Tou Fakalogo Ki Te ʼu Tauhi Ovi ʼa Sehova

1, 2. He ko ʼe neʼe fakatatau e Sehova ia ia totonu ki he tagata tauhi ovi?

KO SEHOVA ʼe ina fakatatau ia ia totonu ki he tagata tauhi ovi. (Esk. 34:11-14) ʼE tokoni mai te faʼahi ʼaia ke tou mahino ki te ʼuluagaaga ʼo Sehova. Ko he tagata tauhi ovi ʼofa ʼe ina iloʼi ʼe ko tona maʼua ke tokaga ki te maʼuli ʼo te ʼu ovi. ʼE ina taki natou ki te ʼu koga meʼa ʼae ʼe maʼu ai te meʼa kai mo te vai pea ʼe ina fua ʼonatou kiʼi ʼuhi. (Pes. 23:1, 2; Esa. 40:11) ʼE ina leʼoleʼo te faga ovi ʼi te ʼaho mo te po pea ʼe ina puipui natou mai te ʼu manu ʼo te vao. (1 Sam. 17:34, 35; Luka 2:8) ʼE ina kumi te ʼu ovi ʼae kua hehe mai te faga ovi pea mo tokaga ki ʼae ʼe lavevea.—Esk. 34:16.

² ʼI te temi muʼa, tokolahi ʼi te hahaʼi ʼa te ʼAtua neʼe tauhi ovi mo gaue kele. Koia ʼae neʼe natou mahino ai pe ko ʼe neʼe fakatatau e Sehova ia ia totonu ki he tauhi ovi. Neʼe natou iloʼi ʼe ʼaoga ke taupau mo tokaga ki te ʼu ovi ke natou maʼuli lelei ai. ʼO toe feia pe ʼe ʼaoga ke taupau pea mo takitaki te hahaʼi e Sehova. (Mko. 6:34) Kapau ʼe mole taupau mo takitaki e Sehova te hahaʼi, pea ʼe natou maʼuli mamahi anai. ʼE mole natou iloʼi te meʼa ʼae ʼe lelei mo ʼae ʼe kovi pea ʼe mole he tahi mo ʼonatou puipui. ʼE natou hage ko “ni ovi ae e hala tagata tauhi ovi.” (1 Hau 22:17) Kaʼe ko natou ʼae ʼe tuku ke tokaga ia Sehova kia natou ʼe natou maʼu ia meʼa fuli ʼae ʼe ʼaoga kia natou.

3. Kotea anai ka tou ako ʼi te alatike ʼaeni?

³ ʼE tou toe mahino mo tatou pe ko ʼe ʼe tatau ia Sehova mo he tagata tauhi ovi. ʼE tou sio ia ʼaho nei ʼe tokaga lelei ki tana hahaʼi. ʼE tou ako anai pe feafeaʼi hana takitaki tatou pea mo tokaga ki te ʼu meʼa ʼae ʼe ʼaoga kia tatou. Pea ʼe tou talanoa anai pe kotea ʼae ʼe tonu ke tou fai ke fua lelei kia tatou te takitaki pea mo te tokaga ʼa Sehova.

ʼE FAKANOFO ʼIHI E TE TAGATA TAUHI OVI LELEI MOʼO TOKONI KIA IA

4. ʼE tokaga feafeaʼi ia Sesu ki te ʼu ovi ʼa Sehova?

⁴ Neʼe fakanofo e Sehova ia Sesu ko te Pule ʼo te kokelekasio Fakakilisitiano. (Efe. 1:22, 23) Ko Sesu “te tauhi ovi agalelei” peʼe lelei, ʼe hage ia ko tana Tamai. ʼE ʼofa ia Sesu ki te ʼu ovi pea mo tokaga kia natou. Neʼe ina toe foaki foki mo tona maʼuli ki ʼana ovi. (Soa. 10:11, 15) Ko te sakilifisio ʼa Sesu ʼe ko he meʼa ʼofa taulekaleka ia maʼa te malamanei katoa. (Mat. 20:28) Koia ʼe ko te fakatuʼutuʼu ʼa Sehova ʼo ʼuhiga mo he tahi pe ʼe tui kia Sesu “ke aua naa mate ia, kae ke ina mau te mauli heegata.”—Soa. 3:16.

5, 6. (1) Ko ai ʼae neʼe filifili e Sesu moʼo tokaga ki ʼana ovi? Pea kotea ʼae ʼe tonu ke fai e te ʼu ovi ke fua lelei kia natou te tokaga ʼa Sesu? (2) Kotea te tupuʼaga tafitō ʼo tatatou fia mulimuli ki te takitaki ʼa te kau tagata ʼafeā?

⁵ ʼE fakaha feafeaʼi e te ʼu ovi ko Sesu Kilisito ʼe ko tanatou tauhi ovi? Neʼe ui fenei e Sesu: “E fakalogo aku ovi ki toku leo; e au iloi natou, pea e natou mulimuli mai ia au.” (Soa. 10:27) ʼE fagono te ʼu ovi ki te leʼo ʼo te Tauhi Ovi Lelei ʼaki tanatou mulimuli tuʼumaʼu ki tana takitaki. Pea ʼe kau ki ai tanatou fakalogo kia natou ʼae neʼe ina fakanofo moʼo tokoni ki tana taupau te faga ovi. ʼI te temi muʼa, neʼe filifili e Sesu ʼana apositolo pea mo ʼana tisipulo moʼo taupau ʼana kaugana. Neʼe ina ui age kia natou ke natou akoʼi pea mo fafaga ʼana kiʼi faga ovi. (Mat. 28:20; lau ia Soane 21:15-17.) ʼI te lahi ʼo te fakamafola ʼo te logo lelei, tokolahi te hahaʼi ʼe natou liliu ko ni tisipulo ʼa Kilisito. Koia ʼae ʼe tokaga ai Sesu ke ʼi ai ni tagata tauhi ovi fotufotuʼa moʼo taupau te ʼu kokelekasio.—Efe. 4:11, 12.

⁶ Ki muli age, neʼe ui fenei e Paulo ki te kau tagata ʼafeā ʼo te kokelekasio ʼo Efeso: “Kua fakanofo koutou . . . e te laumalie maʼoniʼoni ko he kau taupau, moʼo fafaga te kokelekasio ʼa te ʼAtua.” (Gaue 20:28, MN) Ia ʼaho nei, ʼe toe fakanofo te kau tagata ʼafeā ʼaki te laumalie maʼoniʼoni. He ko ʼe ʼe tou ui te faʼahi ʼaia? Koteʼuhi ʼe fakatafito tonatou fakanofo ki te ʼu fakamaʼua ʼae ʼi te Folafola ʼa te ʼAtua ʼae neʼe tohi ʼaki te takitaki ʼo te laumalie maʼoniʼoni. Koia ʼi te temi ʼae ʼe tou fakalogo ai ki te kau tagata ʼafeā, ʼe tou fakaʼapaʼapa ai ki te ʼu Tauhi Ovi lalahi pe ʼe lua ʼae ko Sehova pea mo Sesu. (Luka 10:16) ʼE ko te tupuʼaga tafitō la ʼaia ʼo tatatou lotolelei ʼae ke tou fakalogo ki te kau tagata ʼafeā. Kaʼe ʼe ʼi ai te tahi ʼu tupuʼaga ʼe tonu ai ke tou mulimuli ki tanatou takitaki.

7. ʼE tokoni feafeaʼi mai te kau tagata ʼafeā ke malohi aipe tatatou fakakaumeʼa ʼae mo Sehova?

⁷ Ko te ʼu fakalotomalohi mo te takitaki ʼae ʼe foaki e te kau tagata ʼafeā ki ʼonatou tehina mo tuagaʼane, ʼe fakatafito tuʼumaʼu ia ki te ʼu pelesepeto Fakatohi-tapu. ʼE mole fia puleʼi e te kau tagata ʼafeā ia te maʼuli ʼo te ʼu tehina mo tuagaʼane. (2 Ko. 1:24) Kaʼe ʼe natou fia tokoni kia natou ke fakatafito ʼanatou tonu ki te ʼu pelesepeto Fakatohi-tapu. ʼAki tanatou fai ʼaia, ʼe tokoni ai te kau tagata ʼafeā ke maʼu te logotahi mo te tokalelei ʼi te kokelekasio. (1 Ko. 14:33, 40) ʼE ui ʼi te Tohi-Tapu ko te kau tagata ʼafeā ʼe natou “leoleo” ki ʼokotou maʼuli. Ko tona fakaʼuhiga ʼe fia tokoni te kau tagata ʼafeā kia natou fuli ʼi te kokelekasio ke natou nofo ovi ia Sehova. Koia ʼe natou fenaʼinaʼi ʼi te tokoni ki he tehina peʼe ko he tuagaʼane ʼe ina ʼamanaki fai peʼe kua ina fai he tonu ʼe kovi. (Kal. 6:1, 2; Suta 22) ʼE mole koa la ko ni tupuʼaga lelei ʼaia, ke tou “fakalogo ki [ʼotatou] takitaki”?—Lau ia Hepeleo 13:17.

8. ʼE puipui feafeaʼi e te kau tagata ʼafeā ia te kokelekasio?

⁸ ʼI tona ʼuhiga tauhi ovi ʼofa, neʼe fai e te apositolo ko Paulo te fakatokaga ʼaeni ki te ʼu tehina ʼo Kolose: “Koutou tokaga naa hele koutou e he tahi aki te filosofia pea mo he kaka alunoa, o falala ki te talatisio a te u tagata, pea ki te u malohi fakalaumalie o te malamanei, kae mole kei fai kia Kilisito.” (Kol. 2:8) ʼE tokoni mai te fakatokaga ʼaia ke tou mahino ai ki te tahi tupuʼaga ʼo te maʼuhiga ʼae ke tou fakalogo ki te takitaki ʼa te kau tagata ʼafeā. ʼE natou puipui ʼonatou tehina mai ia natou ʼae ʼe ina fia fakahehe natou mai ia Sehova. Neʼe fakatokaga e te apositolo ko Petelo ʼe faiga anai te kau polofeta loi pea mo te kau faiakonaki loi ke natou fakavaivaiʼi te kau Kilisitiano ke natou talagataʼa kia Sehova. (2 Pet. 2:1, 14) Ia ʼaho nei, ʼe tonu ke fai e te kau tagata ʼafeā he ʼu fakatokaga feia moka ʼe ʼaoga. Ko te kau tagata ʼafeā ʼe ko he kau Kilisitiano poto pea kua natou mahani ʼi te maʼuli. Neʼe fakanofo natou ko he kau tagata ʼafeā he neʼe natou fakaha tanatou mahino lelei ki te Tohi-Tapu pea mo maʼu te ʼu fealagia ʼae ke natou akoʼi te ʼu moʼoni Fakatohi-tapu. (1 Tim. 3:2; Tito 1:9) Pea ko tanatou malohi ʼi te faʼahi fakalaumalie, mo tanatou fakapotopoto pea mo tonatou poto ʼae ʼe fakatafito ki te Tohi-Tapu, ʼe tokoni kia natou ke natou foaki he takitaki ʼe lelei ki ʼonatou tehina mo tuagaʼane.

ʼE FAFAGA MO PUIPUI TE ʼU OVI E TE TAUHI OVI LELEI

9. ʼE fafaga pea mo takitaki feafeaʼi e Sesu ia te kokelekasio ia ʼaho nei?

⁹ ʼE fakaʼaogaʼi e Sehova tana kautahi moʼo akoʼi pea mo takitaki ia te ʼu tehina mo tuagaʼane ʼi te malamanei katoa. ʼE lahi te ʼu tokoni Fakatohi-tapu ʼe tou maʼu ʼi ʼatatou tohi. Pea ʼi ʼihi temi, ʼe toe foaki fakahagatonu e te kautahi ia te takitaki ki te kau tagata ʼafeā ʼo te kokelekasio. ʼE maʼu e te kau tagata ʼafeā te takitaki ʼaia ʼaki he ʼu tohi peʼe ko he ʼu fakatotonu mai te ʼu taupau feʼoloʼaki. ʼAki te ʼu faʼahi fuli ʼaia, ʼe maʼu ai e te ʼu ovi he ʼu fakatotonu ʼe tasilo lelei.

10. Ko te maʼua fea ʼae ʼe tonu ke fai e te ʼu tauhi ovi ʼofa moka kua mavae he tehina peʼe ko he tuagaʼane ʼi te kokelekasio?

¹⁰ Ko te ʼu tauhi ovi ʼofa ʼe ko tonatou maʼua ke natou puipui mo tokaga ki te ʼu ovi. ʼE tuʼania tafitō te kau tagata ʼafeā ʼo ʼuhiga mo natou ʼae kua vaivai tanatou tui peʼe ko natou ʼae neʼe agahala mamafa. (Lau ia Sakopo 5:14, 15.) Lagi ko ʼihi ia natou ʼaia kua natou mavae ʼi te kokelekasio pea ʼe mole kei natou tauhi ki te ʼAtua. Kotea anai ka fai e he tauhi ovi ʼofa moʼo tokoni kia natou? ʼE faiga malohi anai ia ke ina maʼu pea mo fakalotomalohiʼi natou ʼaia ke natou toe liliu mai ki te kokelekasio. Neʼe ui fenei e Sesu: “E mole ko te finegalo o takotou Tamai i te atu lagi ke puli he toko tahi i te u toe liliki aena.”—Mat. 18:12-14.

TATATOU FAʼAHIGA MANATU KI TE ʼU VAIVAIʼAGA ʼA TE KAU TAGATA ʼAFEĀ

11. He ko ʼe ʼe lagi faigataʼa ki ʼihi hanatou fakalogo ki te kau tagata ʼafeā?

¹¹ Ko Sehova pea mo Sesu ʼe ko he ʼu Tauhi Ovi haohaoa. Kaʼe ko te ʼu tauhi ovi ʼae ʼe nā fakaʼaogaʼi moʼo tokaga ki te kokelekasio, ʼe mole natou haohaoa. ʼAki te faʼahi ʼaia, ʼe lagi faigataʼa ki ʼihi hanatou fakalogo ki te kau tagata ʼafeā. ʼE lagi natou manatu fenei: “Ko te kau tagata ʼafeā ʼe ko he ʼu hahaʼi heʼe haohaoa ohage pe ko tatou. He ko ʼe ʼe tonu ke tou fakalogo ki ʼanatou tokoni?” ʼE moʼoni, ko te kau tagata ʼafeā ʼe mole natou haohaoa. Kaʼe ʼe mole tonu ke tou tokagaʼi ʼonatou vaivaiʼaga mo ʼanatou laka hala.

12, 13. (1) ʼI te temi muʼa, neʼe kotea te ʼu laka hala ʼa te ʼu kaugana ʼa te ʼAtua ʼae neʼe ʼi ai ʼonatou pilivilesio? (2) He ko ʼe neʼe loto e Sehova ke tohi ʼi te Tohi-Tapu te ʼu hala ʼa te ʼu tagata maʼu pilivilesio?

¹² ʼI te Tohi-Tapu ʼe fakaha lelei ai te ʼu hala ʼa te ʼu tagata ʼae neʼe fakaʼaogaʼi e Sehova moʼo takitaki ia tana hahaʼi ʼi te temi muʼa. Ohage la ko Tavite, neʼe fakanofo ko te hau ʼo Iselaele, kaʼe ki muli age neʼe agahala ki te ʼAtua. Neʼe momoe mo te fafine ʼohoana pea neʼe ina matehi te ʼohoana ʼo te fafine ʼaia. (2 Sam. 12:7-9) ʼO toe feia mo te apositolo ko Petelo. Logo la te ʼu maʼua lalahi ʼae neʼe ina maʼu ʼi te kokelekasio Fakakilisitiano, kaʼe neʼe ina toe fai mo ia ni hala mamafa. (Mat. 16:18, 19; Soa. 13:38; 18:27; Kal. 2:11-14) Neʼe mole ʼi ai he tagata haohaoa talu mai ia Atama mo Eva gata pe kia Sesu.

¹³ He ko ʼe neʼe loto e Sehova ke tohi ʼi te Tohi-Tapu te ʼu hala ʼo ʼihi ʼo ʼana kaugana ʼae neʼe ʼi ai ʼonatou pilivilesio? Moʼo fakaha ʼe ina lava fakaʼaogaʼi te ʼu tagata heʼe haohaoa moʼo takitaki tana hahaʼi. Pea ʼe ko he faʼahi ia neʼe ina fai tuʼumaʼu. Koia ʼe mole tonu ke tou fakaʼaogaʼi te ʼu laka hala ʼa te kau tagata ʼafeā ia ʼaho nei ko he takuʼaki ke tou lauga ai kia natou peʼe ke tou meʼa noaʼi tonatou ʼuhiga pule. ʼE fakaʼamu ia Sehova ke tou fakaʼapaʼapa pea mo tou fakalogo kia natou.—Lau ia Ekesote 16:2, 8.

14, 15. Kotea te ako ʼe tou lava taʼofi mai te faʼahiga foaki ʼae e Sehova ia te ʼu fakatotonu ki tana hahaʼi ʼi te temi muʼa?

¹⁴ ʼE maʼuhiga ʼaupito ke tou fakalogo ki te kau tagata ʼafeā. Kotea tona tupuʼaga? Kotou fakafuafua muʼa pe neʼe foaki feafeaʼi e Sehova he ʼu fakatotonu ki tana hahaʼi ke natou hao ai ʼi te ʼu temi faigataʼa ʼo te temi muʼa. Ohage la, ʼi te mavae ʼae ʼa te kau Iselaele mai Esipito, neʼe fakaʼaogaʼi e Sehova ia Moisese pea mo Alone moʼo foaki he ʼu fakatotonu maʼuhiga ki tana hahaʼi. Koia ke hao te kau Iselaele ʼi te hogofulu malaʼia, neʼe tonu ke natou fakalogo ki te ʼu fakatotonu. Neʼe tonu ke natou fai he meʼa kai makehe, mo matehi he akeno pea mo vali tona toto ʼi ʼonatou kaumatapa mo ʼonatou fuga matapa. Neʼe palalau fakahagatonu koa te ʼAtua ki tana hahaʼi? Kailoa ia, neʼe tonu ki te hahaʼi ke natou fakalogo ki te kau tagata ʼafeā ʼae neʼe foaki ki ai e Moisese te ʼu fakatotonu. (Eke. 12:1-7, 21-23, 29) ʼI te ʼu aluʼaga ʼaia, neʼe fakaʼaogaʼi e Sehova ia Moisese pea mo te kau tagata ʼafeā moʼo takitaki tana hahaʼi. Ia ʼaho nei ʼe toe fakaʼaogaʼi e Sehova ia te kau tagata ʼafeā moʼo takitaki tana hahaʼi.

¹⁵ ʼE lagi kotou manatuʼi te ʼu lakaga ʼae ʼe fakaʼaogaʼi ai e Sehova ʼi te Tohi-Tapu he ʼu tagata peʼe ko he ʼu ʼaselo moʼo foaki ni fakatotonu ki tana hahaʼi. ʼE lahi te ʼu aluʼaga neʼe haofaki ai tonatou maʼuli ʼuhi ko te ʼu fakatotonu ʼaia. Pea ʼi te ʼu aluʼaga fuli ʼaia, neʼe foaki e te ʼAtua te ʼuhiga pule ki ʼihi ke natou fakafofoga ia ia mo tala ki tana hahaʼi pe kotea ʼae neʼe ʼaoga ke natou fai ʼi te ʼu temi tuʼutamakiʼia. Koia ʼe tou tui papau ai ʼe toe fakahoko pe anai e Sehova te faʼahi ʼaia maʼa tana hahaʼi ʼi Halamaketone. ʼE moʼoni, ia ʼaho nei ko te kau tagata ʼafeā ʼae ʼe tonu ke natou fakafofoga ia Sehova peʼe ko tana kautahi, ʼe maʼua ke natou tokakaga naʼa natou fakaʼaoga koviʼi tonatou ʼuhiga pule ʼae neʼe foaki age e Sehova.

“HE FAGA OVI E TAHI, MO HE TAUHI OVI E TAHI”

16. Kotea te ʼu meʼa ʼae ʼe ui mai e te “leo” ʼe tonu ke tou fakalogo ki ai?

¹⁶ Ko te hahaʼi ʼa Sehova ʼe ko “he faga ovi e tahi” ʼe takitaki e te “tauhi ovi e tahi,” ia Sesu Kilisito. (Soa. 10:16) Neʼe ui e Sesu ʼe nofo anai mo ʼana tisipulo “i te aho fuli, o kaku ki te fakaosi o te malamanei.” (Mat. 28:20) ʼI tona ʼuhiga Hau ʼi selo, ʼe ina puleʼi katoa te ʼu aluʼaga fuli ʼae ka hoko anai ʼi muʼa ʼo tana fakaʼauha te malama ʼa Satana. ʼE tou lava logotahi feafeaʼi pea mo maʼuli fimalie ʼi te kautahi ʼa te ʼAtua? ʼE tali fenei ʼi te Tohi-Tapu: “E logo anai ou taliga i ou muli ki te leo ae e ina ui: Koeni te ala, koutou haele i ai!” Kotea ʼae ʼe kau ki te ʼu meʼa ʼae ʼe ui e te “leo” ʼaia? Ko te ʼu manatu fuli ʼae ʼe akoʼi mai e Sehova ʼi te Tohi-Tapu pea mo ʼae ʼe ina fakaha mai mo Sesu ʼaki te ʼu tauhi ovi ʼae neʼe nā fakanofo.—Lau ia Esaia 30:21; Apokalipisi 3:22.

17, 18. (1) ʼE tuʼutamakiʼia feafeaʼi te hahaʼi ʼa te ʼAtua? Kaʼe kotea ʼae ʼe tou lava tui papau ki ai? (2) Kotea ka tou ako anai ʼi te alatike ʼae ka hoa mai?

¹⁷ ʼE ui ʼi te Tohi-Tapu ko Satana ʼe hage “ko he laione gugulu, o kumi pe ko ai ae e ina kai anai.” (1 Pet. 5:8) Ohage ko he manu ʼo te vao ʼe fia kai, ʼe ina tuli te faga ovi, pea mo ina lamalama te lakaga ʼae ʼe lelei ke ina ʼohofi ai te ovi ʼae ʼe vaivai peʼe kua hehe mai te faga ovi. Koia la ʼae ʼe tonu ai ke tou nofo ovi tuʼumaʼu ki te kokelekasio pea mo Sehova tatatou tauhi ovi mo leʼoleʼo. (1 Pet. 2:25) ʼE talanoa ia Apokalipisi 7:17 ʼo ʼuhiga mo natou ʼae ka hao ʼi te mamahi lahi. ʼE ui ai ko Sesu ʼe ina “taki anai natou ki te u matapuna o te vai mauli, pea e holoholoi anai e te Atua te u loimata fuli i onatou mata.” ʼE ko he fakapapau taulekaleka ia!

¹⁸ ʼE maʼuhiga ʼaupito te maʼua ʼa te kau tagata ʼafeā Kilisitiano ʼae ke natou tokakaga ki te kokelekasio. ʼE lava iloʼi feafeaʼi e te ʼu tagata ʼaia kua hinoʼi, ʼe natou tokakaga fakalelei ki te ʼu ovi ʼa Sesu? ʼE tou tali anai ki te fehuʼi ʼaia ʼi te alatike ʼae ka hoa mai.