Ke Malave Ki Te Loto ʼo Te Kau Ako
1 ʼI muʼa ʼo tana hake ki selo, neʼe ʼui e Sesu ki tana ʼu tisipulo ke nātou akoʼi te hahaʼi ke nātou “mulimuli” ki te ʼu meʼa fuli pe ʼaē neʼe ina fakatotonu age kia nātou. (Mat. 28:19, 20, MN ) Kapau ʼe “mulimuli” he tahi ki te ʼu fakatotonu ʼa Kilisito, pea ʼe tonu ke malave ki tona loto te ʼu meʼa ʼaē ʼe ina ako. (Pes. 119:112) ʼE lava feafeaʼi ke malave ki te loto ʼo he tahi ʼe ako Tohi-Tapu mo koutou?
2 Koutou Faikole Kia Sehova Ke Ina Takitaki Koutou: Ko te fai ʼo ni ʼu tisipulo, ʼe ko he gāue neʼe tuku mai e te ʼAtua. Ke fua lelei tatatou gāue, ʼe maʼuhiga tana tapuakina, ka mole ko tatatou ʼu fealagia. (Gaue 16:14; 1 Ko. 3:7) Koia, ʼe maʼuhiga ke tou faikole kia Sehova ke tokoni mai ki te akoʼi ʼo te moʼoni ki te hahaʼi.—Isa. 50:4.
3 Koutou ʼIloʼi Te Meʼa ʼAē ʼe Tui Kiai: Kapau ʼe koutou ʼiloʼi te meʼa ʼaē ʼe tui kiai te hahaʼi pea mo te tupuʼaga ʼo tanatou tui kiai, pea ʼe koutou ʼiloʼi anai te ʼu palalau ʼaē ʼe tonu ke koutou fai ke malave ki tonatou loto. He koʼe ko ia ʼaē ʼe tou ako, ʼe ina leleiʼia he faʼahiga akonaki? He koʼe ʼe tui mālohi ki te faʼahi ʼaia? Ko te ʼiloʼi ʼo te ʼu faʼahi ʼaia, ʼe lava tokoni mai ke tou ʼiloʼi te ʼu palalau ʼaē ʼe tonu ke tou fai.—Gaue 17:22, 23.
4 Koutou Fakaʼaogaʼi He ʼu Palalau Lelei, ʼe Fakatafito Ki Te Tohi-Tapu: ʼE tonu kia ia ʼaē ʼe ako, ke mahino ki te moʼoni. (Gaue 17:24-31) ʼE tonu ke tou fakahā he tupuʼaga lelei ʼo tatatou ʼamanaki. (1 Pet. 3:15) Kae tou fai tuʼumaʼu te faʼahi ʼaia, ʼaki he agalelei pea mo he loto faʼa kātaki.
5 Koutou Fakaʼaogaʼi He ʼu Lea Fakatātā: ʼE mahino gafua kia ia ʼaē ʼe ako mo kapau ʼe fakaʼaogaʼi he ʼu lea fakatātā pea ʼe toe malave foki ki tona ʼatamai pea mo tona loto. Neʼe fakaʼaogaʼi lahi e Sesu te ʼu lea fakatātā. (Mko 4:33, 34) ʼE mahino ia, kapau ʼe tou loto ke ʼi ai he ʼu fua ʼo te lea fakatātā, pea ʼe tonu ke ʼalutahi mo te puani ʼaē ʼe tou talanoa kiai, pea mo ʼalutahi mo te maʼuli ʼo ia ʼaē ʼe ako.
6 Koutou Fakahā Te ʼu Fua Lelei ʼo Te Tali ʼo Te Moʼoni: ʼE fia ʼiloʼi e te hahaʼi te ʼu fua lelei ʼo tanatou maʼuliʼi te ʼu meʼa ʼaē ʼe nātou ako. Koutou tokoni kia ia ʼaē ʼe ako ke sio ki te fakapotopoto ʼo te ʼu palalau ʼa Paulo ia 2 Timoteo 3:14-17.
7 ʼAua naʼa koutou lotovaivai mo kapau ʼe mole tali e ʼihi takotou fai akonaki. ʼE mole tali anai e te loto ʼo te ʼu hahaʼi fuli. (Mat. 13:15) Kae ko ʼihi hahaʼi ʼe nātou liliu ko he ʼu hahaʼi tui. (Gaue 17:32-34) ʼOfa pe ke feala ʼaki takotou ʼu faiga ʼaē ke malave te logo lelei ki te loto ʼo te tokolahi, ke tokoni kia nātou ke nātou tali pea mo “mulimuli” ki te ʼu meʼa ʼaē neʼe fakatotonu mai e Sesu.