ʼE ʼAoga Ke Foaki Ki Te Kau Tūpulaga He Faʼifaʼitaki Lelei
1 ʼE tou fiafia ʼi te nofo ʼa te tokolahi ʼi te kau tūpulaga mo tatou ʼo nātou ‘fakavikiviki te huafa ʼo Sehova.’ (Pes. 148:12, 13) Tokolahi ia nātou ʼe kei veliveli ʼonatou taʼu. Ko tanatou tuputupu ʼe hā lelei ʼi te ako pea mo te faʼifaʼitaki neʼe tuku ake e te ʼu mātuʼa pea mo te ʼu hahaʼi matutuʼa ʼo te kokelekasio. Kae, ʼaua naʼa koutou meʼa noaʼi te aga ʼa ʼihi tūpulaga ʼe feala ke uga mālohi ai nātou, tāfito te kau tūpulaga ʼaē kua matumatuʼa pea mo te hahaʼi lalahi ʼaē kei tūpulaga.
2 Ko te kau tūpulaga kei liliki ʼe nātou faʼifaʼitaki ki te kau tūpulaga ʼaē kua matumatuʼa. ʼE nātou loto ke nātou liliu ohage ko ʼonatou ʼu kaumeʼa ʼaē ʼe nātou leleiʼia. ʼE nātou tautau holi ke nātou tatau mo ʼihi ʼu tūpulaga ʼaē kua lalahi pea ʼe hage ʼe lahi te ʼu meʼa ʼe nātou ʼiloʼi pea ʼe nātou tuputupu ki muʼa. Ko te meʼa ʼe hoko, ʼe feala ke nātou faʼifaʼitaki ʼakotou palalau pea mo takotou aga ʼo feiā aipe mo takotou leleiʼia te ʼu meʼa fakalaumālie pea mo takotou kau ki te ʼu gāue ʼa te kokelekasio.
3 Kapau ko koutou ko he tūpulaga kua matumatuʼa, ʼe koutou maʼu ia he pilivilesio pea mo te maʼua maʼuhiga. ʼI te temi nei, ko takotou faʼifaʼitaki e lagi ʼe feala ke uga mālohi ai ʼokotou ʼu kaumeʼa ʼaē ʼe kei tūpulaga. Koutou fai te fehuʼi ʼaenī, ‘Ko te aga feafeaʼi koa ʼaē ʼe ʼau tuku ki te kau tūpulaga? ʼE ʼau maʼu koa he manatu ʼe lelei, ʼo mamaʼo mai te ʼu meʼa vale pea mo “te ʼu holi kovi ʼo te temi tūpulaga?” ʼE ʼau fakahā koa te fakalogo pea mo te fakaʼapaʼapa ki taku ʼu mātuʼa, mo te ʼu tagata ʼāfea, pea mo ʼihi hahaʼi ʼaē kua matutuʼa?’ (2 Tim. 2:22; Kol. 3:20) Ko te meʼa ʼaē ʼe koutou talanoa kiai pea mo takotou aga e lagi ko he faʼahi maʼuhiga ʼaia ʼi te tuputupu fakalaumālie ʼo ʼihi tūpulaga ʼaē ʼe nātou tokagaʼi ʼakotou ʼu aga.
4 Ko te faka mafola ʼo te logo ʼo te Puleʼaga ʼe ko te gāue tāfito ʼaia ʼo te kokelekasio. Ko takotou lotolelei pea mo takotou kau tuʼumaʼu ki te fai faka mafola ʼe feala ke fakaloto mālohiʼi ai ʼokotou ʼu kaumeʼa ke lahi tanatou gāue. Kapau ʼe feala takotou pionie, ʼe uga anai ʼokotou kaumeʼa ke nātou fai te faʼahi ʼaia. Ko te tali ʼi te ʼu fono pea mo te foaki ʼo koutou moʼo tokoni ki te fakahoko ʼo te ʼu gāue ʼaoga ʼi te Fale ʼo te Puleʼaga ʼe feala aipe ke koutou tuku ai he faʼifaʼitaki lelei.
5 Logope la neʼe kua laka te ʼu taʼu ʼo Timoteo ʼi te taʼu hogofulu ʼi te temi ʼaē neʼe foaki age ai e Paulo ia te tokoni ʼaenī, ʼe feala ke maʼuliʼi e koutou kau tūpulaga te tokoni ʼaenī: “Ke ke liliu ko he faʼifaʼitaki ki te hahaʼi agatonu ʼi tau palalau, ʼi tau aga, ʼi te ʼofa, ʼi te tui, mo te aga maʼa.” (1 Tim. 4:12) Ko takotou fiafia pea mo takotou kau ki te gāue kia Sehova mo tokotou nefesi katoa ʼe feala ke ina uga ʼokotou kaumeʼa ʼaē ʼe nātou tokagaʼi ia koutou ke nātou haʼele ki muʼa ʼi te faʼahi ʼaia, ʼo tokoni kia nātou ke nātou tuputupu ʼo nātou liliu ko he ʼu tagata mālolohi ʼi te faʼahi fakalaumālie. (Ef. 4:13) Ko te ʼu tūpulaga ʼaē ʼo he ʼu famili neʼe hoki nātou ako pe te Tohi-Tapu, ʼe feala ke nātou ʼōmai ki te moʼoni ʼuhi pe ko te meʼa ʼaē ʼe nātou sisio ʼe koutou fai.
6 ʼO toe maʼuhiga age foki, ko takotou faiva ʼi te fakahā ʼo te ʼu kalitate faka lotu ʼe ina fakavikiviki ia Sehova pea mo tona kautahi. (Taag. 27:11) Ko nātou ʼaē ʼe sisio ki takotou aga ʼe nātou leleiʼia anai te kehekehe ʼo koutou pea mo te kau tūpulaga ʼo te mālama. Koia ʼe koutou maʼu te fealagia ʼaē e tahi, ko te tokoni ki te kau tūpulaga ʼo koutou foaki he fakavikiviki maʼuhiga kia Sehova.—Pes. 71:17.