Ko He Fehuʼi ʼe Faigataʼa

ʼE LAHI te ʼu manatu ʼo ʼuhiga mo te maʼuli pea mo te mate. Ko ʼihi ʼe natou tui ʼe hoko atu pe anai te maʼuli moka hili te mate ʼi he tahi age potu. Ko ʼihi ʼe natou tui ʼe tou toe tutupu ake anai ʼi he tahi age tagata peʼe ko he manu peʼe ko he tahi atu meʼa. Pea ko ʼihi leva ʼe natou manatu ʼe ko te fakaʼosiʼaga ʼaia ʼo te maʼuli ʼo te tagata.

ʼE feala ke mole tatau tatatou faʼahiga manatu ʼo ʼuhiga mo te faʼahi ʼaia, ʼuhi ko totatou faʼahiga akoʼi peʼe ko tatatou agaʼi fenua. ʼE kua mafola te ʼu faʼahiga manatu kehekehe ʼo ʼuhiga mo te aluʼaga ʼae ʼe hoko moka tou mamate. Kaʼe, ʼe tou lava maʼu koa ʼifea he ʼu tali ʼe moʼoni ʼo ʼuhiga mo te fehuʼi faigataʼa ʼaia?

Talu mai ni taʼu ʼe lauʼi teau, neʼe akoʼi e te kau takitaki lotu he akonaki hala ʼo ʼuhiga mo te maʼuli tuputupua ʼa te tagata. Ko natou ʼae ʼe kau ki te ʼu lotu lalahi, ohage ko natou ʼae ʼe ui ʼe mulimuli kia Kilisito, te lotu ʼo te kau Inituisi, te lotu Fakasutea, te lotu Mahometa pea mo ʼihi atu lotu, ʼe natou tui ki te maʼuli tuputupua ʼa te tagata. Kotea tona fakaʼuhiga? Ko tona fakaʼuhiga ʼe hoko atu pe tona maʼuli pea ʼe maʼuli ʼi he malama fakapulipuli. Kaʼe ʼe tui te kau Putisi, ka tuʼa lahi he toe tupu ake ʼa he tahi, ʼe ina maʼu anai te Nirvana, ʼae ko te ʼateaina mai te ʼu mamahi pea mo te ʼu holi fuli.

ʼUhi ko te ʼu akonaki ʼaia, ʼe kaugā malie te hahaʼi ʼe natou tui, ʼi te hili ʼo te mate ʼe toe hoko atu pe te maʼuli ʼi he tahi age malama. ʼI te manatu ʼa te tokolahi, ko te mate ʼe kau ki te aluʼaga ʼo te maʼuli pea ʼe toe kau ki te finegalo ʼo te ʼAtua. Kaʼe, kotea te manatu ʼa te Tohi-Tapu ʼo ʼuhiga mo te faʼahi ʼaia? ʼE matou fakaafe atu ke kotou lau te alatike ʼae ka hoa mai. ʼE kotou maʼu ai anai tona tali.