Ko ʼĀfea ʼAē Kā Hoko Ai Anai Ia Te Tau ʼo Halamaketone?

“Nee au sio leva, pea koeni, nee i ai leva he hahai kaugamalie osi, ae nee mole feala ke lau e he tahi, mai te u puleaga fuli, mo te u faahiga [telepī, MN] fuli, mo te u hahai fuli, mo te u lea fuli. . . . nee omai mai te mamahi lahi.”—APOKALIPISI 7:9, 14.

KO MEʼA fuli kua tokalelei ʼi te temi nei ki te tau ʼo Halamaketone. ʼO feafeaʼi?

Kua ʼi ai te kautahi fakamālamanei ʼa te hahaʼi ʼaē ʼe natou tauhi kiā Sehova pea mo natou maʼuliʼi ia te ʼu lēkula māʼoluga Fakatohi-tapu ʼo te aga ʼaē ʼe tonu ke fai. ʼAki te tokoni ʼa te ʼAtua, ko te toko lauʼi miliona mai te ʼu puleʼaga kehekehe, mo te ʼu telepī kehekehe, pea mo te ʼu lea kehekehe, ʼe natou fakatahitahi ohagē ko he foʼi fāmili logotahi ʼe maʼu ai te ʼofa fakatautēhina. Ko te ʼofa fakatautēhina ʼaia ʼe maʼu ʼi te lotolotoiga ʼo te kau Fakamoʼoni ʼa Sehova.—Soane 13:35.

Kua vave fakatahiʼi e Satana ia tana kautau pea mo fakahoko ia tana ʼohofi lahi ki te taʼi tokalelei ʼaia pea ʼe natou hagē anai ko he hahaʼi ʼe mole puipui. (Esekiele 38:8-12; Apokalipisi 16:13, 14, 16) He koʼē ʼe tou ʼiloʼi ʼe hoko moʼoni anai ia te faʼahi ʼaia? ʼE fakahā mai ʼi te Tohi-Tapu ia te ʼu ʼaluʼaga makehe moʼo tokoni mai kiā tātou ke tou mahino peʼe ko ʼāfea ʼaē kā hoko ai anai ia te tau ʼo Halamaketone. Kua lahi ia te ʼu ʼaluʼaga makehe ʼe tou sisio kiai kua lolotoga hoko.

ʼE Kotou Lolotoga Sisio Nei Ki Te Fakahoko ʼo Te ʼu ʼAluʼaga ʼAia

Neʼe fehuʼi age e te ʼu tisipulo ʼa Sesu kiā te ia peʼe feafeaʼi ki te hahaʼi hanatou lava ʼiloʼi ia “te fakaosi o te malamanei.” (Mateo 24:3) Neʼe tali ia Sesu ʼo ina fakahā fakatomuʼa ia te temi ʼaia ʼo ina ʼui “e malaga ake anai he puleaga o fakafegai ki he tahi puleaga, pea mo he puleaga fakahau o fakafehagai ki he tahi puleaga fakahau; pea e i ai anai, i te u kogamea kehekehe, ni hoge mo ni mafuike.” Pea ina toe ʼui fēnei: “Ko te u mea fuli aia ko te kamataaga pe ia o te u mamahi.” (Mateo 24:7, 8) Neʼe fakatatau e te ʼapositolo ko Paulo ia te temi ʼaia ki “te u aho fakamuli,” ʼo ina ʼui ʼo ʼuhiga mo te ʼu ʼaho ʼaia “e i ai anai he u temi mo faigataa, peʼe maʼuhiga ʼaupitō.” (2 Timoteo 3:1) ʼI tau manatu, ʼe ʼalutahi koa ia te ʼu lea fakapolofetā ʼaenī pea mo te ʼu ʼaluʼaga ʼaē ʼe lolotoga hoko iā ʼaho nei?

He koʼē ʼe faigataʼa anai ʼi te temi ʼaia? ʼE fakahā mai e te ʼapositolo ko Soane ia tona tupuʼaga. Neʼe ina fakakikite ʼe ‘kua nounou pē ia temi’ ki te ʼu gāue ʼa Satana pea mo tana kau temonio ʼaē ʼe fai ki te kele. ʼE ʼui ʼe maʼu anai e Satana ia ‘hona ʼita lahi’ ʼi te temi ʼaia. (Apokalipisi 12:7-12) ʼI takotou manatu lā, ʼe ʼi ai koa he faʼahiga manatu ʼita pea mo agamālohi ʼe ina puleʼi ia te hahaʼi iā ʼaho nei ʼi he koga meʼa pē e tahi peʼe ʼi te mālamanei kātoa?

Neʼe toe ʼui e Sesu ʼi te lolotoga ʼo te temi faigataʼa ʼaupitō ʼaia, ʼe fakahoko anai ia he gāue fakaofoofo. Neʼe ina ʼui fēnei: ‘Ko te logo lelei ʼaenī ʼo te puleʼaga ʼo te ʼAtua, ʼe fakamafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa, pea hoko mai ai leva te fakaʼosi.’ (Mateo 24:14) Iā ʼaho nei, iā fenua e 235 tupu, ʼe fakamafola e te kau Fakamoʼoni ʼa Sehova ia te logo lelei ʼo te Puleʼaga ʼo te ʼAtua iā lea e 500 tupu. Ko te ʼu nusipepa Fakatohi-tapu e lua ʼaē ʼe natou tā, ia Te Tule Leʼo pea mo te Réveillez-vous !, kua lahi ia tona tufa ʼi te mālamanei kātoa. Neʼe toe fakaliliu e te kau Fakamoʼoni ʼa Sehova ia te Tohi-Tapu iā lea e 100. ʼE fai tanatou gāue ʼaki he lotolelei e te ʼu tehina mo tuagaʼane pea ʼe natou fai ia te gāue ʼaki te ʼu meʼa ʼofa ʼe foaki ʼaki he lotolelei. ʼE feala koa ki te gāue fai fakamafola fakaofoofo fakamālamanei ʼaia ke ina fakahoko ia te lea fakapolofetā ʼa Sesu?

ʼE toe fakamahinohino ʼi te Tohi-Tapu ia te ʼu ʼaluʼaga ʼaē kā ina taki fakahagatonu anai ki te tau ʼa Sehova ʼAtua pea mo nātou aē ʼe fakafeagai kiā te ia. Kotou vakaʼi age muʼa ia lea fakapolofetā e tolu ʼe kotou sisio anai ki tona fakahoko.

Kua Kotou Vave Sisio Ki Te ʼu ʼAluʼaga ʼAenī ʼe Hoko

Lea Fakapolofetā 1. ʼE ʼui ʼi te Tohi-Tapu ʼe tala anai e te ʼu puleʼaga ia te logo maʼuhiga ʼo ʼuhiga mo te “tokalelei mo fimalie.” ʼE lagi natou manatu, kua natou maʼu he ʼu puleʼaki ki te ʼu fihifihi lalahi. Kae ko te ʼu ʼaluʼaga ʼaenī ʼe lolotoga hoko ʼe ina fakahā mai ʼe maʼu ia meʼa fuli kae mole maʼu ai ia te tokalelei.—1 Tesalonika 5:1-3.

Lea Fakapolofetā 2. Koia ʼe lahi te ʼu puleʼaga ʼe natou fakatuʼutuʼu ke natou fakafeagai ki te ʼu kautahi fakalotu fakamālamanei. ʼI te Tohi-Tapu, ʼe fakatā ia te ʼu puleʼaga ʼaia ki te manu fekai, pea ko te ʼu lotu hala fakamālamanei ʼe fakatā ki he fafine ʼe heka ʼi te tuʼa ʼo te manu. (Apokalipisi 17:3, 15-18) Ko te manu fakatā neʼe mole ko he fakatuʼutuʼu ʼa te ʼAtua moʼo fakaʼauhā ia te ʼu lotu hala ʼaē ʼe natou ʼui ʼe natou fakafofoga ia te ʼAtua.

ʼAki he ʼu lea fakatā, neʼe fakamahino fēnei e te ʼapositolo ko Soane ia te ʼaluʼaga ʼaia: “Ko te u tala e hogofulu ae nee ke sio ki ai pea mo te manu, e fehihia anai ki te fafine faifeauaki, pea e natou too anai ana mea fuli, kae natou tuku telefua anai ia ia; pea e natou kai anai ona kakano, kae natou tutu anai ia ia i he afi. Koteuhi kua tuku e te Atua ki onatou loto ke natou fakahoko tana fakatuutuu.”—Apokalipisi 17:16, 17.

Lea Fakapolofetā 3. ʼO mulimuli ki te fua lelei ʼo te tau ʼaē ki te lotu hala, ʼe takitaki anai e Satana ia te ʼu puleʼaga ke natou ʼohofi ia nātou ʼaē ʼe tauhi kiā Sehova ʼAtua. Ko te tau ʼaē kā hoa mai kiai ʼe ko Halamaketone.—Apokalipisi 7:14; Mateo 24:21.

ʼE Malave Feafeaʼi Anai Kiā Koutou?

Kapau neʼe mole kotou maʼu ia te fealagia ʼaē ke kotou akoʼi loloto ia te Tohi-Tapu, ʼe feala ke mata faigataʼa hakotou tui ko te ʼu ʼaluʼaga ʼaenī ʼe ina fakahā fakalelei ia te faʼahi ʼaē kā hoko anai. Kae ʼe ko he tupuʼaga lelei ke tou tui ʼe hoko anai ia te ʼu ʼaluʼaga fuli pea ko te ʼu ʼaluʼaga ʼaia ʼe hoko ʼi he kā haʼu kua ovi mai. Ko te fakahoko ʼo te ʼu lea fakapolofetā fuli ʼo te Tohi-Tapu ʼe ina foaki mai ia he ʼamanaki.a

He koʼē ʼe mole tou fakaʼaogaʼi ia he toe temi ke tou ʼiloi peʼe koʼē ʼe tui papau ia te kau Fakamoʼoni ʼa Sehova ko “te tau o te aho lahi o te Atua Mafimafi” kua ovi mai pea he koʼē ʼe mole tonu ke tou mātataku? Kotou palalau mo nātou ʼo ʼuhiga mo te meʼa ʼaē ʼe fakamaʼua ʼi te Tohi-Tapu kiā nātou ʼaē ʼe natou fia maʼu ia te puipui ʼa Sehova ʼAtua. (Apokalipisi 16:14) Ko te ʼu ʼaluʼaga ʼaē ʼe kotou akoʼi ʼe feala ke ina fetogi ia takotou faʼahiga sio ki te kā haʼu.

[Nota]

[Paki ʼo te pāsina 8]

ʼE feala koa ki te gāue ʼa te kau Fakamoʼoni ʼa Sehova ke ina fakahoko ia te lea fakapolofetā Fakatohi-tapu ʼaia?