ʼE Feala Koa Hakotou Tui Ki Te ʼu Milakulo ʼAē ʼe Tuʼu ʼi Te Tohi-Tapu?

KAPAU ʼe fakamatala atu he hisitolia fakaofoofo, ʼe mole koa lā ko te ʼuhiga totonu ʼo ia ʼaē ʼe ina fakamatala atu te hisitolia ʼaē kā ina ʼekenaki anai koutou ke kotou tui peʼe kailoa ki te hisitolia ʼaia? Ko tatatou tui kiā ia ʼe mole fakalogo pē anai ki tana faʼahiga fakamatala ʼo te hisitolia, kae ʼe toe ʼaoga foki ke tou ʼiloʼi peʼe ina tala tuʼumaʼu te moʼoni. Kae kapau lolotoga ni taʼu neʼe ina tala tuʼumaʼu atu pē te moʼoni, pea ʼe ko he tupuʼaga lelei ʼaia ke kotou haga tui ai ki te ʼu meʼa ʼaē ʼe ina ʼui atu.

ʼE toe tatau pē mo te ʼu milakulo ʼaē ʼe fakamatala ʼi te Tohi-Tapu. Neʼe mole he tahi iā tātou neʼe maʼuli ʼi te temi ʼaē neʼe hoko ai te ʼu ʼaluʼaga ʼaia. Kae ʼe feala pē ke tou ʼiloʼi peʼe ko te ʼu fakamatala Fakatohi-tapu ʼaia ʼe tuha mo te falala. ʼO feafeaʼi? ʼE ʼi ai te ʼu ʼaluʼaga ʼe ina fakatuputupu tatatou falala ʼaē ki te ʼu fakamatala ʼo te Tohi-Tapu.

Neʼe hoko te atu milakulo ʼi te ʼu koga meʼa neʼe tokolahi ai te hahaʼi. ʼI ʼihi temi, neʼe ko te toko lauʼi afe hahaʼi, peʼe ko te toko lauʼi miliona hahaʼi neʼe natou sisio kiai. (Ekesote 14:21-31; 19:16-19) Neʼe mole hoko fakafufū te ʼu ʼaluʼaga ʼaia, ke ʼaua naʼa sio kiai te hahaʼi.

Neʼe ʼiloga kehe te ʼu milakulo ʼuhi ko tona faigafua. Neʼe mole ʼaoga he tuʼuga meʼa moʼo fakahoko te ʼu milakulo. ʼE lahi te ʼu milakulo ʼi te Tohi-Tapu neʼe hoko kae neʼe mole fakatuʼutuʼu pea neʼe hoko ʼo mulimuli ki te kole ʼa te hahaʼi. (Maleko 5:25-29; Luka 7:11-16) Ko te ʼu taʼi ʼaluʼaga fēia neʼe mole feala pē ke fakatuʼutuʼu e ia pē ʼaē ʼe ina fakahoko te milakulo.

Neʼe mole ko te logologona, mo te kolōlia pea mo te maʼu koloa ʼaē neʼe ina uga te kau fai milakulo. Kae neʼe natou fakakolōliaʼi te ʼAtua. (Soane 11:1-4, 15, 40) Neʼe tauteaʼi e te ʼAtua te ʼu faiga ʼa te hahaʼi ke natou maʼu koloa mai te ʼu mālohi fakamilakulo.—2 Hau 5:15, 16, 20, 25-27; Gaue 8:18-23.

Ko te ʼu milakulo fuli ʼe talanoa kiai te Tohi-Tapu neʼe mole feala ke fakahoko pē e te tagata. Ohagē lā, ko te tai mo te matagi neʼe fakagona, te vai neʼe fakaliliu ʼo vino, te ʼua ʼaē neʼe fakagata pea mo toe fakatō, te hahaʼi ʼaē neʼe fakamālōlō pea mo nātou ʼaē neʼe kivi. ʼE hā ʼi te ʼu milakulo fuli ʼaia ʼe ʼi ai te mālohi ʼe laka age ʼi te tagata, ʼe feala ke ina puleʼi ia meʼa fuli, ʼaē neʼe lagi tupu ai te hoko ʼo te ʼu taʼi milakulo ʼaia.—1 Hau 17:1-7; 18:41-45; Mateo 8:24-27; Luka 17:11-19; Soane 2:1-11; 9:1-7.

Ko te kau fakafeagai ʼa Sesu, ʼaē neʼe natou sio ki te ʼu milakulo, neʼe mole natou fakafihiʼi ia te hoko moʼoni ʼo te ʼu faʼahi ʼaia. ʼI te temi ʼaē neʼe fakatuʼuake ai e Sesu ia Lasalo, ko te kau fakafeagai ʼa Sesu neʼe mole natou fakafihiʼi te mate ʼo Lasalo. Koteā tona tupuʼaga? He neʼe kua hili kiai ʼaho e fā te kua tuku ʼo Lasalo ʼi te falemaka. (Soane 11:45-48; 12:9-11) Hili kiai ni taʼu e lauʼi teau ki te mate ʼo Sesu, neʼe haga fakamoʼoni aipē e te kau faitohi ʼo te Talmud Fakasutea neʼe maʼu e Sesu he mālohi fakamilakulo. Kae neʼe natou fakafihiʼi pē nātou te haʼuʼaga ʼo te mālohi ʼaia. ʼO toe fēia pē mo te kau tisipulo ʼa Sesu, neʼe mole fehuʼi age kiā nātou ʼi muʼa ʼo te telepinale Fakasutea pe neʼe natou fakahoko he milakulo. Kae neʼe fehuʼi age fēnei: “Ko te malohi fea, pea ko te huafa o ai, nee kolua fai ai te mea aia?”—Gaue 4:1-13.

Kae ʼe feala koa hakotou tui ki te ʼu milakulo ʼaē ʼe fakamatala ʼi te Tohi-Tapu? ʼAki te ʼu ʼaluʼaga ʼaē neʼe hoki tou vakaʼi, ʼe mahino ia ko te ʼu milakulo ʼaē ʼe fakamatala ʼi te Tohi-Tapu ʼe feala hatatou tui kiai. Kae ʼe ʼi ai ʼihi tupuʼaga ʼo tatatou tui ki te ʼu fakamatala Fakatohi-tapu ʼaia. Ohagē lā, ʼi te ʼu fakamatala Fakatohi-tapu, ʼe tautau tala ai te temi mo te koga meʼa ʼaē neʼe hoko ai ia he ʼaluʼaga, pea mo te ʼu higoa ʼa te hahaʼi ʼaē neʼe kau kiai. Māʼiapē lā mo nātou ʼaē ʼe natou valoki te Tohi-Tapu neʼe natou punamaʼuli ʼi te totonu ʼo te ʼu fakamatala ʼaē ʼe tohi ʼi te Tohi-Tapu. Ko lea fakapolofetā e lauʼi teau ʼi te Tohi-Tapu neʼe hoko moʼoni, māʼiapē lā mo te ʼu kiʼi koga veliveli. Pea tahi, ʼe lahi te ʼu tokoni ʼe tou maʼu ʼi te Tohi-Tapu ʼe ina fakafealagia ke fiafia te hahaʼi ʼi ʼanatou felōgoi pea neʼe ʼaoga ki te hahaʼi ʼo te ʼu taʼiake kehekehe pea mo te ʼu agaʼi fenua kehekehe. Ko te fua lelei ʼo te ʼu tokoni ʼaē ʼe tou maʼu ʼi te Tohi-Tapu ʼo ʼuhiga mo te ʼu felōgoi ʼa te hahaʼi, neʼe hā ai ʼe mole hona fakatatau.

Kapau heʼeki kotou falala kātoa ki te Tohi-Tapu, he koʼē koa ʼe mole kotou toʼo he temi mo ʼona vakavakaʼi fakalelei? ʼAki te lahi ʼo takotou mahino ki te Tohi-Tapu, ʼe tuputupu ai anai takotou tui kiai. (Soane 17:17) Pea ʼe kotou mahino ai leva ʼe feala pē hakotou tui ki te ʼu fakamatala ʼaē neʼe hoko ʼi te temi muʼa ʼo ʼuhiga mo te ʼu milakulo. Ko takotou tui ki te ʼu fakamatala ʼaia ʼe ko he fakatafitoʼaga lelei ia ʼo takotou tui ki te ʼu meʼa ʼaē ʼe ʼui ʼi te Tohi-Tapu ʼaē kā vave hoko mai.

[Paki ʼo te pāsina 5]

Ko te kau fakafeagai ʼa Sesu neʼe mole natou fakafihiʼi te mate ʼo Lasalo