E Feafeaʼi Hatatou Fai He ʼu Tisipulo ʼAki Te Tohi Te ʼAtamai Mālama
1 Ko he fakatuʼutuʼu ʼe lelei ke fai e te kau Kilisitiano fuli, ʼe ko te akoʼi ʼo te moʼoni ki te hahaʼi pea mo fai ni ʼu tisipulo ia nātou ʼaē ʼe “lotolelei ki te maʼuli heʼegata.” (Gāue 13:48; Mat. 28:19, 20) Neʼe foaki mai e te kautahi ʼa Sehova te meʼa gāue taulekaleka ke feala ai hatatou fakahoko te faʼahi ʼaia—ko te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Ko tona kupu tāfito ʼe ina fakahā te maʼuhiga ʼo te fai ʼo te ʼu ako Tohi-Tapu, koteʼuhi ko te maʼuli heʼegata ʼe fakalogo ki te maʼu ʼo te ʼatamai mālama ʼo ʼuhiga mo Sehova, te ʼAtua moʼoni pe e tahi, pea mo tona ʼAlo, ia Sesu Kilisito.—Soane 17:3.
2 Ko te tohi Te ʼAtamai Mālama, ʼe ko te tohi tāfito ʼaia ʼaē ʼe fakaʼaogaʼi e te Sosiete ʼi te temi nei moʼo fai ʼo te ʼu ako Tohi-Tapu. ʼI tatatou fakaʼaogaʼi te tohi ʼaia, ʼe feala ke faigafua ai tatatou fakahā ia te moʼoni, mo matala pea mo mahino lelei, pea mo fakanounou. Ko te faʼahi ʼaia ʼe tokoni anai kia tatou ke tou fakalave te moʼoni ki te loto ʼo nātou ʼaē ʼe tou akoʼi. (Luka 24:32) ʼE mahino ia, ʼe tonu anai ke poto lelei ia ia ʼaē ʼe ina fai te ako. Koia la ʼaē neʼe teuteuʼi ai te pepa ʼaenī, ke ina foaki he ʼu tokoni pea mo he ʼu fakamanatu ʼo ʼuhiga mo te ʼu faʼahiga fai ʼo te ako ʼaē ʼe fua lelei. ʼAki te fakasiosio poto, pea ʼo mulimuli pe ki te ʼu ʼaluʼaga ʼo te hahaʼi takitokotahi, ʼe lagi feala ke koutou mulimuli māmālie ki ʼihi ʼu tokoni ʼi te ʼu tokoni ʼaenī peʼe ko te ʼu tokoni fuli ʼaē ʼe fakahā atu ʼi te pepa ʼaenī. Koutou taupau maʼu te pepa ʼaenī, pea koutou fakaʼaogaʼi tuʼumaʼu. Ko te ʼu puani kehekehe ʼaē ʼe tuʼu ʼi te pepa ʼaenī ʼe feala ke tokoni kia koutou ke lelei age takotou fakaʼaogaʼi te tohi Te ʼAtamai Mālama moʼo fai ʼo ni ʼu tisipulo.
3 Tou Fai He Ako Tohi-Tapu ʼe Tuputupu: Tou tokagaʼi moʼoni ko ia ʼaē ʼe tou fai tana ako, ʼe feala ke liliu ko he Kilisitiano pea mo he tēhina pe ko he tuagaʼane fakalaumālie. Tou loto māfana, tou aga fakakaumeʼa, pea mo tou fiafia. Kapau ʼe koutou fakalogo lelei, pea ʼe feala anai hakotou ʼiloʼi lelei ia ia ʼaē ʼe koutou fai tana ako—tona fenua pea mo te ʼaluʼaga ʼo tona maʼuli—pea ʼe tokoni anai te faʼahi ʼaia kia koutou ke koutou ʼiloʼi peʼe feafeaʼi anai hakotou tokoni lelei ki ai ʼi te faʼahi fakalaumālie. Koutou lotolelei ʼo fakaʼaogaʼi hokotou temi kia ia ʼaē ʼe koutou fai tana ako.—1 Tes. 2:8.
4 Kapau kua fakatuʼutuʼu te ako Tohi-Tapu, pea ʼe lelei age ke fai te ako ʼo mulimuli ki te fefakahoahoaʼaki ʼo te ʼu kapite ʼo te tohi Te ʼAtamai Mālama. Ko te faʼahi ʼaia ʼe ina faka fealagia ai anai kia ia ʼaē ʼe ako ke tuputupu māmālie tana mahino ki te moʼoni, koteʼuhi ʼe fefakahoahoa lelei ʼaki te ʼu akonaki faka Tohi-Tapu. Koutou faigaʼi ke fai te ako pea mo lelei, ke maʼuli te ako ʼaia pea mo haʼele ki muʼa. (Loma 12:11) ʼO mulimuli ki te ʼu ʼaluʼaga pea mo te ʼu fealagia ʼo ia ʼaē ʼe ako, ʼe lagi feala ke koutou fai he kapite ʼi te hola katoa ʼaē ʼe koutou fai ai te ako, ʼo mole koutou fai fakavilivili te ako. Ko te kau ako Tohi-Tapu ʼe nātou tuputupu lelei anai mo kapau ko ia ʼaē ʼe ina fai te ako pea mo ia ʼaē ʼe ako ʼe nā fakatuʼutuʼu ke fai tuʼumaʼu te ako ʼi te vāhaʼa fuli. Koia, ʼe feala ke fai te ʼu kapite e 19 mo te hahaʼi tokolahi ia māhina e ono peʼe laka atu.
5 Koutou ʼuluaki kamata te ako ʼaki he ʼu palalau ʼe uga ai te fia mahino ʼo ia ʼaē ʼe ako ki te kapite ʼaē ka koutou vakaʼi. ʼE koutou fakatokagaʼi anai te kupu tāfito ʼo te ʼu kapite fuli, ʼaē ʼe tonu ke faka maʼuhigaʼi. Ko te ʼu kupu tāfito fuli ʼo te ʼu palakalafe, ʼe nātou fakahā he puani maʼuhiga, pea ʼe tokoni anai kia koutou ke koutou taupau maʼu te kupu tāfito ʼo te kapite. Koutou tokakaga ke ʼaua naʼa lahi fau te ʼu meʼa ʼaē ʼe koutou palalau kiai. Kae, koutou faigaʼi ke palalau ia ia ʼaē ʼe koutou fai tana ako. Koutou fai he ʼu fehuʼi ke faka fealagia ai kia ia, ke ina fai atu hana tali ʼe fakatafito ki te ʼu meʼa ʼaē kua ina ʼiloʼi, pea ʼe tokoni anai te ʼu fehuʼi ʼaia kia ia ke ina fakakaukauʼi pea mo ina maʼu te ʼu manatu ʼaē ʼe totonu. (Mat. 17:24-26; Luka 10:25-37; vakaʼi te tohi Manuel pour l’École, ʼi te pasina 50, ʼi te palakalafe 10.) Koutou palalau tāfito ki te ʼu manatu ʼaē ʼe tuʼu ʼi te tohi Te ʼAtamai Mālama. Kapau ʼe koutou hilifaki kiai he tahi ʼu manatu, pea ʼe feala ke faigataʼa ai te mahino ki te ʼu puani tāfito pea mo loaloaga ai te fai ʼo te ako. (Soane 16:12) Kapau ʼe lagaʼi he fehuʼi ʼe mole hona pikipikiga mo te kapite ʼaē ʼe ako, ʼe lagi lelei age ke hoki tali kiai ʼi te ʼosi ʼo te ako. Kapau ʼe koutou fai feiā, pea ʼe feala anai ke koutou fai katoa te ako, ka mole koutou tuʼu fualoa ʼi he meʼa ʼe mole hona pikipikiga mo te ako. Koutou fakamahino kia ia ʼaē ʼe ako ʼe lahi te ʼu fehuʼi ʼaē ʼe ina lagaʼi ʼe tali anai kiai te tohi ʼaē ʼe koutou ako mo ia.—Vakaʼi te tohi Manuel pour l’École, ʼi te pasina 94, ʼi te palakalafe 14.
6 Kapau ʼe tui mālohi ia ia ʼaē ʼe ako ki te Tahitolu, te maʼuli tuputupua ʼo te nefesi, ki te ʼifeli, peʼe ko he tahi ʼu akonaki hala, pea kapau ʼe mole feʼauga te ʼu tali ʼaē ʼe ina maʼu ʼi te tohi Te ʼAtamai Mālama ʼo ʼuhiga mo te ʼu faʼahi ʼaia, pea ʼe lagi feala ke koutou foaki age te tohi Comment raisonner peʼe ko he tahi age tohi ʼe talanoa ai ki te ʼu faʼahi ʼaia. Koutou ʼui age ki ai ʼe koutou palalau anai mo ia ki te ʼu faʼahi ʼaia kae ʼe tonu muʼa ke ina lau te ʼu tohi pea mo ina fakakaukauʼi te ʼu meʼa ʼaē neʼe ina lau.
7 Ko te kamata pea mo te fakaʼosi ʼo te ako ʼaki te faikole moʼo kole te takitaki ʼa Sehova pea mo tana tapuakina, ʼe ko he faʼahi ʼe ina faka maʼuhigaʼi ai te ako, ʼe ina fakahā mai ai kia tatou ʼe tonu ke tou fakaʼapaʼapa ki te ako ʼaia, pea ʼe ina fakatokagaʼi mai ʼe ko Sehova ʼaē te Faiakonaki moʼoni. (Soane 6:45) Kapau ʼe kei suluka ia ia ʼaē ʼe ako, ʼe lagi feala ke koutou kole kia ia ke mole suluka ʼi te lolotoga fai ʼo te ako.—Gāue 24:16; Sake 4:3.
8 Tou Fai Fakalelei Te Ako ʼAki Te Tohi-Tapu, Te ʼu Lea Fakatā, Pea Mo Te Toe Fakamanatu: Tatau aipe peʼe kua tuʼa lahi tana vakaʼi te ʼu kapite ʼo te tohi, kae ko ia ʼaē kua poto lelei ʼi te fai ʼo te ʼu ako, ʼe ina vakaʼi fakatomuʼa anai te kapite ʼaē ka akoʼi, ʼo ina fakakaukauʼi pe koteā te meʼa ʼaē ka ʼaoga tāfito anai kia ia ʼaē ʼe ako. Ko te faʼahi ʼaia ʼe tokoni anai kia ia ke ina ʼiloʼi fakatomuʼa pe koteā te ʼu fehuʼi ʼaē ʼe feala ke lagaʼi e ia ʼaē ʼe ako. Kapau ʼe koutou loto ke lelei takotou fai te ako, pea ʼe tonu ke koutou mahino lelei ki te ʼu puani tāfito ʼo te kapite. Koutou vakaʼi te ʼu vaega ke koutou ʼiloʼi ai pe koteā tona pikipikiga mo te ʼu meʼa ʼaē ʼe talanoa kiai te kapite, pea mo koutou vakaʼi pe ko te ʼu vaega fea ʼaē ka lau lolotoga te ako. Koutou fakakaukauʼi peʼe lava feafeaʼi hakotou fakaʼaogaʼi te ʼu lea fakatā pea mo te ʼu fehuʼi moʼo fai ʼo he fakamanatu ʼi te fakaʼosi ʼo te kapite.
9 Kapau ʼe koutou fakaʼaogaʼi lelei te ʼu vaega, pea ʼe koutou tokoni anai kia ia ʼaē ʼe ako ke mahino kia ia ʼe ina ako moʼoni te Tohi-Tapu. (Gāue 17:11) Koutou fakaʼaogaʼi te talanoa ʼo te pasina 14 ʼo te tohi Te ʼAtamai Mālama ʼaē ko tona kupu tāfito ʼaenī “Ke Koutou Fakamāmāhani Mo Takotou Tohi-Tapu,” moʼo akoʼi kia ia peʼe feafeaʼi te maʼu ʼo te ʼu vaega faka Tohi-Tapu. Koutou fakahā age ki ai peʼe feafeaʼi hana fakakeheʼi te ʼu vaega ʼaē kua tohi ʼi te ʼu palakalafe. Kapau ʼe maʼu he temi, pea koutou kumi te ʼu vaega ʼaē ʼe hinoʼi atu pea mo koutou lau. Koutou kole age kia ia ʼaē ʼe koutou fai tana ako, ke ina tala atu peʼe lagolago feafeaʼi te ʼu vaega ʼaia ki te ʼu palakalafe, pea e feafeaʼi tanatou tokoni ke matala lelei. Koutou faka maʼuhigaʼi te ʼu puani tāfito ʼo te ʼu vaega ke feala hana mahino pe koteā te tupuʼaga ʼo tatatou ʼui ʼaē ʼe ko te ʼu puani tāfito ʼaia ʼo te kapite. (Neh. 8:8) ʼI te agamāhani, ʼe mole ʼaoga ke hilifaki ʼe ia ʼaē ʼe ina fai te ako, he tahi ʼu vaega ki te ʼu vaega ʼaē kua tuʼu ʼi te tohi. Koutou fakamahinohino age ʼe maʼuhiga ke ina ʼiloʼi te ʼu higoa ʼo te ʼu tohi ʼo te Tohi-Tapu pea mo ina ʼiloʼi te fefakahoahoaʼaki ʼo te ʼu tohi ʼaia ʼi te Tohi-Tapu. ʼE lagi ʼaoga anai kia ia ʼaē ʼe ako ke ina lau Te Tule Leʼo fakafalani ʼo te ʼaho 15 ʼo Sūnio 1991 ʼi te pasina 27 ki te 30. Mokā ʼe ʼaoga, koutou fakaloto mālohiʼi ia ia ke ina fakaʼaogaʼi te Tohi-Tapu Traduction du monde nouveau. ʼE feala hakotou fakahā māmālie kia ia peʼe feafeaʼi te fakaʼaogaʼi ʼo te ʼu koga kehekehe ʼo te Tohi-Tapu ʼaia, ohage ko te ʼu vaega ʼaē ʼe tuʼu ʼi te lotomalie ʼo te ʼu pasina, pea mo te kumiʼaga ʼo te ʼu kupu ʼo te Tohi-Tapu.
10 Ko te ako 34 ʼi te tohi Manuel pour l’École du ministère théocratique, ʼe ina fakamahino ko te ʼu lea fakatā ʼe nātou uga te fakakaukau ʼa he tahi ke tuputupu pea ke faigafua tana mahino ki te ʼu manatu foʼou. ʼE nātou fakapipiki tona ʼatamai ki te ʼu meʼa ʼaē ʼi tona loto, koia ko te logo ʼaia ʼe fakahoko ʼaki he mālohi ʼe mole maʼu ʼaki pe he ʼu faʼahiga palalau feiā. (Mat. 13:34) ʼE lahi te ʼu lea fakatā ʼi te tohi Te ʼAtamai Mālama ʼe faigafua kae ʼe mālohi. Ohage la, ko te lea fakatā ʼaē ʼe fakaʼaogaʼi ʼi te kapite 17, ʼe ina uga tatou ke tou loto fakafetaʼi ki te foaki mai e Sehova ʼi te faʼahi fakalaumālie, te meʼa kai, te ʼu mutuʼi meʼa, pea mo tana puipui ia tatou ʼaki te kokelekasio faka Kilisitiano. Ko te ʼu paki matalelei ʼo te tohi Te ʼAtamai Mālama, ʼe feala ke fakaʼaogaʼi fakalelei moʼo uga te loto ʼo ia ʼaē ʼe ako. ʼI te kupu tāfito “Ko Te Fakatuʼuake Fakafiafia,” ʼi te pasina 185, ko te palakalafe 18 ʼe ina fakamālohiʼi ia ia ʼaē ʼe ako ke ina toe vakaʼi te paki ʼo te pasina 86. Ko te faʼahi ʼaia ʼe feala ke ina uga ia ia ke ina manatuʼi ko te fakatuʼuake ʼe ko he meʼa ʼe hoko moʼoni anai ʼi te Puleʼaga ʼo te ʼAtua.
11 ʼI te ʼu kapite fuli ʼaē ʼe nātou ako, ʼe tonu ke tuputupu ai te kau ako ʼo te Tohi-Tapu ʼi te faʼahi fakalaumālie. ʼO ʼuhiga mo te faʼahi ʼaia, ke ʼaua naʼa galo ia koutou ke koutou toe vakaʼi te ʼu fehuʼi ʼi te talanoa ʼaenī “Te Sivi ʼo Tokotou ʼAtamai Mālama” ʼaē ʼe tuʼu ʼi te fakaʼosi ʼo te ʼu kapite fuli. ʼE mole tonu kia ia ʼaē ʼe ina fai te ako ke gata ʼaki pe tana lagaʼi ia te fehuʼi pea mo fakalogo ki te tali. ʼE lahi te ʼu fehuʼi ʼi te tohi ʼaia neʼe fai moʼo uga ʼo ia ʼaē ʼe ako ke feala hana fakahā te meʼa ʼaē ʼe ʼi tona loto. Ohage la, koutou vakaʼi te pasina 31, pe koteā te manatu ʼa ia ʼaē ʼe ako ki te fehuʼi ʼaenī: “Ko te ʼu kalitate fea ʼo Sehova ʼAtua ʼaē ʼe koutou leleiʼia tāfito?”—2 Ko. 13:5.
12 Tou Akoʼi Te Kau Ako Tohi-Tapu ʼo ʼUhiga Mo Te Teuteuʼi ʼo Tanatou Ako: Ko he tahi ʼe ako ʼe ina lau fakatomuʼa te kapite ʼaē ka ina ako, ʼo ina fakaʼiloga te ʼu tali, pea mo ina fakakaukauʼi peʼe feafeaʼi hana fakahā ʼi tana faʼahiga palalau māhani, ʼe vave anai tana tuputupu ʼi te faʼahi fakalaumālie. ʼAki takotou faʼifaʼitaki pea mo takotou palalau fakaloto mālohi, ʼe feala ke koutou ako ia ia ke ina teuteuʼi tana ako. Koutou fakahā age kia ia takotou tohi, ʼaē neʼe koutou fakaʼiloga ai te ʼu kupu tāfito pea mo te ʼu manatu tāfito. Koutou fakamahino age peʼe feafeaʼi te maʼu ʼo te ʼu tali fakahagatonu ʼo ʼuhiga mo te ʼu fehuʼi ʼaē ʼe tuʼu ʼi te tohi. ʼE lagi ʼaoga anai kia ia ʼaē ʼe ako, ke koutou teuteuʼi fakatahi mo ia he kapite. Koutou fakaloto mālohiʼi ia ia ke ina fai he ʼu tali ʼaki tana faʼahiga palalau māhani. ʼE hoki koutou fai te faʼahi ʼaia mo ia, mo kapau kua mahino lelei ki te meʼa ʼaē ʼe ina ako. Kapau ʼe ina lau te tali ʼaē ʼe tuʼu ʼi te tohi, ʼe feala ke koutou uga tana fakakaukau ʼo koutou fehuʼi age kia ia peʼe feafeaʼi anai hana fakamahino ki he tahi te meʼa ʼaē ʼe ina ako.
13 Koutou fakaloto mālohiʼi ia ia ʼaē ʼe ako, mokā ʼe ina teuteuʼi tana ako ʼo te vāhaʼa, ke ina vakaʼi te ʼu vaega ʼaē ʼe tohi ʼi te kapite, heʼe mole feala ke tou lau fuli te ʼu vaega ʼaia lolotoga te ako. Koutou fakamālo kia ia ʼo ʼuhiga mo tana ʼu faiga ʼaē ʼe ina fai moʼo teuteuʼi tana ako. (2 Pe. 1:5; vakaʼi Te Tule Leʼo ʼo te ʼaho 15 ʼo ʼAukusito 1993, ʼi te pasina 13 ki te 14, mo kapau ʼe koutou fia maʼu he tahi ʼu manatu ʼo ʼuhiga mo te meʼa ʼaē ʼe feala ke fai e ia ʼaē ʼe ina fai te ako pea mo ia ʼaē ʼe ako, moʼo fakatuputupu tana ako ʼo te Tohi-Tapu.) Kapau ʼe koutou fai feiā, pea ʼe feala ai leva kia ia ʼaē ʼe ako ke poto lelei ʼi te teuteuʼi ʼo tana ʼu fono, pea mo poto ʼi te fai ʼo he ʼu tali ʼi te ʼu fono ʼo te kokelekasio. ʼE ina akoʼi anai peʼe feafeaʼi hana fakatuputupu tana ako tokotahi ʼo te Tohi-Tapu, he ko te ako ʼaia ʼe ina faka fealagia anai kia ia ke ʼāsili tana tuputupu ʼi te moʼoni ʼi te hili ʼo tana ako katoa te tohi Te ʼAtamai Mālama.—1 Tim. 4:15; 1 Pe. 2:2.
14 Tou Takitaki Te Kau Ako Tohi-Tapu Ki Te Kautahi ʼa Sehova: Ko te maʼua ʼo te tisipulo ko te takitaki ʼo te kau ako Tohi-Tapu ʼaē ʼe fia logo ki te moʼoni ke nātou ʼōmai ki te kautahi ʼa Sehova. ʼE vave anai te tuputupu ʼo ia ʼaē ʼe ako Tohi-Tapu, mo kapau ʼe mahino pea mo ina leleiʼia te kautahi pea mo ina ʼiloʼi ʼe tonu ke kau ia kiai. ʼE tou loto ke ina maʼu te fiafia ʼi te fakatahitahi mo te hahaʼi ʼa te ʼAtua, pea mo fakatahitahi mo tatou ʼi te Fale ʼo te Puleʼaga, ʼaē ʼe feala ke ina maʼu ai te tokoni fakalaumālie ʼaē ʼe foaki e te kokelekasio faka Kilisitiano.—1 Tim. 3:15.
15 Ko te kaupepa Te Kau Fakamoʼoni ʼa Sehova—Logo Tahi Moʼo Fai ʼo Te Finegalo ʼo Te ʼAtua ʼi Te Malamanei neʼe fai ke ʼiloʼi lelei e te hahaʼi te kautahi fakahāhā ʼa Sehova ʼaē ʼe ina fakaʼaogaʼi ʼi te temi nei moʼo fakahoko ʼo tona finegalo. Kapau kua koutou fakatuʼutuʼu te ako, he koʼe koa ʼe mole koutou foaki kia ia ʼaē ʼe ako he kaupepa feiā? ʼI te kamata, koutou fakaafe ia ia ʼaē ʼe ako ke kau ki te ʼu fono. Koutou fakamahino age ki ai peʼe feafeaʼi te fakaʼaluʼalu ʼo te ʼu fono. ʼE feala ke koutou ʼui age ki ai te kupu tāfito ʼo te akonaki ʼaē ka fai ki te kaugamālie ʼi te vāhaʼa ka haʼu, peʼe koutou fakahā age ki ai te alatike ʼaē ka tou vakaʼi ʼi te ako ʼo Te Tule Leʼo. ʼI te ʼu ʼaho ʼaē ʼe mole ʼi ai he fono, ʼe lagi feala ke koutou ʼave ia ia ʼo fakamamata ki te Fale ʼo te Puleʼaga, ke ʼaua naʼa ina tuʼaniaʼi tana ʼuluaki ʼalu ki te fono. ʼE lagi feala ke koutou feʼāveʼaki ia ia ki te ʼu fono. Ka haʼu ki te ʼu fono, koutou faiga ke ina logoʼi ʼe tali lelei ia ia pea ke mole tuʼania ki he meʼa. (Mat. 7:12) Koutou fakahā ia ia ki niʼihi kau Fakamoʼoni, ʼo kau ki ai mo te kau tagata ʼāfea. ʼE mahino ia, ʼe ina kamata faka ʼuhiga anai te kokelekasio ohage ko hona famili fakalaumālie. (Mat. 12:49, 50; Maleko 10:29, 30) ʼE feala ke koutou fai he fakatuʼutuʼu ʼo ʼuhiga mo ia, ohage la ko hona uga ke kau ki he fono e tahi ʼi te vāhaʼa fuli, pea ʼaki te temi ke koutou fai he tahi ʼu fakatuʼutuʼu ʼo ʼuhiga mo ia.—Hep. 10:24, 25.
16 ʼI te tuputupu ʼo te ako Tohi-Tapu ʼaki te tohi Te ʼAtamai Mālama, koutou faka maʼuhigaʼi te ʼu koga ʼaē ʼe fakahā ai te maʼuhiga ʼaē ke kau tuʼumaʼu ki te ʼu fono ʼo te kokelekasio. Koutou fakatokagaʼi tāfito kia ia te pasina 52, 115, 137 ki te 139, 159, ʼo feiā aipe mo te kapite 17. Koutou fakahā age takotou loto fakafetaʼi ki te kautahi ʼa Sehova. (Mat. 24:45-47) Koutou palalau fakalelei ʼo ʼuhiga mo te kokelekasio pea mo koutou palalau age ʼo ʼuhiga mo te ʼu meʼa ʼaē ʼe koutou ako ʼi te ʼu fono. (Pes. 84:10; 133:1-3) ʼE ko he meʼa lelei anai kia ia ʼaē ʼe ako, ke ina sioʼi te ʼu foʼi fime ʼa te Sosiete, ʼo kamata ʼaki te foʼi fime ʼaenī Les Témoins de Jéhovah: un nom, une organisation. Kapau ʼe koutou fia maʼu he tahi age ʼu manatu ʼo ʼuhiga mo te tokoniʼi ʼo he tahi ʼe ina fia ʼiloʼi te moʼoni ke haʼu ki te kautahi, koutou vakaʼi Te Tule Leʼo ʼo te ʼaho 1 ʼo Malesio 1985, ʼi te pasina 22 ki te 26, pea mo te pepa ʼaē ʼe ʼalutahi mo Te Minisitelio ʼo Te Puleʼaga ʼo ʼApelili 1993.
17 Tou Fakaloto Mālohiʼi Te Kau Ako Tohi-Tapu Ke Nātou Fai Faka Mafola Ki Te Hahaʼi: Ko tatatou fakatuʼutuʼu ʼe ko te akoʼi ʼo te hahaʼi ke nātou liliu ko he ʼu tisipulo ʼe fagonogono ʼo ʼuhiga mo Sehova. (Is. 43:10-12) Ko tona faka ʼuhiga, ko ia ʼaē ʼe ina fai te ako ʼe tonu ke ina fakaloto mālohiʼi ia ia ʼaē ʼe ako ke palalau ki te hahaʼi ʼo ʼuhiga mo te ʼu meʼa ʼaē ʼe ina ako ʼi te Tohi-Tapu. Ko te meʼa ʼaia ʼe feala ke koutou fai ʼo lagaʼi te fehuʼi ʼaenī, “ ʼE feafeaʼi anai hau fakamahino te moʼoni ki tou famili?” peʼe “Ko te vaega fea ʼo te Tohi-Tapu ʼe ke fakaʼaogaʼi anai moʼo fakamoʼoni ʼo te faʼahi ʼaenī ki hou kaumeʼa?” Koutou fakahā age te ʼu pasina ʼo te tohi Te ʼAtamai Mālama ʼaē ʼe fakaloto mālohiʼi tāfito ai te fai faka mafola, ohage ko te pasina 22, 93 ki te 95, 105 ki te 106, ʼo feiā aipe mo te kapite 18. Kapau kua feala, pea ʼe foaki anai kia ia he ʼu kiʼi pepa lotu, ke ina fakaʼaogaʼi ʼi te fagonogono faigamālie ki te hahaʼi. Koutou ʼui age ki ai ke ina fakaafe tona famili ke nātou kau ki tana ako. ʼE ʼi ai koa hona ʼu kaumeʼa ʼe nātou fia ako te Tohi-Tapu? Koutou ʼui age ki ai ke ina fakaʼilo koutou kia nātou ʼaē ʼe nātou fia ako te moʼoni.
18 Kapau ʼe kau ki te Ako ʼo Te Minisitelio Faka Teokalatike pea mo te Fono Gāue, pea ʼe feala ke foaki kia ia he tahi ʼu tokoni pea mo he tahi ʼu fakaloto mālohi, ʼe tokoni anai kia ia ke liliu ko he kaugana fai faka mafola ʼo te logo lelei. Kapau ʼe ina fakahā mai kua fia kau ki te ako peʼe fia liliu ko he kaugā fagona, pea ʼe tonu anai ke ina maʼuliʼi te ʼu tokoni faka Tohi-Tapu ʼaē ʼe tuʼu ʼi te pasina 98 pea mo te 99 ʼo te tohi Notre ministère. Kapau ʼe ʼi ai he aga ʼi tona maʼuli ʼe tonu ke ina fakatonutonuʼi, ʼe feala ke koutou kumi ʼi te ʼu tohi ʼa te Sosiete he alatike ʼe ʼaoga ki te faʼahi ʼaia pea mo koutou vakaʼi fakatahi mo ia te meʼa ʼaē ʼe tuʼu ʼi ai. Ohage la, ʼe lagi ko he meʼa faigataʼa kia ia hana tuku tana suluka, peʼe ko te fakaʼaogaʼi ʼo te toloke. ʼE maʼu ʼi te tohi Comment raisonner te ʼu vaega faka Tohi-Tapu, ʼe nātou fakahā lelei ai pe koʼe ʼe līaki e te kau Kilisitiano te ʼu meʼa ʼaia, pea ʼi te pasina 112 ʼe faka maʼuhigaʼi ai te ʼu puani ʼe feala ke tokoni ki te hahaʼi ke nātou līaki te ʼu meʼa kovi ʼaia. Koutou faikole mo ia ʼo ʼuhiga mo te faʼahi ʼaia, pea mo koutou akoʼi ia ia ke falala ki te tokoni ʼa Sehova.—Sake 4:8.
19 Ko te meʼa ʼaē ʼe tonu ke koutou mulimuli kiai, kapau ʼe koutou fia ʼiloʼi peʼe kua feala ki he tahi ke kau ki te gāue fai faka mafola, ʼe koutou maʼu ʼi Te Tule Leʼo ʼo te ʼaho 15 ʼo Sanualio 1996, ʼi te pasina 16, ʼi te palakalafe 6. Kapau kua feala hana kau ki te fai faka mafola, pea ʼe lagi lelei anai ke koutou fai he ʼu faʼifaʼitaki ke feala ai hana ʼiloʼi peʼe feafeaʼi anai tana faka mafola ʼi te ʼuluaki ʼaho. ʼI te faʼahi ʼaia, koutou palalau mo ia ʼo ʼuhiga mo te ʼu agaaga ʼa te hahaʼi ʼo te telituale pea mo te ʼu meʼa māhani ʼaē ʼe nātou ʼui mai. Kapau ʼe feala, pea ʼe lelei ke koutou kamata muʼa mo ia te fai faka mafola ʼi te ʼu ʼapi, pea ʼaki te temi koutou fakahāhā age kia ia te tahi ʼu faʼahi ʼo te minisitelio. Kapau ʼe koutou faiga ke nounou takotou ʼuluaki palalau pea mo faigafua, pea ʼe faigafua anai kia ia hana faʼifaʼitaki kiai. Koutou fakaloto mālohiʼi ia ia, ʼo koutou fiafia ʼi te fai faka mafola, ke feala hana mahino ʼe koutou fiafia, pea mo ina faʼifaʼitakiʼi. (Gāue 18:25) ʼE tonu ke fakatuʼutuʼu te tisipulo foʼou ke kau tuʼumaʼu ki te gāue, ke liliu ko he kaugā fai faka mafola faiva ʼo te logo lelei. ʼE lagi feala hakotou tokoni kia ia ke ina fai hana polokalama ʼe lelei ʼo ʼuhiga mo te gāue. Ke feala hana tuputupu ʼi tana ʼu fealagia ʼi te fai faka mafola ki te hahaʼi, ʼe lagi feala hakotou tokoniʼi ia ia ke ina lau te ʼu alatike ʼo Te Tule Leʼo fakafalani ʼo te ʼaho 15 ʼo Novepeli 1984, ʼi te ʼu pasina 15 ki te 25; te ʼaho 15 ʼo Sūlio 1988, ʼi te pasina 9 ki te 20; te ʼaho 15 ʼo Sanualio 1991, ʼi te pasina 15 ki te 20; pea mo te ʼaho 1 ʼo Sanualio 1994, ʼi te pasina 20 ki te 25.
20 Tou Uga Te Kau Ako Tohi-Tapu Ke Nātou Foaki Tonatou Maʼuli Ki Te ʼAtua Pea Mo Papitema: ʼE feala anai ki he tahi ʼe ako ʼaki te lotolelei, ke feʼauga tana ako ʼi te tohi Te ʼAtamai Mālama ke ina foaki tona maʼuli ki te ʼAtua pea mo papitema. (Vakaʼi ia Gāue 8:27-39; 16:25-34.) Kae, ʼi muʼa ʼo te uga ʼo he tahi ke ina foaki tona maʼuli ki te ʼAtua, ʼe ʼaoga kia ia ke ina fakatuputupu tona ʼofa kia Sehova. (Pes. 73:25-28) ʼAki te ako ʼaia, koutou kumi he ʼu fealagia ke koutou fakatupu ia ia he ʼofa ki te ʼu kalitate ʼo Sehova. Koutou fakahā takotou ʼofa lahi ʼaē ki te ʼAtua. Koutou tokoni kia ia ʼaē ʼe ako ke fakatuputupu tana ʼu felogoi ʼaē mo Sehova. ʼAki te temi, kua ina ʼiloʼi lelei te ʼAtua pea mo ʼofa kia te ia, pea ʼe tauhi agatonu anai kia te ia, heʼe ko te aga faka lotu ʼe pipiki ki tatatou ʼofa kia Sehova.—1 Tim. 4:7, 8; vakaʼi te tohi Manuel pour l’École, ʼi te pasina 75, ʼi te palakalafe 11.
21 Koutou faigaʼi ke koutou fakalave te moʼoni ki te loto ʼo ia ʼaē ʼe ako. (Pes. 119:11; Gāue 16:14; Loma 10:10) ʼE tonu ke ina tokagaʼi peʼe lave feafeaʼi te moʼoni ki tona maʼuli, pea mo ina vakaʼi pe koteā te meʼa ʼaē ʼe tonu ke ina fai ʼo ʼuhiga mo te ʼu meʼa ʼaē kua ina ako. (Loma 12:2) ʼE tui moʼoni koa ki te moʼoni ʼaē ʼe fakahā age kia ia ʼi te vāhaʼa fuli? (1 Tes. 2:13) ʼO ʼuhiga mo te faʼahi ʼaia, ʼe feala ke koutou ʼiloʼi tana manatu ʼo koutou fai age ki ai he ʼu fehuʼi, ohage ko te ʼu fehuʼi ʼaenī: Koteā tau manatu ʼo ʼuhiga mo te faʼahi ʼaenī? ʼE lava feafeaʼi hau fakaʼaogaʼi ʼi tou maʼuli? ʼAki tana ʼu tali ʼe feala ke koutou ʼiloʼi ai pe koteā te faʼahi tāfito ʼaē ʼe ʼaoga ke koutou tokoniʼi ai ke lave te moʼoni ki tona loto. (Luka 8:15; vakaʼi te tohi Manuel pour l’École, ʼi te pasina 50, ʼi te palakalafe 11.) Ko te talanoa ʼo te ʼu paki ʼo te pasina 172 pea mo te 174 ʼo te tohi Te ʼAtamai Mālama ʼe fehuʼi fēnei ai: “Neʼe kua foaki koa tokotou maʼuli ki te ʼAtua ʼi te faikole?” pea “Koteā koa te ʼu meʼa ʼaē ʼe nātou tāʼofi koutou ke ʼaua naʼa koutou papitema?” Ko te ʼu faʼahi ʼaia ʼe feala ke nātou uga ia ia ʼaē ʼe ako ke ina fai he meʼa.
22 Ko te meʼa ʼaē ʼe tonu ke fai mo kapau kua fia papitema he tahi, ʼe fakahā ʼi Te Tule Leʼo ʼo te ʼaho 15 ʼo Sanualio 1996, ʼi te pasina 17, ʼi te palakalafe 9. Ko te tohi Te ʼAtamai Mālama neʼe fakatuʼutuʼu moʼo teuteuʼi ia ia ʼaē ʼe ako ke ina tali ki “Te ʼu fehuʼi kia nātou ʼaē ʼe fia papitema” ʼe maʼu ʼi te tohi Notre ministère, pea ʼe vakaʼi anai e te ʼu tagata ʼāfea mo ia. Kapau ʼe koutou faka maʼuhigaʼi te ʼu tali tāfito ʼo te tohi Te ʼAtamai Mālama, ʼe mahino ia ʼe feala anai kia ia ʼaē ʼe koutou ako, ke tali lelei ki te ʼu fehuʼi ʼaē ka ina vakaʼi anai mo te ʼu tagata ʼāfea ʼo ʼuhiga mo tona papitema.
23 Tou Tokoni Kia Nātou ʼAē Kua Nātou ʼOsi Ako Te Tohi: ʼAki te temi, ʼe tonu kia ia ʼaē kua ʼosi tana ako te tohi Te ʼAtamai Mālama, ke hā tana faiga fakamalotoloto pea mo te loloto ʼo tana fia tauhi ki te ʼAtua. (Mat. 13:23) Koia la ʼaē, ʼi te kupu tāfito ʼo te palakalafe fakaʼosi ʼo te tohi, ʼe lagaʼi ai te fehuʼi ʼaenī, “Koteā Anai Te Meʼa Ka Koutou Fai?” Ko te ʼu palakalafe fakaʼosi ʼe nātou fakahā ai kia ia ʼaē ʼe ako ke tokaga ʼo fakatuputupu tana ʼu felogoi mo te ʼAtua, ke ina maʼuliʼi te ʼu meʼa ʼaē kua ina ako, pea ke mole tuai ʼi te fakahā ʼo tona ʼofa kia Sehova. ʼE mole ʼi ai he tahi tohi ʼe tonu ke toe ako mo nātou ʼaē kua ʼosi nātou ako te tohi Te ʼAtamai Mālama. ʼAki he agalelei ʼe feala ke tou fakamahino fakalelei age kia ia ʼaē kua ʼosi tana ako ka mole heʼeki papitema, pe koteā te meʼa ʼaē ʼe tonu ke ina fai ke tuputupu ʼi te faʼahi fakalaumālie. ʼE lagi feala ke koutou ʼaʼahi ia ia, ʼo koutou faka fealagia age kia ia ke ina maʼu te maʼuli heʼegata.—Tnk. 12:13.
24 Ko te tisipulo foʼou ʼaē kua ina tali te moʼoni pea mo papitema, ʼe lahi anai te ʼu meʼa ʼaē ʼe tonu ke ina fai moʼo fakatuputupu tona ʼatamai mālama pea mo tana mahino ki te moʼoni, ke feala he mālohi ʼo tana tui. (Kol. 2:6, 7) ʼE mole hoko atu tana ako mokā kua ʼosi te ako ʼo te tohi Te ʼAtamai Mālama, kae ʼe feala ke koutou foaki tokotou temi moʼo tokoni kia ia ke tuputupu ʼi te faʼahi fakalaumālie. (Kal. 6:10; Hep. 6:1) ʼO ʼuhiga mo te faʼahi ʼaia, ʼe feala ke ina fakatuputupu tana mahino ki te moʼoni, ʼo ina lau te Tohi-Tapu ʼi te ʼaho fuli, mo ako Te Tule Leʼo pea mo te tahi ʼu tohi ʼaē ʼe foaki mai e te ‘tagata kaugana agatonu,’ ʼo ina teuteuʼi tana ʼu fono pea mo kau kiai, pea mo palalau ki te moʼoni mo tona ʼu tēhina mo tuagaʼane ʼi te tui. (Mat. 24:45-47; Pes. 1:2; Gāue 2:41, 42; Kol. 1:9, 10) Ko tana lau te tohi Notre ministère pea mo tana maʼuliʼi te ʼu tokoni ʼaē ʼe tuʼu ai, ʼe ko he koga maʼuhiga anai kia ia ki te fakahoko katoa ʼo tona minisitelio faka teokalatike.—2 Tim. 2:2; 4:5.
25 Tou Fakatuputupu Tatatou Poto Fai Akonaki: Neʼe fakatotonu mai ke tou “fai ni ʼu tisipulo ʼi te hahaʼi . . . , ʼo [tou] ako ia nātou.” (Mat. 28:19, 20) Mai tona ʼaluʼaga ʼaē ko te poto fai akonaki ʼe pipiki ki te fai ʼo he ʼu tisipulo, koia ʼe tou faiga ai ke tou fakatuputupu totatou poto fai akonaki. (1 Tim. 4:16; 2 Tim. 4:2) Kapau ʼe koutou fia maʼu he tahi ʼu tokoni moʼo fakatuputupu tokotou poto fai akonaki, ʼe lagi lelei ke koutou lau ʼi te tohi Manuel pour l’École, ʼi te ako 10 pea mo te ako 15 ʼaē ko tona kupu tāfito ʼaenī: “E feafeaʼi he maʼu ʼo te poto fai akonaki” pea “ ʼE lava feafeaʼi hatatou fakalave ki te loto ʼo nātou ʼaē ʼe fakalogo”; ʼi te tohi Auxiliaire pour une meilleure intelligence de la Bible, ʼi te kupu tāfito “Te tagata fai akonaki, Te akonaki”; pea mo te alatike ʼo Te Tule Leʼo fakafalani ʼo te ʼaho 1 ʼo Novepeli 1984 “Te poto ʼo te faʼu ʼo he meʼa neʼe ʼahiʼahiʼi ʼi te afi” pea “Mokā koutou fai akonaki, koutou palalau ki te loto”; te alatike ʼo Te Tule Leʼo fakafalani ʼo te ʼaho 1 ʼo Malesio 1986 ko te kupu tāfito “ ʼE koutou popoto koa ʼi te fakakaukauʼi ʼo te hahaʼi ʼaki takotou fakaʼaogaʼi fakalelei te Tohi-Tapu?” pea mo te alatike ʼo Te Tule Leʼo ʼo te ʼaho 15 ʼo Fepualio 1996 “ ʼE Lava Feafeaʼi Ke Tou Fiafia ʼi Te Fai ʼo Ni ʼu Tisipulo.”
26 ʼI takotou faiga ʼaē ke koutou fai ni ʼu tisipulo, ʼaki te tohi Te ʼAtamai Mālama, koutou faikole tuʼumaʼu kia Sehova, ia ia “ ʼaē ʼe ina fakatuputupu,” pea ʼe ina tapuaki anai takotou ʼu faiga ʼaē ke lave ia te logo lelei ʼo te Puleʼaga ki te loto ʼo te hahaʼi. (1 Ko. 3:5-7) ʼOfa pe ke koutou maʼu te fiafia ʼaē ko te akoʼi ʼo te hahaʼi ke nātou mahino, ke nātou leleiʼia, pea ke nātou gāue ʼo ʼalutahi mo te ʼatamai mālama ʼaē ʼe ina taki ki te maʼuli heʼegata!