KOTOU FAKAOVI KI TE ʼATUA
‘Ko Sehova ʼAe Neʼe Fakamolemole Kia Koutou’
Neʼe ui fenei e te tagata faihisitolia Pilitania ko Edward Herbert, kua hili ki ai taʼu ʼe 400: “Ko ʼae ʼe mole fia fakamolemole ki he tahi age, ʼe hage pe ʼe ina maumauʼi ia te ʼaleso ʼae ʼe tonu ke fakalaka ai.” ʼE ina fakamahino mai ia he tupuʼaga ke tou fakamolemole ai, koteʼuhi ʼe ʼi ai pe anai he ʼaho ʼe tou loto ai ke fakamolemole mai e he tahi age. (Mateo 7:12) Kaʼe ʼe ʼi ai te tupuʼaga tafitō ʼo tatatou fakamolemole ki ʼihi. Tou vakaʼi te ʼu palalau ʼaeni neʼe fai e te apositolo ko Paulo: “Ke kotou fekatakiaki i okotou vahaa, pea kapau e mamahi he tahi ki he tahi i he mea, ke kotou fefakamolemoleaki. Ke kotou fakamolemole foki o hage ko [“Sehova,” MN] ae nee fakamolemole kia koutou.”—Kolose 3:13.
Neʼe lagi kua tou fai he aga neʼe mole leleiʼia e he tahi peʼe neʼe agakovi mai he tahi, koteʼuhi ʼae ʼe tou agahala fuli. (Loma 3:23) Kaʼe ʼe tou lava taupau feafeaʼi ia te tokalelei mo te hahaʼi logo la totatou ʼuhiga agahala? Neʼe fai mai e Paulo ia te tokoni Fakaʼatua ʼae ke tou kataki pea mo fakamolemole. Neʼe ʼaoga te tokoni ʼaia kua hili ki ai taʼu ʼe lua afe pea ʼe kei ʼi ai pe tona ʼaoga ʼi te temi nei. Tou vakavakaʼi muʼa te ʼu palalau ʼaia neʼe fai e Paulo.
“Ke kotou fekatakiaki i okotou vahaa.” ʼE fakamatala ʼi te tohi, ʼe maʼu e te kau Kilisitiano ia te kalitate ʼaia, ʼo “natou katakiʼi ia te ʼu hala pea mo te ʼu aga ʼa ʼihi ʼe natou iita ai.” Pea ʼe tou mahino ʼaki te kupu “i okotou vahaa,” ʼe tonu ke tou femaʼuʼaki te kataki. Koia, kapau ʼe tou manatuʼi ʼe ʼi ai te ʼu aga ʼe tou fai ʼe fakatupu ita ki ʼihi, ʼe mole tou tuku anai ia te ʼu agakovi ʼae ʼe fai mai ʼe ʼihi ke ina fakatupu he tokakovi ia tatou. Kaʼe ʼe feafeaʼi la mo kapau ʼe agahala mai he tahi?
“Ke koutou fefakamolemoleaki.” Neʼe fakamahino e te tagata poto, ko te kupu Fakakeleka, ʼae neʼe fakaliliu ʼaki te kupu “fakamolemole” ʼi te Tohi-Tapu Fakaʼuvea, ʼe “toe fakaʼuhiga ki te fakamolemole gafua.” ʼE fakamahino mai ʼi te tahi tohi, ko te kupu ʼaia, ʼe toe fakaʼuhiga ki te foaki ʼo he meʼa ʼaki he loto ʼe lelei. ʼE tou fakaha ʼe tou fakamolemole gafua mo kapau ʼe tou lotolelei ke tou fakamolemole ki he tahi tatau aipe pe tou ‘mamahi ki ai.’ Kaʼe he ko ʼe ʼe tonu ke tou fai ia te faʼahi ʼaia ʼaki he lotolelei? Koteʼuhi, ʼe ʼi ai pe leva he ʼaho ʼe tou loto ai ke fakamolemole mai ia ia ʼae neʼe ina fakamamahiʼi tatou.
“Ke kotou fakamolemole foki o hage ko [“Sehova,” MN] ae nee fakamolemole kia koutou.” Koʼeni ia te tupuʼaga tafitō ʼo hatatou fakamolemole ki ʼihi: ʼE lotolelei ia Sehova ʼAtua ke fakamolemole mai kia tatou. (Mikea 7:18) Kotou fakakaukauʼi age muʼa ia te toe fakamolemole ʼa Sehova ki te kau agahala fuli ʼae ʼe fakahemala. ʼE mole loto e Sehova ke ina fai ia te faʼahi ʼaia kia natou ke feala hanatou fakamolemole age, koteʼuhi ʼae ʼe mole hana agahala. ʼE mahino ia, ko Sehova ʼe ko te faʼifaʼitaki lelei tokotahi ʼaia ʼo te fakamolemole!
Ko te lotomanavaʼofa ʼo Sehova ʼe ina uga tatou ke tou fakaovi age pea mo tou faʼifaʼitakiʼi ia ia. (Efeso 4:32–5:1) Koia ʼe lelei ke tou feʼekeʼaki fenei: ‘Kapau ʼe fakamolemole gafua mai ia Sehova, ʼe mole tonu koa la ke au fakamolemole mo au ki he tahi ʼe heʼe haohaoa, ʼe fakahemala fakamalotoloto ki he agakovi neʼe ina fai mai?’—Luka 17:3, 4.
Te Koga Tohi-Tapu Ke Lau
[Paki ʼo te pasina 11]
Ko Sehova ʼe ko te faʼifaʼitaki lelei tokotahi ʼaia ʼo te fakamolemole!