Kotou Maʼu Te Fīmālie ʼi Te Lotolotoiga ʼo Te Hahaʼi ʼa Te ʼAtua
“ ʼE au fakakolōlia anai koe ʼi te kōkelekāsio lahi.”—PES. 35:18.
1-3. (a) Koteā ʼaē ʼe feala ke tuʼutāmaki ai ia te maʼuli fakalaumālie ʼo te kau Kilisitiano? (b) Kofea ʼaē ʼe feala ai ki te hahaʼi ʼa te ʼAtua ke natou maʼu honatou puipuiʼaga?
ʼI TONĀ temi mālōlō, ko Joe pea mo tona ʼohoana neʼe nā uku ʼi te ʼu lauhakau ʼe tapuke ai te ʼu faʼahiga ika kehekehe pea mo lanu kehekehe. Neʼe nā kaugā mamaʼo atu ki te loloto, ke nā mamata ki te ʼu feo ʼaē ʼi te lalo tai. ʼI tanā kua aʼu ʼaē ki te loloto, neʼe ʼui fēnei age e te ʼohoana ʼo Joe: “ ʼI taku manatu kua tā mamaʼo fau.” Pea tali fēnei age e Joe: “Tuku tau mataku, ʼe au ʼiloʼi pē te meʼa ʼaē ʼe au fai.” ʼE manatuʼi e Joe ia tana punamaʼuli ʼaē ki muli age: ‘ ʼE ʼolo fuli te ʼu ika kifea?’ ʼI meʼa fakamataku, he neʼe mahino leva kiā ia te tupuʼaga ʼaē ʼo te feholaki ʼa te ʼu ika. Mai te loloto ʼo te tai neʼe ʼalu fakahagatonu age ia te aga kiā Joe. ʼI te temi ʼaia neʼe mole kei ʼi ai hona holaʼaga. ʼI te kua fakaoviovi age ʼaē ʼa te aga, fokifā pē pea afe ʼo puli ʼosi.
2 ʼE feala ki he Kilisitiano ʼi tana tokaga fau ʼaē ki te ʼu meʼa ʼo te mālama ʼa Satana—te ʼu fakafiafia, te gāue, te ʼu koloa—ke mole kei ina ʼiloʼi te tuʼutāmaki ʼaē ʼe feala ke hoko kiā ia. ʼE ʼui e Joe, ʼaē ko te tagata ʼāfea: “Ko te meʼa ʼaē neʼe hoko kiā au, neʼe ina fakamahino mai kiā au te maʼuhiga ke au tokaga kiā nātou ʼaē ʼe au fakakaugā ki ai. Tou fakakaumeʼa mo nātou ʼaē ʼi te loto kōkelekāsio heʼe mole tou tuʼutāmaki ai anai!” ʼE mole tonu ke tou tuku ia te ʼu fakafiafia ʼo te mālama ʼaenī ke mole tou toe fakatahi mo te kōkelekāsio, heʼe feala ai ke tou tuʼutāmakiʼia. Kapau ʼe hoko kiā koutou he faʼahi fēia, kotou foimo liliu ʼo toe fakatahi mo te kōkelekāsio. Heʼe kapau ʼe mole kotou fai te faʼahi ʼaia, ʼe feala pē anai ke kotou tuʼutāmakiʼia ʼi te faʼahi fakalaumālie.
3 Iā ʼaho nei, ko te mālama ʼe ko he koga meʼa fakatupu tuʼutāmaki ki te kau Kilisitiano. (2 Tim. 3:1-5) ʼE ʼiloʼi e Satana kua nounou tona temi, pea ʼe ina fakaʼamu ke ina kai ia nātou fuli ʼaē ʼe mole nonofo tōkakaga. (1 Pet. 5:8; Fakh. 12:12, 17) Kae ʼe ʼi ai totatou puipuiʼaga. Neʼe foaki mai e Sehova ki tana hahaʼi ia he nonoʼaga fakalaumālie, ʼe ko te kōkelekāsio Fakakilisitiano.
4, 5. ʼE feafeaʼi te hahaʼi ʼo ʼuhiga mo te kā haʼu, pea koteā tona tupuʼaga?
4 Ko te mālama ʼaenī ʼe ina foaki mai ia he fīmālie ʼe mole tologa ʼi te faʼahi fakasino peʼe ʼi te faʼahi ʼo te loto. Tokolahi te hahaʼi ʼe natou logoʼi ko tonatou fīmālie fakasino ʼe feala ke puli ʼuhi ko te faifakapō, te agamālohi, te totogi kovi ʼo te maʼuli, pea mai te nātulā. Ko tātou fuli ʼe tou tau mo te ʼu fihifihia ʼo te vaivai matuʼa pea mo te mahaki. Pea ko nātou ʼaē ʼe ʼi ai tanatou gāue, mo tonatou ʼu ʼapi, mo tanatou falā feʼauga, pea mole natou mahamahaki, ʼe feala ke natou feʼekeʼaki peʼe ko temi e fia kā hoko atu ai anai te ʼu meʼa ʼaia.
5 Tokolahi neʼe lagi mole feala ke natou maʼu ia he lotofīmālie. Meʼa fakaʼofaʼofa, he ko te kaugamālie ʼaē neʼe fakaʼamu ke natou maʼu te tokalelei pea mo te fīmālie ʼi tanatou ʼohoana pea ʼi he maʼuli fakafāmili, neʼe natou fakatokagaʼi neʼe mole hoko tanatou ʼu fakaʼamu ʼaia. ʼI te faʼahi fakalaumālie, tokolahi te hahaʼi lotu kua natou lotolotolua pea mo hehē, ʼo natou feʼekeʼaki peʼe lelei te takitaki ʼaē neʼe natou maʼu. Tāfito lā mokā natou tokagaʼi ia te ʼu aga ʼaē ʼe fai e tonatou kau takitaki lotu pea mo tanatou ʼu faiakonaki ʼaē ʼe mole fakatafito ki te Tohi-Tapu. Koia, tokolahi te hahaʼi neʼe natou falala ki te poto ʼo te tagata peʼe ki te agalelei pea mo te fakapotopoto ʼo te hahaʼi. Koia ʼe mole fakapunamaʼuli ai, ko te hahaʼi kua natou nofo tuʼania peʼe natou leleiʼia age pē hanatou mole fakakaukauʼi fau ia te kā haʼu.
6, 7. (a) Koteā ʼaē ʼe kehekehe ai ia nātou ʼaē ʼe kaugana ki te ʼAtua pea mo nātou ʼaē ʼe mole kaugana kiā te ia? (b) Koteā ʼaē kā tou vakaʼi anai?
6 ʼE kehekehe ʼaupitō nātou ʼaē ʼe kau ʼi te kōkelekāsio Fakakilisitiano pea mo nātou ʼaē ʼe mole kau ai! Logolā mo tātou ʼaē ko te hahaʼi ʼa Sehova, ʼe tou tau mo te ʼu tuʼuga fihifihia ohagē pē ko te hahaʼi fuli, kae ʼe kehekehe tatatou tauʼi ia te ʼu fihifihia ʼaia. (Lau ia Isaia 65:13, 14; Malakia 3:18.) Koteā tona tupuʼaga? Koteʼuhi ʼe tou maʼu ʼi te Tohi-Tapu ia te ʼu fakamahino lelei ʼo ʼuhiga mo te ʼu ʼaluʼaga ʼaē ʼe hoko nei ʼi te mālamanei, pea ʼe tou maʼu ia te ʼu tokoni lelei moʼo tauʼi te ʼu faigataʼaʼia pea mo te ʼu fihifihia ʼaē ʼe tau mo tātou. Ko te tupuʼaga lā ʼaia ʼo tatatou mole tuʼaniaʼi fau ia te kā haʼu. ʼI tatatou liliu ʼaē ko te kau ʼatolasio ʼa Sehova, ʼe puipui ai tātou mai he ʼu manatu ʼe mole fakapotopoto pea mole hona fakamoʼoni fakatohi-tapu, mai he ʼu aga heʼeʼaoga, pea mo tona ʼu fua kovi. ʼE maʼu ai e te kau Kilisitiano ia te maʼuli fīmālie ʼaē ʼe mole maʼu e ʼihi.—Isa. 48:17, 18; Filp. 4:6, 7.
7 Ko tatatou vakaʼi ia he ʼu faʼifaʼitaki, ʼe lava tokoni mai ke tou fakakaukauʼi ia te fīmālie ʼaē neʼe maʼu e nātou ʼaē ʼe kaugana kiā Sehova, ʼo mole tatau mo te hahaʼi ʼaē ʼe mole natou tauhi kiā te ia. Ko te ʼu faʼifaʼitaki ʼaia ʼe feala ke ina uga tātou ke tou sivisivi tatatou ʼu faʼahiga manatu pea mo tatatou faʼahiga aga, pea mo vakavakaʼi ai peʼe lagi feala ke lahi age hatatou maʼuliʼi ia te tokoni ʼa te ʼAtua, ʼaē neʼe fai moʼo puipui ʼo tātou.—Isa. 30:21.
“Neʼe Teitei Pē Ke Hēʼia Toku ʼu Vaʼe”
8. Koteā ʼaē neʼe tonu ke fai tuʼumaʼu e te ʼu kaugana ʼa Sehova?
8 Mai te kamataʼaga ʼo te hisitolia ʼo te mālamanei, ko nātou ʼaē neʼe natou filifili ke natou tauhi pea mo fakalogo kiā Sehova, neʼe natou tōkakaga naʼa natou fakakaugā mo nātou ʼaē ʼe mole tauhi kiā Sehova. ʼIo, neʼe fakahā e Sehova ʼe fefakafeagaiʼaki anai tana kau ʼatolasio pea mo nātou ʼaē ʼe lagolago kiā Satana. (Sen. 3:15) Mai tona ʼaluʼaga ʼaē ʼe natou lagolago mālohi ki te ʼu pelesepeto ʼa te ʼAtua, ko tana hahaʼi ʼe natou kehekehe mo te hahaʼi fuli. (Soa. 17:15, 16; 1 Soa. 2:15-17) Ko he faʼahi neʼe mole faigafua tuʼumaʼu. ʼIo, ko ʼihi kaugana ʼa Sehova neʼe ʼi ai te ʼu ʼaluʼaga neʼe natou tui vaivai ai ki te fakapotopoto ʼo te maʼu ʼo he faʼahiga maʼuli fakasākilifisio.
9. Fakamatala te fihifihia ʼaē neʼe tau mo te tagata faitohi o te Pesalemo 73?
9 Ko te tahi kaugana ʼa Sehova ʼaē neʼe feʼekeʼaki pe neʼe ina fai ia te ʼu tonu ʼaē ʼe fakapotopoto, neʼe ko ia ʼaē neʼe ina tohi te Pesalemo 73, lagi ko he tahi ʼi te fāmili ʼo Asafe. Ko te tagata fai pesalemo ʼaia neʼe feʼekeʼaki, pe koʼē ko te kau agakovi ʼe fua lelei tuʼumaʼu tanatou ʼu fakatuʼutuʼu, mo fiafia, pea mo maʼu koloa, kae kiā nātou ʼaē ʼe faiga ke natou tauhi ki te ʼAtua, ʼe natou maʼuli mamahi pea ʼe natou tau mo te ʼu fihifihia.—Lau ia Pesalemo 73:1-13.
10. He koʼē ko te ʼu fehuʼi ʼaē neʼe lagaʼi e te tagata fai pesalemo ʼe maʼuhiga kiā koutou?
10 Neʼe heʼeki kotou fai koa ia te ʼu taʼi fehuʼi ʼaia ohagē ko te tagata fai pesalemo? Kapau koia, ʼaua naʼa kotou manatu ʼe vaivai takotou tui. ʼI te mālamanei, ko te ʼu kaugana ʼa Sehova, ʼo kau ai mo nātou ʼaē neʼe fakaʼaogaʼi e Sehova moʼo tohi te Tohi-Tapu, neʼe natou maʼu te ʼu manatu fēia. (Sopo 21:7-13; Pes. 37:1; Sel. 12:1; Hap. 1:1-4, 13) ʼIo, ko nātou fuli ʼaē ʼe natou fia tauhi kiā Sehova, ʼe tonu ke natou fakakaukauʼi lelei te fehuʼi ʼaenī pea ke natou tali ia tanatou tali kiai: Ko te tauhi pea mo te fakalogo ki te ʼAtua ʼe ko te aga koa ʼaia ʼe lelei ke fai? ʼE pipiki te fehuʼi ʼaia ki te fehuʼi ʼaē neʼe lagaʼi e Satana ʼi te ʼōloto ʼi Eteni. ʼE ko te fehuʼi tāfito ʼaia ʼo ʼuhiga mo te pule faʼifaʼitaliha ʼa te ʼAtua. (Sen. 3:4, 5) ʼE lelei ke tou tōkakaga fuli ki te ʼu manatu ʼaē neʼe lagaʼi e te tagata fai pesalemo. ʼE tonu koa ke tou fakaʼamuʼamu ki te maʼuli ʼaē ʼo te hahaʼi laupisi agakovi ʼaē ʼe hagē ʼe haʼele lelei tonatou maʼuli? ʼE tonu koa ke tou ‘situʼa’ kiā Sehova pea mo faʼifaʼitakiʼi tonatou faʼahiga maʼuli? ʼE mahino ia, ʼe ko te meʼa ʼaia ʼe loto tāfito e Satana ke tou fai.
11, 12. (a) Neʼe tekeʼi feafeaʼi e te tagata fai pesalemo tana ʼu lotolotolua, pea koteā te ako ʼe tou tāʼofi mai ai? (b) Koteā ʼaē neʼe tokoni atu kiā koutou ke kotou manatu tahi mo te tagata fai pesalemo?
11 Koteā ʼaē neʼe tokoni ki te tagata fai pesalemo ke ina tekeʼi tana lotolotolua? Logolā neʼe ina fakamoʼoni tana teitei hehē ʼaē mai te faitotonu, kae neʼe fetogi tana manatu ʼi te temi ʼaē neʼe hū ai ki “te sagatualio lahi ʼo te ʼAtua”—ko tona fakaʼuhiga ʼi te temi ʼaē neʼe fakatahi ai mo te hahaʼi ʼa te ʼAtua ʼi tona tapenakulo peʼe ko te fale lotu pea mo ina fakakaukauʼi te fakatuʼutuʼu ʼa te ʼAtua. Koia neʼe mahino lelei ai leva ki te tagata fai pesalemo neʼe mole ina loto ke fakaʼosi tona maʼuli ohagē ko te hahaʼi agakovi. Neʼe feala hana sio, ko tonatou faʼahiga maʼuli pea mo te ʼu meʼa ʼaē neʼe natou fili neʼe taki nātou ki he “kele ʼe mahekeheke.” Neʼe tokagaʼi e te tagata fai pesalemo, ko nātou ʼaē neʼe natou situʼa kiā Sehova ʼuhi he neʼe natou fai he aga heʼeʼaoga, ʼe natou utu anai tanatou ʼu agakovi ʼaki he ‘ ʼu meʼa fakamataku ʼe hoko fakapunamaʼuli,’ kae kiā nātou ʼaē ʼe tauhi kiā Sehova ʼe lagolago anai ia kiā nātou ʼaia. (Lau ia Pesalemo 73:16-19, 27, 28.) ʼE mahino papau neʼe kua kotou sio ki te moʼoni ʼo te ʼu palalau ʼaenī. Ko te maʼuli ʼaē maʼa nātou totonu ʼo mole natou fakaʼapaʼapa ki te ʼu lao ʼa te ʼAtua, ʼe lagi manako kiai te tokolahi, kae ʼe natou utu pē anai te ʼu fua kovi ʼo te taʼi faʼahiga maʼuli ʼaia.—Kal. 6:7-9.
12 Koteā te tahi ako ʼe tou tāʼofi mai te meʼa ʼaē neʼe hoko ki te tagata fai pesalemo? Neʼe ina maʼu te fīmālie pea mo te poto ʼi te lotolotoiga ʼo te hahaʼi ʼa te ʼAtua. Neʼe ina kamata maʼu ia te manatu ʼaē ʼe lelei pea mo totonu, ʼi tana ʼalu ʼaē ki te koga meʼa neʼe ʼatolasioʼi ai Sehova. ʼO toe fēia iā ʼaho nei, ʼe tou maʼu ia te hahaʼi fai tokoni poto pea mo te meʼa kai fakalaumālie lelei ʼi te ʼu fono ʼa te ʼu kōkelekāsio. Koia ʼaē ʼe ʼui ai e Sehova ki tana ʼu kaugana ke natou kau ki te ʼu fono Fakakilisitiano. ʼI te ʼu fono ʼaia, ʼe fakalotomālohiʼi ai anai nātou pea mo uga ai nātou ke natou aga fakapotopoto.—Isa. 32:1, 2; Hep. 10:24, 25.
Kotou Filifili Lelei Tokotou ʼu Kaumeʼa
13-15. (a) Koteā te ʼu meʼa ʼaē neʼe hoko kiā Tina, ʼo fakahā lelei teā? (b) He koʼē ʼe puipui tātou mokā tou fakakaugā mo te ʼu Kilisitiano?
13 Ko Tina, te ʼofafine ʼo Sakopo neʼe tau mo te ʼu faigataʼaʼia lahi he neʼe fakakaugā mo te hahaʼi ʼo te mālama. Ko te fakamatala ʼaē iā Senesi ʼo ʼuhiga mo ia, ʼe ina fakahā mai, neʼe ko tana agamāhani te fakakaugā mo te ʼu tamaliki fafine Kanaane ʼi te koga meʼa ʼaē neʼe nofo ai tona fāmili. Neʼe mole tatau te ʼu lēkula ʼa te kau Kanaane mo ʼaē ʼa te kau ʼatolasio ʼa Sehova ʼo ʼuhiga mo te aga ʼaē ʼe tonu ke fai. Ko te ʼu fakamoʼoni ʼaē neʼe maʼu e te kau ʼalekeolosia, ʼe fakahā ai ʼaki te ʼu aga ʼaē neʼe fai e te kau Kanaane neʼe fonu tonatou fenua ʼi te tauhi tamapua, mo te ʼu aga heʼeʼaoga, pea mo te tauhi ki te ʼu felāveʼi fakasino heʼeʼaoga, pea mo te agamālohi. (Eke. 23:23; Lev. 18:2-25; Teu. 18:9-12) Kotou manatuʼi te ʼu fua kovi ʼo te fakakaugā ʼa Tina mo te hahaʼi ʼaia.
14 Ko Sekemi te tagata ʼo te fenua, neʼe ʼui ko he “tahi neʼe fakaʼapaʼapaʼi lahi ʼi te loto fale kātoa ʼo tana tamai,” neʼe sio kiā Tina “pea neʼe ina ʼave ia ia ke nā momoe pea neʼe ina fakaʼalikiʼi ia ia.” (Sen. 34:1, 2, 19) ʼI toe aga fakamataku! ʼI takotou manatu, neʼe ʼamanaki koa ia Tina ʼe hoko he meʼa fēia kiā ia? Lagi neʼe ina kumi pē ke fakakaumeʼa mo te kau tūpulaga ʼo te fenua, ʼi tana manatu ko niʼihi ʼe mole agakovi. Kae neʼe faihala ʼosi ia Tina.
15 Koteā te ako ʼe tou maʼu mai te hisitolia ʼaia? ʼE mole feafeala ke tou fakakaumeʼa mo ni hahaʼi ʼo te mālama pea mo tou ʼui ʼe mole ʼi ai anai hona ʼu fua kovi. ʼE ʼui ʼi te Tohi-Tapu ko “te ʼu fakakaugā kovi, ʼe natou maumauʼi te ʼu agamāhani ʼaoga.” (1 Ko. 15:33) Tahi ʼaē meʼa, ʼe puipui koutou mokā kotou fakakaumeʼa mo te hahaʼi ʼaē ʼe lotu tahi mo koutou, ʼe natou fakalogo ki te ʼu lao ʼo ʼuhiga mo te aga ʼaē ʼe tonu ke fai ohagē pē ko koutou, pea ʼe natou ʼofa kiā Sehova ohagē ko koutou. Ko te ʼu fakakaugā lelei ʼaia, ʼe fakalotomālohi ai anai koutou ke kotou aga fakapotopoto.—Taag. 13:20.
“Kua Fakamaʼa Koutou”
16. Koteā ʼaē neʼe ʼui e te ʼapositolo ko Paulo ʼo ʼuhiga mo ʼihi ʼi te kōkelekāsio ʼo Kolonito?
16 Neʼe tokoni te kōkelekāsio Fakakilisitiano ki te hahaʼi kaugamālie ke natou maʼa mai te ʼu aga heʼeʼaoga. ʼI te temi ʼaē neʼe fai ai e te ʼapositolo ko Paulo tana ʼuluaki tohi ki te kōkelekāsio ʼo Kolonito, neʼe talanoa ki te ʼu fetogi ʼaē neʼe tonu ke fai e te kau Kilisitiano moʼo fakaʼalutahi tonatou maʼuli mo te ʼu lēkula ʼa te ʼAtua. Ko ʼihi neʼe ko te kau fai folonikāsio, ko te kau tauhi tamapua, ko te hahaʼi tono, ko te hahaʼi fai tagata mo fai fafine, ko te kau kaihaʼa, mo te kau konahia, pea mo ʼihi age meʼa. Neʼe ʼui fēnei e Paulo kiā nātou: “Kae kua fakamaʼa koutou”—Lau ia 1 Kolonito 6:9-11.
17. Neʼe fetogi feafeaʼi te maʼuli ʼo te tokolahi ʼi tanatou maʼuliʼi ia te ʼu lēkula ʼo te Tohi-Tapu?
17 Ko te hahaʼi ʼaē ʼe mole tui ʼe mole natou mulimuli ki he ʼu pelesepeto ʼe lelei. Ko nātou totonu pē ʼaē ʼe natou taki tonatou maʼuli, peʼe natou mulimuli pē ki te faʼahiga maʼuli heʼeʼaoga ʼo te hahaʼi ʼaē ʼi ʼonatou tafa, ohagē ko tona fai e ʼihi ʼi te kau Kolonito ʼo te temi muʼa, ʼi muʼa ʼo tanatou liliu ko te hahaʼi tui. (Efe. 4:14) Kae ko te ʼatamai mālama ʼo te Folafola ʼa te ʼAtua pea mo tana ʼu fakatuʼutuʼu ʼe mālohi moʼo fetogi ke lelei age te maʼuli ʼo nātou fuli ʼaē ʼe natou maʼuliʼi te Tohi-Tapu. (Kol. 3:5-10; Hep. 4:12) Tokolahi iā ʼaho nei kua natou liliu ko te ʼu Kilisitiano ʼo te kōkelekāsio, ʼe feala ke natou ʼui atu, ʼi muʼa ʼo tanatou ako pea mo maʼuliʼi ia te ʼu lēkula faitotonu ʼa Sehova, neʼe natou fai faʼifaʼitaliha te ʼu aga heʼeʼaoga. Kae neʼe mole natou maʼuli fiafia. Neʼe ko te temi pē ʼaē neʼe natou kamata fakatahi ai mo te hahaʼi ʼa te ʼAtua pea mo maʼuliʼi te ʼu pelesepeto ʼo te Tohi-Tapu ʼaē neʼe natou maʼu ai te tokalelei ʼi tonatou maʼuli.
18. Koteā te meʼa neʼe hoko ki te tūpulaga, ʼo fakamoʼoni ai ia te faʼahi fea?
18 Kae ko ʼihi ʼaē ki muʼa atu neʼe natou fili ke natou situʼa ki te ‘vai ʼo te fīmālie’ ʼa te kōkelekāsio Fakakilisitiano, ʼe natou fakahemala ʼaupitō ʼi te temi nei ki te aga ʼaia neʼe natou fai. Ko te tuagaʼane, ʼe tou fakahigoaʼi anai ko Tanya, ʼe ina ʼui neʼe “lahilahi ake ʼi te moʼoni,” kae ʼi tona taʼu 16, neʼe situʼa ia ki te kōkelekāsio ʼo “muliʼi te ʼu meʼa ʼo te mālamanei.” ʼI te ʼu fua kovi ʼaē neʼe hoko kiā ia, neʼe faitama kae neʼe heʼeki loto kiai, pea neʼe ina fakatō tona fatu. ʼE ina ʼui fēnei ʼi te temi nei: “Ko te ʼu taʼu e tolu ʼaē neʼe au mavae ai ʼi te kōkelekāsio, neʼe ʼi ai tona ʼu fua kovi kiā au, he neʼe au tau mo te lotomamahi ʼe mole toe feala anai hona molehi. Ko te meʼa ʼaē ʼe vevele tuʼumaʼu pē ʼi toku loto, ko taku matehi ʼaē ʼo taku tamasiʼi. . . . ʼE au fia ʼui ki te kau tūpulaga fuli ʼaē ʼe natou holi ke natou ‘ ʼahiʼahiʼi’ te mālama tatau aipē peʼe ko he kiʼi temi nounou, kae ʼaua naʼa natou fai te faʼahi ʼaia!’ Lagi ʼi te kamata ʼe lelei, kae ki ʼamuli ʼe ʼi ai tona ʼu fua kovi. Ko te meʼa pē ʼaē ʼe lava foaki atu e te mālamanei ko he maʼuli mamahi. ʼE au ʼiloʼi te faʼahi ʼaia, he neʼe kua au ʼahiʼahiʼi te mālamanei. Kotou haga nonofo ʼi te kautahi ʼa Sehova! ʼE ko te faʼahiga maʼuli pē ʼaia ʼe maʼu ai te fiafia.”
19, 20. Ko te puipui fea ʼaē ʼe foaki e te kōkelekāsio Fakakilisitiano, pea ʼe ina foaki feafeaʼi?
19 Kotou fakakaukauʼi age muʼa peʼe koteā anai kā hoko kiā koutou mo kapau ʼe kotou mavae ʼi te kōkelekāsio Fakakilisitiano, ʼaē ʼe puipui ai koutou. Tokolahi, ʼi tanatou manatuʼi ʼaē te vaʼiganoa ʼo tonatou maʼuli ʼi muʼa ʼo tanatou ʼiloʼi ia te moʼoni, ʼe mole kei natou fia manatuʼi ia te faʼahi ʼaia. (Soa. 6:68, 69) Logolā te ʼu malaʼia pea mo te fakaʼofaʼofa ʼo te mālama ʼo Satana, kae ʼe feala pē ke kotou maʼu ia te fīmālie pea mo te puipui, mo kapau ʼe kotou fakatahi mo tokotou ʼu tehina mo tuagaʼane. Ko takotou fakatahi ʼaē mo nātou pea mo kau tuʼumaʼu ki te ʼu fono, ʼe kotou manatuʼi tuʼumaʼu aipē anai ia te fakapotopoto ʼaē ʼo te ʼu lēkula faitotonu ʼa Sehova pea mo fakalotomālohiʼi aipē koutou ke kotou mulimuli kiai. ʼE lahi te ʼu ʼaluʼaga ke kotou ‘fakakolōliaʼi ai Sehova ʼi te kōkelekāsio lahi,’ ohagē pē ko tona fai ʼaē ʼe te tagata fai pesalemo.—Pes. 35:8.
20 ʼIo, ʼe ʼi ai te ʼu temi ʼe hagē ai ki te kau Kilisitiano fuli ʼe faigataʼa ʼaupitō kiā nātou ia tanatou nonofo agatonu. ʼE lagi ʼaoga pē ʼi te ʼu temi ʼaia ke fakahā age e he tahi te ala ʼaē ʼe totonu. Koteā ʼaē ʼe kotou lava fai, ʼo fēia mo te kōkelekāsio moʼo tokoni ki tokotou ʼu tehina mo tuagaʼane ʼi te ʼu temi ʼaia? ʼI te ʼalatike ʼaē kā hoa mai, ʼe tou vakaʼi ai anai peʼe feafeaʼi hakotou lava ‘haga fakalotofīmālie pea mo fakalotomālohiʼi’ tokotou ʼu tehina—1 Tes. 5:11.
ʼE Kotou Tali Feafeaʼi Anai?
• Koteā ʼaē ʼe tou ako mai te ʼu meʼa ʼaē neʼe hoko ki te tagata ʼaē neʼe ina tohi te Pesalemo 73?
• Koteā ʼaē ʼe tou ako mai te meʼa neʼe hoko kiā Tina?
• He koʼē ʼe kotou lava maʼu te fīmālie ʼi te kōkelekāsio Fakakilisitiano?
[Paki ʼo te pasina 9]
Tou fakakaumeʼa mo nātou ʼaē ʼi te loto kōkelekāsio heʼe mole tou tuʼutāmaki ai anai!