Tou Takitaki Tatatou ʼu Fānau ʼi Te Ala ʼo Te Maʼuli
1 Ko te fakalogo ki te ʼu meʼa ʼaē ʼe fakamaʼua mai e te ʼAtua, ʼe ina taki tatou ki te maʼuli, kae ko te talagataʼa ki tana ʼu lao, ʼe ina taki tatou ki te lotomamahi pea mo te mate. ʼE tou sio ki te faʼahi maʼuhiga ʼaia ʼi te meʼa ʼaē neʼe hoko kia Atama mo Eva. Kapau la neʼe nā haga fakalogo, ʼe nā maʼuʼuli anai ʼo heʼegata, kae neʼe nā filifili ke nā talagataʼa ki te ʼAtua, ʼo nā mamate ai. Ko te ʼu mātuʼa Kilisitiano fuli ʼe tonu ke nātou fai kia nātou totonu te ʼu fehuʼi ʼaenī: Koteā ʼaē ʼe ʼau akoʼi ki taku ʼu fānau? ʼE nātou ʼiloʼi koa te ʼu fakapale ʼaē ʼe kita maʼu mokā kita fakalogo, pea mo te ʼu fua kovi mo kapau ʼe nātou talagataʼa? ʼE nātou ako koa ke nātou ʼoʼofa kia Sehova ʼaki tonatou loto katoa? ʼE ʼau tuku koa he faʼifaʼitaki lelei kia nātou?
2 Koutou Akonakiʼi Te ʼu Fānau ʼo Mulimuli Ki Te ʼu Fakatuʼutuʼu Kua Fai: Moʼo akoʼi te fakalogo ki takotou ʼu fānau, ʼe tonu kia koutou, ʼu mātuʼa, ke koutou fai he ʼu lekula ʼe fakapotopoto pea mo tukupau. Koutou tuku he faʼifaʼitaki ʼo ʼuhiga mo te fakalogo ki te ʼu lekula ʼaia. Koutou fakahā age ʼe fakatūʼa anai nātou mo kapau ʼe mole nātou fakalogo ki te ʼu lekula. Koutou fakahoko takotou ʼu fakapapau, ʼaua naʼa koutou fai tuʼumaʼu he ʼu valoki, peʼe pākalaga, pea ʼaua naʼa koutou fai he ʼu meʼa ʼe mole ʼalutahi mo te ʼu fakatuʼutuʼu ʼaē neʼe koutou fai. (Ef. 6:4) ʼE tonu ke manatu tahi te ʼu mātuʼa ki te ʼu lekula ʼo te akonaki, pea ʼe tonu ke nā fakahoko toko lua moʼo taupau te fakaʼapaʼapa ʼa te tamasiʼi. Kapau ʼe fai e te ʼu mātuʼa te akonaki ʼaki te ʼofa, ʼe ako ai e te fānau ko te fakatūʼa ʼe ko te ikuʼaga ʼaia ʼo tanatou aga kovi. Kae ʼe nātou toe ako foki ko te fakalogo ʼe tupu ai he fiafia, ʼaki te ʼu fakavikiviki pea mo te ʼu fakapale. (Ef. 6:1-3; Hep. 11:6) Kapau ʼe koutou akoʼi age ki takotou ʼu fānau ʼi tanatou kei liliki, ʼe nātou ‘utu anai te meʼa ʼaē neʼe nātou tō,’ pea ʼe koutou hāofaki anai nātou mai te ʼu tuʼutāmaki kehekehe pea mo te mate.—Kal. 6:7; Taag. 23:13, 14.
3 Ko te talagafua, ʼe fakamaʼua kiai te fakalogo. ʼE koutou akoʼi koa takotou fānau ke nātou fakalogo? ʼE koutou fakamaʼua koa ke nātou ʼōmai ki te ʼu fono? ʼE koutou fakatotonu age koa ke nātou fakalogo ʼi te ʼu fono ʼaia? Ko ʼihi mātuʼa ʼe nātou ako tanatou fānau ke nātou fakalogo ʼi tonatou ʼapi. ʼE nātou fakatuʼutuʼu he temi ʼe nātou fai tuʼumaʼu tanatou lautohi mo tanatou fānau. Lolotoga te temi ʼaia, ʼe fakamaʼua ki te ʼu fānau ke nātou heheka maʼu pea mo nātou tokaga ki te lautohi. Kapau ʼe fai te faʼahi ʼaia ʼaki he loto faʼa kātaki, pea ʼaki te temi ʼe feala anai kia nātou liliki ke lelei tanatou fakalogo pea mo tokaga ki te ʼu faiakonaki pea ʼe mole faigafua anai honatou fakaleluʼi e he tahi meʼa lolotoga te ʼu fono. ʼO toe feiā aipe, ʼe tonu ke tuku he faʼifaʼitaki e te ʼu mātuʼa, ʼo nātou fakalogo lelei ʼi te ʼu fono, kae mole nātou hoko tokaga ki he ʼu meʼa noa ʼe hoko lolotoga te ʼu fono. Tahi ʼaē meʼa, ko nātou liliki ʼe nātou leleiʼia te ʼu fono mo kapau neʼe nātou teuteu ke nātou fai hanatou ʼu tali. Kapau ʼe ʼi ai he kiʼi tamasiʼi ʼe ina fai hana tali e tahi peʼe lua ʼaki tana ʼu palalau ʼa ia totonu, pea ʼe mahino ia ʼe tokaga lelei anai ʼo fakalogo pea ʼe ina sio anai ki tona ʼu fua lelei kia ia. Kapau ko te ʼu fānau ʼe nātou kumi te ʼu vaega ʼaē ʼe hinoʼi mai e te ʼu tēhina faiakonaki, pea ʼe nātou nonofo ʼalaʼala anai pea ʼe ko he ako lelei anai kia nātou.
4 ʼI ʼihi temi, ʼi te ʼu fono ʼe hili he hola katoa pea ʼe mole kei manofo maʼu te ʼu kihiʼi tamaliki. ʼE nātou femaliuʼaki ʼi tonatou hekaʼaga, pea ʼe nātou faigaʼi ke tokagaʼi nātou e te hahaʼi ʼo te fono. Peʼe lagi nātou ʼōmai anai mo hanatou ʼu kiʼi meʼa gaoʼi peʼe ko he tahi ʼu meʼa ke nātou gaoʼi pea ʼe fakalelu ki te nofoʼaki. ʼAua naʼa galo kia tatou, māʼia mo “nātou liliki” ʼi Iselaele, neʼe tonu ke nātou fakatahi moʼo “fakalogo” pea mo “ako.” (Teu. 31:12) ʼI ʼihi temi, ʼi tanatou fia ʼolo ʼo haʼele, ʼe fakaleluʼi e te ʼu kihiʼi tamaliki te nofoʼaki, ʼi tanatou ʼolo tuʼumaʼu ʼaē ki te ʼu fale vao lolotoga te fono. Kae ko te ʼu kihiʼi tamaliki ʼaia ʼe nātou lava gaoʼi lolotoga ni ʼu hola, kae mole nātou fia ʼolo ki te ʼu fale vao. Kapau ʼe akoʼi fakalelei e te ʼu mātuʼa tanatou fānau ke nātou ʼolo ki te fale vao ʼi muʼa ʼo te kamata ʼo te fono, ʼi te agamāhani ʼe mole nātou hoko tatuʼu noa anai kiai ʼi te ʼosi kamata pe ʼo te fono.
5 Koutou Fai He ʼu Fakatuʼutuʼu Faka Teokalatike Ki Takotou ʼu Fānau: Ko te tahi faʼahi ʼaē ʼe tonu ke fai ʼi te akoʼi ʼo te fānau ʼi te ala ʼo te maʼuli, ko te takitaki ʼo nātou ʼi tanatou kei liliki ke nātou fakaʼaogaʼi tonatou maʼuli ki te gāue ʼaē ʼe lahi tāfito. Koutou tokoni kia nātou ke nātou faʼifaʼitaki kia Selemia, Esekiele, Isaia pea mo te tahi ʼu hahaʼi neʼe nātou foaki tonatou maʼuli ki te gāue ʼa Sehova. Fakahā age kia nātou te ʼu fealagia ʼe maʼu ʼi totatou temi ʼi te tauhi ʼo te Puleʼaga ʼo te ʼAtua. Koutou faigaʼi ke nātou mahino ki te maʼuhiga ʼo te faʼifaʼitaki ʼaē neʼe tuku mai e Kilisito Sesu ʼi tana loto faka sakilifisio. Koutou fakaloto mālohiʼi nātou ke nātou faikole tuʼumaʼu kia Sehova ʼaki tonatou loto katoa. Pea tāfito, koutou tuku e koutou totonu he faʼifaʼitaki lelei, ke feala hanatou sio ʼe koutou fiafia ʼi te tauhi ʼaki tokotou loto katoa ki te ʼAtua. Pea ka fakahā atu anai e takotou tamasiʼi ʼe ina fia foaki tona maʼuli kia Sehova pea mo ina fakahā te faʼahi ʼaia ʼi te papitema, ʼe koutou fiafia anai ʼi takotou tokoni ki ai ke ina fai te tonu ʼaia.