Koteā ʼAē ʼe Tou Lava Fai Moʼo Tokoni?
1 Ka nātou logo ki he tuʼutāmaki neʼe hoko ʼi he fenua, ʼe tau fai te fehuʼi ʼaenī e te kau Fakamoʼoni ʼa Sehova “Koteā ʼaē ʼe mātou lava fai moʼo tokoni?” ʼI te fakamatala ʼo Gaue 11:27-30, ʼe talanoa ai ʼo ʼuhiga mo te kau Kilisitiano ʼo te ʼuluaki sēkulō ʼaē neʼe nātou foaki he ʼu meʼa ʼofa moʼo tokoni ki tonatou ʼu tēhina ʼi Sutea, neʼe nonofo ʼi te hoge.
2 ʼI totatou temi, ko te ʼu lao ʼo ʼuhiga mo tatatou kautahi, ʼe ina fakagafua ke fakaʼaogaʼi he falā moʼo tokoni ki te ʼu hahaʼi ʼaē neʼe felāveʼi mo he ʼu tuʼutāmaki, peʼe ko nātou ʼaē ʼe nonofo ʼi te faigataʼaʼia.
3 Ohage la, ʼi te taʼu ʼaenī kua ʼosi, tokolahi te ʼu tēhina neʼe nātou tokoni kiā nātou ʼaē neʼe tuʼutāmaki ʼi te hake ʼa te peau, ʼi te Potu Saute ʼo Asia. Neʼe leleiʼia ʼaupito te tokoni moʼoni ʼaia neʼe fai e te ʼu tēhina mo tuagaʼane ʼaki tonatou ʼu meʼa ʼofa. Kae kapau ʼe ʼi ai he ʼu meʼa ʼofa neʼe momoli tāfito ʼo ʼuhiga mo he faʼahiga tuʼutāmaki, ʼe lelei age anai ʼi ʼihi fenua ke fakaʼaogaʼi te ʼu meʼa ʼofa ʼaia ki te fakatuʼutuʼu ʼaē neʼe loto kiai ia ia ʼaē neʼe ina foaki te meʼa ʼofa, pea mo fai lolotoga te temi ʼaē ʼe faka tuʼakoi kiai, tatau aipe peʼe kua maʼu peʼe kailoa e te ʼu tēhina te tokoni ʼaē neʼe ʼaoga kiā nātou.
4 Koia ʼe kole atu ke koutou foaki ki te gāue faka malamanei, takotou ʼu meʼa ʼofa moʼo tokoni kiā nātou ʼaē ʼe faigataʼaʼia pea mo nātou ʼaē neʼe hoko ki ai he tuʼutāmaki. Ko te ʼu meʼa ʼofa ʼaia ʼe fakaʼaogaʼi ki te ʼu gāue ʼaē ʼe fai moʼo tokoni ki te ʼu tēhina mo tuagaʼane ʼaē ʼe faigataʼaʼia pea mo te teuteuʼi ʼo te meʼa kai fakalaumālie. Kapau ʼe ʼi ai he tahi ʼe ina fia foaki hana meʼa ʼofa moʼo tokoni kiā nātou ʼaē ʼe faigataʼaʼia, kae ʼe mole ina loto ke ʼai fakatahi mo te ʼu meʼa ʼofa ʼaē ʼe lagolago ki te gāue faka malamanei, ʼe tali anai tana meʼa ʼofa pea ʼe fakaʼaogaʼi anai mo kapau ʼe faigataʼaʼia ni ʼu tēhina mo tuagaʼane. Kae ʼe ko he meʼa lelei anai mo kapau ʼe feala ki te ʼu meʼa ʼofa ʼaia, ke fakaʼaogaʼi ʼi he potu pe ʼe feala ke ʼaoga kiai pea ke mole tuʼakoi tona faʼahiga fakaʼaogaʼi.
5 Ko te tupuʼaga tāfito ʼo tatatou foaki meʼa ʼofa ki te gāue faka malamanei, heʼe ko he faka fealagia ʼaia ke lahi te falā ʼaē ʼe fakaʼaogaʼi ki te ʼu gāue kehekehe ʼo te Puleʼaga, kae mole fakaʼaogaʼi pe ki te ʼu tuʼutāmaki ʼaē ʼe feala ke hoko. ʼE ʼalutahi te fakatuʼutuʼu ʼaia mo te manatu ʼaē ʼe tou maʼu iā Efeso 4:16 (MN ), ʼaē ʼe ʼui ai ke tou gāue fakatahi moʼo foaki te ʼu meʼa ʼaē ʼe ʼaoga “ki te tuputupu ʼo te sino, ke feala hona laga ʼo ia totonu ʼi te ʼofa.”