Te ʼu Tali Ki Te ʼu Fehuʼi Fakatohi-tapu

ʼE ʼi ai koa he fakatuʼutuʼu ki totatou kele?

ʼE maʼu ʼi totatou kele ia meʼa fuli ʼe ʼaoga ki te maʼuli. Ohage la, ʼe lahi te vai, ʼae ʼe ʼaoga ki te maʼuli. ʼI te tuʼu lelei ʼo te kele ʼi te ʼatulaulau, ʼe mole feala ai ke liliu te ʼu koga tai ʼo ʼaisi peʼe vela fau. Pea ʼaki te ʼu kasa ʼae ʼe ina ʼaofi ia te kele, ʼe mole feala ai ke vela te kele. ʼE fakaofoofo ia te ʼaoga ʼo te ʼu fuʼu ʼakau ki te ʼu manu, ʼo toe feia mo te ʼu manu ki te ʼu fuʼu ʼakau. Koia neʼe manatu ai ia te tokolahi ʼe ʼi ai te fakatuʼutuʼu ki totatou kele.—Lau ia Esaia 45:18.

Kaʼe ʼe lagi kotou feʼekeʼaki fenei: “ʼE kau koa ki ai te mamahi pea mo te ʼu aga heʼe faitotonu?”—Lau ia Tetelonome 32:4, 5.

ʼE fakahoko anai koa ia te fakatuʼutuʼu ki te kele?

Neʼe fakatupu ia te kele ke liliu ko he nofoʼaga fakafiafia maʼa te hahaʼi ʼae ʼe natou fefakaʼapaʼapaʼaki pea mo ʼoʼofa ki tonatou Tupuʼaga. Neʼe fakamaʼuhigaʼi e te ʼAtua ia totatou maʼuli ʼi ʼae ʼo te ʼu manu. ʼE feala ke tou fai te fakatuʼutuʼu ʼae ke tou iloʼi totatou Tupuʼaga pea mo tou leleiʼia pea mo faʼifaʼitakiʼi tona ʼofa pea mo tana faitotonu.—Lau ia Ekelesiasi 12:15; Mikea 6:8.

Ko totatou Tupuʼaga ʼe feala ke ina fakahoko ʼana fakatuʼutuʼu fuli. Koia ʼe feala ke tou tui papau, ʼe ina fakagata anai te mamahi pea mo te heʼe faitotonu pea mo toe fakaliliu anai totatou kele ko he nofoʼaga fakafiafia maʼa te tagata.—Lau ia Pesalemo 37:11, 29; Esaia 55:11.