ʼE Fakapale Te Agatonu
1 Ia Hepeleo 11:6 neʼe tou lau ai ko te ʼAtua “ ʼe ina fakapale ia nātou ʼaē ʼe nātou kumi moʼoni ia ia.” Ko te tupuʼaga ʼo tana fakapale tana ʼu kaugana he neʼe nātou ‘agatonu ʼi he ʼu meʼa ʼe siʼisiʼi’ pea mo ina ‘fakanofo anai nātou ki he ʼu meʼa ʼe lahi.’ (Mateo 25:23) ʼI te tahi ʼaluʼaga, ʼe tautau fakapale e Sehova he gāue lelei ʼaki tana foaki age ki tana ʼu fakamoʼoni agatonu te tahi ʼu pilivilesio ʼi te gāue.
2 Neʼe fakapale te agatonu ʼa te ʼapositolo ko Paulo ʼaki te foaki age kia ia he minisitelio ke ina fakahoko ʼi te ʼu kolo liliki pea mo te ʼu kolo lalahi ʼo te Eulopa pea mo te Asia ʼo te Potu Hihifo. (1 Tim. 1:12) Logope la neʼe lahi te faiga ʼaē moʼo fakahoko ʼo tona minisitelio, neʼe faka maʼuhigaʼi e Paulo te pilivilesio ʼaē neʼe ina maʼu. (Loma 11:13; Kol. 1:25) Neʼe ina fakahā tana loto fakafetaʼi fakamalotoloto ʼaki tana kumi te ʼu fealagia moʼo fai faka mafola. ʼAki tana gāue fakamalotoloto, neʼe ina fakahā lelei ai ʼe maʼuli tana tui. Ko tana faʼifaʼitaki ʼe ina uga tatou ke tou tokagaʼi fakalelei tatatou ʼu pilivilesio ʼi te gāue.
3 Neʼe Foaki Mai e Sehova Kia Tatou Te Minisitelio: ʼE lava feafeaʼi hatatou maʼu te faʼahiga manatu ʼaē neʼe maʼu e Paulo ʼo ʼuhiga mo te pilivilesio ʼaia? ʼE tou kumi anai he ʼu ʼaluʼaga moʼo fakatuputupu ʼo tatatou kau ki te minisitelio. ʼE tou fakaʼaogaʼi anai te ʼu fealagia fuli moʼo fagonogono faigamālie ʼo feiā aipe ki te fai faka mafola ʼi te ʼu ʼapi. ʼE tou kumi ia nātou ʼaē ʼe mole maʼu atu ki tonatou ʼu ʼapi, pea mo tou ʼaʼahi ia nātou fuli ʼaē ʼe fia logo ki te moʼoni. Pea ʼe tou fai he ʼu fakatuʼutuʼu ke feala hatatou fai he ʼu ako Tohi-Tapu.
4 ʼO ʼuhiga mo totatou minisitelio, neʼe fakatokagaʼi e Paulo: “Ke fai ʼaki te lotomālohi.” (2 Tim. 4:2) Ko he meʼa maʼuhiga ʼe tou foimo tokaga kiai. ʼE tou tokagaʼi koa totatou minisitelio ohage ko he meʼa maʼuhiga, ʼo fakamuʼamuʼa ʼi totatou maʼuli? Ohage la, ʼe mole tou faka fealagia anai ki te ʼu fakafiafia pea mo te tahi ʼu gāue ʼi te fakaʼosi vāhaʼa ke nātou toʼo te temi ʼaē ʼe tonu ke fakaʼaogaʼi ki totatou minisitelio. Mai tona ʼaluʼaga ʼaē kua tou ʼiloʼi papau ko te fakaʼosi ʼo te tuʼu ʼaenī kua ōvi mai, ʼe tou toe ʼiloʼi papau foki ko te faka mafola ʼo te logo lelei ʼo te Puleʼaga ʼe ko te gāue ʼaia ʼe maʼuhiga ʼaupito ke tou fai.
5 Ko tatatou agatonu ki te ʼAtua ʼe ʼiloga ʼi tatatou agatonu pea mo tatatou fai tuʼumaʼu te gāue ʼaē neʼe ina fakatotonu mai ke tou fai. Tou fakahoko katoa totatou minisitelio pea ʼe lahi anai te fakapale e Sehova tatatou agatonu.