Te Polokalama Faka Famili—Ki Te ʼu Fono ʼo Te Kokelekasio
1 Kapau ko koutou ko he ʼu mātuʼa Kilisitiano, ʼe mahino ia ʼe koutou loto ke tuputupu ia te ʼofa ʼo takotou fānau kiā Sehova pea mo nātou tauhi kiā te ia, ke feala hanatou maʼu ia te maʼuli heʼegataʼa ʼi te mālama foʼou ʼaē neʼe fakapapauʼi mai e te ʼAtua. Koteā ʼaē ʼe tonu ke koutou fai moʼo tokoni kiā nātou ke nātou fakamuʼamuʼa ʼi tonatou maʼuli ia te tauhi ʼaē kiā Sehova? Ko te faʼahi ʼaē ʼe maʼuhiga tāfito, ko takotou tuku he faʼifaʼitaki lelei. (Taag. 20:7) Neʼe ʼui fēnei e te tuagaʼane ʼo ʼuhiga mo te faʼifaʼitaki ʼo tana faʼē ʼaē neʼe tauhi kiā Sehova: “Neʼe mole ʼi ai he fakaʼāpe lua peʼe tonu ke mātou ʼolo ki te ʼu fono peʼe kailoa.” Neʼe mole galo ʼi te tuagaʼane ia te faʼahi ʼaia.
2 ʼE mahino koa tokotou famili ki te maʼuhiga ʼo te ʼu fono? ʼE tou lotomālohi moʼo fai ʼo te finegalo ʼo te ʼAtua ʼuhi ko te ʼu akonaki ʼaē ʼe tou logo ʼi te ʼu fono ʼaia, pea mo tatatou fakatahi mo ʼotatou tēhina mo tuagaʼane. (Isa. 54:13; Loma 1:11, 12) Kae ko te fakatuʼutuʼu ʼuluaki ʼo te ʼu fono ʼaia ke tou fakavikivki kiā Sehova “ʼi te lotolotoiga ʼo te kaugamālie ʼaē ʼe fakatahitahi.” (Pes. 26:12) Ko te ʼu fono ʼe ko he ʼu temi faigamālie ʼaia moʼo fakahā totatou ʼofa ʼaē kiā Sehova pea mo tou tauhi kiā te ia.
3 “Koutou Tōkakaga Fakalelei”: Kapau ʼe tou loto fakafetaʼi ki te taputapu ʼo tatatou ʼu fono pea ʼe tou “tōkakaga fakalelei” anai ke ʼaua naʼa tou fakatōtō ʼi te ʼu fono moʼo fakahoko he tahi age meʼa ʼe mole faʼa maʼuhiga. (Ef. 5:15, 16; Hep. 10:24, 25) Ka koutou fai takotou polokalama faka famili, ʼe lagi lelei ke koutou tohi te ʼu ʼaho fono. Pea koutou vakaʼi ke ʼaua naʼa ʼi ai he meʼa ʼe ina fakalelu takotou ʼolo ki te ʼu fono, heʼe ko he faʼahi ʼe maʼuhiga ia ki tokotou famili.
4 ʼE lagi tou lotomālohi mokā tou lau neʼe lava tekeʼi e totatou ʼu tēhina te ʼu fihifihia ʼaē neʼe feala ai ke mole nātou kau ki te ʼu fono pea mo te ʼu fakatahi lalahi. Logola ʼe mole lahi feiā tokotou ʼu fihifihia, kae lagi ʼe koutou tau mo ni ʼu faigataʼaʼia. Ko Satana ʼe ina faigaʼi ke faigataʼa ʼaupito ki te hahaʼi ʼa te ʼAtua hanatou tauhi kiā Sehova. Kae ko takotou ʼu faiga mālohi ʼaē moʼo kau ki te ʼu fono ʼe tokagaʼi anai e takotou ʼu fānau. Kapau ʼe koutou fai feiā, ʼe koutou foaki anai kiā nātou ia te meʼa ʼofa fakalaumālie ʼe mole galo anai iā nātou.