Kua ʼi Ai Te ʼUhiga Moʼoni ʼo Tomatou Maʼuli

ʼI TE taʼu 1958, ʼi taku fanauʼi ia taku tama ko Gary, neʼe au tokagaʼi ʼe ʼi ai te faʼahi neʼe kovi. Kaʼe neʼe hoki maʼu e te kau toketa tona mahaki hili mahina ʼe hogofulu, pea toe hili taʼu ʼe nima, pea fakamoʼoni leva ki ai te kau toketa lalahi ʼo Lonitoni. Neʼe au lotomamahi ʼaupito heʼe ko taku taʼahine ko Louise, ʼae ʼe muli ia Gary ia taʼu ʼe hiva, neʼe ina toe maʼu te mahaki ʼaia, kaʼe neʼe kovi age ia.

Neʼe agalelei te kau toketa pea neʼe natou ui mai ʼe maʼu e ʼaku tamaliki te mahaki ʼe mole hona faitoʼo ʼae ko te LMBB.a ʼI te temi ʼaia, neʼe mole iloʼi lelei te mahaki ʼaia. Ko he tahi ʼe kau ki te mahaki ʼaia ʼe mole sio lelei pea ʼaki te temi ʼe liliu ʼo kivi, ʼe sino fau, ʼe tupu hona tahi ʼu kau ʼi tuhi peʼe kau ʼi vaʼe, ʼe suka, ʼe ʼola ʼona hui pea mo mahaki ʼona ifiifi. Koia, ʼe faigataʼa ʼaupito taku tokaga ʼae ki ʼaku tamaliki. Neʼe ha ʼi te sivi neʼe hoki fai pe, ko te tokotahi pe ʼi te toko 125 000 hahaʼi ʼi Pilitania ʼe ina maʼu te taʼi mahaki ʼaia, kaʼe ʼe tokolahi age natou ʼae ʼe natou maʼu te mahaki ʼaia kaʼe ʼe mole faʼa kovi.

KO SEHOVA TOMATOU “NONOAGA”

Mole fualoa ʼi taku ʼosi ʼohoana, neʼe au palalau mo te Fakamoʼoni ʼa Sehova, pea neʼe au iloʼi atu aipe neʼe ko te moʼoni. Kaʼe neʼe mole fia logo ki ai toku ʼohoana. Neʼe ma fetogi koga meʼa tuʼumaʼu ʼuhi ko tana gaue, ʼo mole feala ai haku kau ki he kokelekasio. Kaʼe neʼe hoko atu pe taku lau te Tohi-Tapu pea mo faikole kia Sehova. ʼI meʼa fakalotomalohi taku lau ʼae “ko [Sehova] ko he nonoaga ki te tagata ae e gaohi kovii, ko he nonoaga i te temi o te mamahi” pea ʼe mole ina “siaki natou ae e natou kumi ia [ia]”!—Pes. 9:10, 11.

Neʼe mole lelei te sio ʼa Gary, koia ʼi tona taʼu ono, neʼe ako nofo ʼi te potu saute ʼo Pilitania, ke mulimuli ki te faʼahiga faiako makehe. Neʼe tau telefoni mai ʼo fakaha mai ʼona tuʼania, pea neʼe feala pe ke au tokoni ki ai ʼi te telefoni ke mahino ki te ʼu tokoni ʼaoga ʼo te Tohi-Tapu. Hili ni taʼu ʼi te ʼosi tupu ʼa Louise, neʼe au toe maʼu mo au te ʼu mahaki kovi (te sclérose en plaques mo te fibromyalgie). ʼI te taʼu 16 ʼa Gary, neʼe toe liliu mai ki fale. Kaʼe neʼe kua kovi ʼaupito tana sio, pea ʼi te taʼu 1975, neʼe fakamoʼoni leva ko ia ʼe kivi. ʼI te taʼu 1977, neʼe liakī matou e toku ʼohoana.

ʼI te toe liliu mai ʼa Gary, neʼe matou kau ki te kokelekasio agalelei, pea neʼe au papitema ʼi te taʼu 1974. Neʼe lahi toku fiafia ʼi te tokoni ʼa te tagata ʼafeā kia Gary ke mahino kia ia te ʼu fetogi ʼo tona sino ʼi tana lahilahi ake. Ko te tahi ʼu Fakamoʼoni neʼe natou tokoni mai ki te ʼu gaue ʼo te loto fale. Ki muli age, ko te toko nima ia natou ʼaia neʼe tokoni mai kaʼe totogi e te puleʼaga. Neʼe ko he toe tapuakina lahi!

Neʼe tuputupu lelei ia Gary ʼi te moʼoni pea neʼe papitema ʼi te taʼu 1982. Neʼe fia pionie vaelua ʼi temi, koia neʼe au kauga gaue ai mo ia ʼo au toʼo te selevisi ʼaia, ʼo ma hoko atu lolotoga ni taʼu. Neʼe fiafia ʼaupito taku tama heʼe ki muli age, neʼe fehuʼi fenei age e tamatou taupau ʼo te siliko: “He ko ʼe koa ʼe mole ke pionie katoa Gary?” Neʼe ko te fakalotomalohi tonu ʼaia neʼe ʼaoga kia Gary, pea neʼe pionie katoa ʼi te taʼu 1990.

Neʼe tafa ia Gary ʼi te ʼu hokoga hui ʼo ʼona hui alaga lua, ko te tahi ʼi te taʼu 1999 pea ko te lua ʼi te taʼu 2008. Kaʼe neʼe kovi age te mahaki ʼa Louise. Neʼe tupu kivi, pea ʼi taku sio ʼae neʼe tupu tona tahi kau ʼi vaʼe, neʼe au mahino ai neʼe toe kau mo ia ʼi te mahaki ʼae ko te LMBB. Neʼe ina toe maʼu foki mo te ʼu mahaki ʼi tona sino. Lolotoga ni taʼu, neʼe fai kia ia te ʼu tafa lalahi, ʼo kau ki ai te tafa tuʼa nima ʼo ʼona ifiifi. Pea ohage ko Gary, neʼe toe suka mo ia.

ʼE iloʼi lelei e Louise te ʼu faigataʼaia ʼe feala ke hoko moka tonu ke tafa. Koia, ʼi muʼa ʼo tona tafa, ʼe palalau ai ki te kau toketa faitafa, mo te ʼu toketa ʼae ʼe natou fai te ʼu foʼi huki fakamoe, pea mo te kau gaue ʼo te lopitali, ʼo ina fakamahino age tana mole tali te ʼu faitoʼo ʼae ʼe fakaʼaogaʼi ai te toto. ʼO tupu ai te felogoʼi lelei ʼa Louise mo natou fuli ʼae ʼe tokakaga lelei ʼaupito kia ia.

KUA ʼI AI TE ʼUHIGA ʼO TOMATOU MAʼULI

ʼE lahi te ʼu gaue ʼe matou fai ʼi tomatou loto fale moʼo tauhi kia Sehova. ʼI muʼa ʼo te fai ʼo te ʼu CD, mo te ʼu DVD, pea mo puke ʼatatou alatike ʼi tatatou tuʼasila www.jw.org ʼi te Neti, neʼe ko haku agamahani te failautohi lolotoga ni hola kia Gary mo Louise. ʼI te temi nei, ʼaki te ʼu faʼahi ʼaia, kua feala ai ke matou fakatuʼutuʼu takitokotahi ʼi te vahaʼa fuli ke matou ako te Tohi-Tapu ʼi te ʼu temi kehekehe. ʼE toe feala foki ke matou faitali ʼi te ʼu fono.

ʼI ʼihi temi, ʼe maʼu loto e Gary te ʼu tali ʼae ʼe ina fai, pea ka ina fai hana kiʼi akonaki ʼi te Ako Fakateokalatike, pea ʼe ina fai pe ia ohage ko tana palalau mahani. ʼI te taʼu 1995, neʼe fakanofo tagata faifekau fakaminisitelio, pea ʼe gaue tuʼumaʼu pe ia ʼi te kokelekasio, ʼo tali kaiga pea mo tokaga ki te fakatagi.

Ko te ʼu tehina mo tuagaʼane ʼe natou kauga faifakamafola mo Gary, ʼo natou toho ʼi tona saliote koteʼuhi he ʼola ʼona hui. Neʼe tokoni te tehina kia ia ke ina fai te ako Tohi-Tapu ʼa he tagata. Neʼe toe fakalotomalohi e Gary te tuagaʼane neʼe mole kei fakatahi mo te kokelekasio talu mai taʼu ʼe 25. Pea ʼi te temi nei, ko naua ʼaia kua nā kau ki te ʼu fono.

ʼI te taʼu hiva ʼa Louise, neʼe ina ako mo taku faʼe te tui ʼo he ʼu meʼa mafana. Neʼe ina toe ako mo te tuagaʼane pea mo au ia te faitui fakaʼiloga. ʼI tana leleiʼia ʼaupito te faitui, ʼe ina fai ai te ʼu tupenu lanu kehekehe maʼa te ʼu kiʼi toe kei meamea pea mo te kau matutuʼa ʼo te kokelekasio. ʼE ina toe fai mo te ʼu kiʼi kate ʼe pulusi ai te ʼu pakī. ʼE leleiʼia ʼaupito te ʼu kate ʼaia e natou ʼae ʼe foaki ki ai. ʼI tana lahilahi ake, neʼe ako e Louise te ta masini. ʼI te temi nei, ʼaki te olotinatea, ʼe feala ke ina fakalogo moka faitohi age ʼona kaumeʼa, pea mo tali kia natou. Neʼe papitema ia Louise ʼi tona taʼu 17. ʼI te ʼu mahina ʼae ʼe fai ai te tufa makehe, ʼe ma pionie vaelua ʼi temi tokolua. Ohage ko Gary, ʼe maʼu loto e Louise te ʼu vaega Tohi-Tapu ʼe ina fakaʼaogaʼi moʼo tala tana tui ʼae ki te ʼu fakapapau ʼa te ʼAtua ki he malama “e avahi anai te u mata o te u kivi” pea “e mole ui e he tahi: E au mahaki!”—Esa. 33:24; 35:5.

ʼE lahi tamatou loto fakafetaʼi ki te ʼu moʼoni taulekaleka ʼae ʼe tuʼu ʼi te Folafola ʼa Sehova! ʼE matou fakamalō ʼaupito ki te tokoni ʼofa ʼa te kokelekasio kia matou, ka na ʼaua la neʼe mole lahi te ʼu gaue neʼe feala hamatou fakahoko. Kaʼe tafitō pe ʼaki te tokoni ʼa Sehova, kua ʼi ai te ʼuhiga moʼoni ʼo tomatou maʼuli.