Te Laga ʼo Te ʼu Fale ʼo Te Puleʼaga ʼi ʼIhi Fenua ʼo Te Eulopa
1 ʼI te ʼu taʼu pe ʼaenī e hogofulu kua ʼosi, neʼe faka tuʼakoi te gāue ʼa te kau Fakamoʼoni ʼa Sehova ʼi ʼihi fenua ʼo te Eulopa, ʼo kau ai mo te Eulopa ʼo te Potu Esite. Teitei ʼi te ʼu ʼaluʼaga fuli ʼaia, neʼe fefeka ʼaupito te ʼu faka tuʼakoi ʼaē neʼe fai. Neʼe faigataʼa te fakahoko faʼifaʼitaliha ʼo te ʼu fono, pea neʼe teitei pe ke mole tali te fakaʼaogaʼi ʼo te ʼu Fale ʼo Te Puleʼaga. Kae ʼi te ʼu taʼu pe ʼaenī, “neʼe fai e Sehova te meʼa lahi ʼi tana gāue mo [tatou]. Kua [tou] liliu ʼo fiafia.”—Pes. 126:3.
2 ʼI te kamata ʼo te 1983, neʼe kua kamata tuku age ki te kau Fakamoʼoni ʼa Sehova ke nātou faʼifaʼitaliha ʼi tanatou lotu. ʼI te 1989, neʼe fakamoʼoni te puleʼaga ʼo Polonia pea mo Hukalia ki te gāue ʼa te kau Fakamoʼoni ʼa Sehova. ʼI te 1991, neʼe fakamoʼoni te puleʼaga ʼo Lusia ki te gāue ʼa te kau Fakamoʼoni ʼa Sehova. Talu mai ai, kua tuputupu te gāue ʼi Lusia pea mo te ʼu Puleʼaga Fakatahi ʼāfea ʼo te kau Sovietike. ʼI te lolotoga ʼo te māhina ʼo Malesio 1996 pea mo ʼOketopeli 1998, neʼe tali e te Kolesi Pule te ʼu kole falā ʼa te ʼu filiale e 11 ʼo te ʼu fenua Eulopa, ke laga te ʼu Fale ʼo Te Puleʼaga e 359.
3 ʼI takotou sioʼi te ʼu paki ʼo te pepa ʼo te minisitelio ʼaenī, koutou metitasioʼi te ʼu gāue lalahi pea mo fakaofoofo ʼaē neʼe fai e Sehova maʼa tana hahaʼi. (Pes. 136:4) ʼE koutou fiafia anai ʼi hakotou ʼiloʼi ko te ʼu meʼa ʼofa ʼaē ʼe foaki e te ʼu tēhina mo tuagaʼane ʼo te malamanei katoa, ʼe fakaʼaogaʼi lelei, ʼo ʼalutahi mo te meʼa ʼaē neʼe ʼui e Sesu ia Soane 13:35 (MN ): “ ʼAki te meʼa ʼaia, ʼe ʼiloʼi ai anai e te hahaʼi fuli, ko koutou ko taku ʼu tisipulo, mo kapau ʼe koutou femaʼuʼaki te ʼofa.”
4 ʼI te ʼu fenua Eulopa ʼaē ʼe foaki kiai te tokoni ʼaia ʼo ʼuhiga mo te laga ʼo te ʼu Fale ʼo Te Puleʼaga ʼi te ʼu fenua masiva, ʼe kau ai ia Lumania, ʼaē kua laga ai te ʼu Fale ʼo Te Puleʼaga e 36 talu mai te māhina ʼo Sūlio 2000. ʼI Ukelenia, ʼe teitei pe ki tonatou ʼu Fale fuli ʼo Te Puleʼaga neʼe mulimuli ki te faʼahiga laga fale ʼaē neʼe tuku age kia nātou, ʼo nātou laga ai te ʼu fale feiā e 61 ʼi te taʼu 2001, pea ko fale fono e 76 ʼi te taʼu 2002. ʼAki te ʼu meʼa ʼofa ʼaē neʼe foaki ki te falā ʼaē ʼe ʼaoga ki te ʼu Fale ʼo Te Puleʼaga, neʼe laga ai te ʼu Fale ʼo Te Puleʼaga e teau tupu ʼi Croatie, Lusia, Masetonia, Moldavie, Monténégro, Pulukalia pea mo Serbie.
5 Neʼe mole faigafua te laga ʼo te ʼu Fale ʼo Te Puleʼaga ʼi ʼihi fenua, pea ʼe lahi te ʼu faiga ʼe tonu ke fakahoko ʼi muʼa ʼo te laga ʼa he fale fono. ʼI te agamāhani ʼe lahi te puli temi ʼi te teuteu laga ʼo te ʼu fale ʼaia. Pea tahi ʼaē meʼa, ʼe totogi kovi age te laga ʼo he Fale ʼo Te Puleʼaga ʼi te ʼu potu ʼaia ʼo te Eulopa, ʼi te ʼu potu fenua ʼo Afelika pea mo Amelika ʼo te Potu Saute. Kae ʼuhi ko te tuputupu ʼaupito ʼa te kau atolasio ʼa Sehova, ʼe kei ʼaoga ke laga he ʼu Fale ʼo Te Puleʼaga e lauʼi teau ʼi te ʼu fenua masiva ʼo te Eulopa!
6 ʼI meʼa fakaofoofo hatatou sio ki te tuputupu vave ʼaia ʼo te laga ʼo te ʼu Fale ʼo Te Puleʼaga! ʼE ʼi ai te ʼu faʼifaʼitaki ʼe nātou fakahā mai, neʼe tupu ai he fagonogono lelei ʼi te ʼu kolo ʼaē neʼe hoko ai te ʼu laga fale ʼaia. ʼI te tahi ʼu fenua, ko te ʼu puleʼaga ʼe nātou punamaʼuli ʼi te faifaitahi ʼaē ʼe maʼu ʼi te ʼu fakatuʼutuʼu laga fale ʼaia.
7 Neʼe tonu te lea polofeta ʼa Isaia ʼo ʼuhiga mo te tuputupu ʼo te tauhi moʼoni ʼi totatou temi. ʼAki te polofeta ʼaia, neʼe fakakikite fēnei e te ʼAtua: “Ko ʼau, Sehova, ʼe ʼau fakaviliviliʼi anai te faʼahi ʼaia ʼi tona temi totonu.” (Isa. 60:22) ʼE mahino ia, ʼi te ʼu taʼu e hogofulu ʼaenī kua hili, neʼe hā ʼaki ai neʼe ko te temi ʼa Sehova ke ina fakahoko te tuputupu ʼi te Eulopa ʼo te Potu Esite. ʼOfa pe ke haga foaki mai e Sehova tana ʼu tapuakina lahi, ki te ʼu faiga moʼo fakaviliviliʼi te laga ʼo te ʼu Fale ʼo Te Puleʼaga ʼi te tahi ʼu fenua, pea mo tou haga foaki he ʼu meʼa ʼofa ki te ʼu Laga Fale ʼo Te Puleʼaga! ʼE feala ai anai ke laga he tahi ʼu Fale ʼo Te Puleʼaga ʼi te ʼu fenua māsisiva, pea mo fakatuputupu ai te tauhi maʼa ʼi te ʼu potu kehekehe ʼo te Eulopa, pea mo hoko ai he fagonogono lahi age ki “te ʼu potu taupotu ʼo te kele.”—Gaue 13:47, MN.
[Paki ʼo te pasina 3]
Te Fale ʼo Te Puleʼaga Moscou, Lusia
[Paki ʼo te pasina 4, 5]
Te ʼu Fale Foʼou ʼo Te Puleʼaga ʼi Te Eulopa ʼo Te Potu Esite
Strumica, Masetonia
Daruvar, Croatie
Sokal, Tisitilike ʼo Lviv, Ukelenia
Bitola, Masetonia
Mladost, Pulukalia
Plovdiv, Pulukalia
Krasnooktyabrskiy, Kolo Lahi Ko Maykop, Lusia
Bački Petrovac, Serbie Pea Mo Monténégro
Tlumach, Tisitilike ʼo Ivano-Frankivsk, Ukelenia
Rava-Ruska, Tisitilike ʼo Lviv, Ukelenia
Stara Pazova, Serbie Pea Mo Monténégro
Zenica, Bosnie-Herzégovine
Sokal, Tisitilike ʼo Lviv, Ukelenia
Zhydachiv, Tisitilike ʼo Lviv, Ukelenia