Tou Foaki Ia Tatou ʼAki Te Lotolelei Moʼo Fai ʼo Te ʼu Gāue Lelei Fuli
1 ʼE talanoa te tohi ʼo te mālama ʼo ʼuhiga mo te kau Fakamoʼoni ʼa Sehova, ʼo fēnei: “ ʼE faigataʼa anai he maʼu ʼo ni ʼu hahaʼi ʼo he tahi age ʼu kūtuga ʼe gāue mālohi ohage ko te kau Fakamoʼoni.” He koʼe ʼe gāue mālohi feiā te kau Fakamoʼoni ʼa Sehova pea mo nātou fai ʼaki te lotolelei?
2 Ko te tupuʼaga ʼo tanatou gāue mālohi, heʼe kua nātou mahino ki te maʼuhiga ʼo te temi. Neʼe mahino kia Sesu neʼe faka tuʼakoi tona temi moʼo fakaʼosi ai tana gāue ʼi te kele. (Soane 9:4) ʼI te lolotoga pule ʼo te ʼAlo ʼo te ʼAtua ʼaē kua faka kolōlia ʼi te lotolotoiga ʼo tona ʼu fili ia ʼaho nei, ʼe mahino te hahaʼi ʼa Sehova ʼe tonu ke nātou fai tanatou gāue ʼi he temi kua faka tuʼakoi. Koia la ʼaē, ʼe nātou foaki ia nātou ʼaki te lotolelei ki te gāue taputapu. (Pes. 110:1-3) Mai tona ʼaluʼaga ʼaē ʼe ʼaoga ke lahi age te kau gāue moʼo fetuku ʼo te taʼukai, ʼe mole feala ke vaivai tanatou ʼu faiga. (Mat. 9:37, 38) Koia, ʼe nātou faiga ke nātou mulimuli kia Sesu, ʼaē ʼe ko he faʼifaʼitaki haohaoa ʼo ʼuhiga mo te lotolelei pea mo te faiva ʼi te gāue.—Soane 5:17.
3 Ko te tahi tupuʼaga ʼo te gāue ʼa te kau Fakamoʼoni ʼa Sehova mo tonatou nefesi katoa maʼa Sehova, heʼe ko tanatou kautahi faka malamanei ʼe kehe ia mo te ʼu kūtuga fuli ʼaē. ʼI te agamāhani ʼe fakamaʼua pe e te ʼu kautahi faka lotu ʼo te mālama ki tana hahaʼi he kiʼi temi pea mo he faiga veliveli. Ko te meʼa ʼaē ʼe tui kiai te hahaʼi ʼe siʼisiʼi peʼe mole malave ia ki tonatou maʼuli ʼi te ʼaho fuli, ki tanatou felogoi mo te hahaʼi peʼe ko tanatou ʼu fakatuʼutuʼu ʼi tonatou maʼuli. ʼI tanatou mole maʼu ia te mālohi ʼaē ʼe uga e te tui moʼoni, ʼe nātou fakakinauʼi tonatou ʼu tagata tauhi ke nātou ‘ ʼui age he ʼu meʼa ʼe lave lelei,’ ke nātou fakamoʼoni age ʼe feʼauga pe ʼi tanatou faiga fakakākā. (Is. 30:10) Neʼe tonu ai ki tanatou kau takitaki lotu ke nātou ‘alaala ʼonatou ʼu taliga,’ ke ia nātou he manatu fakavaivai pea mo te piko fakalaumālie.—2 Tim. 4:3.
4 ʼI kehekehe leva mo te hahaʼi ʼa Sehova! ʼE ʼaoga ke tou faiga, pea mo tou gāue ki te ʼu meʼa fuli ʼaē ʼo ʼuhiga mo tatatou tauhi. ʼI te ʼaho fuli, pea ʼi te ʼu meʼa fuli ʼaē ʼe tou fai, ʼe tou maʼuliʼi te meʼa ʼaē ʼe tou tui kiai. Logope la ʼe foaki mai e te moʼoni ia te fiafia lahi, kae ʼe pipiki kiai “he faiga mālohi” mo kapau ʼe tou fia fakahoko katoa te meʼa ʼaē ʼe ina fakamaʼua mai ke tou fai. (Vakaʼi ia 1 Tesalonika 2:2.) Ohage la ko te ʼu maʼua ʼo te maʼuli ʼi te ʼaho fuli ʼe feʼauga aipe ke feala ai he maʼumaʼua ʼa te hahaʼi. Kae, ʼe mole tou faka fealagia anai ki te ʼu tuʼania ʼaia ke nātou tāʼofi ia tatou ke mole tou fakamuʼamuʼa te ʼu meʼa ʼo te Puleʼaga.—Mat. 6:33.
5 Ko te meʼa ʼaē neʼe foaki mai ke tou fai ʼi te gāue ʼa Sehova ʼe ʼaoga pea ʼe maʼuhiga ʼaupito ke ina uga tatou ke tou ‘totogi’ te temi mai ʼihi age ʼu gāue pea ke tou fakaʼaogaʼi te temi ʼaia ke ʼaoga lahi ake ki te ʼu gāue fakalaumālie. (Ef. 5:16) ʼI tatatou ʼiloʼi ʼaē ko tatatou aga faka lotu pea mo tatatou lotolelei ʼe leleiʼia e Sehova, ʼe tou maʼu te tupuʼaga lahi ʼaē moʼo hoko atu ʼo tatatou gāue mālohi. ʼAki te ʼu tapuakina lahi ʼe tou maʼu ʼi te temi ʼaenī pea mo te ʼu ʼamanaki ki te temi ka haʼu, ʼe tou faiga mālohi ke hoko atu tatatou “gāue mālohi pea mo tou tokakaga” ʼo fakamuʼamuʼa te ʼu meʼa ʼo te Puleʼaga.—1 Tim. 4:10.
6 Te Aga Faka Lotu Pea Mo Te Maʼuli Faka Sakilifisio: Tokolahi te hahaʼi ia ʼaho nei ʼe nātou fakamuʼamuʼa age te ʼu meʼa fakasino ʼi te tahi age ʼu meʼa. ʼE nātou ʼui ʼe totonu katoa tanatou tokakaga ki te meʼa kai, te meʼa ʼinu, peʼe ko te mutuʼi meʼa. (Mat. 6:31) ʼI tanatou mole kei feʼaugaʼia te ʼu meʼa ʼaoga ʼaia, ʼe uga nātou e te holi ʼaē ke nātou leleiʼia te maʼuli katoa ʼi te temi ʼaenī pea ke ‘lahi ʼaupito tanatou ʼu meʼa lelei kua tāʼofi ki he ʼu taʼu e lahi, ke nātou lava mālōlō ai, mo kakai, mo ʼiʼinu, pea mo fakafiafia.’ (Luka 12:19) Ko ia ʼaē ʼe ʼalu ki te misa ʼe ina logoʼi ko te faiga ʼaē ʼe fakamaʼuaʼi age e tana lotu ʼe ko he maumauʼi ia ʼo tona loto faʼitaliha. Ko te manatu ʼaē ke lītuʼa peʼe ke ina fakagata tana mulimuli ki te ʼu meʼa fakakoloa peʼe ko te līaki ʼo he meʼa fakafiafia ʼe fakalialia ia kiai. ʼAki tana manatu pe ʼaē kia ia totonu, ʼe ina fakahā ai ʼe mole feala, peʼe mole totonu ia te maʼuli faka sakilifisio.
7 ʼE kehekehe tatatou tokagaʼi te faʼahi ʼaia. Ko te Folafola ʼa te ʼAtua ʼe ina hikihiki tatatou fakakaukau ke feala ai foki hatatou maʼu te ʼu manatu ʼa te ʼAtua ka mole ko te ʼu manatu ʼa te tagata. (Is. 55:8, 9) ʼE tou fai he ʼu fakatuʼutuʼu ʼi totatou maʼuli ʼo laka age ia ʼi te ʼu fakatuʼutuʼu fakatagata. Ko te faka lākatonuʼi ʼo te tuʼi faʼitaliha ʼo Sehova pea mo te tāpuhā ʼo tona huafa ʼe ko te ʼu meʼa maʼuhiga tāfito ʼi te ʼatulaulau katoa. Ko te maʼuhiga ʼo te ʼu fehuʼi ʼaia ʼe lahi tāfito age ia, ohage ko te ʼu puleʼaga fuli “ ʼi muʼa ia te ia ko he meʼa ʼe mole maʼuli.” (Is. 40:17) Ko te faiga ʼaē ke tou maʼuli ʼo tou meʼa noaʼi te finegalo ʼo te ʼAtua ʼe tonu ke tokagaʼi ohage he aga fakavale.—1 Ko. 3:19.
8 Logope la ko ʼihi meʼa fakamālama ʼe ʼaoga pea ko ʼihi ʼu meʼa ʼe ʼaoga moʼo fakahaʼele ʼo te gāue ʼo te Puleʼaga, ʼe mahino kia tatou ko te ʼu meʼa ʼaia ʼe mole ko “te ʼu meʼa ʼaē ʼe maʼuhiga tāfito.” (Filp. 1:10) ʼE tou mulimuli ki te manatu ʼaē ʼe tuʼu ia 1 Timoteo 6:8 ʼaki tatatou faka tuʼakoi tatatou ʼu fakatuʼutuʼu fakasino pea mo tou faiga fakapotopoto ʼo taupau totatou loto ke haga ki ‘te ʼu meʼa ʼaē ʼe mole hā ʼaē ʼe heʼegata.’—2 Ko. 4:18.
9 Mokā ʼe lahi tatatou maʼu te ʼu manatu ʼa te ʼAtua, ʼe siʼisiʼi anai tatatou tuʼaniaʼi te ʼu meʼa fakasino. Mokā tou tokagaʼi te meʼa ʼaē neʼe kua ʼosi fai e Sehova maʼa tatou pea mo te ʼu tapuakina taulekaleka neʼe ina fakapapau mai ki te temi ka haʼu, ʼe tou lotolelei ʼo fai te sakilifisio ʼaē ʼe ina kole mai ke tou fai. (Maleko 10:29, 30) ʼE tonu ke tou foaki kia te ia totatou maʼuli. Kapau ʼe mole tou fai te faʼahi ʼaia ʼo ʼuhiga mo tona manavaʼofa pea mo tona ʼofa, ʼe mole tou leleiʼia anai te maʼuli ʼi te temi nei pea ʼo feiā aipe ki te temi ka haʼu. ʼE maʼua ke tou foaki ia tatou totonu, koteʼuhi ko te ʼu meʼa ʼaē ʼe tou fai ʼi tana gāue ʼe ko ‘he meʼa ʼe tonu ke tou fai.’ (Luka 17:10) Ko he faʼahiga meʼa pe ʼe fakaʼui mai ke tou fai ʼi te gāue ʼa Sehova, ʼe tou fai fakalelei, ʼaki tatatou ʼiloʼi ʼaē ʼe tou “utu fakalahi” anai.—2 Ko. 9:6, 7.
10 ʼE ʼAoga ʼi Te Temi ʼAenī He Kau Gāue Lotolelei: Talu mai te kamataʼaga, ko te kokelekasio faka Kilisitiano neʼe kau ki he gāue mālohi. Neʼe tonu ke fai he fakamoʼoni lahi ʼi muʼa ʼo te tō ʼo Selusalemi ʼi te taʼu 70 ʼo totatou temi. ʼI te lolotoga ʼo te temi ʼaia ko te ʼu tisipulo ʼa Sesu neʼe “lahi tonatou maʼumaʼua ʼaki te palalau.” (Gāue 18:5) ʼI te mafola fakavilivili ʼo te gāue fai faka mafola, neʼe tonu leva ke ʼi ai ni hahaʼi fai faka mafola pea mo te ʼu tagata tauhi ōvi ʼe faiva moʼo lagolago kia nātou. Ko te ʼu tagata ʼaē kua māhani ʼi te felogoi mo te ʼu puleʼaga ʼo feiā aipe ki te ʼu tagata faiva ʼi te tokaga pea mo te vaevae ʼo te ʼu meʼa fakasino ʼaē neʼe ʼaoga. (Gāue 6:1-6; Ef. 4:11) Kapau ko ʼihi neʼe ʼiloa, neʼe lahi ia nātou ʼaē neʼe ū tanatou gāue. Kae ko nātou fuli neʼe ‘nātou fetolo mālohi,’ ʼo gāue tahi mo tonatou loto katoa ʼi te fakahoko ʼo te gāue.—Luka 13:24.
11 Logope la neʼe siʼisiʼi te ʼaoga ʼo te fai ʼo te gāue mālohi ʼi te malamanei katoa lolotoga te ʼu sēkulō ki muli mai, kae neʼe toe mālohi age te fai ʼo te gāue ʼo ʼuhiga mo te Puleʼaga ʼi te temi neʼe foaki age ai kia Sesu te mālohi ʼi tona Puleʼaga ʼi te taʼu 1914. ʼI te kamataʼaga, neʼe mahino ki te tokosiʼi ko te ʼaoga ʼo he kau gāue ʼe liliu anai ʼo maʼuhiga, ʼo fakamaʼua kiai te tokoni ʼa te lauʼi miliona hahaʼi ʼe lotolelei ʼi te ʼu fenua fuli ʼo te kele.
12 Ia ʼaho nei ʼe fai e te kautahi te ʼu fakatuʼutuʼu lahi ʼaupito ʼo ina fakaʼaogaʼi tona ʼu koloā ʼo aʼu ki tona gataʼaga. Ko te gāue ʼo te Puleʼaga ʼe mafola fakavilivili. Ko totatou ʼu temi maʼuhiga ʼe ina uga tatou ke tou foaki ia tatou pea ke tou fakaʼaogaʼi totatou ʼu koloā moʼo fakahoko ʼo te gāue ʼaē ʼe ʼaoga ke fai. ʼI te kua fakaōvi mai ʼo te fakaʼosi ʼo te tuʼu agakovi ʼo te ʼu faʼahiga meʼa ʼaenī, ʼe tou ʼamanaki nei ki he gāue ʼe lahi age ʼi te ʼaho ʼaē ka hoko mai. ʼE fakaafe te kau kaugana fuli ʼa Sehova ke nātou foaki ia nātou ʼaki te lotolelei ki te gāue ʼo ʼuhiga mo te tānaki ʼo te hahaʼi.
13 Koteā Te Meʼa ʼe ʼAoga Ke Fai? ʼE feala hatatou ʼui moʼoni ʼe “lahi ʼaupito te ʼu gāue ʼi te ʼAliki.” (1 Ko. 15:58) ʼE lahi te ʼu koga meʼa kua momoho ai te taʼukai, kae ʼe tokosiʼi te kau gāue. ʼE fakaafe tatou ke tou fai totatou maʼua ʼo mole gata pe ʼi tatatou gāueʼi fakalelei totatou telituale, kae ke tou foaki noa totatou temi moʼo gāue ʼi te koga meʼa ʼaē ʼe ʼaoga kiai he kau gāue.
14 ʼE fakaofoofo tatatou sio ki te kau Fakamoʼoni ʼi te ʼu koga meʼa kehekehe ʼo te kele ʼe nātou foaki noa tonatou temi ʼaki he lotolelei moʼo fai ʼo he tahi ʼu gāue. E lagi ʼe nātou foaki ia nātou ki te ʼu gāue laga fale ʼo ʼuhiga mo te tauhi, peʼe nātou gāue ʼi te ʼu fakatahi, pea mo nātou tokoni mokā hoko he ʼu tuʼutāmaki, peʼe nātou kau tuʼumaʼu ki te fakamaʼa ʼo te Fale ʼo te Puleʼaga ʼo tonatou kokelekasio. ʼO ʼuhiga mo te manatu fakamuli ʼe fakamanatuʼi mai ke tou fakamaʼa tuʼumaʼu te fale fono pea mo fakatokatoka lelei ʼi te ʼosi ʼo te ʼu fono fuli. Ko tatatou fai fakalelei te ʼu gāue ʼaia ʼe tou fakahā ai ʼe tou mahino lelei ki te ʼu palalau ʼa Sesu ʼaē ʼe tuʼu ia Luka 16:10: “Ko ʼaē ʼe agatonu ʼi te ʼu meʼa liliki ʼe toe agatonu pe foki ʼi te ʼu meʼa lalahi, pea ko ʼaē ʼe heʼe faitotonu ʼi te ʼu meʼa liliki ʼe toe heʼe faitotonu pe ʼi te ʼu meʼa lalahi.”
■ Tou Lagolago Ki Te ʼu Gāue ʼo Te Kokelekasio: Ko te ʼu kokelekasio fuli ʼe nātou fakatuʼutuʼu ko he kautahi faka malamanei pea ʼe nātou maʼu te takitaki mai “te tagata kaugana agatonu mo poto,” pea ʼe nātou faʼufaʼu foki te kau fai faka mafola ʼo te Puleʼaga. (Mat. 24:45) Ko te meʼa ʼe fakahoko e te kokelekasio ʼe lahi tona fakalogo ki te meʼa ʼe fia fai pea mo lotolelei kiai te kau fakamoʼoni. Ko te kokelekasio ʼe ina fakatokagaʼi te maʼuhiga ʼo te faka mafola ʼo te logo lelei ʼi te telituale ʼo totatou kokelekasio, ʼo fai he ʼu tisipulo pea mo fakamālohiʼi nātou ʼi te faʼahi fakalaumālie. ʼE feala ke tou kau takitokotahi ki te gāue ʼaia. ʼE feala foki ke tou fai he ʼu fakatuʼutuʼu ʼo ʼuhiga mo te ako takitokotahi ʼo te kokelekasio, mo te fai ʼo he ʼu tali ʼe lelei ʼi te ʼu fono, pea mo lagolago kia nātou ʼaē ʼe ʼaoga kiai he tokoni ʼi te kokelekasio. Ko te ʼu gāue ʼaia ʼe nātou foaki lahi mai he ʼu faigamālie ʼe lelei moʼo fakahā ʼo totatou lotolelei.
■ Ko Te ʼu Tagata Taupau ʼe Nātou Tuku Te Faʼifaʼitaki: Neʼe tuku e Sehova ki te ʼu tagata ʼāfea ʼaē neʼe fakanofo te fealagia ʼaē ke nātou tokakaga ki te ʼu kokelekasio. (Gāue 20:28) Ko te ʼu tagata ʼaia neʼe nātou faiga ke nātou fai te ʼu meʼa ʼaoga ke nātou maʼu te pilivilesio ʼaia. (1 Tim. 3:1) Ko te ʼu tēhina fuli ʼe feala ke nātou fai te meʼa ʼaē ʼe ʼaoga ke feala ai hanatou maʼu te ʼu maʼua ʼo lahi age. Tokolahi te ʼu tēhina ʼe nātou lolotoga tuputupu ʼi te faʼahi fakalaumālie pea ʼe ʼaoga ke nātou haga tuputupu ʼo mulimuli ki te takitaki mo te tokoni ʼofa ʼa te ʼu tagata ʼāfea ʼo te kokelekasio. ʼE tonu ke nātou ako mālohi te Tohi-Tapu pea mo tatatou ʼu tohi. ʼE feala ke nātou fakahā tonatou lotolelei ʼaki tanatou fakalogo ki te ʼu tagata ʼāfea ʼaē neʼe hinoʼi e te laumālie maʼoniʼoni, ʼo mulimuli ki tanatou tui, pea mo nātou fakatuputupu te ʼu kalitate ʼe tonu ke maʼu e te ʼu tagata taupau.—Hep. 13:7, 17.
■ Tou Kau Ki Te Gāue Katoa: Ko te gāue tāfito ʼa te ʼu kokelekasio ʼe ko te faka mafola ʼo te logo lelei. (Mat. 24:14) ʼE ko he tapuakina mokā ʼe gāue ni hahaʼi faiva ʼo nātou faiga ke nātou pionie! ʼE fakamaʼuaʼi ke nātou fetogi tonatou maʼuli. E lagi ʼaoga kia nātou he tahi ʼu fetogi moʼo hoko atu ʼi tanatou gāue makehe ʼaia. Kae ko nātou ʼaē ʼe nātou tuku ki muʼa te pilivilesio ʼo mole nātou tuku te gāue pionie ʼi te hili pe ʼo he taʼu e tahi peʼe lua ʼuhi pe ko he kiʼi lotovaivai ʼe lahi anai tonatou tapuakina e Sehova. Ko te ʼu tagata ʼāfea ʼofa pea mo ʼihi kua faiva ʼe feala ke nātou kau ki te fua lelei ʼo te gāue ʼa te kau pionie, ʼo nātou fakaloto mālohiʼi ia nātou ʼaki he ʼu palalau pea mo tanatou aga. ʼE ko he fakatuʼutuʼu lelei neʼe fakahā e te kau tūpulaga ʼaē ʼe nātou toʼo te gāue pionie ʼi te ʼosi ʼo tanatou ako! ʼO toe feiā aipe ki te hahaʼi lalahi ʼaē ʼe nātou toʼo te gāue pionie katoa mokā ʼe faka fealagia age e tonatou ʼu maʼua faka famili ke nātou ʼāteaina ʼo fai te faʼahi ʼaia. ʼE ko he fīmālie ʼe foaki e te gāue pionie ki te Kilisitiano mokā ʼe kau ki te gāue ʼo ʼuhiga mo te tānaki ʼo te hahaʼi ʼa Sehova ʼaē kua mafola!—Is. 60:22.
■ Tou Kau Ki Te Laga Fale Pea Mo Te Fakamaʼa ʼo Te ʼu Fale Fono: ʼE lauʼi teau te ʼu Fale ʼo te Puleʼaga pea mo te ʼu Fale ki te ʼu Fakatahi lalahi ʼaē ʼe laga. Ko he meʼa fakapuna’maʼuli, kua teitei fai pe te gāue katoa e ʼotatou ʼu tēhina pea mo tuagaʼane ʼaē ʼe nātou foaki tonatou temi ʼi tonatou lotolelei pea mo tanatou fealagia. (1 Fkma. 28:21) Ko te lauʼi afe hahaʼi ʼe nātou foaki noa tonatou temi ki te laga ʼo te ʼu fale ʼaia ʼo nātou fakahoko ai te faʼahiga gāue ʼaē ʼe ʼaoga ke fai ʼi ai. (2 Fkma. 34:8) Mai tona ʼaluʼaga ʼaē ko te gāue ʼaia ʼe ko he koga ʼo te gāue taputapu, ko nātou ʼaē ʼe nātou foaki ia nātou ki te gāue ʼaia ʼe nātou fai ʼi tonatou lotolelei, ʼe mole nātou fakaʼui ke totogi te meʼa ʼaē ʼe nātou fai, ohage ko tanatou faka mafola ʼi te ʼu ʼapi, tanatou fai te ʼu akonaki ki te hahaʼi ʼi tonatou kokelekasio, peʼe ko te gāue ʼi te ʼu fakatahi faka tisitilike pea mo te ʼu fakatahi faka silikosikilipisio. ʼE nātou foaki noa tonatou temi moʼo fai ʼo te ʼu gāue ohage ko te teuteuʼi ʼo he ʼu meʼa ʼo ʼuhiga mo te laga fale ʼo te ʼu fale ki te tauhi moʼo fakavikiviki kia Sehova. ʼE nātou foaki tanatou tokoni moʼo fai ʼo he ʼu meʼa ohage ko te fai ʼo te ʼu pepa, ko te tānaki ʼo te falā, ko te faka felogoi ʼo ʼuhiga mo te totogi ʼo te ʼu meʼa ʼaē ʼe ʼaoga, pea mo te ʼiloʼi ʼo te lahi ʼo te ʼu meʼa ʼe ʼaoga ʼaē ʼe tonu ke totogi. Ko te kau kaugana faitotonu ʼaia ʼa Sehova ʼe mole nātou fakamaʼua he falā ki te ʼu kokelekasio peʼe nātou kumi ke nātou maʼu he ʼu meʼa fakamālama mai ia nātou ʼi te ʼu gāue ʼaē ʼe nātou fai, koteʼuhi ko tanatou ʼu fealagia pea mo tanatou ʼu falā ʼe nātou foaki kia Sehova. Moʼo fakahoko lelei ʼo te gāue ʼaia ʼe ʼaoga ke mālohi te kau gāue ʼi tanatou gāue ʼaki tonatou “nefesi katoa ohage maʼa Sehova.”—Kol. 3:23.
15 Koteā te meʼa ʼaē ʼe makehe ʼaupito ai te lotolelei ʼa te hahaʼi ʼa Sehova? Ko tanatou foaki ʼo nātou. Ko tanatou manavaʼofa ʼo foaki ia nātou ʼe fakalaka ia ʼi te foaki pe ʼaē ʼo te falā peʼe ko te ʼu meʼa fakamālama—ʼe nātou “foaki fakamalotoloto ia nātou.” (Pes. 110:3) Ko te meʼa ʼaia ʼe ko te faka ʼuhiga tāfito ʼo tatatou voto ʼaē kia Sehova. ʼE tou maʼu ai te fakapale makehe. ʼE tou ʼiloʼi ʼe “lahi age te manuʼia” pea ʼe tou “utu fakalahi” koteʼuhi ʼe tou fai te meʼa ʼe leleiʼia e ʼihi, ʼaē ʼe nātou fakahā mai. (Gāue 20:35; 2 Ko. 9:6; Luka 6:38) Ko ia ʼaē ʼe ina foaki mai te ʼu meʼa ʼofa, ʼe ko totatou Tāmai ʼaē ʼe ʼi selo, ia Sehova, ʼaē ʼe “ ʼofa kia ia ʼaē ʼe ina foaki ʼaki te loto fiafia.” (2 Ko. 9:7) ʼE ina fakapale anai tatou ʼo tuʼa teau, ʼaki te ʼu tapuakina ʼe heʼegata anai. (Mal. 3:10; Lom. 6:23) Koia ka foaki atu he ʼu pilivilesio ʼi te gāue kia Sehova, ʼe koutou foaki lelei anai koa ia koutou totonu, pea mo koutou tali ohage ko te fai e Isaia: “Koʼeni ʼau! Fekauʼi ʼau”?—Is. 6:8.