ʼE Tonu Koa Ke ʼIloʼi e Te Fānau Ia Te ʼAtua?

“ ʼE feʼauga pē te lotu ke tupu ai hatatou fefehiʼaʼaki, kae ʼe mole feʼauga ia ke tupu ai hatatou feʼofaʼofaniʼaki.”—KO TE TAGATA FAITOHI PILITĀNIA KO JONATHAN SWIFT.

NEʼE tohi e Swift ia te manatu ʼaia ʼi te ʼu taʼu 1700, kae iā ʼaho nei ko te tokolahi ʼe natou manatu tahi mo ia. ʼI tona fakahagatonu, ko ʼihi ʼe natou tui ʼe mole tonu ke fakagafua age ki te ʼu mātuʼa, ke natou akoʼi tanatou fānau ke natou ʼiloʼi ia te ʼAtua. ʼE natou manatu nātou neʼe mole fua lelei ki te fānau ʼaē neʼe lahilahi ake ʼi he fāmili lotu.

Kiā koutou, ko te manatu fea ʼi te ʼu manatu ʼaenī ʼe fakapotopoto age?

● ʼE mole tonu ke fakagafua age ki te ʼu mātuʼa ke natou akoʼi tanatou fānau ke natou ʼiloʼi ia te ʼAtua.

● ʼE tonu ke talitali te ʼu mātuʼa ke hoki lahilahi ake tanatou fānau, ʼi muʼa ʼo hanatou fai palalau ki te ʼu faʼahi fakalotu mo nātou.

● ʼI te temi ʼaē ʼe kei liliki ai te fānau, ʼe tonu ki te ʼu mātuʼa ke natou akoʼi age kiā nātou te ʼu akonaki ʼaē ʼe natou tui kiai ʼo ʼuhiga mo te ʼAtua. Kae ʼi tanatou kua lalahi ake, ʼe tonu ki te ʼu mātuʼa ke natou fakalotomālohiʼi nātou ke natou fakakaukauʼi te ʼu faʼahi ʼaia e nātou totonu.

● ʼE tonu ki te fānau ke natou tali te ʼu akonaki ʼaē ʼe tui kiai tanatou ʼu mātuʼa, peʼe moʼoni peʼe kailoa.

ʼE Fua Kovi Koa Te Lotu Ki Te Fānau?

ʼE mole loto e he faʼē peʼe ko he tamai ʼofa ke ina fai he meʼa ʼe kovi ki hana tamasiʼi. Kae ʼe lagolago koa te ʼu meʼa ʼaē ʼe hoko, ki te ʼu manatu ʼa te hahaʼi ʼaē ʼe natou tāʼofi te fānau ke natou ʼiloʼi ia te ʼAtua? Talu mai fualoa, ko te ʼu hahaʼi fai kumi neʼe natou sivisivi fakalelei peʼe malave feafeaʼi ki te fānau te ʼu akonaki ʼaē ʼe tui kiai tanatou faʼē peʼe ko tanatou tamai. Koteā ʼaē neʼe natou ako mai tanatou ʼu fekumi?

Neʼe maʼu e te hahaʼi fai kumi ʼe mole fua kovi te lotu, kae ʼe feala ke fua lelei ki te tuputupu ʼa he tamasiʼi. ʼI te taʼu 2008, neʼe tā ʼi te nusipepa (Social Science Research)a te sivi neʼe ʼui fēnei ai: “ ʼAki te lotu neʼe liliu ʼo mālohi age te ʼu felōgoi ʼa te ʼu faʼē mo te ʼu tamai pea mo tanatou fānau.” Neʼe toe ʼui fēnei ʼi te sivi ʼaia: “ ʼE hā mai ko te lotu pea mo te foaki age ki he tahi te ʼu meʼa ʼaē ʼe ʼaoga ki ai ʼi te faʼahi fakalaumālie, ʼe ko he koga maʼuhiga ia ki te maʼuli ʼo te fānau pea ʼe ʼaoga ki te ʼu felōgoi ʼa te fāmili.” Kotou tokagaʼi ʼe tatau te ʼu palalau ʼaia mo te ʼu palalau ʼaenī ʼa Sesu Kilisito: “Fiafia ia nātou ʼaē ʼe natou ʼiloʼi tonatou masiva fakalaumālie.”—Mateo 5:3.

ʼE feafeaʼi ʼo ʼuhiga mo te manatu ʼa ʼihi, ʼaē ʼe tonu ke lalahi ake te fānau ʼi muʼa ʼo hanatou ʼiloʼi ia te ʼAtua pea mo te lotu? ʼE mole natou ʼiloʼi te faʼahi ʼaenī: Ko te ʼatamai ʼa he tamasiʼi ʼe hagē ia ko he pākete ʼe gaʼasi, pea ʼe tonu ke fakafonu. Koia ʼe tonu ki te ʼu mātuʼa ke natou fai he tonu: peʼe fakafonu te “pākete” ʼaia, ʼaē ʼe fakaʼuhiga ki te ʼatamai ʼa he tamasiʼi, ʼi te loto fale ʼaki te ʼu pelesepeto ʼo ʼuhiga mo te aga ʼaē ʼe tonu ke fai pea mo te ʼu akonaki ʼaē ʼe natou manatu ʼe lelei, peʼe natou tuku ki te tuʼuga manatu ʼi tuʼa atu ʼo te loto fale ke fakafonu ʼaki te ʼatamai ʼo te tamasiʼi pea mo tona loto.

Koteā Te Puleʼaki?

Ko te hisitolia ʼe ina fakamoʼoni ʼe feala ki te lotu ke ina fakatuputupu te ʼu manatu fakapalatahi pea mo te fehiʼa. Koia ʼe lava tekeʼi feafeaʼi e te ʼu mātuʼa te meʼa ʼaē neʼe hoko pea neʼe fakamatalatala e Jonathan Swift? ʼE natou lava akoʼi feafeaʼi ki tanatou fānau te ʼu akonaki ʼaē ʼe tokoni age kiā nātou ke natou ʼoʼofa ki te hahaʼi?

Ko tona puleʼaki ʼe maʼu ʼi te ʼu tali ki te ʼu fehuʼi ʼaenī e tolu: (1) Koteā ʼaē ʼe tonu ke ʼiloʼi e te fānau? (2) Ko ai ʼaē ʼe tonu ke ina akoʼi nātou? (3) Koteā te ʼu faʼahiga faiako ʼaē ʼe fua lelei age?

[Nota]