ʼE Kovi Koa Tau Logoʼi Te Lotomamahi?

ʼE lagi neʼe kua ke mahaki. Kaʼe, neʼe lagi lelei vave pe tou mahaki ʼo feala ai ke ke galoʼi te temi ʼaia. Ko te lotomamahi ʼe kehekehe ia. ʼE tohi fenei e Alan Wolfelt ʼi tana tohi (Fakapilitania) Comment apaiser le cœur d’un conjoint endeuillé : “ ʼE mole feala ke puli ʼi he temi te mamahi.” Kaʼe, neʼe ina toe ui fenei: “ ʼAki te alu ʼo te temi mo te tokoni ʼa ʼihi, ʼe malū ifo anai tou lotomamahi.”

Tou vakaʼi te faʼifaʼitaki ʼo te pateliaka ko Apalahamo pe ʼe kotea ʼae neʼe ina fai ʼi te mate ʼo tona ʼohoana. ʼE ui ʼi te Tohi-Tapu “nee fai leva e Apalahamo te putu o Sala, pea nee tagi leva ia ia kia ia.” Ko te kupuʼi palalau “fai leva” ʼe talanoa ki te ʼaoga ʼo he temi kia Apalahamo ke ina katakiʼi tona lotomamahi.a Koʼeni te tahi faʼifaʼitaki: Neʼe tui ia Sakopo neʼe matehi tona foha ko Sosefo e he manu fekai. Neʼe tagi “i he temi fualoa osi” pea neʼe mole lava fakafimalieʼi ia ia e tona famili. Hili ni taʼu ki ai, neʼe kei lotomamahi tuʼumaʼu pe ia Sakopo ʼuhi ko te mate ʼo Sosefo.—Senesi 23:2; 37:34, 35; 42:36; 45:28.

Ohage pe ko te temi muʼa, tokolahi ia ʼaho nei ʼe natou lotomamahi ʼi ni lauʼi taʼu ʼuhi ko he tahi neʼe mate neʼe natou ʼoʼofa mamahi ai. Tou vakaʼi ia faʼifaʼitaki ʼe lua.

• “Neʼe mate toku ʼohoana, ia Robert, ʼi te ʼaho 9 ʼo Sulio 2008. ʼI te uhu ʼae neʼe hoko ai te tuʼutamaki neʼe hage pe ko te uhu fuli. Hili tama fai inu kafe, pea ma fefaʼufuaʼaki mo feʼuiʼaki ‘ ʼE au ʼofa mamahi ia koe,’ ohage pe ko te agamahani ʼi muʼa ʼo tana alu ʼo gaue. Hili ki ai taʼu ʼe ono, ʼe kei au lotomamahi pe. ʼE mole au iloʼi pe ʼe au galoʼi anai ʼi he ʼaho te mate ʼo Rob.”—Gail, taʼu 60.

• “Tatau aipe pe ʼe kua taʼu 18 tupu te mate ʼo toku ʼohoana, kaʼe ʼe kei au manatuʼi pe. Ka au sio ki he meʼa ʼe matalelei ʼi te fakatupu, ʼe au manatuʼi ia ia. Pea ʼe au ui ka na feia age la ʼe kei maʼuli, ʼe fiafia anai ʼi tana sio ki te ʼu meʼa matalelei ʼaia.”—Etienne, taʼu 84.

ʼE mahino ia, ʼe mole kovi ia tatatou logoʼi he ʼu manatu feia lolotoga he temi loaloaga. ʼE tou tahi fakaha pe anai tana faʼahiga putu. Pea ʼe mole ko he agafakapotopoto anai hatatou fakamauʼi te aga ʼa he tahi moka mate he tahi neʼe ʼofa mamahi ai. ʼI te temi ʼaia, ʼe tonu ke tou tekeʼi tatatou tukugakoviʼi ia tatou totonu mo kapau ʼe lahi fau totatou mamahi. Kaʼe ʼe feafeaʼi hatatou katakiʼi totatou lotomamahi?