Te ʼu ʼAta Kovi—ʼE Kovi Moʼoni Koa?

Kua fonu ia te malama ʼaeni ʼi te ʼu ʼata kovi.a Kua feala ke tou maʼu ʼi te ʼu fakafiafia, mo te senima, mo te musika, mo te ʼu tohi, mo te televisio, mo te ʼu gaoʼi viteo, mo te ʼu telefoni toʼotoʼo pea mo te Neti. Kua liliu ko te agamahani ki te hahaʼi ia tanatou sioʼi te ʼu ʼata kovi. Ia ʼaho nei, kua tokolahi age te hahaʼi ʼe natou sioʼi te ʼu ʼata kovi.—Vakaʼi te fakamatala ʼae ʼi te ʼa takai “Te ʼu Moʼoni ʼo ʼUhiga Mo Te ʼu ʼAta Kovi.”

Kua fetogi ia te agaaga ʼo te ʼu ʼata kovi. Neʼe tohi fenei e te fafine faiako ko Gail Dines: “ ʼI te temi nei kua fakahaʼuhaʼu ia te fakalialia ʼo te ʼu ʼata kovi.”

Kotea takotou manatu ʼo ʼuhiga mo te kua mafola ʼo te ʼu ʼata kovi pea mo te faʼahiga manatu ʼa te hahaʼi ki te faʼahi ʼaia? ʼE kovi koa ia te ʼu ʼata kovi? Neʼe ui fenei e Sesu: “Ko te fuu akau lelei fuli e fua lelei, kae ko te fuu akau ae e kovi e fua kovi.” (Mateo 7:17) Kotea te ʼu fua ʼe feala ke tou maʼu ʼi tatatou sioʼi te ʼu ʼata kovi? Tou vakaʼi he ʼu fehuʼi ʼo ʼuhiga mo te ʼu ʼata kovi.

ʼE malave feafeaʼi ia te ʼu ʼata kovi ki te hahaʼi?

TE MANATU ʼA TE KAU POPOTO: ʼE mole faigafua ia te taʼofi ʼo te sioʼi ʼo te ʼu ʼata kovi, pea ʼe fakatatau e te hahaʼi fekumi ia te faʼahi ʼaia ki he toloke.

ʼE fakamatala fenei e Brian,b ʼae neʼe ina sioʼi tuʼumaʼu te ʼu ʼata kovi ʼi te Neti: “Neʼe mole he meʼa neʼe ina lava taʼofi au. Neʼe mole kei feala ke au puleʼi ʼaku manatu. Neʼe hage pe ʼe au toloke. Neʼe au faiga fakamalotoloto ke au taʼofi te faʼahi ʼaia, kaʼe hili ki ai te ʼu taʼu neʼe mole au fealagia.”

ʼI te agamahani, ko te hahaʼi ʼae ʼe natou sioʼi te ʼu ʼata kovi, ʼe natou sio fakafufu. ʼE natou faikaka. Tokolahi ʼe natou logoʼi ai tanatou nofo tokotahi, mo tanatou ufiufi, peʼe natou tuʼania, ʼe natou hoha peʼe natou hoko ita. Ko ʼihi ʼe natou fia fakamate. Neʼe ui fenei e Serge, ʼae neʼe ina sioʼi ʼi te ʼaho fuli ia te ʼu ʼata kovi ʼi tana kiʼi telefoni toʼotoʼo: “Neʼe au lotomamahi. Neʼe hage neʼe mole hoku ʼaoga, mo au tukugakoviʼi pe ia au, pea mo logoʼi taku nofo tokotahi. Neʼe au ufiufi pea neʼe au mataku ʼi te kole tokoni.”

Maʼia mo te sioʼi veliveli pe ʼo te ʼu ʼata kovi ʼe feala ke fua kovi ki he tahi. Neʼe ui fenei e te toketa ko Judith Reisman, ʼae ʼe ina fai he ʼu fekumi ʼo ʼuhiga mo te ʼu ʼata kovi, ʼi muʼa ʼo te Sénat ʼo Amelika: “Ko te sioʼi ʼo te ʼu ʼata kovi, ʼe faigataʼa tona galoʼi, ʼe ina fetogi te fakakaukau, ʼe malave vave ki te tagata, pea ʼe faigataʼa tona pulihi ʼi te ʼatamai.” ʼE fakamatala fenei e Susan, ʼae ʼe taʼu 19, neʼe ina sioʼi te ʼu ʼata kovi ʼi te Neti: “Neʼe mole kei feala ke au galoʼi ia te ʼu ʼata kovi ʼaia ʼi toku ʼatamai. ʼE tautau ha fakafokifa mai. ʼE hage ʼe mole kei feala hona pulihi.”

TE ʼU PUANI KE TOU TAʼOFI: ʼE fakaliliu tatou e te ʼu ʼata kovi ke tou kaugana ki ai, pea ʼe ina fakatupu he ʼu fua kovi ki te hahaʼi.—2 Petelo 2:19.

ʼE malave feafeaʼi ia te sioʼi ʼo te ʼu ʼata kovi ki te famili?

TE MANATU ʼA TE KAU POPOTO: ʼO ʼuhiga mo te ʼu ʼata kovi, neʼe tohi fenei e te taumatuʼa ʼe higoa ko Wendy pea mo Larry Maltz ʼi tanā tohi (The Porn Trap): “ ʼE fakamavete e te ʼu ʼata kovi ia te ʼu taumatuʼa pea mo maumauʼi ia te ʼu felogoʼi fakafamili.”

ʼE fakamavete e te ʼu ʼata kovi ia te ʼu nofo ʼohoana pea mo maumauʼi te ʼu felogoʼi fakafamili:

ʼE ui ʼi te Tohi-Tapu ʼe tonu ki te taumatuʼa ke nā feagatonuʼaki. (Malakia 2:16) Ko he tahi ʼe heʼe agatonu ki tona ʼohoana, ʼe ina maumauʼi tana nofo ʼohoana, ʼo tupu hanā mavete. Ko te taʼi mavete ʼaia, ʼe fakatupu lotomamahi ki te ʼu fanau.

ʼE feala ke fakatupu kovi ia te ʼu ʼata kovi ki te ʼu fanau. ʼE toe fakamahino fenei e Brian: “ ʼI toku taʼu hogofulu, neʼe au maʼu ia te ʼu tohi kovi ʼa taku matuʼa ʼi taku lolotoga gaoʼi. Neʼe au kamata sioʼi fakafufu, pea neʼe mole au mahino pe ko ʼe neʼe au fia sioʼi te ʼu pakī ʼaia. Neʼe au kamata fai he ʼu aga ʼe kovi ʼo kaku pe ki taku kua lahi.” Neʼe fakaha e te ʼu sivi ʼe feala ke fakaneke e te ʼu ʼata kovi ia te kau tupulaga ke natou fakahoko he ʼu felaveʼi fakasino kaʼe kei natou tupulaga pea mo fai mo ni tuʼuga hahaʼi. ʼE natou liliu ai ʼo agamalohi pea mo mohumohu ʼaho.

TE ʼU PUANI KE TOU TAʼOFI: ʼE fakatupu kovi ia te ʼu ʼata kovi ki te ʼu felogoʼi ʼi te feʼofaʼofani fakataumatuʼa pea ʼe maʼu ai ia te mamahi.—Taaga Lea 6:27.

Kotea ia te manatu ʼi te Tohi-Tapu ʼo ʼuhiga mo te ʼu ʼata kovi?

TE MANATU ʼI TE FOLAFOLA ʼA TE ʼATUA: “Koia ke kotou tamatei te mea ae, i okotou kogasino, . . . te feauaki, mo te agafakalialia, mo te u holifakavale, mo te u holikovi, pea mo te manumanu, ae ko he tauhi taulaatua.”—Kolose 3:5.

ʼE fehiʼa ia Sehovac ʼAtua ki te ʼu ʼata kovi. ʼE mole fakaʼuhiga leva ʼe ufiufi ia Sehova ʼi te palalau ki te ʼu faʼahi ʼaia. Neʼe ina fakatupu tatou ʼaki ia te fealagia ʼae ke tou fakahoko he ʼu felaveʼi fakasino, kaʼe gata pe ʼi te nofo ʼohoana. ʼE tokoni anai ki te taumatuʼa ke nā femanakoʼaki tuʼumaʼu pea mo nā maʼu ia te fealagia ʼae ke maʼu hanā fanau.—Sakopo 1:17.

He ko ʼe ʼe feala ke tou tui papau ʼe fehiʼa ia Sehova ki te ʼu ʼata kovi? Tou vakaʼi he ʼu tupuʼaga.

TE ʼU PUANI KE TOU TAʼOFI: ʼE fakatupu kovi ia te ʼu ʼata kovi ki te ʼu felogoʼi ʼa he tahi mo te ʼAtua.—Loma 1:24.

ʼE ʼofa ia Sehova ia natou ʼae ʼe natou fia taʼofi ia te sioʼi ʼo te ʼu ʼata kovi. ʼE ui fenei ʼi te Tohi-Tapu: “E loto tokaga [Sehova] mo manavaofa, e kataki fualoa ia ia mo agalelei lahi; koteuhi e ina iloi te mea ae nee fau tatou ki ai, e ina manatui ko tatou ko te efu.” (Pesalemo 103:8, 14) ʼE ina fakaafe ia natou ʼae ʼe agavaivai ke natou fakaovi age kia te ia pea mo natou “mau ai te manavaofa pea ke [natou] tali ai te kalasia” peʼe ko te ʼofa makehe, ʼae ka tokoni age ʼi tona temi totonu.—Hepeleo 4:16; vakaʼi te fakamatala ʼae ʼi te ʼa takai “Ke Kotou Lava Taʼofi Te ʼu ʼAta Kovi.”

Tokolahi neʼe natou tali ia te tokoni ʼa te ʼAtua. Neʼe fua lelei koa kia natou? Kotou vakaʼi ia te manatu ʼi te Tohi-Tapu ʼo ʼuhiga mo natou ʼae neʼe natou lava taʼofi ʼanatou agamahani kovi: “Kua fakamaa koutou, kua fakamaonionii koutou, kua fakamatatonu koutou i te huafa o te Aliki ko Sesu-Kilisito aki te Laumalie o totatou Atua.” (1 Kolinito 6:11) Ohage ko te apositolo ko Paulo, neʼe feala ki ʼihi ke natou ui fenei: “E au fealagia te u mea fuli i ae e ina fakamalohii au.”—Filipe 4:13.

Neʼe ui fenei e Susan ʼae kua ina lava taʼofi te ʼu ʼata kovi: “ ʼE gata pe kia Sehova ʼe feala ke tokoni mai ke tou lava taʼofi te ʼu ʼata kovi. Kapau ʼe kotou kole tana tokoni pea mo tana takitaki, ʼe feala ke kotou liliu ʼo maʼa ia muʼa ʼo te ʼAtua. ʼE mole ina liakī anai koutou.”