Kua Kotou Iloʼi Koa?
He ko ʼe neʼe fasifasiʼi te ʼu vaʼe ʼo natou ʼae neʼe tutuki ki te pou?
ʼO ʼuhiga mo te tutuki ʼae ʼo Sesu pea mo te ʼu tagata agakovi ʼe tokolua ki te ʼu pou, ʼe ui fenei ʼi te Tohi-Tapu: “Neʼe kole ai e te kau Sutea kia Pilato ke fasifasiʼi ʼonatou vaʼe pea ke toʼo te ʼu sino.”—Soane 19:31, MN.
Neʼe ui ʼi te lao Fakasutea, hili te tutuki ʼo he sino ki te pou, neʼe mole tonu ke tuku “ke tautau i te akau mai te pouli ki te aho.” (Tetelonome 21:22, 23) ʼE mahino ia, neʼe fai e te kau Sutea ia te faʼahi ʼaia kia natou ʼae neʼe tutuki e te kau Loma ki he ʼu pou. Neʼe fasifasiʼi te ʼu vaʼe ʼo te ʼu tagata moʼo fakaviliviliʼi tanatou mamate pea ke feala ke avaifo natou ʼi muʼa ʼo te Sapato, ʼae neʼe kamata ʼi te ʼosi to ʼo te laʼa.
Neʼe tutuki te ʼu nima pea mo te ʼu vaʼe ʼo te tagata agakovi ki te pou pea neʼe fakatuʼu leva te pou. Neʼe tau tugaki te tagata ʼaia ʼi te tautau feia ʼo tona sino, he neʼe to te mamafa ʼo tona sino ki te ʼu faʼahi ʼae neʼe tutuki. Ke feala hana manava, neʼe tonu ke tuʼu fakamalohi ki te faʼo ʼae neʼe tutuki ʼaki ʼona vaʼe. Kaʼe neʼe mole feala ke ina fai ia te faʼahi ʼaia pea mo manava ai mo kapau neʼe fasifasiʼi ʼona vaʼe. Koia neʼe mate fakavilivili ai.
Neʼe fakaʼaogaʼi feafeaʼi te ʼu makamaka ʼi te ʼu tau ʼo te temi muʼa?
Neʼe matehi e Tavite ia te tagata lahi ko Koliate ʼaki tana makamaka. Neʼe lagi ako e Tavite ia tona fakaʼaogaʼi ʼi te ʼu taʼu ʼae neʼe tauhi ovi ai.—1 Samuele 17:40-50.
Ko he pakī neʼe togi ʼe ha ai te ʼu tagata faimakamaka Asilia ʼe natou ʼohofi te kolo malohi ʼo te kau Sutea
ʼE ha ʼi te ʼu pakī ʼo te temi muʼa, te ʼu makamaka neʼe fakaʼaogaʼi ʼi Esipito pea mo Asilia. Ko te agaaga ʼo te makamaka neʼe ko te ʼu kau ʼi maea ʼe lua neʼe haʼi ki ai te kili ʼi manu peʼe ko he moʼi kie. Neʼe fakaʼaogaʼi te ʼu kiʼi foʼi maka momole pea mo takafuafua. Neʼe haga te tagata faimakamaka ʼo milohi ia te foʼi maka pea ina tuku age leva te kau ʼi maea ʼe tahi, ʼo fagona malohi ai te foʼi maka ʼo alu fakahagatonu ki te meʼa ʼae neʼe ina li ki ai.
ʼI te ʼu meʼa ʼae neʼe huke ʼi te ʼu potu fenua Alape, neʼe maʼu lahi ai te ʼu maka ʼo te ʼu makamaka neʼe fakaʼaogaʼi ʼi te ʼu tau. Ko te ʼu tagata faiva ʼi te faimakamaka, neʼe malohi ʼaupito tanatou li ʼaki te ʼu maka, ʼo lau kia kilometa ʼe teitei 240 ʼi te hola. Neʼe feala ke mate he tahi ʼaki te mahafu ʼaia.—Tui Fakamaau 20:16.