Tou Maʼuliʼi Te Foaki ʼo Totatou Maʼuli
1 Lagi neʼe hoki koutou papitema pe, peʼe kua fualoa, kae ʼe mahino ia ʼe koutou manatuʼi te faʼahi maʼuhiga ʼaia ʼo tokotou maʼuli. Ko totatou papitema ʼe mole ko te fakaʼosi ʼaia, kae ʼe ko te kamataʼaga ʼaia ʼo he gāue faʼafai, ʼe feala ke hoko atu ʼo talu ai. (1 Soa. 2:17) Koteā ʼaē ʼe pipiki ki te foaki ʼo totatou maʼuli?
2 Tou Mulimuli Ki Te Faʼifaʼitaki ʼa Kilisito: ʼI tana ʼosi papitema, ‘neʼe kamata e Sesu tana gāue,’ ʼo ina kalagaʼi “te logo lelei ʼo te puleʼaga ʼo te ʼAtua.” (Luka 3:23; 4:43, MN ) ʼO toe feiā pe, ʼi te ʼosi foaki ʼo totatou maʼuli kia Sehova ʼi te papitema, neʼe tou liliu ai ko te kau minisi fakanofo ʼo te logo lelei. Logola ʼe lahi te temi pea mo te ʼu faiga ki te maʼuli fakasino, kae ko tatatou fakatuʼutuʼu tāfito ʼe ko te minisitelio faka Kilisitiano. (Mat. 6:33) Ko nātou ʼaē kua foaki tonatou maʼuli ki te ʼAtua, ʼe mole nātou faiga ke nātou maʼu koloā pea mo nātou logona, kae ʼe nātou faiga ke nātou ‘faka kolōliaʼi tonatou minisitelio,’ ohage ko tona fai e te ʼapositolo ko Paulo. (Loma 11:13) ʼE maʼuhiga koa kia koutou takotou pilivilesio ʼaē ko te tauhi kia Sehova, pea mo koutou fakahoko lelei te gāue ʼaia?
3 Ohage ko Sesu, ʼe tonu ke tou “fakafeagai ki te Tevolo.” (Skp. 4:7, MN ) Neʼe ʼahiʼahiʼi e Satana ia Sesu ʼi te hili ʼo Tona papitema, pea ʼe toe feiā ia ʼaho nei, ʼe ina fia ʼahiʼahiʼi te ʼu kaugana ʼaē kua nātou foaki tonatou maʼuli kia Sehova. (Luka 4:1-13) ʼI te mālama ʼa Satana, ʼe tonu ke tou nonofo tokaga, ʼo tou tekeʼi te ʼu faʼahi fuli ʼaē ʼe feala ke nātou ʼulihi totatou ʼatamai pea mo totatou loto. (Taag. 4:23; Mat. 5:29, 30) Neʼe tokoniʼi te kau Kilisitiano ‘ ʼe mole feala ke nātou kau ki te laupapa ʼa Sehova pea mo te laupapa ʼa te kau temonio.’ (1 Ko. 10:21) ʼE fakamaʼua mai ke tou tokakaga ki te ʼu fakafiafia heʼeʼaoga, ki te ʼu fakakaugā kovi, pea mo te ʼu tuʼutāmaki ʼo te Internet. Tahi ʼaē meʼa, ʼaua naʼa tou fia ʼiloʼi te ʼu akonaki ʼa te kau ʼaposita. Ko tatatou ʼiloʼi te ʼu faʼahi ʼaia, pea mo te tahi ʼu kākā ʼa Satana, ʼe tokoni mai anai kia tatou ke tou maʼuliʼi te foaki ʼo totatou maʼuli.
4 Tou Fakaʼaogaʼi Te ʼu Fakatuʼutuʼu ʼa Te ʼAtua: Moʼo tokoni kia tatou ke tou maʼuliʼi te foaki ʼo totatou maʼuli, ʼe tokoni mai ia Sehova ʼaki tana Folafola pea mo te kokelekasio. Koutou lau te Tohi-Tapu pea mo koutou faikole kia Sehova ʼi te ʼaho fuli pe. (Sos. 1:8; 1 Tes. 5:17) Koutou leleiʼia te ʼu fono ʼo te kokelekasio. (Pes. 122:1) Koutou fakatahi mo nātou ʼaē ʼe manavasiʼi kia Sehova pea mo taupau tana ʼu fakatotonu.—Pes. 119:63.
5 ʼAki te lagolago ʼa te ʼAtua, ʼe feala hakotou maʼuliʼi te foaki ʼo tokotou maʼuli kia Sehova, pea mo koutou fiafia ʼo tauhi kia te ia ʼo talu ai.—Pes. 22:26, 27; Filp. 4:13.