Tou Kau Ki Te ʼu Fono “Tāfito La” ʼi Te Temi ʼAenī
1 Neʼe maʼuhiga tuʼumaʼu ki te hahaʼi ʼa Sehova tanatou fakatahitahi. Ko te kau Iselaelite, neʼe ʼi ai tanatou fale lotu pea mo tanatou ʼu sinakoka ke nātou fai ai te tauhi moʼoni, mo ako te ʼu moʼoni fakaʼatua, pea mo fakakaugā ʼi te fiafia. ʼO toe feiā aipe, neʼe mole tuku e te kau ʼuluaki Kilisitiano tanatou fakatahitahi. ʼI te ʼāsili ʼo te ʼu fihifihia pea mo te ʼu faigataʼaʼia ʼi te ʼu ʼaho fakamuli ʼaenī, ʼe toe ʼaoga foki kia tatou te fakaloto mālohi fakalaumālie ʼaē ʼe tou maʼu ʼi te ʼu fono ʼo totatou kokelekasio, pea ʼe ʼaoga kia tatou “tāfito la” ʼi te temi ʼaenī. (Hep. 10:25) Koutou fakatokagaʼi te ʼu tupuʼaga e tolu ke tou kau ai ki te ʼu fono.
2 Ko Te ʼu Hahaʼi ʼAē ʼe Tou Fakakaugā Mo Nātou: ʼE tokoni mai te Tohi-Tapu kia tatou ke tou “haga fefakaloto fīmālieʼaki pea mo fefakaloto mālohiʼaki.” (1 Tes. 5:11) Ko tatatou fakakaugā mo te ʼu hahaʼi ʼaē ʼe pipiki ki te ʼAtua, ʼe ina fakafonu ai totatou ʼatamai ʼaki te ʼu manatu ʼe fakaloto mālohi pea ʼe ina uga ai tatou ke tou fai he ʼu gāue lelei. Kae kapau ʼe tou nonofo tokotahi, pea ʼe feala ai ke tou maʼu he ʼu manatu vale, peʼe ke tou manatu pe kia tatou totonu, peʼe tou maʼu he ʼu manatu heʼe ʼaoga.—Taag. 18:1.
3 ʼE Akoʼi Ai Tatou: ʼE foaki tuʼumaʼu mai e te ʼu fono faka Kilisitiano he polokalama ako ʼo te Tohi-Tapu, ke tou haga taupau te ʼofa ʼo te ʼAtua ʼi totatou loto. ʼE nātou tuku mai he takitaki ʼaoga ke tou maʼuliʼi “te tokoni fuli ʼa te ʼAtua.” (Gāue 20:27) ʼE akoʼi tatou ʼi te ʼu fono ke tou popoto ʼi te faka mafola pea mo te akoʼi ʼo te logo lelei, pea ko te ʼu meʼa ʼaia ʼe ʼaoga tāfito ʼi te temi ʼaenī ke tou maʼu ai te fiafia lahi, ʼaē ko te maʼu pea mo te tokoni kia nātou ʼaē ka nātou tali anai te moʼoni.
4 ʼE Ko Hatatou Puipui: ʼI te mālama agakovi ʼaenī, ko te kokelekasio ʼe ko he holaʼaga moʼoni ʼi te faʼahi fakalaumālie heʼe maʼu ai te tokalelei pea mo te ʼofa. Ka tou ʼolo ki te ʼu fono ʼo te kokelekasio, ʼe malave mālohi te laumālie ʼa te ʼAtua kia tatou, ʼo ina fakatupu te fua ʼo “te ʼofa, te fiafia, te tokalelei, te kātaki fualoa, te finegaloʼofa, te agalelei, te tui, te agamālū, te loto lolomi.” (Kal. 5:22, 23) ʼE foaki mai e te ʼu fono te mālohi ʼaē ke tou nonofo maʼu ʼi te tui. ʼE teuteuʼi ai tatou ke tou tauʼi te ʼu ʼahiʼahiʼi ʼaē ka hoko mai.
5 Kapau ʼe tou kau tuʼumaʼu ki te ʼu fono, ʼe tou sio ai anai ki te meʼa ʼaē neʼe fakamatala e te tagata fai pesalemo, ʼaē ʼe tuʼu ia Pesalemo 133:1, 3: “Koutou sisio! ʼE ko he meʼa lelei pea mo fakafiafia ki te ʼu tēhina hanatou nonofo fakatahi ʼi te logo tahi!” Tatau aipe te potu ʼaē ʼe tauhi ai pea mo fakatahi ai te hahaʼi ʼa te ʼAtua ia ʼaho nei, kae ʼe ko “te potu ʼaia ʼaē neʼe fakatotonu e Sehova ke hoko ai te tapuakina, ʼio, te maʼuli ʼo aʼu ki he ʼu temi ʼe mole ʼiloʼi honatou gataʼaga.”