Ko He Foʼi Fime Viteo ʼe Fakaloto Mālohi
ʼI ʼApelili ʼo te taʼu 1951, ko te toko lauʼi afe ʼu famili ko te kau Fakamoʼoni ʼa Sehova ʼo te Puleʼaga Sovietike ʼāfea, neʼe tānaki nātou mai te ʼu kolo kehekehe, ʼo fetuku ʼi te ʼu saliote afi ki Sipelia. He koʼe neʼe faiga mālohi te puleʼaga mālohi Sovietike ke ina matehi nātou? Koteā ʼaē neʼe feala ai ki te ʼu tēhina ke nātou maʼuʼuli pea mo nātou tuputupu lolotoga te ʼu lauʼi hogofulu taʼu ʼaē neʼe fakatagaʼi mālohi ai nātou? ʼE koutou maʼu anai tona ʼu tali ʼi te foʼi fime viteo Fidèles dans les épreuves — Les Témoins de Jéhovah en Union Soviétique. Koutou sioʼi te foʼi fime ʼaia, pea ʼofa pe ke ina uga koutou ke koutou nonofo agatonu kia Sehova ʼi te ʼu ʼaluʼaga fuli pe!
Koteā anai takotou tali ki te ʼu fehuʼi ʼaenī: (1) Ko ʼanafea ʼaē neʼe ʼuluaki fakamoʼoni e te Puleʼaga ʼo Lusia te gāue ʼa te kau Fakamoʼoni ʼa Sehova? (2) ʼI muʼa pea ʼi te hili ʼo te Lua Tau Faka Malamanei, koteā ʼaē neʼe tupu ai te kaugamālie ʼaupito ʼa te kau Fakamoʼoni ʼa Sehova ʼi te Puleʼaga Sovietike? (3) Koteā ʼaē neʼe mole ʼalutahi ai te ʼu meʼa ʼaē neʼe nātou tui kiai pea mo te filosofia ʼa Lénine? (4) Neʼe koteā te Opération Nord, pea ʼaki te fakatuʼutuʼu ʼaia koteā ʼaē neʼe fia fai e Staline? (5) Neʼe koteā tona faka ʼuhiga maʼa te kau Fakamoʼoni tonatou fakamavae ʼi tonatou fenua, pea koteā ʼaē neʼe ʼui age ke nātou fai ke mole fakamavae nātou? (6) ʼI tanatou folau loaloaga ki Sipelia ʼi te ʼu saliote afi, neʼe feafeaʼi te fefakaloto mālohiʼaki ʼa te ʼu tēhina mo tuagaʼane, pea mo punamaʼuli ai te kau polisi ʼaē neʼe nātou puke nātou? (7) Koteā te ʼu mamahi ʼaē neʼe kātakiʼi e te kau Fakamoʼoni ʼi Sipelia? (8) Koteā te fakatuʼutuʼu fakalaumālie ʼaē neʼe faka maʼuhigaʼi e te kau Fakamoʼoni ʼa Sehova, pea koteā tona tupuʼaga? (9) He koʼe neʼe tali e te ʼu tēhina ke nātou mamate moʼo maʼu te ʼu tohi, pea neʼe nātou lava fakahoko feafeaʼi te faʼahi ʼaia, logola te faigaʼi ʼa te puleʼaga tona tapuʼi? (10) Neʼe hoko atu feafeaʼi e Khrouchtchev te tauʼi ʼo te hahaʼi ʼo te ʼAtua? (11) Ko te ʼu fakatuʼutuʼu fea ʼaē neʼe fai e te puleʼaga moʼo maumauʼi te tui ʼa te ʼu fānau ʼa te kau Fakamoʼoni? (12) Koteā ʼaē neʼe mahino lelei kiai e te ʼu tēhina ʼo ʼuhiga mo te tupuʼaga ʼo tonatou fakatagaʼi? (Annuaire 2002, pasina 203 ki te 204) (13) Neʼe koteā te mafuliʼaga ʼo te ʼu fakataga mālohi ʼaē neʼe fai e te kau fakafeagai ki te kautahi ʼo te ʼAtua? (Annuaire 2002, pasina 220 ki te 221) (14) Koteā te ʼu fakaʼamu ʼaē neʼe kua hoko maʼa te kau Fakamoʼoni ʼo te Puleʼaga Sovietike ʼāfea? (15) Ko te faʼahi fea ʼaē neʼe tokoni ki totatou ʼu tēhina ke nātou kātakiʼi te ʼu ʼahiʼahi, pea ʼi te koga fakaʼosi ʼo te foʼi fime, ʼe hā feafeaʼi te moʼoni ʼo Selemia 1:19? (16) Koutou fakamatala he faʼifaʼitaki neʼe malave kia koutou ʼo ʼuhiga mo te agatonu ʼi te ʼu ʼahiʼahi.