Kotou Nonofo ʼAlaʼala Ohagē Ko Selemia
“[Ko au Sehova] ʼe au nofo ʼalaʼala ʼo ʼuhiga mo taku folafola, ke au fakahoko.”—SEL. 1:12.
1, 2. He koʼē ʼe fakatatau te “nofo ʼalaʼala” ʼa Sehova ki te fuʼu alimoni?
ʼI TE māhina ʼo Sānualio pea mo Fepualio, ʼe momoko te ʼu fenua ʼo Lipania pea mo Iselaele. I te temi ʼaia, ʼe mole heʼeki mātala te ʼu fisiʼi teu ʼo te ʼu fuʼu ʼakau, gata pē ki te fuʼu alimoni. ʼE ko te fuʼu ʼakau ʼaia ʼaē ʼe ʼuluaki mātala ʼi muʼa ʼo te temi māfana. Koia lā ʼaē ko te fakaʼuhiga ʼo te kupu alimoni ʼi te Fakahepeleo ʼe “ko ia ʼaē ʼe ʼala ake.”
2 ʼI te temi ʼaē neʼe hinoʼi ai e Sehova ia Selemia ko tana polofetā, neʼe tō tonu ia tana fakaʼaogaʼi ʼaē ʼo te agaaga ʼaia ʼo te fuʼu alimoni moʼo fakatā ʼaki te faʼahi ʼe maʼuhiga. ʼI te kamata ʼo tana minisitelio, neʼe fakahā age ki te polofetā te kiʼi vaʼa alimoni. Neʼe koteā te fakaʼuhiga ʼo te kiʼi vaʼa alimoni ʼaia? Neʼe fakamahino fēnei e Sehova: “ ʼE au nofo ʼalaʼala ʼo ʼuhiga mo taku folafola, ke au fakahoko.” (Sel. 1:11, 12) Ohagē pē ko te ‘ ʼala ake,’ peʼe ko te mātala tautonu ake ʼo te fuʼu alimoni, ʼe toe fēia mo Sehova ʼi hona ʼaluʼaga fakatātā, neʼe “ ʼalaʼala ʼuhuʼuhu ake” moʼo fekauʼi ia tana ʼu polofetā ke natou ʼolo ʼo fakahā ki tana hahaʼi te ʼu meʼa ʼaē kā hoko ʼuhi ko tanatou talagataʼa ki tana ʼu lao. (Sel. 7:25) Pea ʼe mole mālōlō anai ia, ʼe “nofo ʼalaʼala” anai ia ʼo aʼu ki te temi ʼaē kā hoko kātoa ai anai ia tana lea fakapolofetā. ʼI te taʼu 607 ʼi muʼa ʼo totatou temi, ʼi tona temi totonu ʼaē neʼe kua fakakatofa, neʼe hoko te tautea ʼaē ʼa Sehova ki te puleʼaga ʼapositā ʼo Suta.
3. Koteā ʼaē ʼe feala ke tou tui papau ʼe fakahoko moʼoni anai e Sehova?
3 ʼE toe fēia iā ʼaho nei, ʼe nofo ʼalaʼala ia Sehova, ʼe tokaga ia ki te fakahoko ʼaē ʼo tona finegalo. ʼE mole feafeala ke ina meʼa noaʼi te fakahoko ʼaē ʼo tana folafola. ʼE malave feafeaʼi kiā koutou te nofo tokaga ʼaē ʼa Sehova? ʼI takotou manatu, ʼi te taʼu 2011 ʼaenī, ʼe “nofo ʼalaʼala” koa ia Sehova moʼo fakahoko ia tana ʼu fakapapau? Kapau ʼe tou lotolotolua ki te hoko moʼoni ʼaē ʼo te ʼu fakapapau ʼa Sehova, pea ʼe ko te temi ʼaenī ke tou ʼalaʼala ai mai tatatou māʼumoea fakalaumālie. (Loma 13:11) ʼI tona ʼuhiga polofetā ʼa Sehova, neʼe nofo ʼalaʼala ia Selemia. Ko tatatou vakavakaʼi ʼaē pe neʼe koteā ʼaē neʼe tokoni kiā Selemia ke nofo ʼalaʼala ai moʼo fakahoko te gāue ʼaē neʼe tuku age e te ʼAtua, pea mo te tupuʼaga ʼaē ʼo tana fai ia te faʼahi ʼaia, ʼe tokoni mai anai kiā tātou ke tou faʼa kātaki ʼi te gāue ʼaē neʼe tuku mai e Sehova ke tou fakahoko.
Ko He Logo Maʼuhiga
4. Koteā te ʼu faigataʼaʼia ʼaē neʼe tau mo Selemia ʼi te temi ʼaē neʼe ina tala ai ia tana logo, pea he koʼē neʼe maʼuhiga ia te logo ʼaia?
4 Neʼe lagi kua taʼu 25 ia Selemia ʼi te temi ʼaē neʼe fakatotonu age ai e Sehova ke liliu ko he tagata leʼo. (Sel. 1:1, 2) Kae ʼi tana ia manatu neʼe kei tamasiʼi fau, neʼe mole poto ia ʼi te palalau ki te ʼu tagata ʼāfea ʼo te puleʼaga, ʼaē neʼe ko te ʼu tagata kua mātutuʼa pea mo maʼu tuʼulaga. (Sel. 1:6) Neʼe tonu ke ina tala te ʼu fakamāu kona pea mo fakamataku, tāfito ki te kau pelepitelō, mo te ʼu polofetā loi, pea mo te ʼu hau, ʼo toe fēia mo nātou ʼaē neʼe haʼele ʼi “te ala ʼaē ʼe ʼolo fuli ai te hahaʼi” pea mo natou “heʼe agatonu tuʼumaʼu pē.” (Sel. 6:13; 8:5, 6) ʼE fakaʼauha anai te fale lotu matalelei ʼo te Hau ko Salomone, ʼaē neʼe ko te tafitoʼaga ʼaia ʼo te tauhi moʼoni talu mai te ʼu sēkulō e fā. ʼE tuʼu lāvaki anai Selusalemi pea mo Suta, pea ko tona hahaʼi ʼe ʼave pōpula anai ki te tahi fenua. ʼE mahino ia, ko te logo ʼaē neʼe fakatotonu age kiā Selemia ke ina tala neʼe maʼuhiga ia!
5, 6. (a) ʼE fakaʼaogaʼi feafeaʼi e Sehova te kūtuga ʼo te kau Kilisitiano fakanofo iā ʼaho nei? (b) Koteā ʼaē kā tou talanoa tāfito anai kiai ʼi tatatou ako ʼaenī?
5 ʼI totatou temi, ʼi tona ʼofa, neʼe fakatuʼutuʼu e Sehova maʼa te mālamanei ia te kūtuga ʼo te kau Kilisitiano fakanofo, ʼaē ʼe natou gāue ohagē ko he tagata leʼo moʼo fakatokaga ki te mālamanei te ʼu fakamāu ʼa te ʼAtua. Talu mai ni ʼu taʼu, ko te kiʼi kūtuga Kilisitiano fakanofo ʼaia, ʼe natou fakalotomālohiʼi te hahaʼi ke natou tokagaʼi te temi ʼaenī ʼe tou māʼuʼuli ai. (Sel. 6:17) ʼE fakahā lelei mai ʼi te Tohi-Tapu ko Sehova, Te Pule Lahi ʼo Te Temi, ʼe mole tuai anai ia. ʼE hoko pē anai tona ʼaho ʼi te temi ʼaē neʼe kua ina fakakatofa kiai, ʼi te hola ʼe mole ʼamanaki kiai te hahaʼi.—Sofo. 3:8; Mko. 13:33; 2 Pet. 3:9, 10.
6 Ko te hahaʼi fuli ʼa Sehova ʼe natou manatuʼi kua vave pē anai ia te haga ʼa Sehova ʼo fakatuʼu ia tona mālama foʼou. Koia ʼe natou ʼiloʼi kua nounou te temi ʼaē ke natou fai fakamafola ai, pea kua tonu ʼi te temi nei ke tala ki te hahaʼi te logo ʼa Sehova. ʼE malave feafeaʼi kiā koutou te faʼahi ʼaia? ʼE mole uga ai koa koutou ke lahi age takotou ʼu faiga ʼaē ki te fai fakamafola? ʼI takotou fai ia te faʼahi ʼaia, ʼe ko he faigamālie anai ʼaia ki te hahaʼi fuli ke natou filifili peʼe natou tauhi kiā Sehova, ohagē ko tona fakahā e Sesu. Tou vakaʼi age muʼa te ʼu kalitātē e tolu ʼaē neʼe tokoni kiā Selemia ke nofo ʼalaʼala moʼo fakahoko tana gāue, pea ʼe toe tokoni mai pē foki anai kiā tātou ke tou fakahoko tatatou ʼu gāue.
Te ʼOfa Ki Te Hahaʼi
7. Kotou fakamahino pe neʼe uga feafeaʼi e te ʼofa ʼaē neʼe maʼu e Selemia ke fai fakamafola logolā te ʼu ʼaluʼaga faigataʼa.
7 Koteā ʼaē neʼe ina uga ia Selemia ke fai fakamafola logolā te ʼu ʼaluʼaga faigataʼa ʼaē neʼe tau mo ia? Neʼe ko tona ʼofa ʼaē ki te hahaʼi. Neʼe mahino kiā Selemia ko te ʼu fihifihia ʼaē neʼe hoko ki te hahaʼi neʼe tupu ʼuhi ko te ʼu tagata tauhi ovi loi. (Sel. 23:1, 2) Neʼe ko tana mahino ki te faʼahi ʼaia ʼaē neʼe tokoni ai kiā ia ke ina fai tana gāue ʼaki te ʼofa pea mo te manavaʼofa. Neʼe loto ia ke logo te hahaʼi ʼo te fenua ki te ʼu folafola ʼa te ʼAtua pea ke natou māʼuʼuli. ʼI te lahi ʼaupitō ʼaē ʼo tana tuʼaniaʼi te faʼahi ʼaia, neʼe tagi ʼo ʼuhiga mo te malaʼia ʼaē neʼe ʼamanaki hoko kiā nātou. (Lau ia Selemia 8:21; 9:1.) ʼE fakahā lelei ʼi te tohi ʼo Tagilāulau te toe ʼofa lahi ʼo Selemia pea mo tana tokaga ʼaē ki te huafa ʼo Sehova pea mo te hahaʼi. (Tagi. 4:6, 9) Kā kotou sisio ki te hahaʼi iā ʼaho nei, ʼe natou “ ʼāhua pea mo mavetevete, ohagē ko he faga ovi ʼe mole honatou tagata tauhi,” ʼe mole kotou fia fakahā koa kiā nātou te logo fakalotofīmālie ʼo te Puleʼaga ʼo te ʼAtua?—Mat. 9:36.
8. Koteā ʼaē ʼe hā ʼaki mai neʼe mole ʼita Selemia logolā te ʼu mamahi ʼaē neʼe fai age kiā ia?
8 Neʼe ko te hahaʼi pē ʼaē neʼe fia tokoni ki ai Selemia ʼaē neʼe natou gaohi koviʼi ia ia, kae neʼe mole ina liufaki age kiā nātou ia tanatou agakovi ʼaia kiā ia peʼe ʼita kiā nātou. Neʼe faʼa kātaki aipē pea mo agalelei kiā nātou, ʼo toe fēia aipē ki te Hau agakovi ko Setesiasi! Logolā te kua ʼosi fakatuʼutuʼu ʼaē e Setesiasi ke matehi ia ia, kae neʼe kolekole age pē e Selemia kiā ia ke fakalogo ki te leʼo ʼo Sehova. (Sel. 38:4, 5, 19, 20) Ko totatou ʼofa ʼaē ki te hahaʼi ʼe mālohi fēia koa ohagē ko Selemia?
Te Lototoʼa ʼAē ʼe Haʼu Mai Te ʼAtua
9. ʼE tou ʼiloʼi feafeaʼi ko te lototoʼa ʼaē neʼe maʼu e Selemia neʼe haʼu mai te ʼAtua?
9 ʼI te ʼuluaki palalau age ʼa Sehova kiā Selemia, neʼe fia maʼu takuʼaki ia Selemia ke mole ina fakahoko tana gāue. ʼE hā mai ai, neʼe mole heʼeki maʼu e Selemia ʼi te temi ʼaia ia te lototoʼa pea mo te mālohi ʼaē neʼe ina maʼu ki muli age leva. Ko te mālohi fakaofoofo ʼaē neʼe maʼu e Selemia ʼi tana gāue fakapolofetā, neʼe haʼu tāfito ia mai tana falala kātoa ʼaē ki te ʼAtua. ʼEī, ko Sehova neʼe nofo mo te polofetā “ohagē ko he tagata mālohi pea mo fakamatakutaku” he neʼe tokoni kiā Selemia pea mo ina foaki age kiā ia te mālohi ʼaē moʼo fakahoko ia tana gāue. (Sel. 20:11) Neʼe logona ʼaupitō te lotomālohi pea mo te lototoʼa ʼa Selemia, koia lā ʼaē neʼe manatu ai ʼihi ʼi te temi ʼaē neʼe fakahoko ai e Sesu ia tana minisitelio ʼi te kele, neʼe ko Selemia ʼaē kua fakatuʼuake!—Mat. 16:13, 14.
10. He koʼē ʼe feala ke kita ʼui ko te toe ʼo te kau fakanofo ʼe ‘natou pule ki te ʼu fenua pea mo te ʼu puleʼaga’?
10 ʼI tona ʼuhiga “Hau ʼo te ʼu fenua,” neʼe fakatotonu e Sehova ke tala e Selemia te logo ʼo te fakamāu ki te ʼu fenua pea mo te ʼu puleʼaga. (Sel. 10:6, 7) Kae koteā te fakaʼuhiga ʼo te ʼui ʼaē ko te toe ʼo te kau fakanofo ʼe “natou pule ki te ʼu fenua pea mo te ʼu puleʼaga”? (Sel. 1:10) Ohagē ko te polofetā ʼo te temi muʼa, neʼe ko te Tuʼi ʼAliki ʼo te ʼatulaulau ʼaē neʼe ina fakatotonu age ki te kūtuga ʼo te kau Kilisitiano fakanofo ia te gāue. Koia ʼe fakagafua ai ki te ʼu kaugana fakanofo ʼa te ʼAtua ke natou tala ʼi te mālamanei te ʼu fakamāu ki te ʼu fenua pea mo te ʼu puleʼaga. ʼI tanatou kua maʼu te fakagafua mai te ʼAtua Māfimāfi pea mo natou fakaʼaogaʼi tana Folafola ʼaē ʼe faigafua pē hakita mahino kiai, ʼe tala e te toe ʼo te kau fakanofo ko te ʼu fenua pea mo te ʼu puleʼaga ʼo totatou temi ʼe taʼaki anai pea mo fakaʼauha anai. ʼE fakaʼaluʼalu te fakaʼauha ʼaia ʼo mulimuli pē ki te ʼu puleʼaki ʼaē kua filifili e Sehova moʼona fakahoko. (Sel. 18:7-10; Fakh. 11:18) ʼE lotomālohi te toe ʼo te kau fakanofo ke ʼaua naʼa natou fakatuatuai ʼi tanatou fakahoko ia te gāue ʼaē neʼe fakatotonu age e te ʼAtua, ʼaē ko te tala ia te ʼu fakamāu ʼa Sehova ʼi te kele kātoa.
11. Koteā ʼaē kā tokoni mai ke hoko atu pē ia tatatou fai fakamafola ʼi te temi ʼaē ʼe tou tau ai mo he ʼu faigataʼaʼia?
11 ʼE feala pē ʼi ʼihi temi ke tou lotovaivai ʼuhi ko te fakafeagai, peʼe ko te mole fia logo ʼa te hahaʼi, peʼe ko he ʼu ʼaluʼaga faigataʼa. (2 Ko. 1:8) Kae ohagē pē ko Selemia, tou kātaki ʼo hoko atu tatatou gāue. ʼAua naʼa tou tuku ke hoholo atu tatatou lotovaivai. ʼOfa pē ke tou tahi haga kole mamahi ki te ʼAtua, mo falala kiā te ia, pea mo ‘maʼu te lototoʼa’ pea mo tou kole kiā te ia ke tokoni mai. (1 Tes. 2:2) ʼI totatou ʼuhiga kau ʼatolasio moʼoni, ʼe tonu ke tou haga nonofo ʼalaʼala ʼo fakahoko totatou ʼu maʼua ʼaē neʼe tuku mai e te ʼAtua. ʼE tonu ke tou lotomālohi ʼo fakamafola ʼi te temi fuli pē ia te fakaʼauha ʼo te Keletiate, ʼaē neʼe fakatā ʼaki te fakaʼauha ʼo Selusalemi ʼaē neʼe mole nofo agatonu. ʼE mole gata pē ia te lototoʼa ʼa te toe ʼo te kau fakanofo ʼi tanatou tala ʼaē ʼo “te taʼu manavaʼofa ʼo Sehova,” kae ʼe natou toe lototoʼa ʼi te tala ʼo “te ʼaho lagavaka ʼo totatou ʼAtua.”—Isa. 61:1, 2; 2 Ko. 6:2.
Te Fiafia ʼo Te Loto
12. He koʼē ʼe feala ke tou ʼui ko Selemia neʼe ina taupau tona loto fiafia, pea koteā ʼaē neʼe fiafia tāfito ai?
12 Neʼe fiafia Selemia ʼi te fakahoko ʼo tana gāue. Neʼe ina ʼui fēnei kiā Sehova: “Neʼe maʼu tau ʼu folafola, pea neʼe au loto ke au kai [tau ʼu folafola]; pea ko tau folafola kua liliu kiā te au ko he fiafia lahi pea mo he fiafia ʼo toku loto; he neʼe toʼo tou huafa kiā au, Ê Sehova.” (Sel. 15:16) Maʼa Selemia, neʼe ko he pilivilēsio tana fakafofoga ia te ʼAtua moʼoni pea mo fakamafola tana folafola. ʼE maʼuhiga te manatu ʼaenī: ʼi te temi ʼaē neʼe tokagaʼi ai e Selemia ia tona manukinukiʼi ʼaē e te hahaʼi, neʼe mole kei fiafia ia. Kae ʼi te temi ʼaē neʼe tokaga ai ki te matalelei pea mo te maʼuhiga ʼo te logo ʼaē neʼe ina tala, neʼe ina toe maʼu tona fiafia.—Sel. 20:8, 9.
13. Ke tou taupau tatatou fiafia, he koʼē ʼe maʼuhiga ke tou fafaga ia totatou loto ʼaki te ʼu moʼoni loloto ʼo te Folafola ʼa te ʼAtua?
13 Ke tou taupau tatatou fiafia iā ʼaho nei ʼi tatatou gāue fai fakamafola, ʼe ʼaoga ke tou fafaga ia totatou loto ʼaki “te meʼa kai fefeka,” ʼaē ko te ʼu moʼoni loloto ʼo te Folafola ʼa te ʼAtua. (Hep. 5:14) Ko he ako Fakatohi-tapu ʼe loloto ʼe ina fakamālohiʼi te tui. (Kol. 2:6, 7) ʼE ina uga ai tātou ke tou fai te ʼu gāue ʼaē ʼe malave moʼoni ki te loto ʼo Sehova. Kapau ʼe tou lolotoga faiga nei ke tou maʼu he temi moʼo lau pea mo ako te Tohi-Tapu, pea ʼe lelei ke tou toe vakavakaʼi tatatou polokalama. Tatau aipē peʼe ko he ʼu kiʼi minuta ʼi te ʼaho fuli, ʼe tou ako pea mo metitāsio ai ia te Folafola, kae ʼe ko he fakatuʼutuʼu kā ina fakafealagia anai kiā tātou ke lahi age ia tatatou fakaovi ʼaē kiā Sehova pea mo tokoni kiā tātou ke tou ‘fakafiafia lahi age pea mo tou loto fiafia,’ ohagē ko Selemia.
14, 15. (a) Neʼe koteā te ʼu fua ʼo te gāue ʼa Selemia ʼi tana agatonu ʼaē ʼo fakahoko fakalelei ʼo tana gāue? (b) Iā ʼaho nei, koteā ʼaē kua mahino kiai ia te hahaʼi ʼa te ʼAtua ʼo ʼuhiga mo te gāue fai fakamafola?
14 Neʼe tonu ke tala tuʼumaʼu e Selemia te ʼu fakatokaga pea mo te ʼu fakamāu ʼa Sehova, “ke ina taʼaki pea mo maumauʼi, ke ina fakaʼauha pea mo holoʼi” kae neʼe toe tokaga pē foki ke ina fakahoko tona fekauʼi ʼaē ke ina “laga pea mo tō.” (Sel. 1:10) Neʼe ʼi ai te ʼu fua ʼo tana gāue ʼaia, heʼe ko ʼihi Sutea, ʼo fēia mo te hahaʼi ʼaē neʼe mole ko he kau Iselaele, neʼe natou hao ʼi te fakaʼauha ʼaē ʼo Selusalemi ʼi te taʼu 607 ʼi muʼa ʼo totatou temi. Iā nātou ʼaē neʼe hao neʼe kau ai ia te kau Lekapite, mo Epeti-Meleki, pea mo Paluke. (Sel. 35:19; 39:15-18; 43:5-7) Ko te ʼu kaumeʼa agatonu ʼaia ʼo Selemia ʼaē neʼe natou manavasiʼi ki te ʼAtua, ʼe natou fakatā lelei ia nātou ʼaē, iā ʼaho nei, ʼe natou maʼu te ʼamanaki ʼaē ke natou māʼuʼuli ʼi te kele, pea ʼe natou kaumeʼa mo te toe ʼo te kau fakanofo. ʼE fiafia ʼaupitō te toe ʼo te kau fakanofo ʼi tanatou lagalaga ʼi te faʼahi fakalaumālie ia te tui ʼa te “hahaʼi tokolahi” ʼaia. (Fakh. 7:9) ʼO toe fēia pē, ko te ʼu kaumeʼa agatonu ʼaia ʼo te kau Kilisitiano fakanofo, ʼe natou fiafia ʼaupitō ʼi tanatou tokoni ki te hahaʼi ʼaē ʼe natou faiga fakamālotoloto ke natou maʼu ia te ʼatamai mālama ʼo te moʼoni.
15 ʼE mahino ki te hahaʼi ʼa te ʼAtua ko te fakamafola ʼo te logo lelei ʼe mole ko he tokoni pē ʼe tou fai ki te hahaʼi ʼaē ʼe natou fia logo kiai, kae ʼe ko tatatou toe tauhi ʼaia ki totatou ʼAtua. Peʼe tou maʼu peʼe kailoa he tahi ʼe fia logo, kae ko tatatou tauhi taputapu kiā Sehova ʼaki tatatou fai fakamafola ʼe fakatupu fiafia lahi kiā tātou.—Pes. 71:23; lau ia Loma 1:9.
‘Kotou Nonofo ʼAlaʼala’ Moʼo Fakahoko Takotou Gāue!
16, 17. ʼE fakahā feafeaʼi iā Fakahā 17:10 pea mo Hapakuke 2:3 te maʼuhiga ʼaē ʼo te ʼu temi ʼaenī ʼe tou māʼuʼuli ai?
16 ʼE maʼuhiga ʼaupitō te temi ʼaenī ʼe tou māʼuʼuli ai mokā ʼe tou vakavakaʼi fakalelei ia te lea fakapolofetā ʼa te ʼAtua, ʼaē iā Fakahā 17:10. Ko te fitu hau, te Mālohi Fakamālamanei ʼo Pilitānia mo Amelika, kua malaga ake. ʼO ʼuhiga mo te mālohi ʼaia, ʼe tou lau fēnei: “ ʼI te temi ʼaē kā haʼu ai [te fitu mālohi fakamālamanei], ʼe nofo anai ʼi he kiʼi temi nounou.” ʼI te temi nei, ko te “kiʼi temi nounou” ʼaia ʼe kua vave ʼosi pē. ʼE foaki mai e te polofetā ko Hapakuke te fakapapau ʼaenī ʼo ʼuhiga mo te fakaʼosi ʼo te tuʼu agakovi ʼaenī: “Ko te meʼa ʼaē neʼe hā ʼe kei tuku ia ki te temi ʼaē neʼe fakakatofa kiai . . . Haga talitali kiai; heʼe hoko moʼoni anai ia. ʼE mole tauhala anai ia.”—Hap. 2:3.
17 Kotou tahi fai te ʼu fehuʼi ʼaenī kiā koutou totonu pē: ‘ ʼE hā moʼoni koa ʼi toku maʼuli ʼe au mahino ki te maʼuhiga ʼo te temi ʼaenī ʼe tou māʼuʼuli ai? ʼI toku faʼahiga maʼuli, ʼe hā ai koa ʼe au tui papau kua ovi mai pē te fakaʼosi? Peʼe hā koa ia ʼi te ʼu tonu ʼaē ʼe au fai pea mo te ʼu meʼa ʼaē ʼe au fakamuʼamuʼa, ʼe mole au tui papau au ʼe kua vave hoko mai te fakaʼosi peʼe au lotolotolua ʼe hoko mai anai te fakaʼosi ʼi he ʼaho?’
18, 19. He koʼē ʼe mole ko te temi ʼaenī ke tou fakamāmālie ai ʼi tatatou gāue?
18 ʼE mole heʼeki ʼosi ia te gāue ʼa te kalasi ʼo te tagata leʼo. (Lau ia Selemia 1:17-19.) ʼE ko he meʼa fakafiafia ia te tutuʼu mālohi ʼaē ʼa te toe ʼo te kau Kilisitiano fakanofo, ohagē ko “he kolona ukamea” pea mo “he kolo mālohi”! ʼE ‘nonoʼo ʼonatou ʼu koga loto ʼaki te moʼoni’ heʼe natou fakafealagia ki te Folafola ʼa te ʼAtua ke ina fakamālohiʼi nātou ʼo aʼu ki tanatou fakaʼosi kātoa ia te gāue ʼaē neʼe tuku age kiā nātou. (Efe. 6:14) ʼAki he toe lotomālohi fēia, ko nātou ʼaē ʼe kau ki te hahaʼi tokolahi, ʼe natou lagolago mālohi ki te toe ʼo te kau fakanofo ʼaki tanatou fakahoko te gāue ʼaē neʼe fakatotonu age e te ʼAtua ke natou fai.
19 ʼE mole ko te temi ʼaenī ke tou fakamāmālie ai ʼi te tala ʼo te Puleʼaga kae ke tou metitāsioʼi ia te fakaʼuhiga ʼo te manatu ʼaē ia Selemia 12:5. (Lau.) Ko tātou fuli ʼe tou tau mo te ʼu fihifihia ʼe tonu ke tou kātakiʼi. Ko tatatou kātakiʼi te ʼu ʼahiʼahi ʼaia ʼo tatatou tui, ʼe feala ke fakatatau ki hatatou lele mo niʼihi ʼi he lele manavā. Kae ʼi te kua ovi mai ʼaē ʼo “te mamahi lahi,” ʼe mahino ia ʼe tou tau anai mo he ʼu fihifihia ʼe lahi age. (Mat. 24:21) ʼI te Tohi-Tapu, kā tou faiga anai ke tou kātakiʼi he ʼu faigataʼaʼia lahi kā ʼamanaki hoko mai, pea ʼe fakatatau ki te faiga lahi ʼa he tahi ke “lele mo te ʼu hōsi.” ʼE maʼua ke kātaki mālohi age he tahi ʼi tana faiga ʼaē ke lele mo te ʼu hōsi. Koia ʼe lelei ai ke tou kātakiʼi iā ʼaho nei te ʼu faigataʼaʼia ʼaē ʼe tau mo tātou, ke feala ai hatatou kātakiʼi te ʼu fihifihia ʼaē kā hoko mai.
20. Koteā ʼaē kua tou fakatotonu mālohi ke tou fai?
20 ʼE feala pē kiā tātou fuli ke tou faʼifaʼitakiʼi ia Selemia, pea mo tou fakahoko fakalelei ia tatatou gāue ʼaē ko te fai fakamafola! Ko te ʼu kalitātē ʼaē neʼe maʼu e Selemia, ʼaē ko te ʼofa, mo te lototoʼa, pea mo te fiafia neʼe tokoni kiā ia ke ina fakahoko agatonu tana minisitelio lolotoga taʼu e 67. Ko te mātala matalelei ʼo te fuʼu alimoni ʼe ina fakamanatuʼi mai ko Sehova ʼe ‘nofo ʼalaʼala’ anai ʼo ʼuhiga mo tana folafola, ke ina fakahoko. Koia ʼe ko he tupuʼaga lelei ʼaia ke tou muliʼi ia te faʼifaʼitaki ʼa Sehova, ʼo tou nonofo ʼalaʼala. Ko Selemia neʼe ‘nofo ʼalaʼala,’ pea ʼe toe feala pē mo tātou ke tou fai te faʼahi ʼaia.
ʼE Kei Kotou Manatuʼi Koa?
• Ko te ʼofa ʼaē neʼe maʼu e Selemia neʼe lava tokoni feafeaʼi kiā ia ke ‘nofo ʼalaʼala’ moʼo fakahoko tana gāue?
• He koʼē ʼe ʼaoga ke tou maʼu ia te lototoʼa ʼaē ʼe haʼu mai te ʼAtua?
• Koteā ʼaē neʼe tokoni kiā Selemia ke ina taupau maʼu ia tana fiafia?
• He koʼē ʼe kotou fia ‘nonofo ʼalaʼala’?
[Paki ʼo te pasina 31]
ʼE hoko atu anai koa takotou fai fakamafola logolā te fakafeagai?