Koutou Kofuʼi Te Agavaivai
1 Ko te tūpulaga tauhi ōvi neʼe falala kia Sehova pea neʼe mālo ʼi te tagata tau mālohi. (1 Sam. 17:45-47) Ko te tagata maʼu koloā neʼe ina kātakiʼi tona malaʼia. (Sopo 1:20-22; 2:9, 10) Neʼe ʼui e te ʼAlo ʼo te ʼAtua ko tana poto faiakonaki fuli neʼe haʼu mai tana Tāmai. (Soa. 7:15-18; 8:28) ʼI te ʼu faʼifaʼitaki fuli ʼaenī, neʼe maʼuhiga te agavaivai. ʼO toe feiā pe ʼi te temi nei, ʼe maʼuhiga te agavaivai ʼi te ʼu ʼaluʼaga kehekehe ʼaē ʼe tau mo tatou.—Kol. 3:12.
2 Ka Tou Fai Faka Mafola: ʼI totatou ʼuhiga kau minisi Kilisitiano, ʼaki te agavaivai ʼe tou tala te logo lelei ki te hahaʼi fuli, ʼo mole tou lauʼia tonatou lanu peʼe ko tonatou fenua peʼe ko tonatou haʼuʼaga. (1 Ko. 9:22, 23) Kapau ʼe aga ʼitaʼita ʼihi ki te logo ʼo te Puleʼaga, ʼe mole tou liufaki age te aga ʼaia, kae ʼe tou faʼa kātaki ʼo kumi ia nātou ʼe tau mo te logo lelei. (Mat. 10:11, 14) ʼE mole tou faigaʼi ke tou fia hā ki te hahaʼi ʼaki tatatou ako, kae ʼe tou fakatokaga age ki te hahaʼi ia te Folafola ʼa te ʼAtua, ʼo tou mahino ʼe lahi age tana fakalotoʼi ʼi he ʼu palalau ʼe tou lava fai. (1 Ko. 2:1-5; Hep. 4:12) ʼAki tatatou faʼifaʼitakiʼi ia Sesu, ʼe tou faka fealagia ke vikiʼi ia Sehova.—Mko. 10:17, 18.
3 ʼI Te Kokelekasio: ʼE tonu foki ki te kau Kilisitiano ke nātou ‘feagavaivaiʼaki.’ (1 Pet. 5:5) Kapau ʼe tou faka ʼuhiga totatou ʼu tēhina ʼe nātou māʼoluga age ia tatou, ʼe tou kumi anai he ʼu puleʼaki ke tou tauhi totatou ʼu tēhina, kae mole tou fakatalitali ke nātou tauhi ia tatou. (Soa. 13:12-17; Filp. 2:3, 4) ʼE mole hage anai kia tatou ʼe mole tau mo tatou ke tou kau ki te ʼu gāue ohage ko te fakamaʼa ʼo te Fale ʼo Te Puleʼaga.
4 ʼE tokoni mai ia te agavaivai ke tou ‘fekātakiʼaki ʼi te ʼofa’ pea ʼe ina fakamālohiʼi ia te tokalelei pea mo te logo tahi ʼi te kokelekasio. (Ef. 4:1-3) ʼE tokoni mai kia tatou ke tou fakalogo kia nātou ʼaē neʼe fakanofo e Sehova ki te gāue takitaki. (Hep. 13:17) ʼE ina uga ia tatou ke tou tali te ʼu tokoni fuli ʼo feiā mo te ʼu akonaki fuli pe ʼe lagi foaki mai kia tatou. (Pes. 141:5) Pea ʼe uga tatou e te agavaivai ke tou falala kia Sehova mokā tou fakahoko te ʼu pilivilesio ʼe lagi tou maʼu ʼi te kokelekasio. (1 Pet. 4:11) Ohage ko Tavite, ʼe tou fakamoʼoni ko te fua lelei ʼo te ʼu gāue fuli ʼe mole fakalogo ki he fealagia fakatagata, kae ʼe fakalogo ki te tapuakina ʼa te ʼAtua.—1 Sam. 17:37.
5 ʼI Muʼa ʼo Totatou ʼAtua: Ko te faʼahi ʼaē ʼe maʼuhiga tāfito, ko tatatou ‘agavaivai ʼi te lalo nima mālohi ʼa te ʼAtua.’ (1 Pet. 5:6) Kapau ʼe tou tau mo he ʼu faigataʼaʼia, ʼe lagi tou fakaʼamu ke hoko mai la te fīmālie ʼaē ka foaki mai anai e te Puleʼaga. Kae ʼaki te agavaivai ʼe tou faʼa kātaki, ʼo tou fakatalitali ke fakahoko e Sehova tana ʼu fakapapau ʼi te temi ʼaē kua ina fakakatofa kiai. (Skp. 5:7-11) Ohage pe ko te meʼa ʼaē neʼe hoko ki te tagata ʼaē neʼe nofo agatonu ko Sopo, ʼo feiā mo tatou ko te meʼa ʼaē ʼe maʼuhiga tāfito kia tatou, “ke hoko atu te tapuakina ʼo te huafa ʼo Sehova.”—Sopo 1:21.
6 Ko te polofeta ko Taniela ‘neʼe fia mālalo ʼi muʼa ʼo tona ʼAtua’ pea neʼe ʼofainaʼi e Sehova, pea neʼe lahi te ʼu pilivilesio neʼe ina maʼu. (Tan. 10:11, 12) ʼO feiā mo tatou, ʼofa pe ke tou mahino “ko te ikuʼaga ʼo te agavaivai pea mo te manavasiʼi kia Sehova, ʼe ko te ʼu koloā, mo te kolōlia, pea mo te maʼuli.”—Taag. 22:4.