Te Moʼoni ʼo ʼUhiga Mo Te ʼAtua Mo Kilisito

Ko Ai Ia Te ʼAtua?

Kotea Tona Huafa? Neʼe tala tonu e te ʼAtua: “Ko au Sehova. Ko toku huafa ʼaia.” (Esaia 42:8, MN) ʼE ha tuʼa 7 000 tupu tona huafa ʼi te Tohi-Tapu. Kae ʼe lahi te ʼu fakaliliu ʼo te Tohi-Tapu neʼe molehi ai tona huafa ʼo fetogi ʼaki ni higoa fakatuʼulaga ohage ko “ ʼAliki.” Kae ʼe fakalotomalohiʼi tatou e te ʼAtua ke tou “fetapa ki tona huafa,” he ʼe loto ia ke tou kaumeʼa mo ia.—Pesalemo 105:1.

Te ʼu Tuʼulaga ʼo Sehova. ʼE ui ʼi te Tohi-Tapu ko Sehova te “ ʼAtua,” te “Mafimafi,” te “Tupuʼaga,” te “Tamai” mo te “ ʼAliki.” Pea ʼe ʼi ai te ʼu faikole ʼi te Tohi-Tapu ʼe fakaʼaogaʼi lua ai te tuʼulaga mo te huafa ʼo Sehova.—Taniela 9:4, MN.

Te Agaaga ʼo Te ʼAtua. Ko te ʼAtua ʼe laumalie. (Soane 4:24) Neʼe heʼeki sio he tahi ki ai. (Soane 1:18) Pea ʼe ui mai ʼi te Tohi-Tapu ʼe feala ke tou fakamamahiʼi peʼe tou fakafiafiaʼi tona loto.—Taaga Lea 11:20; Pesalemo 78:40, 41.

Te ʼu Kalitate ʼo Te ʼAtua. ʼE mole fakapalatahi te ʼAtua. (Gaue 10:34, 35) ʼE toe “manavaʼofa, pea mo agaʼofa, tuai ʼi te ita pea mo fonu ʼi te lotoʼofa pea mo te moʼoni.” (Ekesote 34:6, 7, MN) Kae ʼe ko te ʼu kalitate ʼaeni ʼe fa ʼae ʼe maʼuhiga kehe age ia.

ʼE Malohi. Ko Sehova “te Atua Mafimafi,” ʼe mole he tuʼakoi ʼo tona malohi pea ʼe ina fakahoko anai tana ʼu fakapapau fuli.—Senesi 17:1.

ʼE Poto. ʼE mole toe oviovi he tahi ki te poto ʼo te ʼAtua he ʼe ui ʼi te Tohi-Tapu ʼe “poto tokotahi” ia ia.—Loma 16:27.

ʼE Totonu. ʼE “faitotonu” tuʼumaʼu pe te ʼAtua pea ʼe “lelei tukupau” ʼana gaue.—Tetelonome 32:4.

ʼE ʼOfa. ʼE tohi fenei ʼi te Tohi-Tapu: “Ko te ʼAtua ʼe ko te ʼofa.” (1 Soane 4:8) Ko tona ʼuhiga totonu ʼe ko te ʼofa pea ko meʼa fuli ʼe ina fai ʼaki te ʼofa ʼo fua lelei ai kia tatou.

ʼE Fia Kaumeʼa Te ʼAtua Mo Tatou. Ko te ʼAtua tatatou Tamai ʼae ʼe ʼi selo. (Mateo 6:9) Kapau ʼe tou tui kia te ia ʼe tou liliu anai ko hona kaumeʼa. (Pesalemo 25:14) ʼE loto e te ʼAtua ke tou fakaovi kia te ia ʼi te faikole pea mo tou ‘tuku kia te ia ʼatatou tuʼania fuli, he ʼe tokaga kia tatou.’—1 Petelo 5:7; Sakopo 4:8.

Kotea ʼAe ʼe Kehe Ai Te ʼAtua Mo Sesu?

Ko Sesu ʼe Mole Ko Te ʼAtua. ʼE ʼulutokotahi ia Sesu he ʼe ko ia tokotahi pe ʼae neʼe fakatupu totonu e te ʼAtua. ʼE fakahigoaʼi ʼi te Tohi-Tapu ko te Foha ʼo te ʼAtua. (Soane 1:14) ʼI tona ʼosi fakatupu, neʼe fakaʼaogaʼi leva e Sehova ia Sesu ki te fakatupu ʼo meʼa fuli.—Taaga Lea 8:30, 31; Kolose 1:15, 16.

Neʼe mole fia tatau ia Sesu mo te ʼAtua. Neʼe ui e Sesu: “ ʼE au fakafofoga ia [te ʼAtua], pea ʼe ko Ia ʼae neʼe ina fekauʼi mai au.” (Soane 7:29) Neʼe ina ui ki ʼana tisipulo: Ko Sehova ‘taku Tamai mo takotou Tamai’ pea ko ‘toku ʼAtua mo tokotou ʼAtua.’ (Soane 20:17) Hili tana mate, neʼe fakatuʼuake e Sehova ia Sesu ki te maʼuli ʼi selo pea neʼe foaki age ki ai te pule katoa ʼi te toʼomataʼu ʼo te ʼAtua.—Mateo 28:18; Gaue 2:32, 33.

Fakaovi Ki Te ʼAtua ʼAki Ia Sesu Kilisito

Neʼe hifo ia Sesu ki te kele ke ina akoʼi tatou ʼo ʼuhiga mo tana Tamai. Neʼe ui e Sehova ʼo ʼuhiga mo Sesu: “Ko toku ʼAlo ʼaeni, toku ʼofaina. Kotou fakalogo kia te ia.” (Maleko 9:7) ʼE iloʼi lelei e Sesu ia te ʼAtua he neʼe ina ui: “ ʼE mole iloʼi e he tahi pe ko ai te Tamai, gata pe ki te ʼAlo pea mo ia ʼae ʼe lotolelei e te ʼAlo ke ina fakaha age ki ai.”—Luka 10:22.

Neʼe maʼu fuli e Sesu te ʼu kalitate ʼo te ʼAtua. Neʼe ina ui ai: “Ko ʼae kua sio kia te au, kua toe sio ia ki te Tamai.” (Soane 14:9) Neʼe faʼifaʼitakiʼi e Sesu te ʼofa ʼo tana Tamai, pea neʼe iloga ʼi ʼana palalau mo tana aga. Neʼe fia fakaovi ai te hahaʼi ki te ʼAtua. Neʼe toe ui e Sesu: “Ko au te ala, mo te moʼoni pea mo te maʼuli. ʼE mole he tahi ʼe haʼu ki te Tamai kaʼe ʼe mole fakalaka ia te au.” (Soane 14:6) Neʼe ina fai mo te ʼu palalau ʼaeni: ʼE “atolasio anai te kau atolasio moʼoni ki te Tamai ʼaki te laumalie mo te moʼoni, koteʼuhi ʼe kumi e te Tamai te faʼahiga hahaʼi ʼaia ke natou atolasio kia te ia.” (Soane 4:23) ʼEi, ʼe kumi nei e te ʼAtua ia natou ʼae ʼe fia fakaovi kia te ia, ohage ko koe.