Te ʼu Tokoni ʼo ʼUhiga Mo Te ʼAho Fakamanatu

ʼI te taʼu ʼaenī, ʼe fai anai te ʼAho Fakamanatu ʼi te Felianima ʼaho 24 ʼo Malesio. ʼE tonu ke vakaʼi te ʼu faʼahi ʼaenī e te kau tagata ʼāfea:

◼ ʼI takotou fakatuʼutuʼu te hola ʼo te fono, koutou tokaga ke feʼāveʼaki te vino pea mo te pane ʼi te kua ʼosi tō ʼo te laʼā.

◼ Ko te hahaʼi fuli, ʼo kau ai mo te tēhina ʼaē ka faiakonaki, ʼe tonu ke nātou ʼiloʼi pe ko te potu fea pea ko te hola fia ʼaē ka fai ai te Fakamanatu.

◼ ʼE tonu anai ke maʼu pea mo teuteuʼi fakatomuʼa te pane pea mo te vino.​—⁠Vakaʼi Te Tule Leʼo ʼo te ʼaho 15 ʼo Fepualio 2003, pasina 14 mo te 15.

◼ ʼE tonu anai ke fakatokatoka fakatomuʼa te ʼu pa, mo te ʼu ipu, mo te laupapa, pea mo te kie fāliki.

◼ ʼE tonu anai ke fakamaʼa fakatomuʼa te Fale ʼo Te Puleʼaga peʼe ko te koga meʼa ʼaē ka fai ai te fono.

◼ ʼE tonu anai ke filifili fakalelei te ʼu tēhina ʼaē ka nātou feʼāveʼaki te pane mo te vino, pea ke fakahā fakatomuʼa kiā nātou te meʼa ʼaē ʼe tonu ke nātou fai, pea ke natou teu maʼa.

◼ ʼE tonu anai ke fai he ʼu fakatuʼutuʼu moʼo ʼave te pane mo te vino ki te kau fakanofo ʼaē neʼe mole nātou lava ʼōmai ki te fono.

◼ Kapau neʼe fakatuʼutuʼu ke fakaʼaogaʼi te Fale ʼo Te Puleʼaga e he ʼu kokelekasio kehekehe, pea ʼe tonu anai ke felogoi lelei te ʼu kokelekasio ʼaia, naʼa hahaʼi fau te hūʼaga ki te Fale fono peʼe ko te ala, peʼe ko te ʼu taulaga motokā.