Te ʼu Meʼa ʼAē Kā Fakahā Anai ʼi Te ʼAho ʼo Sehova

“Ko te ʼaho ʼo Sehova ʼe haʼu anai ohagē ko he tagata kaihaʼa, . . . pea ko te kele pea mo te ʼu gāue ʼaē ʼe fai ʼi ai ʼe hā anai.”—2 PET. 3:10.

1, 2. (a) ʼE fakaʼosi feafeaʼi anai te tuʼu ʼo te ʼu faʼahiga meʼa agakovi ʼaenī? (b) Koteā te ʼu fehuʼi ʼaē kā tou vakaʼi anai?

KO TE tuʼu ʼo te ʼu faʼahiga meʼa agakovi ʼaenī ʼe fakatafito ki te toe loi ʼaē, ko te tagata ʼe ina lava puleʼi fakalelei te kele kae mole takitaki ia ia e Sehova. (Pes. 2:2, 3) ʼE feala koa ke tuʼu ʼo talu ai he fakatuʼutuʼu ʼe fakatafito ki he loi? Kailoa ia! Kae ʼe mole ʼaoga ke tou talitali ke holo tokotahi pē te mālama ʼa Satana. ʼE fakaʼauha anai e te ʼAtua ʼi te temi ʼaē kua ina fakakatofa kiai, ʼo mulimuli pē ki tona loto. Ko te fakafeagai ʼaē ʼa te ʼAtua ki te mālama agakovi ʼaenī, ʼe hā lelei ai anai ia tana faitotonu pea mo tona ʼofa.—Pes. 92:7; Taag. 2:21, 22.

² Neʼe tohi fēnei e te ʼapositolo ko Petelo: “Ko te ʼaho ʼo Sehova ʼe haʼu anai ohagē ko he tagata kaihaʼa, pea ʼi te ʼaho ʼaia ko te ʼu lagi ʼe puli anai ʼi he logoaʼa, kae ko te ʼu meʼa ʼaē kua kakaha ʼe mavetevete anai, pea ko te kele pea mo te ʼu gāue ʼaē ʼe fai ʼi ai ʼe hā anai.” (2 Pet. 3:10) Koteā koa ʼaē ʼe fakaʼuhiga kiai “te ʼu lagi” ʼaia pea mo te “kele” ʼaia? Koteā koa ia “te ʼu meʼa” ʼaē kā mavetevete anai? Pea koteā te fakaʼuhiga ʼo te ʼui ʼaē e Petelo “ ʼe hā anai” ia te “kele pea mo te ʼu gāue ʼaē ʼe fai ʼi ai”? Kapau ʼe tou maʼu ia te ʼu tali ki te ʼu fehuʼi ʼaia, pea ʼe tou nofo teuteu anai ki te ʼu meʼa fakamataku ʼaē kā vave hoko mai.

Te ʼu Lagi Pea Mo Te Kele ʼAē Kā Pulihi Anai

3. Koteā te “ ʼu lagi” ʼaē ʼe talanoa kiai iā 2 Petelo 3:10, pea ʼe pulihi feafeaʼi anai?

³ ʼI tona fakaʼaogaʼi fakatātā ʼi te Tohi-Tapu, ko te kupu te “ ʼu lagi” ʼe tau fakaʼuhiga ki te ʼu pule mālohi, ʼaē ʼe māʼoluga age ʼi te hahaʼi. (Isa. 14:13, 14; Fakh. 21:1, 2) Ko “te ʼu lagi” ʼaē kā “pulihi anai” ʼe natou fakatātā te ʼu puleʼaga fakatagata, ʼaē ʼe natou pule ki te hahaʼi aga heʼe lotu. Ko tonatou pulihi ʼaē ʼi he toe “logoaʼa,” ʼe lagi fakaʼuhiga ʼe hoko vave anai tonatou fakaʼauha.

4. Koteā koa ia te “kele,” pea ʼe fakaʼauha feafeaʼi anai?

⁴ Ko te “kele” ʼe ina fakatā te hahaʼi ʼo te mālamanei ʼaē ʼe mamaʼo ʼi te ʼAtua. Neʼe fēia te mālamanei ʼi te temi ʼo Noe, pea ʼi te fakatotonu ʼa te ʼAtua, neʼe pulihi ʼi te Tulivio. “ ʼAki te folafola pē ʼaia, ko te ʼu lagi pea mo te kele ʼo te temi ʼaenī, kua tānaki maʼa te afi pea kua tāʼofi nātou ki te ʼaho ʼo te fakamāu pea mo te fakaʼauha ʼo te hahaʼi aga heʼe lotu.” (2 Pet. 3:7) Neʼe ko te Tulivio ʼaē neʼe fakaʼaogaʼi moʼo fakaʼauha ia te kau agakovi fuli ʼi te moʼi temi pē e tahi, kae ko te fakaʼauha ʼaē kā hoko mai, ʼe fakahoahoa muʼa tona ʼu koga kehekehe lolotoga “te mamahi lahi.” (Fakh. 7:14) Ko te meʼa ʼaē kā ʼuluaki hoko ʼi te mamahi lahi ʼaia, ʼe uga anai e te ʼAtua ia te kau takitaki fakapolitike ʼo te mālamanei ke natou fakaʼauha ia “Papiloni Lahi,” ʼo ina fakahā ai ia tana fehiʼa likoliko ki te fafine paomutu ʼaia ʼaē ʼe ina fakatātā te ʼu lotu. (Fakh. 17:5, 16; 18:8) Pea ʼi te tau ko Halamaketone, te koga fakaʼosi ʼo te mamahi lahi, ko Sehova totonu ʼaē kā ina molehi kātoa ʼosi te ʼu meʼa fuli ʼo te mālama ʼa Satana.—Fakh. 16:14, 16; 19:19-21.

“Ko Te ʼu Meʼa . . . ʼe Mavetevete Anai”

5. Koteā ʼaē ʼe kau ʼi te ʼu meʼa fakatā ʼaē neʼe talanoa kiai Petelo?

⁵ Koteā koa ia “te ʼu meʼa” ʼaē kā “mavetevete anai”? Ko te tikisionalio Fakatohi-tapu ʼe ina ʼui ʼe fakaʼuhiga ki he ʼu “ ʼuluaki meʼa” peʼe ki he ʼu “meʼa tāfito.” ʼE toe fakahā ai, ko te kupu ʼaia “neʼe fakaʼaogaʼi moʼo fakaʼuhiga ki te ʼu mataʼi tohi ʼaē ʼo te alphabet, ko he ʼu koga tāfito ʼaia ʼo te palalau.” Koia, ko “te ʼu meʼa” ʼaē ʼe talanoa kiai Petelo ʼe fakaʼuhiga ki te ʼu koga tāfito ʼo te mālama ʼa Satana, tana ʼu aga, mo tana ʼu gāue, pea mo tana ʼu fakatuʼutuʼu ʼaē ʼe fakafeagai ki te ʼAtua. ʼI “te ʼu meʼa” ʼaia ʼe kau ai te “laumālie ʼo te mālamanei,” ʼaē “ ʼe gāue ʼi te temi nei ki te ʼu foha ʼo te talagataʼa.” (1 Ko. 2:12; lau ia Efesi 2:1-3.) Ko te laumālie, peʼe ko te “ ʼaele” ʼaia, ʼe mafola ʼi te mālama ʼa Satana. ʼE ina uga te hahaʼi ke natou fakakaukau, mo fai he ʼu fakatuʼutuʼu, mo fai he ʼu palalau pea mo he ʼu aga ʼe hā ai te manatu ʼa Satana, ia te “pule ʼo te mālohi ʼo te ʼaele” ʼaē ʼe fialahi pea mo agapauʼu.

6. ʼE hā feafeaʼi ia te laumālie ʼo te mālamanei?

⁶ Koia, tatau aipē peʼe mole natou ʼiloʼi, ko nātou ʼaē ʼe natou maʼu te laumālie ʼo te mālama, ʼe natou tali ke taki e Satana tonatou ʼatamai pea mo tonatou loto, ʼo natou faʼifaʼitakiʼi tana faʼahiga manatu pea mo tana ʼu aga. Koia lā ʼaē ʼe natou fai pē te meʼa ʼaē ʼe natou loto kiai, kae mole natou tokagaʼi ia te finegalo ʼo te ʼAtua. Ko tanatou ʼu aga fuli ʼe fai ʼaki pē te fialahi pea mo te manatu pē ʼaē kiā nātou totonu, ʼo natou agatuʼu ki te ʼu pule, pea mo natou higa tuʼumaʼu ki “te holi ʼo te kakano pea mo te holi ʼo te ʼu mata.”—Lau ia 1 Soane 2:15-17.a

7. He koʼē ʼe tonu ke tou “puipui [totatou] loto”?

⁷ Koia lā ʼaē ʼe maʼuhiga ʼaupitō ai ke tou “puipui [totatou] loto” ʼo tou fakahā te poto fakaʼatua mokā tou filifili hotatou ʼu kaumeʼa, peʼe ko he tohi, peʼe ko he fakafiafia, pea mo te ʼu faʼahi ʼaē ʼe tou vakaʼi ʼi te Itineti! (Taag. 4:23) Neʼe tohi fēnei e te ʼapositolo ko Paulo: “Kotou tōkakaga, heʼe lagi feala ke ʼi ai he tahi ʼe ina toho anai koutou ki he hele, ʼaki te filosofia pea mo te ʼu kākā ʼaē ʼe vaʼiganoa, ʼo mulimuli ki te talatuku fakatagata, ʼo mulimuli ki te ʼu meʼa tāfito ʼo te mālamanei, kae mole mulimuli kiā Kilisito.” (Kol. 2:8) ʼE toe ʼāsili maʼuhiga ia te tokoni ʼaia ʼi te kua ovi mai ʼo te ʼaho ʼo Sehova, heʼe ko te ʼaho maʼuhiga ʼaia ʼe fakatatau ki te ‘kakaha’ ʼaē kā ina fakahuhuʼa anai “te ʼu meʼa” fuli ʼo te tuʼu ʼa Satana, ʼo hā lelei ai tanatou mole lava talitali ʼaē ia te hauhau ʼo te ʼAtua. ʼE tou manatuʼi ai te ʼu palalau ʼaē iā Malakia 4:1: “ ʼE hoko mai te ʼaho ʼaē ʼe vela ohagē ko he gutuʼumu, pea ko nātou fuli ʼaē ʼe fialahi pea mo nātou fuli ʼaē ʼe natou fai te agakovi ʼe natou liliu anai ohagē ko he mohuku. Pea ko te ʼaho ʼaia ʼe hoko mai ʼe ina tutu anai ia nātou.”

“Ko Te Kele Pea Mo Te ʼu Gāue ʼAē ʼe Fai ʼi Ai ʼe Hā Anai”

8. ʼE “hā” feafeaʼi te kele pea mo te ʼu gāue ʼaē ʼe fai ai?

⁸ Koteā te fakaʼuhiga ʼo te tohi ʼaē e Petelo “ko te kele pea mo te ʼu gāue ʼaē ʼe fai ʼi ai ʼe hā anai”? Ko te kupu “hā” ʼe toe feala ke fakaliliu ʼaki te kupu “maʼu” peʼe “tuku ʼātea.” Neʼe fia ʼui e Petelo, ʼi te lolotoga ʼo te mamahi lahi, ʼe haga anai ia Sehova ʼo fakaʼasi te ʼuhiga moʼoni ʼo te mālama ʼa Satana, ʼe ko nātou ʼaē ʼe natou faʼufaʼu te mālama ʼaia ʼe natou fakafeagai kiā te Ia pea mo Tona Puleʼaga, pea ko te tupuʼaga lā ʼaia ʼe tonu ai ke ina fakaʼauha nātou. ʼI te lea fakakikite neʼe fai ʼo ʼuhiga mo te temi ʼaia, ʼe tou lau fēnei iā Isaia 26:21: “Ko Sehova ʼe hū mai tona koga meʼa ʼo fakafihiʼi te hala ʼo ia ʼaē ʼe nofo ʼi te fenua pea mo fakafeagai kiā ia, pea ʼe mahino papau ia ko te fenua ʼe ina fakahā anai tana ʼu ligitoto pea ʼe mole toe ina ʼuʼufi anai tana ʼu mate.”

9. (a) Koteā ʼaē ʼe tonu ke tou tōkakaga kiai, pea koteā tona tupuʼaga? (b) Koteā ʼaē ʼe tonu ke tou maʼuliʼi, pea koteā tona tupuʼaga?

⁹ ʼI te ʼaho ʼo Sehova, ko nātou ʼaē neʼe natou maʼu te laumālie ʼo te mālamanei ʼe natou fakahā anai tonatou ʼuhiga moʼoni, ʼo lagi natou fematematehiʼaki. ʼI tona fakahagatonu, ko te ʼu fakafiafia agamālohi ʼaē ʼe manako ʼaupitō kiai te hahaʼi ʼo te temi ʼaenī, ʼe lagi natou faʼufaʼu te ʼatamai ʼa te tokolahi ki te temi ʼaē kā natou ‘hiki anai tonatou nima ki tonatou kaumeʼa.’ (Sakl. 14:13) Koia ʼe maʼuhiga ai ke tou tōkakaga ki te ʼu ʼata, mo te ʼu tohi, mo te ʼu gaoʼi viteo, pea mo te ʼu gāue fuli ʼaē ʼe feala ke fakatupu iā tātou te fialahi pea mo te manako ki te agamālohi, ʼaē ko he ʼu aga ʼe fehiʼa kiai te ʼAtua! (2 Sam. 22:28; Pes. 11:5) Kae tou maʼuliʼi te fua ʼo te laumālie ʼo te ʼAtua, he ko te ʼu kalitātē ʼaia ʼe mole feala ke pulihi ʼi te ʼaho ʼo Sehova ʼaē ʼe fakatatau ki he hauhau kakaha.—Kal. 5:22, 23.

Ko Te “ ʼu Lagi Foʼou Pea Mo Te Kele Foʼou”

10, 11. Koteā koa ia te fakaʼuhiga ʼo te “ ʼu lagi foʼou” pea mo te “kele foʼou”?

¹⁰ Lau ia 2 Petelo 3:13. Ko te “ ʼu lagi foʼou” ʼe ko te Puleʼaga ʼo te ʼAtua ʼaē ʼe ʼi selō, ʼaē neʼe fakatuʼu ʼi te taʼu 1914 ʼi te temi ʼaē neʼe fakaʼosi ai “te ʼu temi ʼaē kua fakakatofa ki te ʼu puleʼaga.” (Luka 21:24) Ko te puleʼaga hau ʼaia ʼe kau ai ia Kilisito Sesu pea mo tona ʼu kaugā hau e toko 144 000, pea ko te tokolahi iā nātou ʼaia kua natou tali tonatou fakapale ʼaē ki selō. ʼI te tohi ʼo te Fakahā, ko te kau fakanofo ʼaia ʼe fakatātā nātou ki “te kolo tapu, te Selusalemi Foʼou, ʼe hifo ifo mai te lagi mai te ʼAtua, pea kua teuteuʼi ohagē ko he fafine ʼohoana kua fakamataleleiʼi ki tona ʼohoana.” (Fakh. 21:1, 2, 22-24) Ohagē pē ko te kolo ʼo Selusalemi ʼaē neʼe ko te potu neʼe fakatuʼu ai te puleʼaga ʼo te Iselaele ʼāfea, ʼo toe fēia aipē mo te Selusalemi Foʼou pea mo tona ʼOhoana Tagata fakatātā ʼe nā faʼufaʼu ia te puleʼaga ʼo te ʼu faʼahiga meʼa ʼo te tuʼu foʼou. Ko te kolo ʼaia ʼe ʼi selō ʼe ‘hifo ifo anai mai te lagi,’ ko tona fakaʼuhiga ʼe tokaga mai anai ia ki te ʼu meʼa ʼaē ʼi te kele.

¹¹ Ko te “kele foʼou” ʼe fakaʼuhiga ki te hahaʼi foʼou ʼo te kele ʼaē kā natou fakahā anai ia tanatou fakalogo ʼaē ki te Puleʼaga ʼo te ʼAtua. Ko te palatiso fakalaumālie ʼaē kua nofo nei ʼi ai te hahaʼi ʼa te ʼAtua, ʼe liliu anai ko he palatiso moʼoni ʼi te “kele ʼaē kā nofoʼi [e te hahaʼi] ʼi te kā haʼu.” (Hep. 2:5) ʼE feafeaʼi hatatou lava kau ʼi te ʼu faʼahiga meʼa ʼo te tuʼu foʼou ʼaia?

Tou Nofo Teuteu Ki Te ʼAho Lahi ʼo Sehova

12. He koʼē ʼe fakamataku anai te hoko mai ʼo te ʼaho ʼo Sehova ki te mālama ʼaenī?

¹² Ko Paulo pea mo Petelo neʼe nā fakakikite ʼe hoko fakapunamaʼuli mai anai te ʼaho ʼo Sehova, “ohagē ko he tagata kaihaʼa” (Lau ia 1 Tesalonika 5:1, 2.) Māʼia mo te kau Kilisitiano moʼoni ʼaē ʼe natou fakatalitali ki te ʼaho ʼaia, ʼe natou punamaʼuli anai ʼi te vave ʼaē ʼo tona hoko mai. (Mat. 24:44) Kae ko te hahaʼi ʼo te mālama, ʼe mole gata pē anai ʼi tanatou punamaʼuli, ʼe toe kovi age anai ia kiā nātou ʼi te temi ʼaia, he neʼe tohi fēnei e Paulo: “Kā natou [te hahaʼi ʼaē ʼe māʼuʼuli ʼo mamaʼo ʼi te ʼAtua] ʼui anai: ‘Tokalelei pea mo fīmālie!’ pea ʼe tonu anai ke hoko fakafokifā he fakaʼauha kiā nātou, ohagē ko te ʼu nunuʼa ʼo te tuʼania ki te fafine faitama; pea ʼe mole natou hao anai.”—1 Tes. 5:3.

13. Koteā ʼaē ʼe feala ke tou fai ke ʼaua naʼa tou tō ki te loi ʼaē ʼo ʼuhiga mo te kalaga “Tokalelei pea mo fīmālie!”?

¹³ Ko te kalaga ʼaē ko te “Tokalelei pea mo fīmālie!” ʼe ko he tahi pē ʼaia loi ʼe fai anai e te kau temonio, kae mole tui anai kiai te ʼu kaugana ʼa Sehova. Neʼe tohi fēnei e Paulo: “ ʼE mole kotou nonofo ʼi te fakapōʼuli, ke maʼutokā koutou e te ʼaho ʼaia ohagē ko hana maʼutokā anai he kau kaihaʼa, koteʼuhi ko koutou fuli ko te ʼu foha ʼo te mālama pea mo te ʼu foha ʼo te ʼaho.” (1 Tes. 5:4, 5) Koia tou nonofo ʼi te mālama, ʼo mamaʼo ʼi te fakapōʼuli ʼo te tuʼu ʼa Satana. Neʼe tohi fēnei e Petelo: “ ʼU ʼofaina, ʼaē kua kotou ʼiloʼi fakatomuʼa te faʼahi ʼaia, kotou nonofo tōkakaga, naʼa taki koutou mo nātou ʼaia [te kau faiako loi ʼi te kōkelekāsio] ʼi te hala ʼo te hahaʼi ʼaē ʼe natou meʼa noaʼi te lao pea ke ʼaua naʼa kotou hehē mai takotou tutuʼu mālohi.”—2 Pet. 3:17.

14, 15. (a) ʼE fakahā feafeaʼi e Sehova ia tana fakaʼapaʼapa ʼaē kiā tātou? (b) Koteā te ʼu palalau Fakatohi-tapu ʼaē ʼe tonu ke tou tokaga lelei kiai?

¹⁴ Kotou fakatokagaʼi, ko Sehova ʼe mole gata pē ʼi tana ʼui mai ʼaē ke tou “nonofo tōkakaga,” ʼo mole ina tuku mai he tahi ʼu fakamahino. Kae ʼe fakaʼapaʼapa kiā tātou ʼo ina foaki mai ke tou “ ʼiloʼi fakatomuʼa” ia te ʼu meʼa tāfito ʼaē ʼe tonu ke hoko ʼi te kā haʼu.

¹⁵ Meʼa fakaʼofaʼofa foki, heʼe meʼa noaʼi e ʼihi te ʼu fakatokaga ʼaē ke tou nonofo tōkakaga. ʼE natou ʼui fēia: “Kua lauʼi taʼu tamatou logo ki te ʼu fakamanatu ʼaia.” Kae ʼe tonu ke mahino kiā nātou, ko tanatou ʼu palalau ʼaia ʼe hā ai tanatou lotolotolua ʼo ʼuhiga mo te kalasi ʼo te tagata kaugana agatonu, pea mo tanatou lotolotolua foki ʼo ʼuhiga mo Sehova totonu pea mo tona ʼAlo. Neʼe ʼui fēnei e Sehova: “Haga talitali.” (Hap. 2:3) ʼO toe fēia aipē mo Sesu, neʼe ina fai te tokoni ʼaenī: “Ke kotou nonofo ʼalaʼala, heʼe mole kotou ʼiloʼi pe ko te ʼaho fea ʼaē ʼe haʼu ai tokotou ʼAliki.” (Mat. 24:42) Pea neʼe toe ʼui fēnei e Petelo: “Ko te ʼu faʼahiga tagata feafeaʼi anai ia koutou ʼi te aga fakamāʼoniʼoni pea mo te ʼu gāue ʼaē ʼe fakaʼiloga ʼaki takotou pipiki ki te ʼAtua, ʼo talitali pea mo kotou taupau lelei ʼi tokotou ʼatamai te hoko mai ʼo te ʼaho ʼo Sehova.” (2 Pet. 3:11, 12) Mole feala anai ʼi he temi ke meʼa noaʼi e te tagata kaugana agatonu pea mo te Kolesi Pule ia te ʼu palalau maʼuhiga ʼaia!

16. Koteā te faʼahiga aga ʼaē ʼe tonu ke tou tekeʼi, pea koteā tona tupuʼaga?

¹⁶ ʼE mahino ia, ʼe ko te “tagata kaugana agakovi” ʼaē ʼe ina ʼui ʼe tuai mai te Pule. (Mat. 24:48) Ko te kaugana agakovi ʼaia ʼe kau ʼi te kūtuga ʼaē ʼe talanoa kiai iā 2 Petelo 3:3, 4. Neʼe ʼui e Petelo, “ ʼi te ʼu ʼaho fakaʼosi ʼe ʼomai anai te kau vāvā” ʼaē ʼe “natou haʼele ʼo mulimuli pē ki tonatou ʼu holi,” ʼo natou manukiʼi ia nātou ʼaē ʼe fakalogo ki te fakatokaga ʼaē ke natou haga manatuʼi tuʼumaʼu te ʼaho ʼo Sehova. ʼEī, ʼe mole natou tokagaʼi te ʼu meʼa ʼo te Puleʼaga, kae ko te kau vāvā ʼaia ʼe natou tokaga pē ki te ʼu meʼa ʼaē ʼe natou holi kiai. Ke ʼaua naʼa tou liliu ʼi he temi ʼo maʼu ia te taʼi talagataʼa ʼaia heʼe fakatupu tuʼutāmaki anai kiā tātou totonu pē! Kae tou “fakaʼuhiga te kātaki fualoa ʼa totatou ʼAliki ko he fakamaʼuli ʼo tātou,” ʼo tou maʼumaʼua ʼi te fakamafola ʼo te Puleʼaga pea mo te fai ʼo ni ʼu tisipulo, pea ʼaua naʼa tou tuʼaniaʼi fau te ʼu meʼa ʼaē kā hoko mai, heʼe fakalogo te faʼahi ʼaia kiā Sehova.—2 Pet. 3:15; lau ia Gāue 1:6, 7.

Tou Falala Ki Te ʼAtua ʼo Te Fakamaʼuli

17. Neʼe feafeaʼi te tali ʼa te kau Kilisitiano agatonu ki te fakatotonu ʼa Sesu ke natou feholaki mai Selusalemi, pea koteā tona tupuʼaga?

¹⁷ ʼI te taʼu 66 ʼo totatou temi, ʼi te kua ʼosi ʼohofiʼi ʼo Sutea e te ʼu kautau Loma, neʼe fakalogo te kau Kilisitiano agatonu ki te fakatotonu ʼaē ʼa Sesu ke natou foimo feholaki mai Selusalemi ʼi te temi pē ʼaē kā natou maʼu ai he fealagia ke natou mavae mai ai. (Luka 21:20-23) He koʼē neʼe natou lotomālohi ʼo foimo fakalogo ki te fakatotonu ʼaia? ʼE mahino ia, neʼe natou manatuʼi tuʼumaʼu pē ia te fakatotonu ʼaē ʼa Sesu. ʼE moʼoni, neʼe natou ʼiloʼi ko te tonu ʼaia kā natou fai, ʼe iku anai ki he ʼu fihifihia, ohagē ko tona fakakikite e Sesu. Kae neʼe toe mahino kiā nātou, ʼe mole sītuʼa anai ia Sehova ki tana ʼu kaugana agatonu.—Pes. 55:22.

18. ʼAki te ʼu palalau ʼa Sesu ʼaē iā Luka 21:25-28, koteā takotou manatu ki te toe mamahi lahi ʼaē kua vave hoko mai?

¹⁸ Mo tātou foki, ʼe maʼua ke tou falala kātoa kiā Sehova, heʼe ko ia tokotahi pē ʼaē kā ina fakamaʼuli anai tātou mokā hoko te toe mamahi lahi neʼe mole heʼeki hoko ʼi te hisitolia fakatagata ki te tuʼu ʼaenī. Hili kiai he kiʼi temi ʼi te kua ʼosi kamata ʼo te toe mamahi lahi, kae iā muʼa ʼo te fakahoko e Sehova ia tana fakamāu ki te hahaʼi ʼo te kele kātoa, ko te hahaʼi ʼe natou “matapopō anai . . . ʼi tonatou mātataku pea ʼuhi ko te talitali ʼaē ki te ʼu meʼa kā hoko mai ki te kele kātoa.” Kae ʼi te lolotoga mātataku ʼa te kau fili ʼo te ʼAtua, ʼe mole tuʼania anai te ʼu kaugana agatonu ʼa Sehova, kailoa, heʼe natou ʼiloʼi anai kua ovi mai tonatou fakamaʼuli.—Lau ia Luka 21:25-28.

19. Koteā ʼaē kā tou vakaʼi anai ʼi te ʼalatike kā hoa mai?

¹⁹ ʼEī, ko he kā haʼu fakafiafia ʼe ʼamanaki hoko mai kiā nātou ʼaē ʼe natou nofo mamaʼo ʼi te mālama ʼaenī pea mo tana “ ʼu meʼa”! Ohagē ko te ʼu manatu ʼaē kā tou vakaʼi anai ʼi te ʼalatike kā hoa mai, kapau ʼe tou fia maʼuli, pea ʼe mole feʼauga pē hatatou tekeʼi te ʼu meʼa ʼaē ʼe kovi. ʼE maʼua ke tou maʼuliʼi he ʼu kalitātē ʼe leleiʼia e Sehova pea mo fai he ʼu gāue ʼe ina tali lelei.—2 Pet. 3:11.

[Nota]

ʼE Feala Koa Hakotou Fakamahino?

• Koteā te fakaʼuhiga fakatātā . . .

ʼo te ‘ ʼu lagi pea mo te kele’ ʼo te temi ʼaenī?

ʼo “te ʼu meʼa”?

ʼo te “ ʼu lagi foʼou pea mo te kele foʼou”?

• He koʼē ʼe tou falala kātoa ki te ʼAtua?

[Paki ʼo te pasina 13]

ʼE feafeaʼi takotou ‘puipui ia tokotou loto’ pea mo nofo mamaʼo ʼi te mālama ʼaenī?

[Paki ʼo te pasina 14]

ʼE tou fakahā feafeaʼi anai ʼe tou “fakaʼuhiga te kātaki fualoa ʼo totatou ʼAliki ko he fakamaʼuli ʼo tātou”?