼihi lakaga, ʼe lagi feala ke kotou fakalogo he kiʼi gaoʼi neʼe puke, ohagē ko te ʼu kiʼi gaoʼi ʼaē ʼe fai ʼi tatatou ʼu fakatahi, peʼe kotou sioʼi mo nātou ia he foʼi ʼata viteo pea mo fai palalau kiai, ʼaē neʼe fai e te kau Fakamoʼoni ʼa Sehova. Peʼe feala hakotou lau fakatahi he ʼu vaega Fakatohi-tapu, ʼo takitahi iā nātou he ʼu vaega ke ina lau.
ʼI Te Tule Leʼo pea mo te Réveillez-vous !, ʼe ʼi ai te ʼu ʼalatike ʼe feala ke fai kiai ia te ako fakafāmili. Ohagē lā, ʼe feala ke kotou fakaʼaogaʼi ia te ʼalatike ʼi te pāsina 31 ʼo te Réveillez-vous !, ko tona kupu tāfito “Que répondriez-vous ?” (ʼE Kotou Tali Feafeaʼi Anai?) ʼI te ʼu Tule Leʼo Fakafalani fuli ʼaē ki te kaugamālie, ʼe maʼu ai te ʼalatike ʼe feala ke ako, ko tona kupu tāfito “Pour nos jeunes lecteurs” (Maʼa Tatatou Kau Lautohi Tūpulaga). Ko te ʼu ʼalatike ʼaia ʼaē ʼe feala ke ako ʼe fetofetogi ʼaki te ʼu ʼalatike maʼa te kau talavou pea mo te kau finemui, ʼaē ko tona kupu tāfito “Enseignez vos enfants” (Kotou Akoʼi Takotou Fānau).
Ko te ʼu ʼalatike ʼi te Réveillez-vous ! ʼaē ko tona kupu tāfito “Les jeunes sʼinterrogent” ʼe fia lau anai e te ʼu mātuʼa ʼo te kau tūpulaga, ʼo fēia mo te 2 Tohi Les jeunes sʼinterrogent. Kā kotou fakaʼaogaʼi ia te tohi ʼaia, ʼaua naʼa kotou vakaʼi fakavilivili ia te fakamatala ʼaē ʼe ʼātakai, ko tona kupu tāfito “Quʼen pensez-vous ?” (Koteā Takotou Manatu?) pea ʼe tuʼu ʼi te ʼu fakaʼosi kāpite. Ko te fakamatala ʼaē ʼe ʼātakai ʼe mole ko he fakamanatu pē. Ko te ʼu fehuʼi ʼaē ʼe tuʼu ai, ʼe feala ke fakaʼaogaʼi ki te fai palalau fakafāmili.
Kae kotou tōkakaga ke mole liliu ia te ako fakafāmili ko he temi fakafehuʼi. Ohagē lā, ʼaua naʼa kotou fakakinauʼi takotou tamasiʼi ke ina lau leʼo lahi te ʼu manatu ʼaē neʼe ina tohi ʼi te ʼu pāsina ʼaē ko tona kupu tāfito “Mon journal” (Taku Sulunale) peʼe ko te ʼu meʼa ʼaē neʼe ina tohi ʼi te tahi age ʼu pāsina ʼaē ʼe feala ke ina tohi ai tana ʼu manatu. ʼI te pāsina 3, ʼi te kupu tāfito “Un mot aux parents” (Nota Ki Te ʼu Mātuʼa), ʼe ʼui fēnei: “Moʼo fakalotomālohiʼi takotou tamasiʼi ke ina tohi faʼifaʼitaliha ʼi tana tohi ia tana ʼu manatu, kotou fakaʼapaʼapa ki tona maʼuli fakatūpulaga. Ki muli age, ʼe lagi ina fia fakahā atu anai ia tana ʼu manatu ʼaē neʼe ina tohi ʼo ʼuhiga mo he ʼu faʼahi.”
Kapau ʼe kotou fai tuʼumaʼu takotou tauhi fakafāmili, mo ʼaoga ki takotou fānau, pea mo fakafiafia, ʼe tapuakina lahi anai e Sehova takotou ʼu faiga. Ko te temi makehe ʼaia mo tokotou fāmili, ʼe tokoni atu anai ke kotou taupau ia tokotou fāmili ʼofaina ke mālohi ʼi te faʼahi fakalaumālie.
[Talanoa ʼo te pasina 31]
Kotou Fakakaukauʼi He ʼu Meʼa Ke Kotou Fai Mo Tokotou Fāmili
“Kā mā ako mo tamā ʼu taʼahine ʼaē kei liliki, ʼe mā fai palalau mo toku ʼohoana ki te ʼu ʼalatike ʼaē ʼe tonu ke teuteuʼi ki te fono pea ʼosi ʼaia, pea fai leva e tamā taʼahine he pāki ʼe ina fakamatala fakanounou ia te faʼahi ʼaē neʼe ako. ʼI ʼihi temi, ʼe matou faʼifaʼitakiʼi ia te ʼu hisitolia Fakatohi-tapu peʼe ko he ʼu ʼuluaki palalau ki te fai fakamafola. ʼE mā faiga ke mā fai ia te ako ʼo mulimuli pē ki te ʼu meʼa ʼaē ʼe natou lava mahino kiai, pea ke natou leleiʼia, ke mā vikiʼi nātou pea ke fakafiafia ia te temi ako.”—J.M., Amelika.
“Moʼo tokoni ki te tama ʼa te fafine ʼaē ʼe au fai tana ako, ke mahino pe neʼe feafeaʼi te fakaʼaogaʼi ʼo te takaiga tohi ʼi te temi muʼa, neʼe matou tā ia te tohi ʼo Isaia, kae neʼe matou molehi ia te ʼu kāpite pea mo te ʼu vaega. Neʼe matou fakapipiki ia te ʼu pāsina pea mo tākai te tahi potu pea mo tahi potu. Neʼe faigaʼi leva e te kiʼi tama ke ina fai ia te meʼa ʼaē neʼe fai e Sesu ʼi te sinakoka ʼi Nasaleti. Ko te fakamatala iā Luka 4:16-21 ʼe ʼui ai ko Sesu “neʼe ina folahi te takaiga tohi [ʼo Isaia] ʼo ina maʼu” te koga tohi ʼaē neʼe ina kumi. (Isa. 61:1, 2) Kae ʼi te faiga ʼa te kiʼi tama ke ina faʼifaʼitakiʼi, neʼe faigataʼa kiā ia tana maʼu ia Isaia 61 ʼaki ia te takaiga tohi loa ʼaia ʼaē ʼe mole tohi ai he kāpite pea mo he vaega. ʼI tana punamaʼuli ʼi te poto ʼo Sesu ʼi te fakaʼaogaʼi ʼo te ʼu takaiga tohi, neʼe ʼui fēnei e te tama: ‘Ko Sesu neʼe fakaofoofo!’ ”—Y. T., Saponia.
[Paki ʼo te pasina 30]
Ko te ʼu temi ako ʼaē ʼe ʼi ai tona ʼaoga ki te fānau, ʼe tokoni kiā nātou ke natou tauʼi ia te fakaneke ʼa te ʼu kaugā ako
[Paki ʼo te pasina 31]
Kotou faiga ke fakafiafia ia te Tauhi Fakafāmili ʼaē ʼe fai ʼi te afiafi